Собор Карельских святых

На велицей вечерни
Блажен муж: 1-й антифон. На Господи, воззвах: стихиры на 8: праздника 3, и святых 5. Стихиры святых, глас 6.
Подобен: Все отложше:
    Земля веселится и Небо радуется,/ святии отцы в земли Карельстей просиявшии,/ восхваляюще подвиги и труды ваша,/ душевное благомощие и ума чистоту,/ законом бо естества не победистеся./ О, соборе святый и полче Божественный,/ земли нашей утверждение вы есте воистину.
Восхвалим Андрея Первозваннаго/ и святаго равноапостольнаго Владимира,/ яко тех трудами в земли Русстей вера насадися,/ и доныне благодатию Божиею напаяется/ и плод сторичный приносит.
Благоверный княже Александре,/ князей русских похвало,/ воинов соблюдение,/ врагов побеждение,/ сирот и вдов заступниче!/ Приими ныне похвальное пение,/ еже во храмех Божиих совершают людие твои,/ почитающе память твою.
Евангельски Христа возлюбивше,/ преподобнии Зосимо, Савватие и Германе,/ мира отвратистеся,/ в непроходимыя же и пустынныя острова Соловецкия зашедше,/ всякия добродетели образу навыкосте,/ мудрой пчеле подобящеся,/ и приятелище изрядно Духу Святому бысте, премудрии.
Радуйся, пустыне, прежде безплодна и необитаема,/ послежде яко крин цветущая,/ взыграйте, горы Валаама и вся древа дубравная,/ хваляще с нами Сергия и Германа,/ вкупе же Арсения и Германа,/ отцы всехвальныя.
Приидите, празднолюбцы,/ воспоим дивнаго подвижника Церкве Русския,/ Александра Свирскаго,/ с праведными ученики его/ Афанасием, Игнатием, Дионисием и Корнилием,/ Леонидом, Макарием, Ферапонтом и Феодором,/ яко звезды бо возсияша на тверди церковней./ Тех молитвами, Христе Боже наш,/ православных веру утверди,/ яко Человеколюбец.
Преподобнии отцы Никифоре и Геннадие,/ Пахомие и Кирилле,/ Корнилие и Авраамие,/ вы слепым даете свет, болящим исцеление,/ милостиво приклоняющеся к приходящим с верою/ и просящим помощи вашея./ Мы же, заступники и предстатели вас обретше,/ с теплою молитвою к вам прибегаем.
Идеже бе хлад и мраз,/ идеже леса и дебри,/ тамо жизнь райская процвете/ от святых твоих, Господи,/ Авраамия и Антония, Афанасия и Варлаама,/ Геннадия и Германа,/ иже, оледеневшая сердца людская теплотою веры растопивше,/ плодоносна сия соделаша/ и ныне молятся о душах наших.
Слава, глас 8:
Ликуй, Фиваидо русская,/ красуйтеся пустыни и дебри Олонецкия,/ возрастившия святых и славных отцев множество,/ чудным житием всех наставляющих/ миру не прилеплятися,/ крест свой на рамена взяти/ и во след Христу шествовати.
И ныне, Богородичен, глас 6: Кто Тебе не ублажит, Пресвятая Дево:
Вход. Прокимен дне. И чтения три.
Пророчества Исаиина чтение (глава 60, ст. 1-5, 11-13):
Светися, светися, Иерусалиме,/ прииде бо твой свет, и слава Господня на тебе возсия./ Се, тма покрыет землю, и мрак на языки,/ на тебе же явится Господь, и слава Его на тебе узрится./ И пойдут царие светом твоим, и языцы светлостию твоею./ Возведи окрест очи твои и виждь собраная чада твоя:/ се, приидоша вси сынове твои издалеча, и дщери твоя на рамех возмутся./ Тогда узриши и возрадуешися,/ и убоишися и ужаснешися сердцем,/ яко приложится к тебе богатство морское и языков и людий./ И отверзутся врата твоя присно,/ день и нощь не затворятся,/ ввести к тебе силу язык и цари их ведомыя./ Языцы бо и царие, иже не поработают ти, погибнут,/ и языцы запустением запустеют./ И слава Ливанова к тебе приидет,/ кипарисом и певгом и кедром вкупе, прославити место святое Мое,/ и место ногу Моею прославлю.
Премудрости Иисуса, сына Сирахова, чтение (гл. 44, ст. 1-14):
Восхвалим убо мужи славны и отцы наша в бытии./ Многу славу созда Господь в них величием Своим от века./ Господствующе во царствиих своих/ и мужи, именити силою, советующе разумом своим,/ провещавшии во пророчествах;/ старейшины людий в советех/ и в разуме писания людий./ Премудрая словеса в наказании их,/ ищуще гласа мусикийска и поведающе повести во писаниих,/ мужи богатии, обдаровани крепостию,/ мирно живуще в жилищих своих./ Вси сии в родех прославлени быша,/ и во днех их похвала./ Суть от них иже оставиша имя, еже поведати хвалы./ И суть, ихже несть памяти, и погибоша, яко не сущии,/ и быша яко не бывша, и чада их по них./ Но сии мужие милостивии,/ ихже правды не забвены быша,/ с семенем их пребудет доброе наследие,/ изчадия их в заветех./ Остася семя их и чада их по них,/ до века пребудет семя их,/ и слава их не потребится./ Телеса их в мире погребена быша,/ а имена их живут в роды./ Премудрость их поведят людие,/ и похвалу их исповесть Церковь.
Премудрости Соломоновы чтение (гл. 3, ст. 1-9):
Праведных душы в руце Божией,/ и не прикоснется их мука./ Непщевани быша во очесех безумных умрети./ И вменися озлобление исход их./ И еже от нас шествие - сокрушение, они же суть в мире./ Ибо пред лицем человеческим аще и муку приимут,/ упование их безсмертия исполнено./ И вмале наказани бывше,/ великими благодетельствованы будут,/ яко Бог искуси я и обрете их достойны Себе./ Яко злато в горниле, искуси их/ и, яко всеплодие жертвенное, прият я,/ и во время посещения их возсияют/ и, яко искры по стеблию, потекут./ Судят языком и обладают людьми,/ и воцарится Господь в них во веки./ Надеющиися Нань уразумеют истину,/ и вернии в любви пребудут Ему./ Яко благодать и милость в преподобных Его/ и посещение во избранных Его.
На литии стихира храма и святых, глас 2:
Радуйся, карельская похвало,/ священномучениче Николае,/ усердно Церкви Христовой послуживый/ и, угрозы безбожник нивочтоже вменив,/ за веру Христову смерть приемый./ О, новомучениче всеблаженнейший,/ моли милостиваго Бога/ спастися душам нашим.
Радуйся, светильниче северныя страны нашея,/ праведный отроче Артемие,/ ты, ангельский нрав и душу непорочную имея,/ благодетельными чудотворении утешал еси/ всех, молящихся с любовию и благодарственно восписующих тебе:/ радуйся, предстателю наш праведный.
Радуйтеся, архипастырие достославнии,/ Филиппе и Феофане, угодницы Христови,/ чистоты Церкве блюстителие вернии,/ богословы изряднейшии./ О, архипастырие достославнии,/ Божества Триипостаснаго вернии служителие,/ молите спастися душам нашим.
Слава, глас тойже:
О, Всесильне Христе Царю!/ Явивый земли нашей сонм святых:/ преподобных и праведных,/ святителей и чудотворцев,/ пастырей и архипастырей,/ мучеников и новомучеников./ Тех молитвами помилуй и спаси душы наша.
И ныне, Богородичен, глас тойже: О, чудесе новаго, всех древних чудес:
Молитвы на литии:
Спаси, Боже, люди Твоя и благослови достояние Твое, посети мир Твой милостию и щедротами, возвыси рог христиан православных и низпосли на ны милости Твоя богатыя: молитвами Всепречистыя Владычицы нашея Богородицы и Приснодевы Марии: силою Честнаго и Животворящаго Креста: предстательствы честных Небесных Сил безплотных: честнаго славнаго Пророка, Предтечи и Крестителя Иоанна: святых славных и всехвальных  апостол Петра и Павла, святаго апостола Андрея Первозваннаго и прочих всех святых апостол: иже во святых отец наших и вселенских великих учителей и святителей, Василия Великаго, Григория Богослова и Иоанна Златоустаго: иже во святых отец наших святителей Николая, Мир Ликийских, Чудотворца и Спиридона Тримифунтскаго Чудотворца: святых равноапостольных Мефодия и Кирилла, учителей Словенских, святых равноапостольных великаго князя Владимира и великия княгини Ольги: иже во святых отец наших, святителя Михаила, перваго митрополита Киевскаго, первосвятителей Московских и всея Руси, Петра, Алексия, Ионы, Макария, Филиппа, Иова, Ермогена и Тихона, святых, в земли Карельстей просиявших: святаго благовернаго великаго князя Александра Невскаго, святителя Феофана, Затворника Вышенскаго, Геннадия, архиепископа Новгородскаго; святых чудотворцев Авраамия Ростовскаго и Артемия Веркольскаго; священномучеников Вениамина, митрополита