Собор Сибирских святых

Текст утвержден Священным Синодом
Русской Православной Церкви
14 июля 2018 года (журнал № 62)

Кондак 1

Избра́нный чудотво́рче и пресла́вный уго́дниче Христо́в, богоно́сне о́тче наш Ге́рмане, Аля́ски украше́ние и Це́ркве Правосла́вныя ра́дование, воспева́ем ти похвалы́ сия́. Ты же, я́ко Небе́сный наш покрови́тель и всемо́щный пред Бо́гом моли́твенник, не преста́й хода́тайствовати о нас, ча́дех твои́х, усе́рдно тебе́ вопию́щих: Ра́дуйся, преподо́бне о́тче наш Ге́рмане, пресла́вный чудотво́рче.

Икос 1

А́нгелов Творе́ц предызбра́ тя, о́тче Ге́рмане, пропове́дником бы́ти правосла́вныя ве́ры в зе́млех но́вых и посла́ тя, я́ко благове́стника, ко язы́чником, да возсия́ет им свет И́стины. Благода́рнии же лю́дие воспева́ют тебе́, я́ко Небе́сному покрови́телю, похвалы́ сия́:

Ра́дуйся, пусты́нею Саро́вскою изде́тска взраще́нный;

ра́дуйся, Валаа́мския оби́тели о́трасле пречестна́я.

Ра́дуйся, пусты́нное уедине́ние возлюби́вый;

ра́дуйся, Бо́жиею Ма́терию от сме́рти спасе́нный.

Ра́дуйся, апо́столов после́дователю;

ра́дуйся, свет и́стинныя ве́ры во Аме́рику принесы́й.

Ра́дуйся, Фаво́рским све́том озаре́нный;

ра́дуйся, тьму идолослуже́ния Христо́м просвети́вый.

Ра́дуйся, преподо́бне о́тче наш Ге́рмане, пресла́вный чудотво́рче.

Кондак 2

Ви́дя Госпо́дь пла́менную любо́вь твою́, е́юже от ю́ности возгоре́ся, преподо́бне, во оби́тель Саро́вскую Ему́ еди́ному послужи́ти приведе́ тя, последи́ же на о́стров Валаа́мский путь твой упра́ви, иде́же в со́нме и́ноков ты воспева́л еси́ неуста́нно: Аллилу́иа.

Икос 2

Ра́зум духо́вный тебе́ от ю́ности дарова́ся, свя́тче Бо́жий, да уразуме́еши красоту́ небе́сную и сла́дость ея. Сего́ ра́ди от прему́драго игу́мена Наза́рия, наста́вника преподо́бнаго Серафи́ма Саро́вскаго, поуча́лся еси́ прему́дрости Бо́жией и путе́м Госпо́дним, те́мже Свята́я Це́рковь восхваля́ет тя:

Ра́дуйся, в де́брех саро́вских ста́рцу пусты́ннику послужи́вый;

ра́дуйся, с преподо́бным Серафи́мом еди́наго наста́вника име́вый.

Ра́дуйся, я́ко пчела́, от вели́каго Фео́дора духо́вный некта́р в Санакса́ре собра́вый;

ра́дуйся, во пресла́вную оби́тель Валаа́мскую на по́двиги прише́дый.

Ра́дуйся, я́ко тезоимени́тому тебе́ Ге́рману, первонача́льнику Валаа́мскому, свя́тостию уподо́бился еси́;

ра́дуйся, я́ко по́двиги пустынножи́тельския подъя́л еси́.

Ра́дуйся, за кро́тость и ти́хость бра́тиею валаа́мскою почита́емый;

ра́дуйся, ны́не все́ю Це́рковию прославля́емый.

Ра́дуйся, преподо́бне о́тче наш Ге́рмане, пресла́вный чудотво́рче.

Кондак 3

Си́ла Вы́шняго повеле́ богому́дрому Петро́ва гра́да святи́телю Гаврии́лу посла́ти пропове́дники правосла́вныя ве́ры в зе́млю Аля́скинскую и тебе́, преподо́бне Ге́рмане, сей жре́бий апо́стольский прия́ти. Те́мже вси лю́дие, просвеще́ннии све́том Христо́вым труды́ твои́ми и о́бразом жития́ твоего́, воспе́ша Бо́гу: Аллилу́иа.

Икос 3

Име́я не то́кмо тща́ние о по́двизе и́ночестем, но и ре́вность апо́стольскую в пропове́дании, ты, преподо́бне Ге́рмане, лю́дем, во тьме язы́ческаго неве́дения седя́щим, Христа́ распя́таго и воскре́сшаго возвести́л еси́. Помина́юще у́бо и́ноческая бде́ния твоя́ и труды́ апо́стольския, с любо́вию восхваля́ем тя:

Ра́дуйся, безро́потное послуша́ние игу́мену яви́вый;

ра́дуйся, в путь да́льний про́поведи ра́ди ева́нгельския отше́дый.

Ра́дуйся, любве́ ко оте́честву не угаси́вый;

ра́дуйся, но́вое твое́ оте́чество пла́менне возлюби́вый.

Ра́дуйся, и́ноческаго жития́ во Аме́рице первонача́льниче;

ра́дуйся, правосла́вныя ве́ры ре́вностный пропове́дниче.

Ра́дуйся, о́бразе преподо́бных оби́тели Ла́дожския;

ра́дуйся, Се́верныя Фиваи́ды о́трасле, во Аля́ске процветы́й.

Ра́дуйся, преподо́бне о́тче наш Ге́рмане, пресла́вный чудотво́рче.

Кондак 4

Бу́рю злых напа́стей и скорбе́й претерпе́л еси́, преподо́бне, и по́двигом до́брым во стране́ но́вей подвиза́лся еси́, сего́ ра́ди и Христо́с тя просла́ви и да́ром прозре́ния и чуде́с обогати́ и дарова́ тебе́ Ца́рство Небе́сное, иде́же ты со А́нгелы воспева́еши Бо́гу: Аллилу́иа.

