Святитель Иннокентий (Смирнов), епископ Пензенский

На велицей вечерни
На Господи, воззвах: стихиры, глас 1.
Подобен: Начало ныне положим:
Ныне время наста, о празднолюбцы,/ во псалмех и пениих прославити/ Бога, дивнаго во святых Своих,/ воздвигшаго нам днесь Иннокентия преславнаго,/ молящагося тепле о душах наших.
Песненными добротами/ украшается днесь Церковь первородных,/ воспевающи невинности тезоименитаго,/ святителя Пензенскаго и Саратовскаго,/ яко предивна своего ходатая/ и молитвенника о душах наших.
Троицы Пребезначальныя служителя предобра/ и лжемудрствований посрамителя изрядна/ память ныне нам наста./ Темже убо стецемся, людие,/ похвалити сего тщащеся,/ яко велика земли нашея светильника/ и молитвенника о душах наших.
Ины стихиры, глас 4:
Сияет, яко солнце, светлостию/ память святителя Твоего, Господи, Иннокентия,/ обличившаго нечестие златословесными глаголы,/ человекоугодие и высоковыйных превозношение посрамившаго,/ кротких землю достигшаго,/ егоже молитвами даруй нам грехов очищение,/ яко Благ и Человеколюбец.
Врачуеши страсти и души просвещаеши верных,/ притекающих ко святей раце мощей твоих,/ ангелов собеседниче, архиереев сопрестольниче,/ апостолов единонравне, исповедников равностоятелю,/ преподобных сожителю, благоверия поборниче,/ предстателю наш, славне Иннокентие.
Многим воздержанием, святителю, жизнь твою украсив,/ путь, ведущий в жизнь вечную, указал еси/ и евангельским учением шествовал еси,/ жестоким же житием плоть твою изнуряя,/ гордаго змия воздержанием победил еси./ Темже, на Небесех водворяяся,/ Богови предстоиши, святе Иннокентие,/ Егоже моли согрешений оставление даровати/ чтущим любовию святую память твою.
Слава, глас тойже:
Радуйся и веселися о Господе/ богоизбранная паство святителя,/ ныне песньми венчаемаго,/ яко, таковаго светильника и отца себе имущи,/ духовная чада нарекостеся,/ егоже прослави Бог знаменьми и чудесы преславными,/ обильно исцеления приходящим к нему дарующа./ Темже, припадающе, ему возопиим:/ о, всеблаженне Иннокентие, отче наш,/ непрестанно моли Всесвятую Троицу,/ да Небеснаго Царствия улучити сподобимся.
И ныне, Богородичен: Иже Тебе ради:
Вход. Прокимен дне. И чтения три святительская.
На литии стихира, глас 4:
Суетная мудрования отложше, блаженне,/ Православия держатися неотступно научал еси/ и, стеснения скорбная претерпевая,/ восприятие будущия радости провидел еси,/ да многотрудным житием и ученьми/ источник приснотекущий небесныя сладости/ нам, недостойным, покажеши.
Слава, глас тойже:
Вся убо могий о укрепляющем тя Христе,/ болезни и немощи смиренно претерпевая,/ на Бога все упование возложил еси,/ мирскаго же пристрастия гнушаяся/ и сущая мира, яко не сущая, вменяя,/ чистым умом и немятежным сердцем выну Богу послужил еси,/ темже, сосуд Святаго Духа явився,/ моли, святителю Иннокентие, помиловатися душам нашим.
И ныне, Богородичен:
Несть душам нашим ослабы, ниже избавления,/ токмо молитвами Твоими, Мати Дево,/ и милостию от Тебе Воплощшагося Спаса Христа,/ к Нему же взываем,/ на ходатайство Твое надежду крепку имуще,/ да спасет и сохранит всех нас,/ песньми Тя, яко Богородицу, величающих.
На стиховне стихиры, глас 1:
О, блаженне святителю Иннокентие,/ егда суемудреннии восташа на Церковь Божию,/ мечем обоюдоострым учения истиннаго сих посекл еси,/ верныя же щитом правоверия оградил еси,/ сего ради поношения претерпел еси,/ да земли Русской явишися/ новое и преславное украшение.
Стих: Нога моя ста на правоте,/ в церквах благословлю Тя, Господи.
О, пречудне отче Иннокентие,/ ныне Церковь Русская ублажает тя,/ яко тверда исповедника веры,/ чудес обильных реку источающаго,/ и святителя всечестна,/ паству твою добре упасшаго,/ мы же, земнороднии,/ яко чада ко отцу, тебе вопием,/ еже помиловатися нам в День судный.
Стих: Суди ми, Господи,/ яко аз незлобою моею ходих.
О, славне Иннокентие,/ егда скорбныя нахождения во смирении претерпел еси,/ тогда глас Господень пресладкий на тебе исполнися,/ яко изгнаннии правды ради блажени суть,/ сего ради, венцем нетленным украсився,/ дерзновение велие от Владыки приял еси,/ еже молитися о душах наших.
Слава, глас 8:
Земля Русская, духовно процветши,/ яко крин прекрасный износит днесь/ святителя пречудна Иннокентия,/ иже молитвами своими облагоухавый ю,/ явися нам великий заступник/ и ходатай о душах наших.
И ныне, Богородичен, глас тойже: Безневестная Дево:
Тропарь, глас 5:
От юности смиренным нареченный,/ во иночестве же чистоте тезоименный,/ духовныя мудрости любитель явился еси,/ златовещанный благочестия учителю/ и лживых пагубных учений обличителю,/ за Истину нечестивыми гонимый,/ незлобие и кротость проповедавый/ и паству Пензенскую ревностне пасый,/ святителю всечестне Иннокентие,/ моли Христа Бога умудрити нас во спасение.
На утрени
На Бог Господь: тропарь святаго дважды. Слава, и ныне, Богородичен.
По 1-м стихословии седален, глас 3:
Человецы ликовствуют духовно, обретоша бо молитвенника и предстателя и, похвальными венцы Иннокентия украшающе, яко угодника Христова прославляют. Егоже молитвами, Господи, от страстей и бед избави нас.
Слава, и ныне, Богородичен:
Избави нас молитвами Твоими, Владычице, согрешений бездны, демонскаго озлобления, языческаго пленения и злонравных лукавнейшаго вреда, да Тя, яко Избавительницу нашу, величаем.
По 2-м стихословии седален, глас 4:
Страдания за истину подъем, святителю, теми душу твою очистил еси, ныне же Христа Бога моли, да в доброделании нас укрепит, грехов очищение подаст и спасет души наша.
Слава, и ныне, Богородичен:
Настави ны на путь покаяния, уклоняющияся присно в безпутие зол и Преблагаго прогневавшия Господа, Неискусобрачная Благословенная Марие, Заступнице Усердная рода христианскаго.
По полиелеи седален, глас 2:
Отребие миру, погружаему в пучине лжеучения, вменился еси, святе Иннокентие, но обаче не возможе тя разлучити от любве Божия, яже о Христе Иисусе, Господе нашем, ни скорбь, ни теснота, ни самая смерть.
Слава, и ныне, Богородичен:
Востани, Пречистая Мати, и воздежи руце Твои молебне к Сыну Твоему и Богу купно со святителем Иннокентием, да избудем многих бед и зол, присно по грехом нашим обуреваемии.
Степенна, 1-й антифон 4-го гласа. Прокимен, глас 4: Священницы Твои облекутся в правду/ и преподобнии Твои возрадуются. Стих: Блажен муж, бояйся Господа, в заповедех Его восхощет зело. Всякое дыхание: Евангелие от Луки, зачало 64.
По 50-м псалме стихира, глас 6:
Святителю отче Иннокентие,/ тобою мнози грады и обители хвалятся,/ Московския бо земли славное прозябение явился еси,/ град же святаго Петра и Новаграда честная обитель Юрьевская/ постническими подвиги твоими украшаются,/ земля Пензенская и пределы Саратовския/ процветоша, словесы твоими напаяеми,/ ныне же, во Граде Небеснем вселяяся,/ поминай нас, чтущих память твою.