Петроградскаго, Дамиана архиепископа Курскаго и Никодима епископа Белгородскаго, священномучеников Николая и Василия пресвитеров; преподобных и богоносных отец наших: Авраамия Кенскаго и Елеазара Анзерскаго, Антония Римлянина и Евфросина Синозерскаго, Адриана Ондрусовскаго и Кассиана Комельскаго, Александра Свирскаго и Александра Ошевенскаго, Арсения Коневскаго и Никодима Кожеезерскаго, Вассиана и Ионы Пертоминских, Афанасия Сяндемскаго и Афанасия Наволоцкаго, Варлаама Керетскаго и Варлаама Пинежскаго, Геннадия и Никифора Важеозерских, Германа Белоезерскаго и Диодора Юрьегорскаго, Сергия и Германа Валаамских, Евфимия и Антония Карельских, Зосимы, Савватия, Германа Соловецких, Ионы Яшезерскаго и Лонгина Яренгскаго, Сергия и Варвары Островских, Макария Высокоезерскаго и Лазаря Муромскаго, Корнилия Палеостровскаго, Трифона Печенгскаго и Феодорита Кольскаго, Пахомия Кенскаго и Кассиана Соломенскаго, Корнилия и Ферапонта Островских, святаго блаженнаго Фаддея Петрозаводскаго, святаго праведнаго отца нашего Иоанна Кронштадтскаго и всех святых, в земли Карельстей просиявших, ихже и память ныне совершаем, святых праведных Богоотец Иоакима и Анны и всех святых, молим Тя, Многомилостиве Господи, услыши нас, грешных, молящихся Тебе, и помилуй нас.
Владыко Многомилостиве, Господи, Иисусе Христе Боже наш, молитвами Всепречистыя Владычицы нашея Богородицы и Приснодевы Марии, силою Честнаго и Животворящаго Креста, предстательствы честных Небесных Сил безплотных, честнаго славнаго Пророка, Предтечи и Крестителя Иоанна, святых славных и всехвальных апостол, святых славных и добропобедных мучеников, преподобных и богоносных отец наших и всех святых, в земли Карельстей просиявших, ихже и память ныне совершаем, святых праведных Богоотец Иоакима и Анны и всех святых Твоих, благоприятну сотвори молитву нашу, даруй нам оставление прегрешений наших, покрый нас кровом крилу Твоею, отжени от нас всякаго врага и супостата, умири нашу жизнь, Господи, помилуй нас и мир Твой, и спаси души наша, яко Благ и Человеколюбец.
На стиховне стихиры, глас 2:
Святых память велие торжество явися земли нашея:/ сии бо воистину делы и словесы и многовидным житием/ и от Бога дарованием соделашася святи./ И ныне, прославльшему их Христу предстояще,/ молятся о нас прилежно,/ любовию совершающих светлое их торжество.
Стих: Честна пред Господем/ смерть преподобных Его.
Преподобнии отцы всечестнии,/ Лазарю и Афанасие,/ Ионо и Вассиане,/ вы, на колесницу добродетелей возшедше,/ к Богу востекосте,/ победныя почести приемлюще./ Темже блажим вас, прехвальнии.
Стих: Блажен муж, бояйся Господа,/ в заповедех Его восхощет зело.
Ликом постническим сочетавшеся,/ преподобнии Макарие и Лонгине,/ ныне во обителех Небесных живете,/ веселящеся, идеже ликуют Ангели./ Темже поминайте любовию блажащих вас на земли/ и святое ваше творящих празднество.
Слава, глас 3:
Преподобнии отцы, мира красоту и сладость временную возненавидевше/ и иноческое житие возлюбивше,/ Ангелом собеседницы бысте/ и светильницы многосветлии земли нашей,/ чудесами, яко звезды сияете,/ всех нас поминайте, совершающих священную память вашу,/ мы бо чада ваша/ и вас на помощь призываем,/ просяще даровати нам мир и велию милость.
И ныне, Богородичен, глас тойже: Творец и Избавитель мой, Пречистая:
Тропарь, глас 8:
Якоже плод красный Твоего спасительнаго сеяния,/ земля Карельская приносит Ти, Господи,/ вся святыя в той просиявшия./ Тех молитвами в мире глубоце,/ Церковь и страну нашу Богородицею соблюди Многомилостиве.
На утрени
Величание:
Величаем вас,/ вси святии, в земли Карельстей просиявшии,/ и чтим святую память вашу,/ вы бо молите за нас/ Христа Бога нашего.
Таже седален, глас 3:
Днесь просия ваша память, святии, якоже пресветлая заря над землею нашею тьму безбожия и нечестия отгоняющи и сердца верных просвещающи, во еже пети Христу: Иисусе, Спасе наш, слава Тебе.
Слава, глас тойже:
Воспоим, вернии, во благознаменитый день святых наших, предварим лице Христа во исповедании и во псалмех воскликнем Ему: призри, Господи, с небесе и виждь, и посети виноград сей, и утверди и, егоже насади десница Твоя.
И ныне, Богородичен:
Ты еси Похвала верных, Безневестная, Ты Предстательница и Прибежище христиан, Стена и Пристанище: к Сыну бо Твоему мольбы прилежныя возносиши, Всенепорочная, и спасаеши от бед верою и любовию Богородицу Чистую Тебе славящия.
По 50-м псалме стихира, глас 6:
Иже на земли Ангели/ и на Небеси человецы Божии,/ мира благое украшение/ и Отечества нашего похвалу,/ всех святых земли Карельския почтим,/ насаждени бо в дому Господни,/ процветоша праведно/ и, яко кедри в пустыни, умножиша стадо Христово словесных овец/ в преподобии и правде.
Канон, глас 2.
Песнь 1
    Ирмос: Грядите, людие,/ поим песнь Христу Богу,/ раздельшему море и наставльшему люди,/ яже изведе из работы египетская,/ яко прославися.
    Припев: Вси святии земли Карельския, молите Бога о нас.
    Светильников светлых множество на свещнице церковней яви Господь: святителей, мучеников, преподобных и праведных, иже житием своим землю Олонецкую украсиша.
Огнь Божественный возсия и оживотвори зде пустыню, прежде безплодну и необитаему, последи же подвиги преподобных Сергия и Германа, аки крин, процветшую и инок множество взрастившую.
    Благодаряще, поим песнь Христу, пославшему нам Зосиму, Савватия, Германа Соловецких чудотворцев, иже, мира отвратившеся, в непроходимыя и пустыя острови Соловецкия вселишася и подвиги своими Превечному Богу угодиша.
Добропобеднии Антоние Сийский, Афанасие Наволоцкий, Варлааме Пинежский! Вы, стрел разжженных лукаваго и огня, в лице вам дышущаго, не убоявшеся, Христа проповедасте и на страдание мужественно потекосте.  Темже ныне со святыми водворяетеся.
Богородичен: Воспоим песнь Пречистей Богородице Деве, славяще рождество Христа Бога непостижимое и вопиюще: помилуй стадо Твое, едина Всепетая.
Песнь 3
    Ирмос: На камени мя веры утвердив,/ разширил еси уста моя на враги моя;/ возвесели бо ся дух мой, внегда пети:/ несть свят, якоже Бог наш,/ и несть праведен паче Тебе, Господи.
    Многомилостиве Господи, сохрани землю Олонецкую и даждь ей быти  ненаветней от врагов молитвами святых Твоих, в ней подвизавшихся.
    Утверди нас в Тебе, Господи, молитвами собеседник Твоих Александра Свирскаго и Елисея Сумскаго, ихже искуси, обрете достойны Себе и чудесы прослави.
    Киими песньми восхвалим угодников Божиих, Лазаря и Афанасия Муромских, обителию святою пустыню украсивших и светом веры Христовы лопарей просветивших?
Смирением, яко ризою, облеклся еси, священномучениче Николае, егда клеветницы без вины на смерть тя осудиша. Темже величаем страдания твоя и славословим кончину твою.    
Богородичен: Ангел Святейшая, Богородице Дево, под Твой кров притекаем, Владычице, людие Твои, Помощница буди нам, рабом Твоим, и спасения Подательница.
Песнь 4
    Ирмос: Пришел еси от Девы, не ходатай, ни ангел,/ но Сам, Господи, воплощся,/ и спасл еси всего мя человека:/ тем зову Ти:/ слава силе Твоей, Господи.
    Радостно едиными усты и сердцем величаем вас, святии земли Олонецкия, и чтим святую память вашу, вы бо молите о нас Христа Бога нашего.
    Единонравно на земли поживше и земная мудрования презревше, ум в горняя вперили есте, богомудрии Геннадие и Никифоре Важеозерстии, отцы всехвальнии.
    Духом провидя славу земли Северныя, Антоние Римлянине достославне, от ветхаго Рима на камени в тую преплыл еси и веру правую в ней утвердил еси.
Незлобив, праведен и милостив быв, Артемие Веркольский, блаженства Небеснаго в земли кротких сподобился еси, идеже вкушаеши вечнаго утешения.
Богородичен: Свет Божественный рождши, явилася еси, Богородице Дево, Заступница  усердная рода христианскаго.
Песнь 5