Икос 4

Слы́шаще о чудесе́х твои́х, лю́дем явле́нных, егда́ о́гненное запале́ние и наводне́ние губи́тельное ты останови́л еси́ моли́твою свое́ю, вси лю́дие умиля́хуся се́рдцем. Мо́лим тя и нам яви́ти си́лу твою́ и по́мощь, к тебе́ вопию́щим:

Ра́дуйся, богопропрове́дниче, ре́вностию твое́ю нас вдохновля́яй;

ра́дуйся, боголю́бче, сердца́ на́ша ра́достию исполня́яй.

Ра́дуйся, за всех уныва́ющих те́плый моли́твенниче;

ра́дуйся, душ смяте́нных пресла́достный умири́телю.

Ра́дуйся, я́ко смире́нием твои́м подае́ши стра́ждущим исцеле́ние;

ра́дуйся, я́ко кро́тостию твое́ю окрыля́еши ду́ши на́ша во е́же созерца́ти го́рняя.

Ра́дуйся, тве́рдый вразуми́телю всех отше́дших от Правосла́вия;

ра́дуйся, любо́вию твое́ю направля́яй нас на путь пра́вый.

Ра́дуйся, преподо́бне о́тче наш Ге́рмане, пресла́вный чудотво́рче.

Кондак 5

Я́ко звезда́ во стране́ полу́нощней возсия́л еси́, преподо́бне, на о́строве Ело́вем, Но́вый Валаа́м нарече́ннем, да озари́ши све́том любве́ твоея́ и богомо́щною моли́твою твое́ю всю зе́млю Америка́нскую, да со всех конце́в ея лю́дие правосла́внии воспою́т те́пле Бо́гу: Аллилу́иа.

Икос 5

Ви́дяще смире́ние твое́, о́тче наш Ге́рмане, вси дивля́хуся зело́, ка́ко ты, преподо́бному Анто́нию Пече́рскому, первонача́льнику мона́шества на Руси́, подража́я, восхоте́л еси́ просты́м и́ноком бы́ти и по вели́кому смире́нию твоему́ от служе́ния свяще́нническаго отре́клся еси́. Сего́ ра́ди взыва́ем ти такова́я:

Ра́дуйся, первонача́льниче мона́шества во Аме́рице;

ра́дуйся, смире́нием небе́снаго Оте́чества дости́гнувый.

Ра́дуйся, небе́сною сла́вою увенча́нный;

ра́дуйся, оби́тель на месте по́двигов твои́х предреки́й.

Ра́дуйся, мо́щи твоя́ предрече́нной оби́тели дарова́вый;

ра́дуйся, исто́чник чуде́с от них ми́ру яви́вый.

Ра́дуйся, защи́тниче те́плый бра́тии, тобо́ю собира́емыя;

ра́дуйся, и́ноком вождь ве́лий на бра́ни неви́димой.

Ра́дуйся, преподо́бне о́тче наш Ге́рмане, пресла́вный чудотво́рче.

Кондак 6

Пропове́дует пусты́ня се́верная по́двиги и чудеса́ твоя́, преподо́бне, и тя, я́ко но́вую ветвь виногра́дника Це́ркве Ру́сския, на земли́ Америка́нстей прозя́бшую, прославля́ет. Ты бо де́бри Аля́ски и леса́ ея́ моли́твою твое́ю облагоуха́л еси́ и, подви́жником дре́вним подража́я, в безмо́лвии нощне́м взыва́л еси́ к Бо́гу: Аллилу́иа.

Икос 6

Просвети́вый люде́й, во тьме язы́честей пребыва́ющих, и о́браз подви́жническаго жития́ сим показа́вый, моли́ся о всех нас, богоно́сне о́тче наш Ге́рмане, да и мы, благодаря́ще Го́спода за ми́лость Его́, нам явле́нную, непреста́нно воспева́ем ти похва́льныя сия́ глаго́лы:

Ра́дуйся, Пресвяты́я Тро́ицы служи́телю ве́рный;

ра́дуйся, пусты́ни Ело́выя подви́жниче усе́рдный.

Ра́дуйся, щит ве́ры живы́я и разу́мныя всем подава́яй;

ра́дуйся, тьму све́том ева́нгельским просвеща́яй.

Ра́дуйся, я́ко суету́ и уны́ние богомы́слием отгна́л еси́;

ра́дуйся, я́ко убо́га себе́ имену́я, смире́нию всех поуча́л еси́.

Ра́дуйся, сердца́ на́ша ра́достию твоею́ испо́лнивый;

ра́дуйся, наде́ждою благо́ю нас укрепи́вый

Ра́дуйся, преподо́бне о́тче наш Ге́рмане, пресла́вный чудотво́рче.

Кондак 7

Хотя́й возсия́ти све́ту богопозна́ния во стране́ язы́честей, благоволи́ Госпо́дь се́яти семена́ ве́ры правосла́вныя и повеле́ тебе́, преподо́бне, да всех научи́ши ве́ре и́стинней и защити́ши ю́. Ты же, я́ко па́стырь безстра́шный ма́лому стаду еванге́льски взыва́еши, да не убои́мся, я́ко обетова́но есть нам Небе́сное Ца́рствие, те́мже науче́ннии тобо́ю, ра́достне пое́м: Аллилу́иа.

Икос 7

Ди́вно в вы́шних моли́твенно пребыва́л еси́, преподо́бне, но и в ни́жних на земли́ су́щих не забыва́л еси́, наипа́че же о сирота́х ве́лие попече́ние яви́л еси́, устроя́я прию́т им и учи́лище, иде́же за́поведем Госпо́дним поуча́л еси́ их. Сих ра́ди трудо́в твои́х приими́ от нас похвалы́ сия́:

Ра́дуйся, ни́щих и сиро́т защи́тителю;

ра́дуйся, бла́гостный о них попечи́телю.

Ра́дуйся, я́ко стра́ху Бо́жию ча́да своя́ науча́л еси́;

ра́дуйся, я́ко живо́ю водо́ю Ева́нгелия всех напоя́л еси́.