Канон, глас 2, егоже краегранесие: Нищету духовную стяжати сподоби, отче.
Песнь 1
Ирмос: Грядите, людие,/ поим песнь Христу Богу,/ раздельшему море и наставльшему люди,/ яже изведе из работы египетския,/ яко прославися.
Небесный Царю, смиренную душу мою от скверн очисти и слова благодать низпосли, да возмогу достойно воспети угодника Твоего, преславнаго Иннокентия.
Имуще тя предстателя добра к щедрому Богу, нас, напастьми и обстоянии скорбными одержимых, укрепи, подая руку спасения, святителю милостиве Иннокентие.
Щедр и незлобив пастве своей явился еси, отче Иннокентие, темже, Духа Божия исполненный, ума моего омрачение отжени, страстей бурю утиши, к безстрастия пристанищу управи и от злых устен защити твоих молитв покровом.
Богородичен: Егда Божиим повелением от временныя жизни отъити хощу, Пречистая, бесовския руки мя свободи, Ангелы в спутники подаждь и рая вкусити сподоби, идеже Иннокентий святитель с безплотными лики сладости божественныя наслаждается.
Песнь 3
Ирмос: На камени мя веры утвердив,/ разширил еси уста моя на враги моя,/ возвесели бо ся дух мой, внегда пети:/ несть свят, якоже Бог наш,/ и несть праведен, паче Тебе, Господи.
Припев: Святителю отче Иннокентие, моли Бога о нас.
Тя, смиренне Иннокентие, всесветла светильника, не под спудом, но на высоте свещника Церкве Христовы поставлена, усердно молим: светоносными лучами глубокую тьму греха отжени, неверных к познанию Истины настави, шатания умов низложи, нас же во Православии укрепи.
Уставил еси, премудре Иннокентие, струями твоего богоглаголиваго языка ложныя токи суемудренных, иже, яко безсильнии, не возмогоша мутными водами лжеучения потопити ны. Темже вопием ти: токи страстей наших изсуши и ко благочестию настави.
Духа Божия исполнився, зловония века сего низложил еси, кадильнице благовонная, Иннокентие блаженне, и паству твою учением Православныя Церкве облагоухал еси. Темже тя, яко наставника предобра, верно восхваляем.
Богородичен: Упование и стена и тихое пристанище еси людем Твоим, Пресвятая Дево, Всесвятаго Сына Твоего умоли спасение нам улучити, да непрестанно в невечернем свете славу Триединому Богу воспеваем.
Ин кондак, глас 3.
Подобен: Дева днесь:
Днесь святитель Христов Иннокентий/ предстоит Престолу Божию/ и с лики святых за ны молится Богу,/ емуже ныне со умилением покланяемся/ и во псалмех и пениих величаем,/ обретохом бо молитвенника ко Превечному Богу.
Седален, глас 3:
О, неизреченныя благости Божия! О, неизглаголаннаго Его смотрения! Честныя мощи святителя Иннокентия ныне обретошася, души верных утешающе и на брань противу козней лукаваго укрепляюще. К нимже припадающе, усердно вопием: ущедри нас молитвами твоими, святителю Бога Всещедраго.
Слава, и ныне, Богородичен:
Иже Отцу Сопрестольный Сын на земли воплощся, яко человек, из утробы Твоея, Чистая, пройде, порфирою кровей Твоих в наше оболкийся естество, да падшия ны человеки возставит и Небеснаго Сиона гражданы явит.
Песнь 4
Ирмос: Услышах, Господи,/ славное Твое смотрение/ и прославих, Человеколюбче,/ непостижимую Твою силу.
Храм Всесвятаго Духа, добродетельми сияяй, мирови явился еси, святителю честный, научение книжное прилежно стяжав, тайны неизреченныя судеб Божиих постигл еси, и списанием дел времен минувших верныя премудро во благочестии даже доныне наставляеши, да зовем благодарне: слава силе Твоей, Господи.
Оружием мудрости божественныя препрел еси нечестивых, исповедниче честный. Поношения и гонения за истину благодушне претерпевая, земную мудрость нивочтоже вменяя, непрестанно взывал еси: слава силе Твоей, Господи.
В Небесныя чертоги Ангели Божии вознесоша чистую душу твою, блаженне, идеже со святители и исповедники Престолу Всевышняго предстоиши, укрепльшему тя на подвиги велия, непрестанно взывая: слава силе Твоей, Господи.
Богородичен: Недвижимое утверждение веры и яко многоценный дар душам нашим, Богородицу во псалмех и пениих духовных восхвалим, вернии, да избавит от мук вопиющих к Рождшемуся из Нея: слава силе Твоей, Господи.
Песнь 5
Ирмос: Света Подателю и веков Творче, Господи,/ во свете Твоих повелений настави нас:/ разве бо Тебе, иного бога не знаем.
Укрепляемь силою Троическою, преблаженне, проповедник велегласный пастве Саратовской явился еси, вопия: возвеличите Господа со мною, и вознесем Имя Его вкупе. Темже и мы Владыку Небесе и земли величаем: инаго бо разве Тебе бога не знаем.
Юность свою постом и молитвою благоукрасил еси, мудре, и священства благодать непорочно стяжати сподобился еси. И ныне, Престолу Вседержителя предстоя, молися, славне Иннокентие, да от языка лукаваго и озлобления свободимся и огня вечнаго избавимся.
Святителей удобрение и исповедников похвало, чудес источниче, умоли Зиждителя, Егоже пришествие при дверех есть, обрести нам грехов оставление.
Твоих словес наставления, еже Православие в чистоте всем содержати, чужеземным же лжеучением никакоже прилеплятися, объяша всю землю Русскую, ты бо Вышнему выну взывал еси: инаго бо разве Тебе бога не знаем.
Богородичен: Яже мирови мир подавшая и Начальника тишины рождшая, укроти волнение страстей моих, Чистая, и на камени безстрастия мя утверди, Сыну Твоему взывающа: инаго бо разве Тебе бога не знаем.
Песнь 6
Ирмос: Ко Господу от кита Иона возопи:/ Ты мя возведи из глубины ада, молюся,/ да, яко Избавителю, во гласе хваления/ истины же Духом пожру Тебе.
Житием твоим, а не токмо ликом, святителю Димитрию Ростовскому подобяся, душу твою, блаженне, яко рай богонасажденный, сотворил еси; безумнии же, яко сор, отринуша тя, не терпяще силы словес твоих. Темже, отче, и нас темных падений греховных избави.
Архиерей чуден и нравов исправитель и душ устроитель показался еси, ревностне о людех твоих пекийся, мирским же начальником противустал еси, злоковарство и лихоимство тех обличая, святе Иннокентие.
Туне есть тщание наше достойное пение тебе сотворити, Иннокентие предивне, но, яко Христос прият вдовицы две лепте, тако и ты не возгнушайся похвальных словес наших и малый сей труд приими, в похвалу тебе приносимый.
Богородичен: Избавльшеся Тобою от бед и скорбей, Мати Безневестная, и Тебе ради радость получивше, Тя, яко Подательницу благую и Заступницу верную, вси величаем.
Кондак, глас 8:
Священнаго и боговещаннаго проповедника/ и дивнаго премудрости учителя/ вчинил еси, Господи, в наслаждение благих Твоих и покой,/ труды бо онаго и блаженную кончину/ паче всякаго всеплодия прием,/ едине Прославляяй святыя Своя.
Икос:
Житие непорочное явил еси, святителю Иннокентие, невинности тезоименный, и, веры ради скорбных нахождения претерпев, чистою душею к Престолу Господню притекл еси, прехвальне. Ныне же, райския пищи наслаждаяся, о иже на земли поющих тя Владыку Христа умоли, знаменьми и чудесы Прославляющаго святыя Своя.
Песнь 7