    Ирмос: Света Подателю и веков Творче, Господи,/ во свете Твоих повелений настави нас:/ разве бо Тебе иного Бога не знаем.
Тихое и доброе пристанище яви нам Господь, в земли Олонецтей Божественный Свой виноград насадив, из коего вино чудное источи, спасительным и духовным питием нас напояя.
    Явил еси, Христе Боже, угодники Твоя, Авраамия и Корнилия Палеостровских, ихже терпеливно на добрых пажитех веры возрастил еси.
    Преподобнии отцы наши, Ионо Яшезерский и Ионо Клименецкий, вы слезными потоки души напоили есте и непорочнаго жития духовное благомощие явили есте, богомудрии.
Радуйся, преподобне отче Макарие Высокоезерский, ты, яко мудрая пчела, мед духовный собирая, сосуд избранный явился еси. Темже достойно тя ублажаем.    
Богородичен: Богородице Дево, Ты еси нам святое ограждение, источник исцелений и совершенное спасение душ наших.
Песнь 6
    Ирмос: В бездне греховней валяяся,/ неизследую милосердия Твоего призываю бездну:/ от тли, Боже,  мя возведи.
    Воспеваем вас, вси святии земли Олонецкия, яко противу начал и властей злобы поднебесныя дерзновенно ополчистеся и тех коварства любовию и смирением победисте.
    Звезды пресветлыя явистеся, вернии раби Господни: Пахомие Кенский, Александре Ошевенский, Кириаче Каргопольский. Вы бо, узким путем шествовавше, яко постницы, в алчбе и жажде временное житие проводисте; яко послушницы, Христово смирение стяжасте; и яко молитвенницы, блаженство плача о гресех познасте.
    Трудницы Господни бысте, преподобнии отцы наши, Афанасие Сяндемский, Елеазаре Анзерский, образ злострадания и терпения показавшии, страстей прилоги и козни вражия попалившии и поругания яко врачество чистительное испившии.
Врага рода человеческаго именем Христовым отгнав, преподобне Трифоне Печенгский, языческая жертвы упразднил еси и жертву хвалы на месте сем Богу принесл еси.
Богородичен: Исцелений неоскудное Сокровище еси нам, Богородице Дево, молим Тя, Владычице, даруй нам душ очищение и от бед свобождение.
Кондак, глас 3:
Днесь лик святых, в земли Карельстей Богу угодивших,/ предстоит в церкви и невидимо за ны молится Богу./ Ангели с ним славословят/ и вси святии Церкве Русския ему спразднуют,/ о нас моляще купно Превечнаго Бога.
Песнь 7
    Ирмос: Божия снизхождения/ огнь устыдеся, в Вавилоне иногда,/ сего ради отроцы в пещи, радованною ногою,/ яко в цветнице, ликующе, пояху:/ благословен еси, Боже отец наших.
    Храм Бога жива суще, святии отцы наши, любве Его ради живота своего не пощадили есте, темже, миродержателя тьмы века сего победивше, вся сети его, яко паучину, разорили есте, поюще: благословен еси, Боже отец наших.
Возсияли есте в мире, яко светильницы светлии, преподобнии отцы наши, Адриане Ондрусовский и Киприане Сторожевский, неусыпающую скорбь о гресех стяжавшии и слезы многия о них пролившии. Темже, послушанию и смирению навыкше, Христу Спасителю взывали есте: благословен еси, Боже отец наших.
Обители Духа Пресвятаго явилися есте, преподобнии отцы наши, Авраамие и Никодиме Кожеозерстии, Евфимие и Феликсе Карельстии, многими скорбьми в Царство Небесное вшедшии, идеже ныне воспеваете: благословен еси, Боже отец наших.
Чудотворче Кронштадтский Иоанне! Ты молитвою твоею падшия возставлял еси, недужныя исцелял еси. Ныне же, во славе Небесней пребывая, не остави нас, почитающих память твою и верою зовущих: благословен еси, Боже отец наших.
Богородичен: Заре Светоносная и Сене Небесная, Богородице Дево, Свет неизреченно рождшая, просвети, Владычице, и наша души, грехи омраченныя.
Песнь 8
Ирмос: Победители мучителя и пламене/ благодатию Твоею бывше,/ заповедем Твоим зело прилежаще,/ отроцы вопияху:/ благословите, вся дела Господня, Господа.
Премирныя жизни образ миру явившии, избрание свое подвиги благочестия оправдавшии и правый путь к Небеси нам показавшии, преподобнии отцы наши, молите Бога о нас.
Основание непоколебимое Церкве нашея явилися есте, отцы преподобнии Кирилле Челмогорский, Арсение Коневский, Диодоре Юрьегорский, благое иго Христово люботрудно понесшии, Христа ради всеконечно себе отвергшиися и в терпении души ваша стяжавшии.
Широкий путь греха презревше, путем тесным и прискорбным до конца дний шествовали есте, преподобнии отцы наши Варлааме Керетский, Евфросине Курженский, Кассиане Соломенский, и, смирением плоть духу поработивше, Небесных Обителей достигли есте.
О, пастырю блаженне Феофане! Ты, в тайных подвизех течение совершая, яко светильник пресветлый людем явился еси и чада духовная добре воспитал еси, лучами словес твоих путь ко спасению указуя.
Богородичен: Угаси в нас пламень греховный, Богородице Дево, и волю Сына Твоего научи творити нас, Едина Чистая и Благословенная.
Песнь 9
    Ирмос: От Бога Бога Слова,/ неизреченною мудростию, пришедшаго обновити Адама,/ ядию в тление падшаго люте,/ от Святыя Девы неизреченно воплотившагося нас ради,/ вернии, единомудренно песньми величаем.
    Песньми духовными прославляем вас, преподобнии! Вы бо, вся хотения Господня исполнивше и многия скорби в мире претерпевше, на Небеса со славою возшли есте, и тамо ныне с лики ангельскими Бога величаете.
    Преподобнии отцы наши Елеазаре и Назарие Олонецтии! Вы, единомудренни бывше и всякое плотское пристрастие вседушно отвергше, едино на потребу подвиги велиими взыскали есте.
    Святаго блаженнаго Фаддея Петрозаводскаго да ублажим, той бо отвержением себе Богу последова и подвигом юродства разум Христов стяжа. Сего ради, многая страдания претерпев, в покой Царствия Небеснаго вниде.
О, велицыи сродницы наши, именованнии и безыменнии, явленнии и неявленнии, Небеснаго Сиона достигшии и славу многу от Бога приимшии! Утешение нам, в скорби сущим, испросите, веру правую в нас укрепите и люди расточенныя соберите, песнь благодарения, яко дар любве, от нас приемлюще.
Богородичен: Богородице Дево, Надеждо ненадежных и нечаянная Радосте наша! Величаем Тя, Ты бо еси верных Заступление и душ наших Спасение.
Светилен, глас 1:
Радуйся, славная земле Карельская, слава бо святых твоих в тебе возсия. Ликуйте ныне и веселитеся, благочестивии людие, яко сонм велий ходатаев Небесных имате пред Богом нашим.
На хвалитех стихиры, глас 4:
Преподобнии отцы наши,/ вы, яко цвети духовнии земли Карельския/ и сокровище неистощимое, нам явилися есте./ Сего ради прославляем прославльшаго вас Господа,/ Егоже молим даровати душам нашим/ мир и велию милость.
Взыграйте днесь, горы и холми,/ восплещите, море и езера водная,/ срадуйтеся и сликовствуйте нам, вернии людие,/ в светоносный день памяти преподобных Сергия и Германа,/ на горах Валаамских,/ яко финиксы, процветших.
Приидите, празнолюбцы и постников сословие,/ верою и любовию сошедшеся,/ постники дивныя, Зосиму и Савватия, почтим./ О, всеблаженнии, преподобным сожителие и ангелом собеседницы,/ о нас молитеся ко Господу,/ помиловатися душам нашим.
Слава, глас 6:
Преподобнии отцы земли нашея,/ вы, в законе Господни день и ночь поучавшеся,/ яко древеса, насажденнии при исходищих вод бысте/ и плод страданий в терпении Христу принесосте./ Темже, дерзновение к Нему имуще,/ испросите нам очищение грехов/ и велию милость.
И ныне, глас тойже: Богородице, Ты еси Лоза истинная:
Молитва
О, преславнии и всехвальнии угодницы Божии, вси святии в земли Карельстей просиявшии! К вам, яко теплым ходатаем и предстателем нашим с молитвою смиренно прибегаем: умолите Милостиваго Бога, да дарует нам тихое и безмятежное житие в веце сем, да избавит нас от враг видимых и невидимых, от искушений и напастей, от соблазнов лукаваго и всякаго зла. На Страшнем же Суде Своем сподобит нас деснаго стояния и наследники Царствия Небеснаго сотворит, идеже купно с вами прославим Пречестное и Великолепое имя Отца и Сына и Святаго Духа, ныне и присно и во веки веков. Аминь.
                                      