Ра́дуйся, моли́твы непреста́нныя учи́телю;

ра́дуйся, хле́бом небе́сным и земны́м сиропита́телю.

Ра́дуйся, плоть покоря́ти ду́ху поуча́вый;

ра́дуйся, Бо́га всем се́рдцем люби́ти наставля́вый.

Ра́дуйся, преподо́бне о́тче наш Ге́рмане, пресла́вный чудотво́рче.

Кондак 8

Стра́нное чу́до яви́ человеколю́бец Госпо́дь, дарова́ бо тебе́, преподо́бне, дар прозре́ния и исцеле́ния я́ко исто́чник утеше́ния лю́дем Свои́м. Ты же свои́ми и словесы́ приве́л еси́ мно́гия к любви́ Бо́жией. Те́мже си́янием по́двигов твои́х просвеще́ннии, лю́дие взыва́ху ко Го́споду: Аллилу́иа.

Икос 8

Избра́н Бо́гом был еси́, о́тче преподо́бне, те́мже лю́дие новопросвеще́ннии све́том Христо́вы ве́ры притека́ху к тебе́ в боле́знех и печа́лех. Ты же, я́ко оте́ц чадолюби́вый, предста́тельствовал еси́ за всех в моли́твах, источа́я исцеле́ния и утеша́я всех, к тебе́ о по́мощи взыва́ющих, те́мже сла́вляху тя духо́вная ча́да твоя́:

Ра́дуйся, душ смяте́нных умири́телю пресла́дкий;

ра́дуйся, врачу́ наш безме́здный и благода́тный.

Ра́дуйся, не́мощей на́ших цели́телю милосе́рдный;

ра́дуйся, в беда́х и обстоя́ниих помо́щниче ско́рый.

Ра́дуйся, лише́нным кро́ва те́плое прибе́жище;

ра́дуйся, обурева́емым, я́ко «Скала́ Мона́шеская», ти́хое приста́нище.

Ра́дуйся, гряду́щая я́ко настоя́щая прови́девый;

ра́дуйся, прегреше́ний сокрове́нных обличи́телю прозорли́вый.

Ра́дуйся, преподо́бне о́тче наш Ге́рмане, пресла́вный чудотво́рче.

Кондак 9

Всего́ себе́ Го́сподеви пре́дал еси́, блаже́нне, те́мже со А́нгелы в пусты́ни сла́достно бесе́довал еси́. И ны́не с ли́ки а́нгельскими на Небесе́х непреста́нно взыва́еши Творцу́ всех и Созда́телю хвале́бное: Аллилу́иа.

Икос 9

Вети́и многовеща́ннии не возмо́гут исчи́слити чудеса́ твоя́, лю́дем явле́нная, я́ко и ду́си нечи́стии по словеси́ твоему́ от люде́й стра́ждущих исхожда́ху. Егда́ же бысть наводне́ние ве́лие, ты моли́твою свое́ю пред ико́ною Бо́жия Ма́тере останови́л еси́ мо́ре, глаго́ля: «Да́лее сея́ черты́ не пре́йдет вода́». Те́мже ти воспева́ем си́це:

Ра́дуйся, стихи́и водны́я усмири́телю ди́вный;

ра́дуйся, от запале́ния лесна́го изба́вителю пресла́вный.

Ра́дуйся, святи́теля Инноке́нтия, в мо́ри взыва́вшаго к тебе́, услы́шавый;

ра́дуйся, по мо́рю пла́вающим ко́рмчий наде́жный.

Ра́дуйся, я́ко гнев злых люде́й ти́хостию исправля́л еси́;

ра́дуйся, я́ко ди́вное благоуха́ние с небесе́ к тебе́ прибега́ющим ниспосыла́л еси́.

Ра́дуйся, ве́лия зна́мения при жи́зни твое́й показа́вый;

ра́дуйся, и по сме́рти твое́й мно́гая чудеса́ яви́вый.

Ра́дуйся, преподо́бне о́тче наш Ге́рмане, пресла́вный чудотво́рче.

Кондак 10

Спаси́тельнаго се́яния Госпо́дня, в вертогра́де земли́ Америка́нския насажде́ннаго, плод кра́сный ду́хом прови́дя, песнь благода́рственную Пресвяте́й Тро́ице посреде́ пусты́ни се́верныя возноси́л еси́, о́тче святы́й Ге́рмане, и со А́нгелы небе́сными взыва́л еси́: Аллилу́иа.

Икос 10

Стена́ еси́ всем, прибега́ющим к тебе́, о́тче, я́ко в житии́ твое́м пресла́вная показа́л еси́, и при кончи́не твое́й ди́вное чу́до яви́л. Лю́дие же, ви́дяще в час кончи́ны твоея́ о́гненный столп до небесе́ и нетле́ние телесе́ твоего́, возопи́ша тебе́ такова́я:

Ра́дуйся, пра́ведною кончи́ною в свя́тости твое́й нас уве́ривый;

ра́дуйся, я́ко восхожде́ние твое́ на небеса́ столпо́м о́гненным зна́менася.

Ра́дуйся, я́ко и гроб твой неду́жным исцеле́ния источа́ше;

ра́дуйся, мо́щи твоя́ благоуха́нныя в насле́дие нам оста́вивый;

Ра́дуйся, я́ко у ра́ки твоея́ хроми́и воста́ша и глас твой из гро́ба слы́шаша.

ра́дуйся, я́ко исто́чник воды́ святы́я и целе́бныя нам дарова́л еси́.

Ра́дуйся, я́ко ста́рцу Гера́симу яви́лся еси́, на Ело́вый о́стров того́ призыва́яй;

ра́дуйся, та́инственно, я́ко живы́й, на о́строве сем пребыва́яй.

Ра́дуйся, преподо́бне о́тче наш Ге́рмане, пресла́вный чудотво́рче.