Ирмос: Образу златому, на поли Деире служиму,/ трие Твои отроцы небрегоша безбожнаго веления,/ посреде же огня ввержени, орошаеми, пояху:/ благословен еси, Боже отец наших.
Скорбная искушения и лютая обстояния смирением попрал еси, тех и нас молитвами твоими избави, блаженне, вопиющих: благословен еси, Боже отец наших.
Пение псаломское воспеша людие, и при словесех: аз же, Господи, уповаю на Тя, душа твоя святая от тела разлучися. Нас же, на всемощныя молитвы твоя надеющихся, утверди непрестанно взывати: благословен еси, Боже отец наших.
О нас милостивныя твоя длани ко Владыце молебне простирай, святе Иннокентие, и, соблазнов избавляя, неотлучно с нами духом пребывай, отче преподобне, наставляя в молитве звати Творцу: благословен еси, Боже отец наших.
Богородичен: Да человеки падшия обожит, явися Сын Твой, Владычице, совершен Человек. Сего убо моли причастники Божества сотворити поющия: благословен еси, Боже отец наших.
Песнь 8
Ирмос: В пещь огненную ко отроком еврейским снизшедшаго/ и пламень в росу преложшаго Бога/ пойте, дела, яко Господа,/ и превозносите во вся веки.
О всеславнем прославлении твоем, святителю, людие Русстии возвеселишася, явился бо еси чудотворец изящный и ходатай пред Богом предивный, Того умоляя о вопиющих: пойте, дела, яко Господа, и превозносите во вся веки.
Божиим Промыслом сохранены быша от поругания святыя мощи твоя, святителю Иннокентие, аще и храм, идеже погребено бысть тело твое, от безбожных разорися. Ныне же целы явишася и, яко звезда пресветлая, просвещают всех притекающих к ним и Богу зовущих: пойте, дела, яко Господа, и превозносите во вся веки.
Избави нас, святителю Христов, сетей вражиих молитвами твоими и окорми живот наш силою Всещедраго Бога, Емуже с тобою покланяемся, велегласно вопиюще: да благословит тварь вся Господа и превозносит во вся веки.
Богородичен: Отеческия славы не отступль, волею к нашей худости снизшел еси, Сладчайший Иисусе, и от Девы плоть приял еси. Еяже молитвами избави рабы Твоя от бед и скорбей.
Песнь 9
Ирмос: Безначальна Родителя Сын, Бог и Господь,/ воплощся от Девы, нам явися,/ омраченная просветити, собрати расточенная./ Тем Всепетую Богородицу величаем.
Тело твое честное, священне Иннокентие, с верою приступающим исцеления источает, страстей различных тьму отгоняет и светом невечерним просвещает всех, хвалящих тя.
Чистоту ума стяжав, Духа Святаго жилище был еси, богоблаженне, благодать же святительства прием, проповедник изящный и учитель искусный показался еси, научая люди православно исповедати в Троице Единаго Бога.
Едине Блаже, Христе Многомилостиве, в молитву Тебе ныне приводим угодника Твоего Иннокентия. Не презри ходатайства его грех наших ради, но помилуй нас, верою взывающих: заступничеством святителя нашего, Господи, помилуй нас.
Троичен: Тебе неприступному Богу и Славы Царю Трисолнечному, Строителю и Промыслителю всяческих, Единому Благому и Сущему, Божества державу имущему, песнь Трисвятую воспевающе, покланяемся присно и непрестанно величаем.
Богородичен: Отроковице Всенепорочная, Мати, Дево Пречистая, Сына и Бога Твоего милостива сотвори нам и страстей лютых избави.
Светилен:
Веселится ныне земля Саратовская, людие же Пензенстии тебе покланяются и Христа величают, обретоша бо великое сокровище.
Слава, и ныне, Богородичен:
Владычице Всемилостивая, просвещение помраченных душ наших, Свет истинный миру рождшая, со святителем пречудным Иннокентием Сына Твоего и Бога умоли о всех нас.
На хвалитех стихиры, глас 4:
Жительство наше есть на Небесех,/ сице божественный Павел рече,/ ты же, святе Иннокентие,/ весь ум твой к Горним возвысив,/ прекраснаго онаго рая, еще в телеси сый, вкусити сподобился еси./ Темже ныне, с Горними лики водворяяся,/ нас, еще долу сущих,/ молитвами твоими присно ограждай.
Сила Божия в немощи совершается,/ тако глаголет Господь,/ ныне зрим слов сих на тебе преславное сбытие,/ яко немощен плотию,/ Духа усердный ратоборец показался еси,/ лжеименных учений усердный обличитель и доблестный отгнатель./ Испроси и нам, отче Иннокентие,/ от Подвигоположника Христа мужества дар,/ во еже противостати духу мира сего,/ и молитвами твоими нас присно ограждай.
Ины стихиры, глас 2.
Подобен: Егда от Древа:
Егда душа твоя разлучашеся/ от тленнаго сего жития,/ тогда псалмопевца слышати сладчайший глас,/ еже упование твое на Господа есть,/ сподобился еси, предивне Иннокентие./ Ныне же, в раи сладости вчиняяся,/ уже не в сениих и гаданиих,/ но лицем к лицу зриши Господа/ и прославляеши Святую Троицу.
Егда страдания за истину претерпевал еси,/ тогда во отребие и уметы себе самаго вменил еси,/ святителю смиренне, отче Иннокентие,/ Бог же, зряй вся тайная,/ на свещнице святительства тебе устави/ и венец нетленный тебе подаде./ Днесь же, небесными и земными гласы ублажаемь,/ Господеви помолися, исповедниче,/ от всяких лютых нам избавитися.
Слава, глас 5:
Единому токмо Богу нашему/ всякую славу, честь и поклонение/ в дусе и истине приносити верно подобает,/ тако от Церкве Божия научены есмы,/ но, яко подобие Его в себе возрастившия,/ да почтутся от нас святии Его,/ яко приснии Божии друзи и доблии венечницы,/ в ихже сонме, яко пресветлая звезда,/ Иннокентий святитель нам возсия./ Мы же к нему днесь тепле вопием:/ яко дерзновение стяжавый ко Спасу нашему,/ от всяких лютых молитвами твоими нас ограждай.
И ныне, Богородичен:
Земля Русская,/ дом Пречистыя Богородицы от лет древних нареченная,/ многия милости Ея улучи,/ темже и мы с верою и упованием сице вопием:/ не престай заступати нас, Царице и Владычице,/ пучины греховныя избавляющи/ и спасение душам нашим подающи.
Славословие великое, ектении и отпуст.
На Литургии
Блаженна от канона, песни 3-я и 6-я. Прокимен, глас 1: Уста моя возглаголют премудрость,/ и поучение сердца моего разум. Стих: Услышите сия, вси языцы,/ внушите, вси живущии по вселенней. Апостол ко Ефесеем, зачало 233. Аллилуиа, глас 4: Уста праведнаго поучатся премудрости. Стих: Язык его возглаголет суд. Евангелие от Иоанна, зачало 36. Причастен: В память вечную будет праведник:
Молитва
О, угодниче Божий, святителю Христов Иннокентие! Призри от славы твоея Горния и приими молитвы нас, грешных и недостойных рабов твоих, зде пред образом твоим честным [или святыми мощьми твоими] припадающих и тепле молящихся, и принеси я ко Престолу вся содержащаго в руце Своей Бога, Емуже ты во вся дни жизни твоея усердно послужил еси. Моли, угодниче Божий, Всемилостиваго Спаса Христа за богоданную паству твою, отжени от земнаго Отечества твоего вся соблазны, раздоры и нестроения, Церковь Христову и град наш святыми твоими молитвами от расколов, прельщения иноверием и наветов злых человек огради. Всех же нас в единомыслии и любви друг ко другу соедини, да едиными усты и единем сердцем воспоем всесвятое и единодержавное Имя Отца и Сына и Святаго Духа во веки веков. Аминь.

