Преподобная Елена Дивеевская (Мантурова)

На малей вечерни
На Господи, воззвах: стихиры на 4, глас 2:
Киими похвальными песньми/ воспоим преподобную Елену,/ от юности Бога возлюбившую,/ кроток нрав имевшую,/ имже кроткому Господу Иисусу благоугодившую,/ Егоже молит о спасении душ наших?
Киими похвалами/ согласно прославим Елену богомудрую,/ ангельскому житию подражавшую/ и паче сияния солнечнаго/ благодатию Святаго Духа блистающую/ и молящуюся о спасении душ наших?
Киими словесными венцы/ украсим Елену досточудную,/ добродетели цвет неувядаемый,/ ангельския чистоты ревнительницу,/ непорочную невесту Христа Бога нашего,/ Егоже молит о спасении душ наших?
Кое сплетем ти славословие,/ преподобная мати Елено?/ Посещаеши бо вся, притекающия к раце мощей твоих,/ от страстей покрываеши,/ от бед избавляеши/ и молишися прилежно Богу/ о спасении душ наших.
Слава, глас 3:
Украшена добротами красоты Божественныя,/ ангелов доброты зриши, мати преподобная,/ и богатно чудеса источаеши,/ всем, с верою приходящим к честным мощем твоим,/ и молишися прегрешений оставление даровати/ празднующим святую память твою.
И ныне, праздника, или Богородичен.
   На стиховне стихиры, глас 1:
Преподобнаго Серафима чадо возлюбленное,/ егоже молитвами окормляема,/ море житейское безбедно преплыла еси/ и, пристанища спасительнаго достигши,/ райскаго веселия наслаждаешися, богоблаженная.
Стих: Дивен Бог во святых Своих,/ Бог Израилев.
Исполньшися даров духовных,/ недуги неисцельныя целиши/ и огненное опаление уставляеши,/ духи лукавыя отгоняеши/ и всем в печалех помогаеши, досточудная.
Стих: Честна пред Господем/ смерть преподобных Его.
Преподобная мати Елено,/ ты, всем сердцем Бога возлюбивши,/ Вышняго Царствия достигла еси,/ помози и нам дух кротости и смирения стяжати/ и в покаянии житие провождати.
    Слава, глас 3:
На земли в послушании подвизавшися/ и временную смерть претерпевши,/ яко голубица младая, на Небеса возлетела еси,/ позлащенне же криле добродетели стяжавши,/ в райстей обители вогнездилася еси,/ преподобная мати Елено.
        И ныне, праздника, или Богородичен.
Тропарь писан на велицей вечерни
На велицей вечерни
На Господи, воззвах: стихиры на 8, глас 1.
Подобен: Небесных чинов:
Небесных чинов Радование,/ Пресвятая Богородица Дева,/ яви удел Свой во вселенней/ и сподоби тя, преподобная Елено,/ избранницею Ея быти и начальницею обители пречудныя./ Молися, блаженная мати, о любовию чтущих тя.
Небесную Помощницу имущи,/ вражиих наветов не устрашилася еси/ и из глубины души к Ней тепле воззвала еси:/ Владычице, спаси и приими обет мой./ И тако силою Заступницы Державныя/ козни лукаваго посрамила еси, всеблаженная.
Память твою, Елено, светло празднуем,/ ты бо, вольным стремлением тесную стезю избравши,/ светом покаяния сердце свое озарила еси/ и, к ревности жития монашескаго себе подвигши,/ Жениха Небеснаго всею душею возлюбила еси,/ волею нас ради Пострадавшаго и Искупившаго вся./ С Нимже ныне в радости воскресения пребываеши.
Глас 4:
Любовию Христовою уязвившися, мати Елено,/ преподобнаго Серафима смиренно просила еси,/ еже во иночестем чине Богу послужити./ Старец же три лета со тщанием тя испытоваше,/ послежде на жительство во обитель Дивеевскую посла,/ идеже ты, в молитве и молчании пребывающи,/ образ благонравнаго жития показала еси,/ темже и достойная наследница райския обители явилася еси.
Мироносицы жены утру глубоку/ ароматы вземше,/ ко гробу Господню приидоша,/ ты же, богомудрая мати Елено,/ мятежа мирскаго избегши,/ тихаго пристанища обители достигла еси/ и, тепле слезы проливающи,/ благоухание молитвы чистейшия,/ яко миро, Спасу принесла еси./ Божественныя же благодати световидными лучами просвещаема,/ светом богоразумия и наша сердца озари,/ верою славящих тя.
Преподобным Серафимом благословенная,/ таинственная начальнице Мельничныя обители,/ преподобная мати Елено,/ послушание того усердно исполняющи,/ чистоту в храме Божии тщательно хранила еси,/ в немже, яко в чертозе украшеннем, всегда пребывала еси./ Помози и нам, богоблаженная мати,/ чистоту сердца соблюдати/ и храм Божий со усердием посещати.
Глас 5.