Кондак 11

Пе́ние хвале́бное тебе́ прино́сим, о́тче преподо́бне, о пра́веднем жити́и твое́м. Восхваля́ем и честну́ю кончи́ну твою́, я́ко предузна́л еси́ час преставле́ния своего́, учени́к же твой Гера́сим обоня́л есть благоуха́ние ди́вное в час той. Пресла́вно бысть и погребе́ние твое́, егда́ испо́лнися предрече́нное тобо́ю. Мы же воспева́ем чудоде́ющему Бо́гу: Аллилу́иа.

Икос 11

Светопода́тельный свети́льник был еси́ всему́ и́ноческому чи́ну да́льния Аме́рики, преподо́бне о́тче наш Ге́рмане, науча́я по́двигу, защища́я от напа́стей, хода́тайствуя о них и глаго́ля: «Не в морски́х то́кмо волна́х обурева́емся, но среди́ преле́стнаго и многомяте́жнаго ми́ра стра́ждем и скита́емся, оба́че к небе́сному на́шему Оте́честву гряде́м». Сего́ ра́ди вопие́м ти:

Ра́дуйся, ве́рный сподви́жниче Иоаса́фа, пе́рваго епи́скопа Ру́сския Аме́рики;

ра́дуйся, свиде́телю ре́вности Иувена́лиевы да́же до сме́рти.

Ра́дуйся, алеу́та Петра́ пронареки́й новому́ченика;

ра́дуйся, предви́девый святи́тельство Инноке́нтия в земли́ Алеу́тстей.

Ра́дуйся, ученику́ своему́ Се́ргию о́браз и́ноческаго жития́ показа́вый;

ра́дуйся, и́нока Гера́сима на Но́вый Валаа́м чуде́сно призва́вый.

Ра́дуйся, на Руси́, безбо́жием плене́нней, Адриа́на пресви́тера от темни́цы огради́вый;

ра́дуйся, святи́теля Иоа́нна тебе́ просла́вити подви́гнувый.

Ра́дуйся, преподо́бне о́тче наш Ге́рмане, пресла́вный чудотво́рче.

Кондак 12

Благода́ти испо́лнена ве́дуще тя, преподо́бне отче, про́сим: моли́ся те́пле ко Го́споду, да огради́т Це́рковь Свою́ Святу́ю от ду́ха ми́ра сего́, вою́ющаго на сыно́в Ея́ неве́рием и отвраща́ющаго от богодарова́нныя жизни, да́бы восходи́ти нам от земли́ на не́бо и воспева́ти Бо́гу: Аллилу́иа.

Икос 12

Пою́ще твое́ прославле́ние, преподо́бне, ублажа́ем тя, я́ко многомо́щна моли́твенника и предста́теля на́шего. Ты же, стяжа́вый Ду́ха Свята́го и Тем просвети́вый лю́ди земли́ Америка́нския, услы́ши нас, вопию́щих к тебе́ такова́я:

Ра́дуйся, моли́тву чи́стую и теплоту́ серде́чную стяжа́вый;

ра́дуйся, сле́з твои́х тече́ньми пусты́ни беспло́дное возде́лавый.

ра́дуйся, я́ко се́рдце твое́ бысть благода́ти Бо́жия испо́лнено.

ра́дуйся, све́том сокрове́нным осия́нный.

Ра́дуйся, умо́м очище́нным та́йны Боже́ственныя созерца́вый;

ра́дуйся, тишины́ и ми́ра по́мыслов дости́гнувый.

Ра́дуйся, сердца́ Ду́хом Святы́м просвеща́яй;

ра́дуйся, соверше́нство обреты́й и нас к сему призыва́яй.

Ра́дуйся, преподо́бне о́тче наш Ге́рмане, пресла́вный чудотво́рче.

Кондак 13

О, пресла́вный уго́дниче Бо́жий, преподо́бне и богоно́сне о́тче наш Ге́рмане, приими́ ма́лое сие́ моле́ние на́ше, в похвалу́ тебе́ возноси́мое, и предстоя́ ны́не престо́лу Го́спода Вседержи́теля, непреста́нно моли́ся о нас, ча́дех твои́х да, пребыва́юще в любви́ и единомы́слии, навы́кнем всегда́ твори́ти во́лю Бо́жию по слову твоему: «От сего́ дне, от сего́ часа́ да бу́дем люби́ти Бо́га превы́ше всего́ и твори́ти святу́ю во́лю Его́», и ку́пно с тобо́ю сподо́бимся воспева́ти хвале́бную песнь: Аллилу́иа.

[Се́й конда́к глаго́лется три́жды.]
[Далее повторяем 1‑е икос и кондак:]

Икос 1

А́нгелов Творе́ц предызбра́ тя, о́тче Ге́рмане, пропове́дником бы́ти правосла́вныя ве́ры в зе́млех но́вых и посла́ тя, я́ко благове́стника, ко язы́чником, да возсия́ет им свет И́стины. Благода́рнии же лю́дие воспева́ют тебе́, я́ко Небе́сному покрови́телю, похвалы́ сия́:

Ра́дуйся, пусты́нею Саро́вскою изде́тска взраще́нный;

ра́дуйся, Валаа́мския оби́тели о́трасле пречестна́я.

Ра́дуйся, пусты́нное уедине́ние возлюби́вый;

ра́дуйся, Бо́жиею Ма́терию от сме́рти спасе́нный.

Ра́дуйся, апо́столов после́дователю;

ра́дуйся, свет и́стинныя ве́ры во Аме́рику принесы́й.

Ра́дуйся, Фаво́рским све́том озаре́нный;

ра́дуйся, тьму идолослуже́ния Христо́м просвети́вый.

Ра́дуйся, преподо́бне о́тче наш Ге́рмане, пресла́вный чудотво́рче.

Кондак 1

Избра́нный чудотво́рче и пресла́вный уго́дниче Христо́в, богоно́сне о́тче наш Ге́рмане, Аля́ски украше́ние и Це́ркве Правосла́вныя ра́дование, воспева́ем ти похвалы́ сия́. Ты же, я́ко Небе́сный наш покрови́тель и всемо́щный пред Бо́гом моли́твенник, не преста́й хода́тайствовати о нас, ча́дех твои́х, усе́рдно тебе́ вопию́щих: Ра́дуйся, преподо́бне о́тче наш Ге́рмане, пресла́вный чудотво́рче.