Текст утвержден Священным Синодом
Русской Православной Церкви
29 декабря 2017 года (журнал № 131)

Кондак 1

Избра́нный уго́дниче Христо́в и ди́вный благоче́стия подви́жниче, святи́телю о́тче Инноке́нтие, восхваля́ем тя я́ко Правосла́вия побо́рника и па́губных обы́чаев искорени́теля. Ты же, име́яй дерзнове́ние ко Го́споду, дарова́вшему нам тя вели́каго моли́твенника и ско́раго в беда́х помо́щника, моли́ о па́стве твое́й, зову́щей: Ра́дуйся, святи́телю о́тче Инноке́нтие, те́плый моли́твенниче о душа́х на́ших.

Икос 1

А́нгельским смире́нием украси́в житие́ твое́, святи́телю о́тче Инноке́нтие, от ю́ности Боже́ственную Прему́дрость возлюби́л еси́, Ду́хом Святы́м освяще́н, луча́ми Христо́ва уче́ния всех просвеща́я; сего́ ра́ди тебе́, на Небеси́ и на земли́ просла́вленному, во умиле́нии вопие́м си́це:

Ра́дуйся, смире́нием на го́ру доброде́телей возведе́нный;

ра́дуйся, ко А́нгельским ликам на Небеси́ причте́нный.

Ра́дуйся, Це́ркве Правосла́вныя па́стырю предо́брый;

ра́дуйся, па́стве свое́й от волко́в губи́тельных защи́тниче неустраши́мый.

Ра́дуйся, целому́дрия ревни́телю изя́щный;

ра́дуйся, о́бразе кро́тости драгоце́нный.

Ра́дуйся, Правосла́вия пропове́дниче неуста́нный;

ра́дуйся, архиере́ю Бо́жий свы́ше просла́вленный.

Ра́дуйся, я́ко зре́нием ра́ки моще́й твои́х нас утеша́еши;

ра́дуйся, я́ко исто́чник исцеле́ний оби́льно нам излива́еши.

Ра́дуйся, па́ству пе́нзенскую доброде́ланию науча́яй;

ра́дуйся, зе́млю Сара́товскую в ве́ре утвержда́яй.