Кондак 1*

Избра́нный уго́дниче Христо́в, сла́вный подви́жниче, преподобному́чениче Евфроси́не, прими́ похва́льное пе́ние, тебе́ от нас с любо́вию  приноси́мое и, предстоя́ на Небеси́ Престо́лу Пресвяты́я Тро́ицы, моли́ о спасе́нии всех нас, с ве́рою зову́щих ти:

Ра́дуйся, преподобному́чениче Евфроси́не, пустыннолю́бче и те́плый о нас моли́твенниче.

Икос 1

Равноа́нгельскаго жития́ взыску́я, до́ма роди́тельскаго и всего́ мирска́го любве́ ра́ди Бо́жия удали́вся, блаже́нне, Христу́ после́довал еси́, во оби́тель Валаа́мскую всели́лся еси́ и та́мо до́бре подвиза́лся еси́, рабо́тая Го́сподеви день и нощь труда́ми, поста́ми и моли́твами. Мы же, по́двиги твоя́ зря́ще, со благогове́нием пое́м ти:

Ра́дуйся, пусты́ннаго жития́ ревни́телю;

Ра́дуйся, пресве́тлое слепы́м прозре́ние;

Ра́дуйся, боголю́бия учи́телю;

Ра́дуйся, земли́ Устюже́нския украше́ние;

Ра́дуйся, всем прибега́ющим помога́яй;

Ра́дуйся,  свои́м оте́ческим заступле́нием не оставля́яй;

Ра́дуйся, подви́жников пресве́тлая похвало́,

Ра́дуйся, му́чеников сла́во;

Ра́дуйся, преподобному́чениче Евфроси́не, пустыннолю́бче и те́плый о нас моли́твенниче.

Кондак 2

Ви́дя тя Госпо́дь сосу́д избра́н, прозре́в тя побо́рника ве́ры в гряду́щие времена́ тя́жкая для земли́ Ру́сской, Влады́ка всех тя к бу́дущему вели́кому служе́нию в Вели́ком Новогра́де уготовля́л еси́. Ты же, в доброде́телях возраста́я, с любо́вию воспева́л еси́ Ему́: Аллилу́иа. 

Икос 2

Ра́зум благи́й стяжа́в, моли́твеннаго уедине́ния ища́, бежа́л еси́ собла́знов многолю́днаго гра́да в весь Доло́сскую, да́ в простоте́ и тишине́ богоуго́дно поживе́ши и чтеце́м во хра́ме Бо́гу послу́жиши. Мы же, зря́ще тя не о земны́х веще́х, но о небе́снем непреста́нно помы́сляюща, глаго́лем ти си́це:

Ра́дуйся, Бо́га па́че всех красо́т ми́ра сего́ возлюби́вый;

Ра́дуйся, веле́нием Бо́жиим в ве́си Доло́сстей труди́выйся;

Ра́дуйся, Бо́гу угоди́вый;

Ра́дуйся, пре́лестям су́етнаго ми́ра  не покори́выйся;

Ра́дуйся,  жития́ по́стническаго вожделе́вый;

Ра́дуйся, нище́ту ду́ха усво́ивый;

Ра́дуйся, на Го́спода упова́ние  вы́ну име́вый;

Ра́дуйся, Ца́рствия Небе́снаго сподо́бивыйся;

Ра́дуйся, преподобному́чениче Евфроси́не, пустыннолю́бче и те́плый о нас моли́твенниче.

Кондак 3

Си́ла Бо́жия осени́ тя, егда́ житию́ преподо́бных отце́в ревну́я, по́двигов и́ноческаго по́прища вожделева́я, во оби́тель Ти́хвинскую стопы́ своя́ напра́вил еси́, иде́же и по́стриг прия́т. Научи́ и нас еди́ному Бо́гу служи́ти, непреста́нно взыва́я Ему́: Аллилу́иа.

Икос 3

Име́яй вы́ну в уме́ свое́м Го́спода и мы́сль ка́ко Ему́ угоди́ти, посто́м, смире́нным игу́мену и бра́тии послуша́нием, усе́рдными  труда́ми с любо́вию Бо́гу служи́л еси́ в простоте́ серде́чней. Мы же, по́двигам твои́м дивя́щеся, ублажа́ем тя та́ко:

Ра́дуйся, на крыле́х моли́твы к Бо́гу возлете́вый;

Ра́дуйся, ве́тхаго челове́ка с себя́ совле́кий;

Ра́дуйся, непреста́нно свою́ земну́ю кончи́ну пред очи́ма име́вый;

Ра́дуйся, обе́ты целому́дрия, послуша́ния и нищеты́ испо́лнивый;

Ра́дуйся, чте́нием Сло́ва Бо́жия ум на ка́мени ве́ры утверди́вый;

Ра́дуйся, от Бо́га дар прозорли́вости прия́вый;

Ра́дуйся, стра́сти укроти́вый;

Ра́дуйся, сла́дость смире́ния позна́вый;

Ра́дуйся, преподобному́чениче Евфроси́не, пустыннолю́бче и те́плый о нас моли́твенниче.

Кондак 4

Бу́ри грехо́вныя тебе́ не потопи́ша, пресла́вне о́тче Евфроси́не, все житие́ твое́ служе́нию Бо́гу посвяти́л еси́, себе́ в храм Бо́жий угото́вал еси́. Та́може благослови́ Христо́с устро́ити святу́ю оби́тель, иде́же ты непреста́нно моля́ся Го́споду, взыва́л еси́: Аллилу́иа.

Икос 4

Слы́шав о суро́вом пусты́нническом житии́, возжела́л еси́ уйти́ в пусты́ню спаси́тельную, и,  игу́мена благослове́ние получи́в,  из Ти́хвинския оби́тели в ме́сто пусты́нное прите́кл еси́, руко́ю Госпо́днею направля́ем, и зде, во бла́тех непроходи́мых всели́лся еси́, соверша́я по́стническия труды́ твоя́, по сих же и страда́ния Христа́ ра́ди прия́л еси́. Сего́ ра́ди велича́ем тя си́це:

Ра́дуйся, безмо́лвия люби́телю;

Ра́дуйся, Бо́гом да́нный покрови́телю;

Ра́дуйся, посто́м плоть ду́ху покори́вый;

Ра́дуйся,  бде́нными моли́твами горды́ню сокруши́вый;

Ра́дуйся, тво́рче сете́й рыба́цких, иску́сно бе́гающий сете́й лука́ваго;

Ра́дуйся, ископа́вый пеще́ру и пруд в пусты́ни, нарече́нной Ста́рая.

Ра́дуйся, у бре́га е́зера Сини́чья оби́тель основа́вый;

Ра́дуйся, в любви́ и кро́тости Христу́ подража́вый;

Ра́дуйся, преподобному́чениче Евфроси́не, пустыннолю́бче и те́плый о нас моли́твенниче.