Молитва

О, преди́вный уго́дниче Бо́жий, преподо́бне о́тче наш Ге́рмане, ты по́двигом до́брым подвиза́лся еси́, хлад и ины́я тяготы́ в земли́ Алеу́тстей претерпе́л еси́.

Ны́не же испо́лнися сло́во Госпо́дне на тебе́, в ма́лем ве́рным Ему́ бы́вшем, те́мже и поста́ви тя Госпо́дь я́ко Небе́снаго покрови́теля Це́ркве Америка́нския. Мы же вси взыва́ем ти те́плою моли́твою: моли́ся за Це́рковь на́шу Святу́ю, да огради́т Ю́ Госпо́дь от темных сил вра́жиих, нас да сохрани́т в чистоте́ и благоче́стии, да утверди́т в ве́ре кре́пкой и несумне́нной. И испроси́ всем нам ду́ха ми́ра и любве́, ду́ха кро́тости и смире́ния, горды́ни отгна́ние, от самопревозноше́ния огражде́ние, боля́щим по́мощь и исцеле́ние, скорбя́щим утеше́ние, а́лчущим пра́вды духо́вныя пи́щу Небе́сную. Да, улучи́вше жела́емая, обря́щем пра́ведное воздая́ние в день Стра́шнаго Суда́ и со все́ми святы́ми воспое́м и просла́вим Живонача́льную Тро́ицу, Отца́ Непости́жимаго, И́стиннаго и Единоро́днаго Сы́на и Свята́го Уте́шителя Ду́ха, во ве́ки. Ами́нь.

глас 3

Це́ркве Христо́вы свети́льницы,/ всея́ Росси́и украше́ние,/ святи́и вси, в земли́ Сиби́рстей просия́вши,/ Влады́ку всех моли́те/ мир вселе́нней дарова́ти// и душа́м на́шим ве́лию ми́лость.

Перевод: Церкви Христовой светильники, всей России украшение, все святые, в земле Сибирской просиявшие, Владыку всех молите даровать вселенной мир и душам нашим великую милость.

Величание

Велича́ем вас,/ святи́и вси в земли́ Сиби́рстей просия́вшии,/ и чтим святу́ю па́мять ва́шу,/ вы бо мо́лите за нас// Христа́ Бо́га на́шего.

Минея, 31 Марта, Канон святителю

Глас 8

Песнь 1

Ирмос: Ди́вному Бо́гу вели́чия принесе́м,/ и великоле́пно с на́ми/ да воспое́т земля́ и не́бо/ я́сно сла́ву Его́.

Припев: Святи́телю, о́тче Инноке́нтие, моли́ Бо́га о на́с.

Отве́рзем уста́ похва́льная,/ уясни́м язы́к в па́мяти, вси ве́рнии, но́ваго Росси́йскаго свети́льника,/ апо́стола Сиби́ри и Аме́рики, святи́теля Инноке́нтия,/ и с ним ди́вному Бо́гу вели́чия принесе́м, и воспое́м сла́ву Его́.

Припев: Святи́телю, о́тче Инноке́нтие, моли́ Бо́га о на́с.

Госпо́дню гла́су, призва́вшему просвети́ти лю́ди, во тьме́ седя́щия, послушли́в был еси́,/ страну́ свою́ оста́вив, да́льнему и тру́дному пути́ вда́лся еси́/ и, дости́г к Алеу́тским острово́м,/ там о апо́стольски потруди́лся еси́,/ вели́чия ди́вному Бо́гу принося́ и воспева́я сла́ву Его́.

Сла́ва Отцу́ и Сы́ну и Свято́му Ду́ху.

Оте́ц и учи́тель был еси́ алеу́том, све́том Ева́нгелия тех просвети́в,/ научи́л еси́ их плинфоде́ланию 50, каменозда́тельству и ины́м худо́жеством/ и с по́мощию их храм в че́сть Вознесе́ния Госпо́дня воздви́гл еси́,/ освяти́л еси́ его́,/ да вси прино́сят в нем вели́чия Бо́гу, ди́вному во святы́х, и пою́т сла́ву Его́.

И ны́не и при́сно и во ве́ки веко́в. Ами́нь.

Богородичен: Спаси́тельное еси́ приста́нище и покро́в призыва́ющих Тя, Богороди́тельнице Пречи́стая,/ те́мже от души́ призыва́ем Тя те́пле:/ Влады́чице, спаси́ ны/ и научи́ нас ди́вному Бо́гу вели́чия приноси́ти и воспева́ти сла́ву Его́.

Песнь 3

Ирмос: Уподо́би мя, Христе́, у́мно горе́ Сио́нстей,/ возвы́сивый и утверди́вый в наде́жди о Тебе́/ и иска́павый ро́су благода́ти,/ Человеколю́бче.

Припев: Святи́телю, о́тче Инноке́нтие, моли́ Бо́га о на́с.

Подража́тель любве́ Отца́ Небе́снаго,/ я́ко сын любве́, в любви́ пребыва́яй,/ любо́вию Христо́вою возлюби́л еси́ ча́да твоя́, святи́телю Инноке́нтие,/ просвеще́ния их ра́ди в ма́лем кораблеце́,/ волна́ми морски́ми обурева́емь, преплыва́л еси́ от о́строва на о́стров, пропове́дуя Христа́:/ мно́гия жи́тели прибре́жия Бе́рингова мо́ря крести́л еси́ и моли́лся еси́ о них,/ я́ко да иска́пает на них ро́су благода́ти Своея́ Человеколю́бец.

Припев: Святи́телю, о́тче Инноке́нтие, моли́ Бо́га о на́с.

О́стров Ситх апо́стольскими твои́ми труды́, святи́телю Инноке́нтие, хва́лится,/ та́мо бо пле́мя колоше́й просвети́л еси́/ и храм во и́мя Арха́нгела Михаи́ла воздви́гл еси́,/ в не́мже и до ны́не возно́сится моле́ние Го́споду Бо́гу,/ источи́вшему на них ро́су благода́ти Своея́.