Ра́дуйся, святи́телю о́тче Инноке́нтие, те́плый моли́твенниче о душа́х на́ших.

Кондак 2

Ви́дев, святи́телю о́тче Инноке́нтие, я́ко ве́ра правосла́вная во Оте́честве на́шем попира́ется от лжеучи́телей иносла́вных, потща́лся еси́ вседу́шно Христу́ послужи́ти и ве́ру и́стинную от ересе́й огради́ти, па́ству же от волко́в, расхища́ющих ю, защити́ти. Мы же, дивя́щеся таково́му твоему́ дерзнове́нию, вопие́м укре́пльшему тя Го́споду: Аллилу́иа.

Икос 2

Ра́зум богопросвеще́нный име́я, измла́да Христу́ послужи́л еси́, вре́менныя сла́сти во уме́ты вменя́я, того́ ра́ди благода́тию архиере́йства увенча́ тя Госпо́дь. Мы же подви́жническое изволе́ние твое́ воспева́юще, вопие́м ти си́це:

Ра́дуйся, путь пра́вый избра́вый;

ра́дуйся, сим неотсту́пно ше́дый.

Ра́дуйся, вся кра́сная ми́ра презре́вый;

ра́дуйся, ду́шу свою́ доброде́тельми украси́вый.

Ра́дуйся, се́рдце свое́ Христу́ отве́рсто име́вый;

ра́дуйся, страсте́м вхо́ды его́ затвори́вый.

Ра́дуйся, послуша́ния вся́ и́ноческая неле́ностно проше́дый;

ра́дуйся, со стра́хом Бо́жиим Же́ртву Безкро́вную приноси́вый.

Ра́дуйся, мона́хом пра́вило изя́щнейшее;

ра́дуйся, свяще́нником о́бразе благогове́йнейший.

Ра́дуйся, всем подвиза́ющимся до́брый наста́вниче;

ра́дуйся, тружда́ющимся спасе́ния ра́ди ско́рый помо́щниче.

Ра́дуйся, святи́телю о́тче Инноке́нтие, те́плый моли́твенниче о душа́х на́ших.

Кондак 3

Си́лою свы́ше облече́ тя Госпо́дь, ты же, святи́телю о́тче Инноке́нтие, взем крест свой, невозвра́тно Ему́ после́довал еси́, и уве́дев, я́ко и́го Христо́во бла́го и бре́мя Его́ легко́ есть, воспе́л еси́ Милосе́рдному Бо́гу: Аллилу́иа.

Икос 3

Име́я на скрижа́лех се́рдца твоего́ словеса́ Боже́ственнаго Па́вла, и́стинный о́браз ве́рным яви́лся еси, и нас восле́д Хри́ста ше́ствовати научи́, вопию́щих ти такова́я:

Ра́дуйся, Христо́в учениче́ и́стинный.

ра́дуйся, во благове́стии апо́столом подо́бный;

Ра́дуйся, я́ко чистото́ю а́нгельскою обле́клся еси;

ра́дуйся, я́ко отце́м дре́вним во уче́нии подража́л еси́.

Ра́дуйся, да́ром прозре́ния почте́нный;

ра́дуйся, испове́дниче неустраши́мый.

Ра́дуйся, я́ко в по́двизех свои́х вели́ким преподо́бным ра́вен был еси́;

ра́дуйся, я́ко непреста́нно ко Го́споду моли́твы возноси́л еси.

Ра́дуйся, ми́лостыню твори́ти николи́же оста́вивый;

ра́дуйся, па́мять сме́ртную на вся́кий час жития́ своего́ име́вый.

Ра́дуйся, благоле́пия хра́мов Бо́жиих ревни́телю;

ра́дуйся, я́ко сам храм Го́споду яви́лся еси.

Ра́дуйся, святи́телю о́тче Инноке́нтие, те́плый моли́твенниче о душа́х на́ших.

Кондак 4

Вели́кому святи́телю Росто́вскому Дими́трию не то́кмо ли́ком подо́бен был еси́, но житие́м и де́лы свои́ми сему́ уподо́бился еси́, просвеща́я малове́рных, ве́рных же укрепля́я, нас же всех науча́я вопи́ти Милосе́рдному Бо́гу: Аллилу́иа.

Икос 4

«Се Жени́х гряде́т в полу́нощи», — та́ко воспе́л еси́, блаже́нне, благода́ть архиере́йства прие́м, не ра́бе, но дру́же Христо́в Инноке́нтие, и Го́спода сре́тил еси́ душе́ю, любо́вию горя́щею, и нас в любви́ Боже́ственней укрепи́, зову́щих ти такова́я:

Ра́дуйся, я́ко Си́ла Бо́жия соверши́ся в не́мощнем телеси́ твое́м;

ра́дуйся, я́ко вси неду́зи со смире́нием претерпе́л еси́.

Ра́дуйся, клеветы́ и осужде́ния я́ко младе́нец незло́бивый прия́л еси́;

ра́дуйся, я́ко во обличе́нии нече́стия на ли́ца не взира́л еси́.

Ра́дуйся, ни́щих и си́рых пита́телю изоби́льный;

ра́дуйся, оби́женных защи́тниче дерзнове́нный.

Ра́дуйся, оби́дящих многому́дренное обличе́ние;

ра́дуйся, учи́телю, па́ству, ти вве́ренную, ко спасе́нию наставля́яй.

Ра́дуйся, уны́ние си́лою упова́ния на милосе́рдие Бо́жие победи́вый;

ра́дуйся, с кро́тостию и смире́нием и от про́стых поуче́ния приима́вый.

Ра́дуйся, вся́ ко́зни вра́жия си́лою Бо́жиею попра́вый;

ра́дуйся, Бо́гу сла́вно угоди́вый.

Ра́дуйся, святи́телю о́тче Инноке́нтие, те́плый моли́твенниче о душа́х на́ших.

Кондак 5

«Возвели́чите Господа со мно́ю и вознесе́м И́мя Его́ вку́пе», — та́ко па́ству Сара́товскую в про́поведи призыва́л еси́, ны́не же мы с тобо́ю вку́пе вопие́м Жизнода́вцу Бо́гу: Аллилу́иа.

Икос 5

Непреста́нно в ке́ллии коле́на преклоня́я, «Бо́же, ми́лостив бу́ди мне́ гре́шному», взыва́л еси́, и нам ми́лостива сотвори́ Влады́ку Небесе́ и земли́, тебе́ вопию́щим такова́я:

Ра́дуйся, и́мя Госпо́дне я́ко ору́жие проти́ву ко́зней диа́вольских име́вый;

ра́дуйся, си́лу Бо́жию в не́мощнем телеси́ стяжа́вый.