Кондак 5

Боготе́чной звезде́ среди́ блат и дрему́чих лесо́в подо́бна была́ еси́ пусты́ня Синозе́рская, преподо́бне, егда́ ру́це твои́ и бра́тий твои́х сотвори́ша в ней храм Бо́жий, Благове́щения Пресвяты́я Богоро́дицы имену́емый. И вси приходя́щии во оби́тель сию́ от тебе́, я́ко от исто́чника оби́льнаго, почерпа́ху наставле́ния спаси́тельная, ра́зум бо духо́вен име́л еси́, непреста́нно ко Го́споду взыва́я: Аллилу́иа.

Икос 5

Ви́дяще лю́ди свято́е житие́ твое́, прихожда́ху к тебе́, да спаси́тельныя глаго́лы услы́шат. Ты же, до́брый па́стырю, любо́вию свое́ю и моли́твами слове́сное ста́до собра́л еси́. «Го́споди, при́зри на ме́сто сие́ и благослови́ его́», – к Бо́гу взыва́л еси, преподо́бне, в труде́х непреста́нных пребыва́я; мы же, в ле́ности и во гресе́х все житие́ ижди́вшии, восхваля́юще любо́вь твою́ ко Го́споду, вопие́м ти:

Ра́дуйся, преподо́бных Гу́рия и Филаре́та соприча́стниче;

Ра́дуйся, оби́тели Синозе́рския сла́во и удобре́ние;

Ра́дуйся,  во гресе́х пребыва́ющих Бо́жий печа́льниче,

Ра́дуйся, сил небе́сных хвале́ние;

Ра́дуйся, убе́жище мно́гим  дарова́вый;

Ра́дуйся, любо́вию Христо́вою  хла́дныя сердца́  согре́вый;

Ра́дуйся,  прило́ги вра́жия попра́вый;

Ра́дуйся, ду́шу твою́ храм Свята́го Ду́ха соде́лавый;

Ра́дуйся, преподобному́чениче Евфроси́не, пустыннолю́бче и те́плый о нас моли́твенниче.

Кондак 6

Пропове́дник Бо́га и́стиннаго яви́лся еси́, преподобному́чениче Евфроси́не,  егда́ в годи́ну сму́тную супоста́ты злы́я покры́ша зе́млю Ру́сскую; на Голго́фу свою́ смире́нно взоше́л еси́, воспева́я  Спаси́телю всех: Аллилу́иа.

Икос 6

Возсия́л еси́ па́че со́лнца, егда́, прозре́в  кончи́ну твою́ и истоща́ние оби́тели твоея́, ве́рным Бо́гови был еси до сме́рти, па́мятствуя, яко прише́л еси́ сю́ду умре́ти Христа́ ра́ди, оба́че под угро́зою ги́бели от ра́тных супоста́т свята́го ме́ста пусты́ннаго не оста́вил еси. Когда́ прии́дет брань, тогда́ и ну́жно яви́ти по́двиг му́жества, – и́нока Ио́ну бежа́ти мы́слившаго увещева́л еси ты. Мы же, неустраши́мость ду́ха твоего́ зря́ще,  воспева́ем тя в пе́снех таковы́х:

Ра́дуйся, прозорли́вче пресла́вный;

Ра́дуйся, Ду́ха Свята́го кре́посте необори́мая;

Ра́дуйся, засту́пниче, нам Бо́гом да́нный;

Ра́дуйся, моли́твы свеще́ неугаси́мая;

Ра́дуйся, малоду́шных ободре́ние;

Радуйся, от скорбе́й ско́рое  избавле́ние;

Ра́дуйся, до́брый ко́рмчий, на путь и́стины наставля́яй;

Ра́дуйся, злы́я по́мыслы на́ша искореня́яй;

Ра́дуйся, преподобному́чениче Евфроси́не, пустыннолю́бче и те́плый о нас моли́твенниче.

Кондак 7

Хотя́ обе́ты свои́ испо́лнити и ра́ди Христа́ в оби́тели умре́ти, ме́чное посече́ние от руки́ разбо́йническия смире́нно прия́л еси́, нас любле́нию Бо́га поуча́ющ. Мы же, си́лу Бо́жию, в тебе́ явле́нную, зря́ще, пое́м Влады́ке всех: Аллилу́ия.

Икос 7

Но́ваго му́ченика яви́ тя нам Госпо́дь, свя́те Евфроси́не, егда́ со преподо́бным Ио́ною у Креста́ сре́тив супоста́ты, мече́м их усече́н был еси́. Та́може честну́ю главу́ твою́ злый враг раздроби́. Та́ко преда́л еси́ ду́шу свою́ в ру́це Го́сподеви. Мы же му́ченичество твое́ почита́юще, тя похвала́ми ублажа́ем  си́ми:

Ра́дуйся, пребыва́я те́лом на земли́, мы́слями к го́рнему возлете́вый;

Ра́дуйся, вре́меннаго стра́ха ра́ди любве́ Бо́жией не устраши́выйся;

Ра́дуйся, му́жественне Гефсима́нию свою́ претерпе́вый;

Ра́дуйся, вы́ну славосло́вити Бо́га внутрь се́рдца научи́выйся;

Ра́дуйся, вслед Христу́ смире́нно на Голго́фу свою́ восше́дый;

Ра́дуйся, и́мене Госпо́дня ра́ди пострада́вый;

Ра́дуйся, си́лою Бо́жиею одержа́вый незри́мую побе́ду;

Ра́дуйся, от Бо́га вене́ц му́ченический прия́вый;

Ра́дуйся, преподобному́чениче Евфроси́не, пустыннолю́бче и те́плый о нас моли́твенниче.

Кондак 8

Стра́нником на земли́ пожи́л еси́, о часе́ кончи́ны твое́я непреста́нно помышля́я, егда́ же смерть встре́тил еси́, то и тогда́ моли́твы Гос́подеви возсыла́я, с любо́вию пел еси Ему́: Аллилу́ия.

Икос 8

Вси лю́дие рыда́я кончи́не па́стыря, стеко́шася ко гро́бу твоему́, собо́рне пе́вше и погребо́ша святы́я мо́щи твоя́ в наро́читом ме́сте оби́тели, ю же основа́л еси́, преподо́бне. Ны́не же в небе́сных селе́ниях пребыва́я, не оста́ви моли́твами твои́ми нас,  вопию́щих ти:

Ра́дуйся, во́ли Бо́жиия исполни́телем бы́ти вожделе́вый;

Ра́дуйся, му́жески к му́ке устреми́выйся;

Ра́дуйся, ме́чное усече́ние любве́ ра́ди ко Го́споду претерпе́вый;

Ра́дуйся, пе́рвым христиа́нским му́ченикам уподо́бивыйся;

Ра́дуйся, заблужда́ющим до́брое вразумле́ние;

Ра́дуйся, бе́дствующим благо́е и ско́рое вспоможе́ние;

Ра́дуйся, я́ко по́мощь и заступле́ния твоя́ и по сме́рти не оскудева́ют;

Ра́дуйся, я́ко твои́ми моли́твами злы́я лю́бящими быва́ют;

Ра́дуйся, преподобному́чениче Евфроси́не, пустыннолю́бче и те́плый о нас моли́твенниче.

Кондак 9

Вся а́нгельская во́инства удиви́шася свято́му житию́ и во́льным страда́ниям твои́м, преподобному́чениче Евфроси́не. Мы же, побе́ду твою́ над лука́вым восхваля́я, про́сим тя научи́ и нас вы́ну пе́ти Христу́ Бо́гу: Аллилу́ия.

Икос 9

Вити́я велере́чивия не возмо́гут изрещи́ вся по́двиги твоя́ и страда́ния о Христе́, я́же претерпе́л еси́. О сих свиде́тельствует Сам Госпо́дь, мно́гими чудесы́ от моще́й святы́х твои́х источа́емыми. Мо́лим тя о вразумле́нии нас, заблу́дших, и зове́м ти: 

Ра́дуйся, бед на́ших прогони́телю;

Ра́дуйся, серде́ц малове́рных в ве́ре укрепле́ние;

Ра́дуйся, о спасе́нии душ ре́вностный рачи́телю;

Ра́дуйся, сла́вящий Бо́га немо́лчными песнопе́ньми;

Ра́дуйся, мирски́я лю́ди храни́ти себе́ ра́ди чад наставля́яй;

Ра́дуйся, Бо́гу рабо́тающих не оставля́яй;

Ра́дуйся, ко́зней бесо́вских разруши́телю;

Ра́дуйся, к исполне́нию во́ли Бо́жией путеводи́телю;

Ра́дуйся, преподобному́чениче Евфроси́не, пустыннолю́бче и те́плый о нас моли́твенниче.