Сла́ва Отцу́ и Сы́ну и Свято́му Ду́ху.

Доброде́тельми, я́ко луча́ми со́лнечными, просвети́л еси́ неве́рных в да́льних страна́х,/ пятьна́десять бо лет апо́стольски труди́лся еси́ на Алеу́тских острове́х,/ иде́же не то́чию па́стырь и учи́тель,/ но и строи́тель, и врач, и всем вся в ну́ждах был еси́,/ да вся приобря́щеши и приведе́ши Христу́. Те́мже от святи́теля Филаре́та Моско́вскаго проро́чески,/ я́ко равноапо́стол, пре́жде твоего́ прославле́ния на земли́, почте́н был еси́/ и от Бо́га венча́н сла́вою на Небеси́,/ Его́же моли́, да низпо́слет и нам ро́су благода́ти Своея́ Человеколю́бец.

И ны́не и при́сно и во ве́ки веко́в. Ами́нь.

Богородичен: Арха́нгельскую пе́снь, е́же ра́дуйся, Тебе́ зове́м, Богоневе́сто, Госпо́дь с Тобо́ю,/ ра́дуйся, Ра́досте А́нгелов и всех челове́ков, сла́вящих Тя, весе́лие,/ спаси́ ду́ши пою́щих Тя, Богоро́дице Чи́стая.

Седален, глас 2

Орга́не доброгла́сный,/ возгреме́вый Христо́во Ева́нгелие лю́дем Сиби́ри и Аме́рики/ и тем возвести́вый сло́ва Бо́жия смотре́ние,/ ум Го́рний,/ до́ле жи́тельствуяй и в Небесе́х Богомы́слием пребыва́яй,/ ты, управля́я твою́ па́ству, умно́жил еси́ церко́вная ча́да/ усынови́в я Небе́сному Отцу́,/ и ны́не, святи́телю Инноке́нтие, моли́ся о нас,/ всеблаже́нную па́мять твою́ ра́достно пра́зднующих.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богородичен: С ве́рою и любо́вию притека́ющих к Тебе́/ и со стра́хом пою́щих Тя/ моли́твенный глас услы́ши, Влады́чице.

Песнь 4

Ирмос: Всел еси́ на ко́ни, апо́столы Твоя́, Го́споди,/ и прия́л еси́ рука́ма Твои́ма узды́ их,/ и спасе́ние бы́сть ежде́ние Твое́/ ве́рно пою́щим;/ сла́ва си́ле Твое́й, Го́споди.

Припев: Святи́телю, о́тче Инноке́нтие, моли́ Бо́га о на́с.

Смотре́нием Бо́жиим Це́рковь Ру́сская в земли́ Америка́нстей ка́федру святи́тельскую учрежда́ет/ и тя во епи́скопа Камча́тскаго, Кури́льскаго и Алеу́тскаго поставля́ет./ Ты же, святи́телю Инноке́нтие, во́ли Госпо́дней повину́яся, корми́ло правле́ния прие́млеши,/ ди́вному Па́влу, апо́столу язы́ков, подража́я, земли́ обши́рныя обтека́еши,/ просвеще́нную твою́ па́ству науча́я пе́ти:/ сла́ва си́ле Твое́й, Го́споди.

Припев: Святи́телю, о́тче Инноке́нтие, моли́ Бо́га о на́с.

Труды́ твои́ми апо́стольскими просвети́л е́сть Госпо́дь лю́ди, во тьме́ и се́ни сме́ртней седя́щия,/ те́мже, я́ко до́брый па́стырь, святи́телю Инноке́нтие,/ указа́л еси́ им пу́ть в Ца́рство Небе́сное, всех науча́я пе́ти:/ сла́ва си́ле Твое́й, Го́споди.

Сла́ва Отцу́ и Сы́ну и Свято́му Ду́ху.

О тебе́, просвети́теле свое́м, алеу́ты и колоши́ возра́довашася/ и, до дне́сь внима́я уче́нию твоему́, прино́сят в же́ртву Бо́гу труды́ рук свои́х,/ благода́рно любо́вию почита́я тя,/ научи́вшаго их воспева́ти еди́ными усты́:/ сла́ва си́ле Твое́й, Го́споди.

И ны́не и при́сно и во ве́ки веко́в. Ами́нь.

Богородичен: Пыла́ющий страсте́й пла́мень в нас угаси́,/ исто́чник слез да́руй, Влады́чице,/ я́ко да и́ми оты́мем скве́рну смире́нных душ на́ших и обря́щем ми́лость, во е́же пе́ти:/ сла́ва си́ле Твое́й, Го́споди.

Песнь 5

Ирмос: Повеле́ния Твоя́ просвеще́нием, Христе́ Бо́же,/ я́ко Благ, показа́л еси́,/ зане́, Светода́вче,/ от но́щи у́тренююще, сла́ву возсыла́ем.

Припев: Святи́телю, о́тче Инноке́нтие, моли́ Бо́га о на́с.

Чистото́ю жития́ твоего́ и неуста́нными труды́ твои́ми/ в нощи́ неве́дения седя́щия язы́ки Камча́тския – коря́ки, чу́кчи и тунгу́сы ко све́ту Христо́ву обрати́л еси́, святи́телю Инноке́нтие,/ и научи́л еси́ их у́треневати и сла́ву Бо́гу возсыла́ти.

Припев: Святи́телю, о́тче Инноке́нтие, моли́ Бо́га о на́с.

Еле́ем любве́ твоея пома́зал еси́ лю́ди, на морски́х острове́х су́щия,/ апо́стольски утвержда́я Це́рковь Христо́ву, в ве́ре покланя́тися Триеди́ному Бо́гу./ Сего́ ра́ди со апо́столы ра́дуешися,/ прие́мля по́честь благове́стника Христо́ва.

Сла́ва Отцу́ и Сы́ну и Свято́му Ду́ху.