Ра́дуйся, си́лою моли́тв твои́х вся́ наве́ты вра́жия разруши́вый;

ра́дуйся, благоче́стия сто́лпе, на ка́мени спаси́тельныя ве́ры возведе́нный.

Ра́дуйся, по́двигом до́брым чад свои́х терпели́вно научи́вый;

ра́дуйся, всего́ себе́ в ру́це Бо́жии преда́вый.

Ра́дуйся, все́ жела́ние ко Христу́ име́вый;

ра́дуйся, в Бо́зе на́шем наме́рение свое́ полага́вый.

Ра́дуйся, я́ко Христу́ сораспя́лся еси́;

ра́дуйся, я́ко сла́дость лице́м к лицу́ зре́ния Его́ ны́не вкуша́еши.

Ра́дуйся, хода́таю наш неусы́пный;

ра́дуйся, свети́льниче ве́ры неугаси́мый.

Ра́дуйся, святи́телю о́тче Инноке́нтие, те́плый моли́твенниче о душа́х на́ших.

Кондак 6

Ди́вным виде́нием укрепи́ тя Госпо́дь при кончи́не земна́го жития́ твоего́: а́нгели Бо́жии прия́ша тя с собо́ю и в Небе́сныя оби́тели вознесо́ша, иде́же ты пое́ши ны́не Бо́гу: Аллилу́иа.

Икос 6

Во све́тлыя о́ныя оби́тели Бо́жия пресели́лся еси́, пречу́дне о́тче, словесе́м псалмопе́вца что́мым «Аз же, Го́споди, упова́ю на Тя». И нас во упова́нии сем све́тлем укрепи́, пою́щих ти такова́я:

Ра́дуйся, а́нгелами на Не́бо вознесе́нный;

ра́дуйся, Небе́сныя ра́дости еще́ на земли́ вкуси́вый.

Ра́дуйся, я́ко тебе́ Небеса́ отверзо́шася;

ра́дуйся, я́ко Госпо́дь в Небе́сныя оби́тели всели́ тя.

Ра́дуйся, до кончи́ны жития́ твоего́ о па́стве твое́й попече́ние име́вый;

ра́дуйся, я́ко не́мощи теле́сныя чадолю́бие тво́е не ума́лиша.

Ра́дуйся, я́ко Ду́хом Святы́м восходя́ от си́лы в си́лу, Небе́снаго Ца́рствия дости́гл еси́;

ра́дуйся, я́ко та́мо ны́не со святы́ми ликовству́еши.

Ра́дуйся, я́ко и нас гре́шных на земли́ не оставля́еши;

ра́дуйся, я́ко ду́хом нам спребыва́еши.

Ра́дуйся, моли́твами свои́ми нам помога́яй;

ра́дуйся, яко любы́ твоя́ ника́коже оскуде́ на нас.

Ра́дуйся, святи́телю о́тче Инноке́нтие, те́плый моли́твенниче о душа́х на́ших.

Кондак 7

Хотя́ просвети́ти всех ве́дением неизрече́нных суде́б Бо́жиих, ди́вный списа́тель дел мину́вших был еси́, в нихже прему́дрый Про́мысл Созда́теля, вся племена́ и язы́ки ко спасе́нию веду́щий, всем указа́л еси́. Темже и мы Ще́дрому Бо́гу покланя́емся и вопие́м: Аллилу́иа.

Икос 7

Но́ваго тя чудотво́рца и моли́твенника дарова́ нам Человеколю́бец Госпо́дь, егда́ за умноже́ние беззако́ния оскуде́ во мно́гих любы́. Сего́ ра́ди твоего́ е́же о нас предста́тельства про́сим, на всепокрыва́ющую любо́вь твою́ наде́ющеся: не оста́ви нас в годи́ну лю́тых испыта́ний, укрепля́я моли́твами твои́ми вопию́щих ти такова́я:

Ра́дуйся, я́ко моли́твами твои́ми зе́млю на́шу облагоуха́л еси́;

ра́дуйся, я́ко по́двиги твои́ми край наш освяти́л еси́.

Ра́дуйся, о па́стве твое́й предста́телю неусы́пный;

ра́дуйся, помо́щниче наш во вся́ких беда́х и напа́стех.

Ра́дуйся, списа́телю суде́б Бо́жиих пречу́дный;

ра́дуйся, те́ми вся ны наста́вивый.

Ра́дуйся, пропове́дниче велегла́сный;

ра́дуйся, де́лателю вертогра́да Христо́ва прему́дрый.

Ра́дуйся, ве́рный и благи́й во́ине Царя́ Небе́снаго;

ра́дуйся, цевни́це духо́вная, Ду́ха Свята́го испо́лненная.

Ра́дуйся, архиере́ев богодохнове́нное украше́ние;

ра́дуйся, благоче́стия тве́рдое огражде́ние.

Ра́дуйся, святи́телю о́тче Инноке́нтие, те́плый моли́твенниче о душа́х на́ших.

Кондак 8

Стра́нное и пресла́вное чу́до яви́ся всем, егда́ честны́я и многоцеле́бныя мо́щи твоя́, а́ще и от безбо́жных пору́гани бы́ша, обрето́шася па́ки. К сим у́бо припа́дающе, Бо́гу вопие́м: Аллилу́иа.

Икос 8

Весь еси́ в вы́шних, но и нас, до́лу пове́рженных, не оставля́еши, святи́телю о́тче Инноке́нтие, моле́ния на́ша слы́шиши и ско́ро исполня́еши. Неотсту́пен у́бо пребу́ди от нас, вопию́щим ти такова́я:

Ра́дуйся, я́ко все́х прибега́ющих к тебе́ заступа́еши;

ра́дуйся, я́ко врачева́ния нам источа́еши.

Ра́дуйся, я́ко моле́нием на́шим внима́еши;

ра́дуйся, я́ко во бла́го их исполня́еши.

Ра́дуйся, я́ко чудесы́ твои́ми ве́рныя возвеселя́еши;

ра́дуйся, я́ко моще́й твои́х бе́си трепе́щут.

Ра́дуйся, я́ко нас, грехми́ омраче́нных, просвеща́еши;

ра́дуйся, я́ко смрад страсте́й на́ших отгоня́еши.

Ра́дуйся, я́ко тала́нт, Бо́гом да́нный тебе́, умно́жил еси́;

ра́дуйся, я́ко в ра́дость Го́спода твоего́ вшел еси́.