Кондак 10

Спасти́ хотя́ всех, Человеколю́бец Госпо́дь яви нам тя, преподо́бне, да́ мы, зря́ще богоуго́дное житие́ твое́, благоче́стию поучи́мся. Помози́ же нам, свя́те, не́мощным, моли́твами твои́ми, бога́тство и сла́ву ми́ра сего́ тле́ннаго презре́ти и Го́сподеви с  любо́вию и тре́петом рабо́тати, пою́ще Ему́: Аллилу́ия.

Икос 10

Сте́нами кре́пкими сокры́ лука́вый чудотво́рныя мо́щи твоя́ в годи́ну лю́тых гоне́ний на Це́рковь Христо́ву, оба́че не вжига́ют свети́льника и не поставля́ют его под спу́дом, но на све́щнице, да све́тит всем, та́ко и тя, свеще́ негаси́мая, чрез лета́ мно́гая ве́рные обрето́ша па́ки. Сла́вим Го́спода, возвра́щшаго нам чудотво́рныя мо́щи твоя́, и с любо́вию пое́м ти:

Ра́дуйся, Бо́гови ве́рный служи́телю;

Ра́дуйся, стра́ха сме́рти искорени́телю;

Ра́дуйся, все бога́тство твое́ в Бо́зе положи́вый;

Ра́дуйся, по́двигами подо́бен дре́вним отце́м бы́вый;

Ра́дуйся, помо́щниче обездо́ленным и убо́гим;

Ра́дуйся, прогони́телю из серде́ц на́ших самолю́бия и ле́сти;

Ра́дуйся, к други́м ми́лостивый, к себе́ стро́гий;

Ра́дуйся, Бо́гом дарова́нная нам кре́посте;

Ра́дуйся, преподобному́чениче Евфроси́не, пустыннолю́бче и те́плый о нас моли́твенниче.

Кондак 11

Пе́ние похва́льное приими́ от нас, преподобному́чениче сла́вный, и я́ко засту́пниче  усе́рдный моли́ Бо́га да не у́мрем безпокая́нны, да, непреста́нно па́мятствовав  о сме́рти, сря́щем  чи́стым се́рдцем час кончи́ны своея́ и сподо́бимся с тобо́ю пе́ти Бо́гу: Аллилу́иа. 

Икос 11

Свеща́ светоза́рная был еси́, преподо́бне, в земле́ Устюже́нстей тьму́ неве́рия озаря́юще, ны́не же просвети́ умы́ и сердца́ на́ша, грехо́м омраче́нныя, да зове́м ти:

Ра́дуйся, ра́достью непреста́нною испо́лнивыйся;

Ра́дуйся,  о́браз жи́зни непоро́чныя  показ́авый;

Ра́дуйся, чистото́ю жития́ А́нгелом уподо́бивыйся;

Ра́дуйся, любо́вь к Бо́гу и бли́жнему стяжа́вый;

Ра́дуйся, звездо́ путь ко спасе́нию указу́ющая;

Ра́дуйся,  кончи́ны му́ченичестей сре́тение лику́ющее;

Ра́дуйся, от оби́д свобожда́яй;

Ра́дуйся,  проще́нию и терпе́нию нас наставля́яй;

Ра́дуйся, преподобному́чениче Евфроси́не, пустыннолю́бче и те́плый о нас моли́твенниче.

Кондак 12

Благода́ть, да́нную ти от Бо́га ве́дуще, припа́даем ти, свя́те о́тче, и про́сим приле́жно: моли́ Го́спода Вседержи́теля, да храни́т Це́рковь Свою́ от раско́ла,  да да́рует  стране́  на́шей мир и огради́т ю от вся́каго зла, да пода́ст нам вся, я́же ко спасе́нию поле́зная, да воспои́м благода́рственне  Бо́гу: Аллилу́иа.

Икос 12

Пою́ще Бо́га, просла́вльшаго тя, восхваля́ем чи́стое житие́, по́двиги и чудеса́ твоя́, Евфроси́не богому́дре; ты бо всем се́рдцем Бо́га возлюби́в, преда́ся  Ему́, кончи́ны му́ченическия не отри́нув, за Христа́ во́льно пострада́л еси. Вене́ц сла́вы от Бо́га прия́л еси́. Ны́не же пред лице́м Царя́ ца́рствующих предстоя́, моли́ о нас приле́жно, да мы в исправле́ние прии́дем и тя воспое́м си́це:

Ра́дуйся, преда́ния святы́х отец храни́телю;

Ра́дуйся, любому́дрия учи́телю;

Ра́дуйся, от озлобле́ния сердца́ на́ша избавля́яй;

Ра́дуйся, слепоту́ неве́дения отыма́яй;

Ра́дуйся, свети́льниче светоза́рный, ко Христу́ люде́й мно́жества приведы́й;

Ра́дуйся, ста́рче любоще́дрый;

Ра́дуйся, всем смире́нным мольба́м внима́яй;

Ра́дуйся, никого́же без по́мощи не оставля́яй;

Ра́дуйся, преподобному́чениче Евфроси́не, пустыннолю́бче и те́плый о нас моли́твенниче.

Кондак 13

О пресла́вный уго́дниче Христо́в и преди́вный чудотво́рче, преподобному́чениче Евфроси́не, приими́ сие́ ма́лое моле́ние на́ше и умоли́ Всеми́лостиваго Бо́га покая́ние соверше́нное нам дарова́ти, ко пра́ведному житию́ нас напра́вити, бу́ди нам в час сме́ртный предста́тель кре́пкий, да сподо́бимся в Небе́снем Ца́рствии ку́пно с тобо́ю пе́ти Бо́гу Спаси́телю на́шему: Аллилу́иа.

* Акафист составлен сотрудниками Богослужебной комиссии Череповецкой Епархии.

Минея, 28 Июня, Кано́н преподо́бных

Глас 4

Песнь 1

Ирмос: Триста́ты кре́пкия,/ Рожде́йся от Де́вы,/ безстра́стия во глубине́/ души́ трича́стное потопи́, молю́ся,/ да Тебе́, я́ко в тимпа́не,/ во умерщвле́нии телесе́/ побе́дное воспою́ пе́ние.

Припев: Святи́и преподо́бнии отцы́ Се́ргие и Ге́рмане, моли́те Бо́га о на́с.

Со́лнце Пра́вды – Христе́,/ возсия́й ми днесь све́том ра́зума Твоего́,/ да свети́льники на́ша, Се́ргия и Ге́рмана,/ се́рдцем и устна́ми воспою́ во сла́ву Твою́, Влады́ко.

Припев: Святи́и преподо́бнии отцы́ Се́ргие и Ге́рмане, моли́те Бо́га о на́с.

Реко́ша в себе́ святи́и:/ бежи́м простра́ннаго пути́, зане́ в па́губу веде́т,/ бежи́м грехо́вных страсте́й,/ до а́да бо низво́дят,/ те́сный же путь возлю́бим,/ да насле́дим жизнь ве́чную.

Сла́ва Отцу́ и Сы́ну и Свято́му Ду́ху.

Я́коже дожде́м, слеза́ми зе́млю се́рдца ва́шего напая́юще,/ и, я́ко со́лнцем, теплото́ю моли́твы согрева́юще,/ доброде́телей плоды́, Се́ргие и Ге́рмане, виногра́да Де́лателю принесо́сте.

И ны́не и при́сно и во ве́ки веко́в. Ами́нь.

Богородичен: Доброде́тели святы́х пою́ и сла́влю,/ сам же зла́я твори́ти, увы́ мне, не престаю́./ Но, Влады́ко Христе́, молйтвами Ма́тере Твоея́/ и мене́, окая́ннаго, от сна ле́ности к доброде́телей де́ланию возбуди́.

Песнь 3

Ирмос: Не му́дростию, и си́лою, и бога́тством хва́лимся,/ но Тобо́ю, О́тчею Ипоста́сною Му́дростию, Христе́,/ несть бо свят, па́че Тебе́, Человеколю́бче.

Припев: Святи́и преподо́бнии отцы́ Се́ргие и Ге́рмане, моли́те Бо́га о на́с.