Ле́ности и вся́каго мирска́го пристра́стия в жи́зни сей уклони́лся еси́,/ пло́ть свою́ труда́ми и по́двигами истни́л 51 еси́,/ посеща́я па́ству свою́ в Яку́тске и Приаму́рстей стране́,/ иде́же хра́мы Бо́жия созда́в,/ град Благове́щенск святи́тельскою ка́федрою украси́л еси́/ и, но́выя о́вцы ста́да Христо́ва поуча́я,/ сло́во Бо́жие на их язы́ки преве́л еси́:/ да всяк язы́к, от но́щи у́тренюя, сла́ву возсыла́ет Бо́гу.

И ны́не и при́сно и во ве́ки веко́в. Ами́нь.

Богородичен: О Богороди́тельнице, ра́дости Пода́тельнице,/ ве́рою сла́вящия Тя и от души́ пою́щия Тя/ ра́дости неизрече́нныя испо́лни и Све́та невече́рняго сподо́би,/ Де́во Богоблагода́тная, Влады́чице.

Песнь 6

Ирмос: Отве́ргл мя еси́/ во глубины́ се́рдца морска́го,/ и ви́дех чудеса́ Твоя́, Го́споди.

Припев: Святи́телю, о́тче Инноке́нтие, моли́ Бо́га о на́с.

В корабли́ с тобо́ю плову́щии, в пучи́не бу́рею потопля́еми,/ мо́ре, повину́вшееся тебе́, ви́деша и у́жасом одержи́ми бы́ша,/ те́мже, от безду́шнаго научи́вшеся, свя́тости твое́й поклони́шася, святи́телю Инноке́нтие,/ прославля́юще чудеса́ Госпо́дня.

Припев: Святи́телю, о́тче Инноке́нтие, моли́ Бо́га о на́с.

Егда́ во́лею Бо́жиею к бе́регу Япо́нии приста́л еси́, святи́телю Инноке́нтие,/ та́мо сподви́жнику твоему́, равноапо́стольному Никола́ю, благослове́ние на труды́ апо́стольския препода́л еси́,/ утверди́в в нем ре́вность Бо́жию просвеща́ти лю́ди япо́нския,/ сего́ ра́ди и просла́влена еста́, я́ко благове́стника Христо́ва.

Сла́ва Отцу́ и Сы́ну и Свято́му Ду́ху.

Ко́рмчий иску́сный корабля́ церко́внаго,/ чу́дно по вода́м морски́м преплы́л еси́/ и в земле́ непло́дней ра́лом слове́с твои́х олядене́вшая люде́й се́рдца возде́лал еси́,/ Боже́ственное се́мя в них все́яв,/ плод кра́сный Христу́, святи́телю Инноке́нтие, возрасти́л еси́, взыва́я ко Го́споду:/ на о́стровех морски́х ви́дех чудеса́ Твоя́, Го́споди.

И ны́не и при́сно и во ве́ки веко́в. Ами́нь.

Богородичен: Упова́ние и наде́жда на́ша Ты еси́, Пресвята́я Богоро́дице,/ спаси́ страну́ на́шу правосла́вную и лю́ди Твоя́,/ моля́щияся и и́мя Твое́ призыва́ющия.

Кондак, глас 4

И́стинный и нело́жный учи́тель был еси́:/ запове́данная бо Го́сподем сам сотвори́в,/ и́мже учи́л еси́ и наказа́л еси́ ко благоче́стию приходя́щая ча́да,/ неве́рныя вразумля́л еси́ позна́ти ве́ру и́стинную,/ просвеща́я их святы́м Креще́нием./ Сего́ ра́ди со апо́столы ра́дуешися,/ прие́мля по́честь благове́стника Христо́ва.

Икос

Пе́рвый се́ятель был еси́ духо́вных доброде́телей,/ архиере́й и учи́тель тобо́ю просвеще́нным в стра́нах Сиби́ри и Аме́рики./ Мно́гия язы́ки от неве́рия в ве́ру Христо́ву приве́л еси́,/ чи́стым житие́м Бо́гу угожда́ти тех наставля́я./ Сего́ ра́ди прославля́ем тя, святи́телю Инноке́нтие,/ я́ко благове́стника Христо́ва.

Песнь 7

Ирмос: В нача́ле зе́млю основа́вый/ и Небеса́ сло́вом утверди́вый,/ благослове́н еси́ во ве́ки, Го́споди, Бо́же оте́ц на́ших.

Припев: Святи́телю, о́тче Инноке́нтие, моли́ Бо́га о на́с.

И́го Христо́во на ра́мо взем, после́довал еси́ стопа́м Его́,/ апо́стольски в да́льней стране́ потруди́лся еси́,/ тобо́ю просвеще́нным ча́дом сло́во Бо́жие на яку́тском язы́ке возвести́л еси́,/ да прославля́ют они́ Основа́вшаго зе́млю на вода́х, поя́ Го́сподеви:/ благослове́н еси́ во ве́ки, Бо́же оте́ц на́ших.

Припев: Святи́телю, о́тче Инноке́нтие, моли́ Бо́га о на́с.

Слове́сную па́ству Христо́ву благово́нным зла́ком богоуго́дно воспита́вый/ и на пра́вый христоподража́тельнаго жития́ пу́ть боголе́пно наста́вивый,/ вручи́л еси́ прее́мником твои́м/ и, Го́споду изво́лившу, стопы́ твоя́ в первопресто́льный град Москву́ напра́вил еси́, поя́ Го́сподеви:/ благослове́н еси́ во ве́ки, Бо́же оте́ц на́ших.

Сла́ва Отцу́ и Сы́ну и Свято́му Ду́ху.

Па́стырски жезл прие́м, святи́телю Инноке́нтиев Про́мыслом Бо́жиим води́м был еси́,/ на престо́л моско́вский прише́д,/ пра́здник святи́телей Петра́, Алекси́я, Ио́ны и Фили́ппа учреди́л еси́,/ и, по апо́столу, всем вся быв,/ да всех ко Христу́ приведе́ши и ку́пно с ни́ми вопие́ши:/ благослове́н еси́ во ве́ки, Го́споди, Бо́же оте́ц на́ших.