Ра́дуйся, я́ко нас пред Престо́лом Бо́жиим непреста́нно помина́еши;

ра́дуйся, я́ко в житии́ сем нас не оставля́еши.

Ра́дуйся, святи́телю о́тче Инноке́нтие, те́плый моли́твенниче о душа́х на́ших.

Кондак 9

Вси правосла́внии лю́дие возра́довашася, егда́ на Собо́ре святи́тельстем в ли́це святы́х Це́рковь Правосла́вная просла́ви тя. Мы же, иму́ще такова́го моли́твенника, вопие́м возвели́чившему тя Бо́гу: Аллилу́иа.

Икос 9

Вети́и суему́дреннии, тобо́ю посра́мленнии, недоуме́ют, что́ глаго́лати, си́лою бо Бо́жиею укрепля́емь, сих дерзнове́нно обличи́л еси. Мы же, взира́юще на пра́ведное житие́ твое́ и на тве́рдое ве́ры правосла́вныя испове́дание, вопие́м ти такова́я:

Ра́дуйся, Христо́м Бо́гом возлю́бленный;

ра́дуйся, си́лою свы́ше облече́нный.

Ра́дуйся, науче́ние кни́жное возлюби́вый;

ра́дуйся, к тому́ усе́рдие име́вый.

Ра́дуйся, ра́зум Боже́ственный стяжа́вый;

ра́дуйся, я́ко Сло́во Бо́жие умудри́ тя.

Ра́дуйся, преда́ний апо́стольских ве́рный блюсти́телю;

ра́дуйся, пра́вды Бо́жия ре́вностный храни́телю.

Ра́дуйся, просвеще́нный благода́тию;

радуйся, учи́телю златослове́сный.

Ра́дуйся, изгна́нный пра́вды ра́ди Христо́вы;

ра́дуйся, таковых бо есть Ца́рствие Небе́сное.

Ра́дуйся, святи́телю о́тче Инноке́нтие, те́плый моли́твенниче о душа́х на́ших.

Кондак 10

Спасти́ хотя́ па́ству твою́ от ересе́й и собла́знов, скве́рная уче́ния беззако́нных обличи́л еси́, пресла́вне о́тче Инноке́нтие, Правосла́вие же кро́тостию прему́дрых слове́с твои́х утверди́л еси́ и научи́л еси́ ста́до твое́ воспева́ти Бо́гу: Аллилу́иа.

Икос 10

Стена́ тве́рдая и огра́да необори́мая бысть си́ла моли́тв твои́х, богоно́се о́тче Инноке́нтие, сего́ ра́ди и мы, па́ства твоя, к тебе́ с ве́рою прибега́ем и усе́рдно мо́лим: бу́ди нам огражде́ние кре́пкое и ору́жие, враги́ прогоня́ющее, да не возра́дуются хотя́щии нам зла́я. Такова́го у́бо богодарова́ннаго помо́щника и засту́пника иму́ще, в весе́лии вопие́м ти такова́я:

Ра́дуйся, па́ствы твоея́ до́брый первостоя́телю;

ра́дуйся, сумня́щихся кре́пкое в ве́ре утвержде́ние.

Ра́дуйся, зло́бу власте́й предержа́щих кро́тко претерпе́вый;

ра́дуйся, и́стину небоя́зненно им веща́вый.

Ра́дуйся, гоне́ния и притесне́ния пра́вды ра́ди смире́нно прие́мый;

ра́дуйся, в до́мех благочести́вых чад твои́х приста́нище име́вый.

Ра́дуйся, я́ко тобо́ю от всех зол избавля́емся;

ра́дуйся, я́ко твои́ми моли́твами ре́вности в правосла́вней ве́ре исполня́емся.

Ра́дуйся, я́ко тобо́ю и́стина утвержда́ется;

ра́дуйся, я́ко тобо́ю лицеприя́тие и человекоуго́дие посрамля́ется.

Ра́дуйся, я́ко пресе́кл еси́ злочести́вых волне́ние;

ра́дуйся, лю́дем пе́нзенским и сара́товским похвале́ние.

Ра́дуйся, святи́телю о́тче Инноке́нтие, те́плый моли́твенниче о душа́х на́ших.

Кондак 11

Пе́ние похва́льное прино́сим тебе́, святи́телю о́тче Инноке́нтие, и смире́нно про́сим тя: моли́ о нас Человеколю́бца Бо́га, да не отврати́т лица́ Своего́ от нас, при́сно согреша́ющих и бла́гость Его́ на всяк час преогорчева́ющих, но да изба́вит нас от грехо́в и прегреше́ний на́ших, наипа́че же сподо́бит в час кончи́ны на́шея покая́ния и Боже́ственных Та́ин прича́стия, да с тобо́ю в Небе́сных оби́телех воспое́м Бо́гу: Аллилу́иа.

Икос 11

Свети́льник, во тьме неве́рия седя́щих просвеща́яй, был еси в земне́м жити́и твое́м, о́тче наш Инноке́нтие. Просвети́ у́бо моли́твами твои́ми и нас, в пучи́не греха́ погиба́ющих, да благода́рне вопие́м тебе́ си́це:

Ра́дуйся, смире́ния и терпе́ния наста́вниче наш прему́дрый;

ра́дуйся, в моли́твах и бде́ниях учи́телю наш предо́брый.

Ра́дуйся, я́ко от суесло́вия и суему́дрия нас отвраща́еши;

ра́дуйся, я́ко в доброде́тели нас наставля́еши.

Ра́дуйся, я́ко в суете́ мирсте́й и попече́ниих жите́йских погря́зшим путь в Го́рняя указу́еши;

ра́дуйся, я́ко обремене́нных греха́ми и скорбя́ми мно́гими, никогда́же оставля́еши.

Ра́дуйся, и́стинный учениче́ Христо́в, всех си́рых возлюби́вый;

ра́дуйся, го́рдых и жестоковы́йных смири́вый.

Ра́дуйся, я́ко всех почитаю́щих тя от напа́стей и зол сохраня́еши;

ра́дуйся, я́ко всех скорбя́щих и боле́знующих, к заступле́нию твоему́ притека́ющих, утеша́еши.

Ра́дуйся, свети́льниче, нас потемне́нных грехми́ любо́вию освеща́яй;

ра́дуйся, ми́ро, на́с беззако́нии смра́дными оскверне́нных, облагоуха́яй.

Ра́дуйся, святи́телю о́тче Инноке́нтие, те́плый моли́твенниче о душа́х на́ших.