Подобен: Радуйся, Живоносный Кресте:
Радуйся, невесто Христова, Елено всеславная!/ Ты, Невесту Неневестную непрестанно песнословящи,/ смирением к высоте добродетелей вознеслася еси/ и к подвигом неослабным потекла еси, зовущи:/ сердце мое да возвысится к Тебе, Слове!/ Емуже и обручилася еси, чин ангельский приимши./ Моли, богоблаженная, мир мирови даровати/ и душам нашим велию милость.
Радуйся, преподобная мати наша Елено,/ ангельския чистоты ревнительнице!/ Ты, оружие воздержания и щит молитвы присно держащи,/ правило благочестия и образ иноческаго жития явила еси./ Темже заступлением твоим плодоносны Господеви нас соделай,/ и моли мир мирови даровати/ и душам нашим велию милость.
Слава, глас 6:
Преподобная мати Елено,/ сердце твое обитель Святаго Духа соделала еси,/ из негоже благость любве Христовы источашеся,/ понеже милостыню тайно творила еси/ и сестер, в скорби сущих,/ словом добрым утешала еси./ Темже предвари на помощь тя призывающим,/ и испроси у Бога нам мудрости духовныя/ и прегрешений оставление.
И ныне, праздника, или Богородичен.
Вход. Прокимен дне. И чтения три преподобническая.
На литии стихира, глас 4:
Днесь инокинь множество сошедшеся,/ любовию воспевают тя,/ преподобная мати Елено,/ ты бо, светло украсивши светильник елеем любве и милости,/ в сретение Жениха Христа радостно притекла еси/ и в Чертог украшенный невестолепно возшла еси./ Темже, яко дерзновение имущи,/ моли милостиваго Бога/ от бед Отечеству нашему избавитися,/ мирови мир даровати/ и душам нашим велию милость.
Слава, и ныне, праздника или Богородичен.
На стиховне стихиры, глас 5:
Преподобная мати наша Елено,/ ты, в посте, молитве и богомыслии пребывающи/ и красотою нрава красящися,/ совершенным смирением, кротостию и милосердием Владыце Христу послужила еси./ Мы же, ублажающе тя, во умилении зовем:/ не отметайся от нас, чад твоих,/ и подаждь скорбящим утешение,/ в бедах всем поможение/ и моли спастися душам нашим.
Стих: Дивен Бог во святых Своих,/ Бог Израилев.
Преподобная мати наша Елено,/ ты, чисте и богоугодне на земли поживши,/ верная служительница Чистыя Девы явилася еси/ и над устроением святыя Ея Канавки усердно потрудилася еси./ Мы же, ведуще твое дерзновение к Пречистей Богородице, сице вопием:/ моли обитель Дивеевскую во благолепии сохранити/ и спастися душам нашим.
Стих: Честна пред Господем/ смерть преподобных Его.
Преподобная мати наша Елено,/ красный цвете целомудрия,/ благости и любве исполнение,/ веры неугасимая свеще,/ монашествующих путеводительнице/ и неусыпная о всех предстательнице!/ Испроси нам благодать Пресвятаго Духа,/ радости блаженныя Того приятия/ и спасение душам нашим.
Слава, глас 2:
Преподобная мати Елено,/ ты, послушанию преподобнаго Серафима навыкши/ и словеса того в сердце слагающи,/ откровений о обители Дивеевстей сподобилася еси/ и, свято хранящи вся тебе заповеданная,/ наставлением того верно последовала еси./ В храме же Божии, псалмы неустанно возносящи/ и на Крест Христов со умилением взирающи,/ о мире всего мира молилася еси,/ взывающи к Заступнице Усердной:/ Пресвятая Богородице, спаси нас.
И ныне, праздника, или Богородичен.
Тропарь, глас 1:
Добродетельми кротости, смирения и воздержания просиявши,/ таинственная начальница Мельничныя общины в Дивееве явилася еси,/ преподобная мати наша Елено,/ даже до смерти в совершеннем послушании/ старцу Серафиму пребыла еси/ и Господа лицезрети сподобилася еси./ Испроси нам дерзновение Ему Единому служити/ во спасение душ наших.
На утрени
По 1-м стихословии, седален, глас 7:
Яко звезда утренняя и солнце светлое, возсия днесь память твоя, преподобная мати Елено. Темже молим тя: ум наш, нерадением омраченный, просвети и подвигни сердца монашествующих постническому твоему житию подражати.
Слава, и ныне, Богородичен:
Удивишася, Чистая, лицы Ангельстии, како Причастница суща богатейшия радости Небесныя, во юдоли скорбей человеческих присно пребываеши, и ко всякому воплю молитвы матерски тщишися, и благодать раздаеши неиждиваемую, больных исцеляющи и печальных утешающи, Дево Мати Господня, сокровище пространнейшее милости Божественныя.
По 2-м стихословии седален, глас 1:
Осияема ныне непрестанною славою Пресвятыя Троицы, мати наша Елено, и Божественнаго веселия и радости исполнена, тепле о нас молися на Небесех, во еже избавитися нам муки вечныя.