И ны́не и при́сно и во ве́ки веко́в. Ами́нь.

Богородичен: Ра́дуйся, престо́ле Госпо́день огнезра́чный;/ ра́дуйся, заре́ невеще́ственнаго блиста́ния;/ ра́дуйся, о́блаче возсия́вшаго Со́лнца Пра́веднаго – Христа́, Спа́са на́шего, Ему́же пое́м:/ благослове́н еси́, Го́споди, Бо́же оте́ц на́ших.

Песнь 8

Ирмос: Покрыва́яй вода́ми превы́спренняя Своя́,/ полага́яй мо́рю преде́л песо́к/ и содержа́й вся,/ Тя пое́т со́лнце, Тя хва́лит луна́,/ Тебе́ прино́сит пе́снь вся тва́рь,/ я́ко Соде́телю всех во ве́ки.

Припев: Святи́телю, о́тче Инноке́нтие, моли́ Бо́га о на́с.

Архиере́й сый, святи́телю Инноке́нтие,/ архипа́стырем на́шим в моли́твах спосо́бствуй,/ да пра́во пра́вят сло́во и́стины,/ Це́рковь Правосла́вную огради́, страну́ на́шу сохрани́,/ су́етными и стра́стными помышле́нии мяту́щийся ум наш исцели́,/ разсла́бленная сердца́ на́ша укрепи́, ве́ру в нас умно́жи,/ да сла́вим Соде́теля всех во ве́ки.

Припев: Святи́телю, о́тче Инноке́нтие, моли́ Бо́га о на́с.

Все́льшаяся в тя благода́ть Свята́го Ду́ха святи́теля тя изря́дна нам показа́,/ светоно́сными равноапо́стольных исправле́ний заря́ми/ Це́рковь Росси́йскую све́тло озари́, священнонача́льниче Инноке́нтие,/ те́мже де́ло Бо́жие на земли́ соверши́в, предугото́вав же себе́ Го́сподеви,/ по прия́тии Святы́х Та́ин Христо́вых о Бо́зе почи́л еси́,/ да со святы́ми пое́ши на Небеси́:/ благослове́н еси́, Го́споди, Бо́же оте́ц на́ших, во ве́ки.

Сла́ва Отцу́ и Сы́ну и Свято́му Ду́ху.

Любы́ николи́же отпа́дает, глаго́лет Боже́ственный Дух уста́ми первоверхо́внаго апо́стола Па́вла,/ в чудесе́х же любве́ твоея́ и́стина сия́ извести́ся, святи́телю Инноке́нтие,/ я́ко и по сме́рти ча́дом твои́м явля́ешися/ и пе́ти Го́сподеви поуча́еши во вся ве́ки.

И ны́не и при́сно и во ве́ки веко́в. Ами́нь.

Богородичен: Я́же по благода́ти дарова́нная от Бо́га Помо́щнице нам всем, христиа́ном,/ Того́ моли́, Всеблага́я и Непоро́чная,/ я́ко да пре́зрит на́ша безчи́сленная согреше́ния/ и изба́вит пла́меннаго томле́ния, и тьмы́ кроме́шныя, и му́ки вся́кия.

Песнь 9

Ирмос: Благослове́н Госпо́дь, Бог Изра́илев,/ воздви́гнувый рог спасе́ния нам/ в до́му Дави́дове, о́трока Своего́,/ в них же посети́ нас Восто́к с высоты́/ и напра́вил ны е́сть на пу́ть ми́ра.

Припев: Святи́телю, о́тче Инноке́нтие, моли́ Бо́га о на́с.

Ю́же стяжа́л еси́ честно́ю Твое́ю Кро́вию,/ Це́ркве Твоея, Христе́, ча́да утверди́ и напра́ви на пу́ть ми́ра,/ та́ко воздыха́л еси́ к Сы́ну Бо́жию, святи́телю о́тче наш Инноке́нтие,/ Ца́рствия Небе́снаго еще́ на земли́ сын быв.

Припев: Святи́телю, о́тче Инноке́нтие, моли́ Бо́га о на́с.

Тече́ние восприя́т и пу́ть соверши́,/ зе́млю непло́дну моли́твами твои́ми добропло́дну показа́,/ о принося́щих тебе́ пе́ние сие́, святи́телю Инноке́нтие, Христа́ Бо́га на́шего моли́,/ да принесе́м покая́ния плоды́,/ я́ко да посети́т и нас Восто́к с высоты́/ и напра́вит стопы́ на́ша на пу́ть ми́ра.

Сла́ва Отцу́ и Сы́ну и Свято́му Ду́ху.

Смотре́нием Бо́жиим и святи́тельским благослове́нием/ руко́ю мое́ю приноси́мое твои́м трудо́м похвале́ние, святи́телю Инноке́нтие, не отри́ни,/ но приими́ и моли́ Христа́ Бо́га,/ да изба́вит мя шу́ияго стоя́ния и напра́вит мя на пу́ть ми́ра.

И ны́не и при́сно и во ве́ки веко́в. Ами́нь.

Богородичен: Я́ко похвалу́ А́нгелов и челове́ков/ восхваля́ем Тя вси, Де́во Мари́е, и ве́рно мо́лимся, Всепе́тая:/ моле́ние на́ше приими́ и проше́ния испо́лни.

Светилен

Пло́тию, а́ще и почи́л еси́, святи́телю Инноке́нтие,/ но ду́хом жив сый,/ в Ца́рствии невече́рнем со Христо́м ца́рствуеши/ и мо́лишися Ему́ о призыва́ющих тя ве́рою и любо́вию.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богородичен: Влады́чице, Де́во Чи́стая, изба́ви нас лю́тых всех,/ умоля́ющи на Кресте́ Пригвозди́вшаго грехи́ на́ша,/ и сподо́би нас одесну́ю Его́ ста́ти, егда́ прии́дет во сла́ве Свое́й.