Преслу́шав за́поведь, пра́отец сла́дости ра́йския лише́н бысть,/ послуша́нием же святи́и ве́чную жизнь насле́довавше,/ Богозре́нием наслажда́ются.

Припев: Святи́и преподо́бнии отцы́ Се́ргие и Ге́рмане, моли́те Бо́га о на́с.

Та́йное де́лание ва́ше, безмо́лвия люби́телие, ви́дя Оте́ц Небе́сный,/ я́ко сы́ны Своя́ уще́дри, благода́тию обогати́/ и на Небеса́х просла́ви.

Сла́ва Отцу́ и Сы́ну и Свято́му Ду́ху.

Чистоты́ рачи́тели, земны́я А́нгелы,/ избра́нныя сосу́ды Свята́го Ду́ха,/ чи́стое зерца́ло целому́дрия,/ Се́ргия и Ге́рмана чистото́ю се́рдца почти́м.

И ны́не и при́сно и во ве́ки веко́в. Ами́нь.

Богородичен: Раб сый чре́ва,/ ка́ко возмогу́ плоть ду́ху покори́ти и чистоту́ а́нгельскую стяжа́ти?/ Но, о де́вственных похвало́, Пречи́стая!/ Ты из пле́на сего́ изба́ви мене́, несмы́сленнаго.

Седален, глас 1

Боже́ственным жела́нием распали́вшеся, преподо́бнии/ псало́мски ко Христу́ взыва́ху:/ что́ нам есть на Небеси́ па́че Тебе́, Бо́же вожделе́ннейше,/ жела́ний на́ших кра́ю?/ И от Тебе́ что́ восхоте́хом на земли́?/ Вся земна́я презре́хом, вся тле́нная вмени́хом за уме́ты,/ да Тебе́ еди́наго приобря́щем, все́ю душе́ю возлю́бим/ и Тебе́ еди́ному послу́жим./ Тех моли́твами, Человеколю́бче Го́споди, любве́ Твоея́ сердца́ на́ша испо́лни/ и спаси́ нас, яко Благоутро́бен.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богородичен: Я́ко Небе́снаго Царя́ чисте́йший храм была́ еси́, Пречи́стая,/ и, к Нему́ иму́щая ма́тернее дерзнове́ние,/ Того́ умоли́ти потщи́ся,/ е́же очи́стити ду́ши на́ша от мно́жества прегреше́ний/ и хра́мы че́стны в жили́ще Себе́ человеколю́бием Свои́м нас соде́лати,/ Того́ бо есмы́ творе́ние./ Аще и согреша́ем, но наде́жды, е́же спасти́ся, не отпа́даем,/ иму́ще Тя к Нему́, Влады́чице, те́плую о нас Предста́тельницу.

Песнь 4

Ирмос: Седя́й в сла́ве на Престо́ле Божества́/ во о́блаце ле́гце,/ прии́де Иису́с Пребоже́ственный/ Нетле́нною Дла́нию и спасе́ зову́щия:/ сла́ва, Христе́, си́ле Твое́й.

Припев: Святи́и преподо́бнии отцы́ Се́ргие и Ге́рмане, моли́те Бо́га о на́с.

Я́ко ло́зы виногра́да Христо́ва су́ще, Се́ргие и Ге́рмане,/ грозда́ми доброде́телей процве́тшии,/ вино́м Боже́ственнаго весе́лия испо́лните сердца́ на́ша.

Припев: Святи́и преподо́бнии отцы́ Се́ргие и Ге́рмане, моли́те Бо́га о на́с.

Мо́лим вас, я́ко в ра́дости су́щия пра́ведных, всеблаже́ннии,/ вся́ку печа́ль и го́ресть от душ на́ших отгна́ти,/ я́ко да, ра́дующеся, сла́вим вас.

Сла́ва Отцу́ и Сы́ну и Свято́му Ду́ху.

Те́мная страсте́й бу́ря воста́ на мя/ и свет благода́ти сокрыва́ется от оче́с мои́х./ Но, о свиде́тельницы мы́сленнии!/ моему́ омраче́нию ускори́те в по́мощь.

И ны́не и при́сно и во ве́ки веко́в. Ами́нь.

Богородичен: Ли́цы А́нгелов и преподо́бных/ и мы, гре́шнии, мо́лим Тя, Благоутро́бне Го́споди,/ предста́тельством Ма́тере Твоея́ уще́дри и спаси́ всех нас.

Песнь 5

Ирмос: Нечести́вии не у́зрят сла́вы Твоея́, Христе́,/ но мы Тя, Единоро́дне,/ Оте́ческия Сла́вы Сия́ние Божества́,/ от но́щи у́тренююще,/ воспева́ем Тя, Человеколюбче.

Припев: Святи́и преподо́бнии отцы́ Се́ргие и Ге́рмане, моли́те Бо́га о на́с.

Кра́йним безмо́лвием, моли́твою же, и посто́м, и бде́нием ду́ши своя́ очи́стивше,/ пустыннолю́бцы Трисия́ннаго Све́та прия́телище соде́лашася.

Припев: Святи́и преподо́бнии отцы́ Се́ргие и Ге́рмане, моли́те Бо́га о на́с.

Не я́коже тро́сти, ве́тром коле́блемыя,/ но я́ко тве́рдии столпи́, Се́ргий и Ге́рман,/ на краеуго́льном ка́мени, Христе́, ве́рою утверди́вшеся,/ доброде́тельми просия́ша.

Сла́ва Отцу́ и Сы́ну и Свято́му Ду́ху.

Иоа́ннову житию́ в пусты́ни Иорда́нове/ и Илиину́ безмо́лвию на горе́ ревну́юще, преподо́бнии,/ страсте́й и́га дея́нием свобо́ждшеся,/ Богозре́нием просвети́шася.

И ны́не и при́сно и во ве́ки веко́в. Ами́нь.

Богородичен: Ты покро́в мой от напа́стей вра́жиих, Влады́чице,/ Ты свет се́рдцу моему́, печа́льми жите́йскими омраче́нному,/ при́сно бу́ди, Богоро́дице, и спаси́ мя.

Песнь 6

Ирмос: Приидо́х во глубины́ морски́я,/ и потопи́ла мя есть бу́ря мно́гих грехо́в,/ но, я́ко Бог, из глубины́ возведи́ живо́т мой, Многоми́лостиве.

Припев: Святи́и преподо́бнии отцы́ Се́ргие и Ге́рмане, моли́те Бо́га о на́с.

Яко же́ртву непоро́чну и всесожже́ние ту́чно,/ принесо́ша себе́ святи́и Бо́гу,/ и, па́че вся́каго всепло́дия же́ртвы и приноше́ния,/ благоуго́дни Ему́ яви́шася.

Припев: Святи́и преподо́бнии отцы́ Се́ргие и Ге́рмане, моли́те Бо́га о на́с.

У́мныма очи́ма зря́ще пред собо́ю Го́спода, Богоблаже́ннии,/ непоро́чно ше́ствовали есте́ по стезя́м за́поведей Его́,/ утвержде́ни иму́ще но́зе благода́тию Свята́го Ду́ха.

Сла́ва Отцу́ и Сы́ну и Свято́му Ду́ху.

Не име́ поко́я боголюби́вый дух ваш, Се́ргие и Ге́рмане,/ до́ндеже не обрето́сте себе́ ме́сто безмо́лвия./ В том бо ве́рою и любо́вию с Бо́гом соедини́вшеся,/ ве́чный поко́й насле́довасте.

И ны́не и при́сно и во ве́ки веко́в. Ами́нь.

Богородичен: Не ки́том, я́коже Ио́на, но грехо́м пожре́н сый, вопию́:/ Влады́ко Христе́!/ Моли́твами Пречи́стыя Твоея́ Ма́тере и преподо́бных оте́ц/ от нетле́ния мя изба́ви, я́ко Благоутро́бен.

Кондак, глас 4

От мирска́го жития́ изше́дше,/ отверже́нием ми́ра Христу́ после́довасте,/ и достиго́сте вели́каго Нева́ е́зера,/ и, в нем на о́строве Валаа́ме все́льшеся,/ равноа́нгельное житие́ пожи́ли есте́,/ отону́дуже, веселя́щеся, прешли́ есте́ к Небе́сным черто́гом./ И ны́не со А́нгелы Влады́чню Престо́лу предстоя́ще,/ помина́йте нас, чад свои́х,/ я́же собра́ли есте́, Богому́дрии,/ да ра́достно от души́ вопие́м:/ ра́дуйтеся, Се́ргие и Ге́рмане, отцы́ преблаже́ннии.