Кондак 12

Благода́ти сосу́д избра́нный был еси́, святи́телю о́тче Инноке́нтие; те́мже восхваля́юще тя усе́рдно, мо́лим: проле́й те́плую моли́тву ко Господу за Оте́чество на́ше, да изба́вимся от наше́ствия иноплеме́нных и междоусо́бных бра́ней, да́ в ми́ре и тишине́ воспое́м Христу́ Бо́гу: Аллилу́иа.

Икос 12

Пою́ще сла́вное твое́ к Небе́сным оби́телем восхожде́ние, святи́телю о́тче Инноке́нтие, прославля́ем равноа́нгельное житие́ твое́ и во умиле́нии се́рдца сла́вим, хва́лим и велича́ем возвели́чившаго тя Го́спода, дарова́вшаго нам но́ваго моли́твенника и предста́теля, Его́же умоли́ спасти́ся всем, пою́щим ти такова́я:

Ра́дуйся, житие́м чи́стым А́нгелов удиви́вый;

ра́дуйся, по́двиги твои́ми челове́ков наста́вивый.

Ра́дуйся, нището́ю духо́вною сокро́вище Ца́рствия Бо́жия обреты́й;

ра́дуйся, пла́чем и скорбя́ми вре́менными утеше́ния ве́чнаго сподо́бивыйся.

Ра́дуйся, кро́тостию зе́млю пра́ведных насле́дивый;

ра́дуйся, пра́вды на земли́ взыскавый, на Небесе́х же пра́вдою Бо́жиею насыще́нный

Ра́дуйся, ми́лостию и нищелю́бием ми́лость ве́лию от Го́спода стяжа́вый;

ра́дуйся, о́чи серде́чныя от скве́рны греха́ очи́стивый и Бо́га узре́вый.

Ра́дуйся, поноше́ния и непра́ведная гоне́ния Христа́ ра́ди претерпе́вый;

ра́дуйся, изгна́нный пра́вды ра́ди и в Небе́сныя оби́тели со сла́вою вше́дый.

Ра́дуйся, миротво́рче, сы́ном Бо́жиим нарече́нный;

ра́дуйся, мзду́ мно́гу на Небесе́х прие́мый.

Ра́дуйся, святи́телю о́тче Инноке́нтие, те́плый моли́твенниче о душа́х на́ших.

Кондак 13

О, пресла́вный святи́телю Христо́в Инноке́нтие! Приими́ от нас сие́ ма́лое моле́ние, в похвалу́ тебе́ приноси́мое, и изба́ви на́с предста́тельством твои́м от бе́д и скорбе́й, да в житии́ сем вре́меннем сете́й вра́жиих и пре́лести бесо́вския изба́вльшеся, возду́шная мыта́рства непреткнове́нно про́йдем и в Небе́сный Иерусали́м всели́тися сподо́бимся, иде́же с тобо́ю Всеблаго́му Бо́гу на́шему воспое́м: Аллилу́иа.

[Се́й конда́к глаго́лется три́жды.]
[Далее повторяем 1‑е икос и кондак:]

Икос 1

А́нгельским смире́нием украси́в житие́ твое́, святи́телю о́тче Инноке́нтие, от ю́ности Боже́ственную Прему́дрость возлюби́л еси́, Ду́хом Святы́м освяще́н, луча́ми Христо́ва уче́ния всех просвеща́я; сего́ ра́ди тебе́, на Небеси́ и на земли́ просла́вленному, во умиле́нии вопие́м си́це:

Ра́дуйся, смире́нием на го́ру доброде́телей возведе́нный;

ра́дуйся, ко А́нгельским ликам на Небеси́ причте́нный.

Ра́дуйся, Це́ркве Правосла́вныя па́стырю предо́брый;

ра́дуйся, па́стве свое́й от волко́в губи́тельных защи́тниче неустраши́мый.

Ра́дуйся, целому́дрия ревни́телю изя́щный;

ра́дуйся, о́бразе кро́тости драгоце́нный.

Ра́дуйся, Правосла́вия пропове́дниче неуста́нный;

ра́дуйся, архиере́ю Бо́жий свы́ше просла́вленный.

Ра́дуйся, я́ко зре́нием ра́ки моще́й твои́х нас утеша́еши;

ра́дуйся, я́ко исто́чник исцеле́ний оби́льно нам излива́еши.

Ра́дуйся, па́ству пе́нзенскую доброде́ланию науча́яй;

ра́дуйся, зе́млю Сара́товскую в ве́ре утвержда́яй.

Ра́дуйся, святи́телю о́тче Инноке́нтие, те́плый моли́твенниче о душа́х на́ших.

Кондак 1

Избра́нный уго́дниче Христо́в и ди́вный благоче́стия подви́жниче, святи́телю о́тче Инноке́нтие, восхваля́ем тя я́ко Правосла́вия побо́рника и па́губных обы́чаев искорени́теля. Ты же, име́яй дерзнове́ние ко Го́споду, дарова́вшему нам тя вели́каго моли́твенника и ско́раго в беда́х помо́щника, моли́ о па́стве твое́й, зову́щей: Ра́дуйся, святи́телю о́тче Инноке́нтие, те́плый моли́твенниче о душа́х на́ших.

Молитва

О, свя́тче Бо́жий, святи́телю Христо́в Инноке́нтие, при́зри от сла́вы твоея́ го́рния и прими́ моли́твы нас, гре́шных и недосто́йных рабо́в твои́х, зде пред о́бразом твои́м честны́м [или́: святы́ми моща́ми твои́ми] припа́дающих и те́пле умоля́ющих тя, и принеси́ их ко Престо́лу вся содержа́щаго в руце́ Свое́й Бо́га, Ему́же ты до́бре послужи́л еси́ во дни земна́го жития́ твоего́. Умоли́, уго́дниче Бо́жий, Всеми́лостиваго Спа́са Христа́ за богода́нную твою́ па́ству, тя возлюби́вшую, да отжене́т от земна́го оте́чества твоего́ вся собла́зны, раздо́ры, нестрое́ния. Це́рковь Христо́ву и град наш огради́ святы́ми твои́ми моли́твами от раско́лов, прельще́ния инове́рием и наве́тов злы́х челове́к. Всех же нас в единомы́слии и любви́ друг ко дру́гу соблюди́, да еди́ными усты́ и еди́нем се́рдцем воспое́м всесвято́е и единодержа́вное И́мя Отца́, и Сы́на, и Свята́го Ду́ха во ве́ки веко́в. Ами́нь.