Икос

Ка́ко, неразу́мен сый, воспою́ по́стники всехва́льныя?/ Сло́во бо прему́дрости и сло́во ра́зума несть дано́ ми,/ безслове́сием одержи́му су́щу./ Ты Сам, смы́сла Пода́телю, Иису́се,/ Прему́дрость ве́чная и Сло́во Бо́жие Ипоста́сное,/ моли́твами преподо́бных ум мой просвети́ и да́руй сло́во,/ да гла́сом а́нгельским воспою́ их, глаго́ля:/ ра́дуйтеся, зве́зды мы́сленныя, от восто́ка нам возсия́вшия;/ ра́дуйтеся, безмо́лвия люби́тели всеизря́днии./ Ра́дуйтеся, Христо́вых за́поведей де́латели непоро́чнии;/ ра́дуйтеся, злати́и сосу́ди, Ду́хом Святы́м испо́лненнии./ Ра́дуйтеся, столпи́ одушевле́ннии, зда́ние по́стничества утвержда́ющии;/ ра́дуйтеся, кри́ни, чистото́ю серде́чною, а́ки сне́гом, убеле́ннии./ Ра́дуйтеся, ма́слины, от Христа́ нам еле́й милосе́рдая плодонося́щия;/ ра́дуйтеся, ве́рным побо́рницы, моли́твенным копие́м сопроти́вныя поража́ющии./ Ра́дуйтеся, цели́телие теле́сных не́мощей и страсте́й душе́вных;/ ра́дуйтеся, ускоря́ющии в по́мощь обурева́емым и вам моля́щимся./ Ра́дуйтеся, Валаа́му свети́ла ве́лия и пресве́тлая./ Ра́дуйтеся, Се́ргие и Ге́рмане, отцы́ всеблаже́ннии.

Песнь 7

Ирмос: Ю́ноши три в Вавило́не,/ веле́ние мучи́телево на бу́йство прело́жше,/ посреде́ пла́мене вопия́ху:/ благослове́н еси́, Го́споди,/ Бо́же оте́ц на́ших.

Припев: Святи́и преподо́бнии отцы́ Се́ргие и Ге́рмане, моли́те Бо́га о на́с.

Огню́ су́щу в вас, Се́ргие и Ге́рмане, Боже́ственныя любве́,/ пла́мень по́хоти и огнь я́рости претворися в ро́су./ Тем, ра́дующеся, в безмо́лвии воспева́ете:/ благослове́н еси́, Го́спода, Бо́же оте́ц на́ших.

Припев: Святи́и преподо́бнии отцы́ Се́ргие и Ге́рмане, моли́те Бо́га о на́с.

Пло́ти свое́й, я́коже злато́му и́долу о́троцы, преподо́бнии не послужи́ша,/ но, апо́стольски распина́юще ю со страстьми́ и похотьми́, покори́ша ду́ху/ и, хра́мы честни́ сотво́ршеся Свято́му Ду́ху, взыва́ху:/ благослове́н еси́, Го́споди, Бо́же оте́ц на́ших.

Сла́ва Отцу́ и Сы́ну и Свято́му Ду́ху.

Я́ко чистоты́ храни́тели,/ чисте́йшему Божеству́ вмести́лище соде́лашася, любому́дрии,/ и, во пло́ти су́ще, тайноде́йствием Уте́шителя к преми́рных зре́нию восхища́хуся, пою́ще:/ благослове́н еси́, Го́споди, Бо́же оте́ц на́ших.

И ны́не и при́сно и во ве́ки веко́в. Ами́нь.

Богородичен: Яко Ма́терь Безнача́льнаго Бо́га Сло́ва су́щую,/ Тя, Влады́чице, прошу́ умиле́нно от безслове́сных страсте́й изба́вити мя,/ я́ко о́троки от пещи́ халде́йския, да с ни́ми, ра́дуяся, воспою́:/ благослове́н еси́, Го́споди, Бо́же оте́ц на́ших.

Песнь 8

Ирмос: Изба́вителю всех, Всеси́льне,/ посреде́ пла́мене благоче́ствовавшия,/ снизше́д, ороси́л еси́/ и научи́л еси́ пе́ти:/ вся дела́, благослови́те, по́йте Го́спода.

Припев: Святи́и преподо́бнии отцы́ Се́ргие и Ге́рмане, моли́те Бо́га о на́с.

Бо́дренным ума́ трезве́нием и те́плым ко Христу́ моле́нием,/ диа́вола, я́ко льва рыка́ющаго и и́щущаго кого́ поглоти́ти, преподо́бнии посрами́ша,/ стра́стныя того́ прило́ги отсе́кше./ Тем со о́троки поя́ху:/ вся дела́, благослови́те, по́йте Го́спода.

Припев: Святи́и преподо́бнии отцы́ Се́ргие и Ге́рмане, моли́те Бо́га о на́с.

Вся ору́жия Бо́жия Се́ргий и Ге́рман восприи́мше на гора́х Валаа́ма,/ я́коже Моисе́й и Ааро́н, воздея́нием ума́ и рук на высоту́,/ сопроти́вных си́лу, ве́рным спобо́рствующе, осла́биша, пою́ще песнь:/ вся дела́, благослови́те, по́йте Го́спода.

Сла́ва Отцу́ и Сы́ну и Свято́му Ду́ху.

Безнача́льная, Вседержи́тельная, Единосу́щная Свята́я Тро́ице,/ моли́твами преподо́бных Твои́х/ от трех мы́сленных враго́в боре́ний ду́ши на́ша изба́ви,/ поми́луй и спаси́ всех, благоче́стно Тя испове́дающих.

И ны́не и при́сно и во ве́ки веко́в. Ами́нь.

Богородичен: Богоуго́дно пожи́вшим после́довати мене́ сотвори́ до́брыми де́лы, Всенепоро́чная,/ потребля́ющи от души́ моея́ прило́ги лука́вых де́монов/ и возводя́щи при́сно ум мой к зре́нию за́поведей Сы́на Твоего́ и Творца́ моего́.

Песнь 9

Ирмос: Ева у́бо неду́гом преслуша́ния/ кля́тву всели́ла есть;/ Ты же, Де́во Богоро́дице,/ прозябе́ннем чревоноше́ния ми́ров и благослове́ние процвела́ еси́./ Тем Тя вси велича́ем.

Припев: Святи́и преподо́бнии отцы́ Се́ргие и Ге́рмане, моли́те Бо́га о на́с.

На тве́рдом ве́ры ка́мени благода́тию утвержде́ни су́ще,/ в безмо́лвии подвиза́ющеся,/ тече́ние по́стничества до́бре сконча́вше/ и мздовоздая́ние от Христа́ прии́мше,/ Тому́ ны́не моли́теся, всеблаже́ннии,/ в ве́ре и доброде́тели ве́рных Свои́х утверди́ти.

Припев: Святи́и преподо́бнии отцы́ Се́ргие и Ге́рмане, моли́те Бо́га о на́с.

Яко победи́тели мы́сленных враго́в, Се́ргие и Ге́рмане,/ предстоя́ще ны́не Престо́лу Небе́сных сил Царя́,/ моли́те бла́гость Его́ правосла́вным на сопоста́ты по́беду и одоле́ние дарова́ти.

Сла́ва Отцу́ и Сы́ну и Свято́му Ду́ху.

В Небе́сных су́ще оби́телех, преподо́бнии, Влады́ку всех моли́те/ страну́ на́шу и вся гра́ды и страны́ христиа́нская в ми́ре сохрани́ти/ и вся ны спасти́, благоче́стно вас почита́ющия.

И ны́не и при́сно и во ве́ки веко́в. Ами́нь.

Богородичен: Ка́мень краеуго́льный, Христо́с, ве́рным есть основа́ние,/ неве́рным же – ка́мень претыка́ния и собла́зна./ На сем Ка́мени, Влады́чице, утверди́ мое́ помышле́ние/ и спаси́ мя, я́ко к Нему́ иму́щая ма́тернее дерзнове́ние.

Светилен

Светода́вче Го́споди!/ Свети́льников на́ших, Се́ргия и Ге́рмана, моли́твами/ просвети́ нас, ве́рою Тебе́ служа́щих/ и благоче́стно пра́зднующих светоно́сную тех па́мять.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богородичен: Свеще́ та́инственная, Богоневе́сто!/ Су́щим во тьме неразу́мия све́том ра́зума и́стины возсия́й/ и спаси́ всех, благоче́стно Тя я́ко Ма́терь Бо́жию велича́ющих.