Слава, и ныне, Богородичен:
О Тебе радуемся и Тя прославляем, Дево Пречистая, яко Невместимаго вместила еси, Егоже присно моли о спасении душ наших.
Величание:
Ублажаем тя,/ преподобная мати наша Елено,/ и чтим святую память твою,/ ты бо молиши о нас/ Христа Бога нашего.
Псалом избранный: Терпя, потерпех Господа:
По полиелеи седален, глас 2:
Како воспоим терпение и послушание твое, преподобная мати? Ты бо, наставленьми преподобнаго Серафима укрепляема, благословение того на иноческий подвиг кротце ожидала еси, последи же, воли Божии повинующися, временную кончину во смирении прияла еси. Моли спастися душам нашим.
Слава, и ныне, Богородичен:
Радуйся, Ангелом радость мира приемшая; радуйся, рождшая Творца Твоего и Господа. Радуйся, сподобльшаяся быти Мати Божия.
Степенна, 1-й антифон 4 гласа. Прокимен, глас 4: Дивен Бог во святых Своих,/ Бог Израилев. Стих: В церквах благословите Бога, Господа от источник Израилевых. Всякое дыхание: Евангелие от Матфеа, зачало 104.
По 50-м псалме стихира, глас 6:
Радуйся и веселися обителе Божия Матере,/ обогатившаяся многоцелебными мощами/ преподобныя Елены досточудныя!/ Днесь бо воистину священный/ и радостный праздник наста,/ непорочная невеста Христова/ песньми духовными ублажается,/ небеса убо достойно веселятся,/ земля же радуется,/ инокини, молитвами тоя хранимии, ликуют,/ вернии благодать исцелений обретают,/ совершающе светлое торжество.
   Канон, глас 8.
                                                  Песнь 1
Ирмос: Колесницегонителя фараоня погрузи/ чудотворяй иногда/ Моисейский жезл, крестообразно поразив/ и разделив море,/ Израиля же беглеца, пешеходца спасе,/ песнь Богови воспевающа.
Чистоту помышлений даждь ми, Спасе мой, еже воспети чистотою Ангелом подобную, богоблаженную Елену, славную угодницу Христову.
Киими похвалами восхвалим преподобнаго Серафима, возрастившаго во уделе Божия Матере дивную подвижницу и теплую о нас молитвенницу?
Наставлениям духовнаго отца твоего, великаго старца Серафима, усердно последовавши, мати Елено, истинное послушание стяжала еси.
Богородичен: Радуйся, Пресвятая Госпоже, освятившая Дивеево Твоим пришествием; радуйся, насадившая веру истинную. Радуйся, собравшая монашествующих множество.
Песнь 3
Ирмос: Небеснаго круга Верхотворче, Господи,/ и Церкве Зиждителю,/ Ты мене утверди в любви Твоей,/ желаний краю, верных утверждение,/ Едине Человеколюбче.
Во обитель Дивеевскую притекла еси, идеже, усердно подвизавшися, узким путем послушания даже до смерти шествовала еси. Помози и нам, преподобная мати, добродетель послушания стяжати.
Девственными добротами просвещена, богоблаженная Елено, Чистому Слову уневестилася еси и, плотския страсти умертвивши, Того живоносным стопам последовала еси.
Позлащенне криле добродетели стяжавши, на высоту небесную возлетела еси, блаженная Елено, яко голубица нетленная.
Богородичен: Радуйся, во удел Себе Дивеево избравшая; радуйся, Заступницею места сего быти изволившая. Радуйся, Споручнице вечнаго спасения.
Седален, глас 4:
Красотою девственною преукрашена, невесто непорочная, преподобная мати Елено, в чертог Христов, радующися, возшла еси, идеже лицы Ангельстии и святых собори любовно тя сретоша и Сам Царь славы, возлюбленный твой Жених, призре на тя милостиво и увенча тя венцем безсмертия. Егоже моли, всеблаженная, не лишити и нас, земных и перстных, наследия Небеснаго.
Слава, и ныне, Богородичен, глас тойже:
Чистая Всенепорочная, и Неискусобрачная,/ Едина безлетнаго Сына и Слово Божие в лете рождшая,/ Того со всеми святыми моли,/ даровати нам очищение и велию милость.
Песнь 4
Ирмос: Услышах, Господи,/ смотрения Твоего таинство,/ разумех дела Твоя/ и прославих Твое Божество.
Кротостию и смирением Христу подобящися, источник избранный любве явилася еси, преподобная Елено. Помолися Господу, блаженная мати, да огнь Божественныя любве и в нас не угаснет.
Дары Христу принесла еси, чистое умерщвление удов, и труды воздержания, темже и прияла еси Небесное Царство и вечнующее наслаждение.
В Небесный чертог вселилася еси, преподобная Елено, невеста избранна бывши Вседержителю. Темже и благодать от Него прияла еси исцеления струи источати и страстная течения изсушати.
Богородичен: Радуйся, теплая Ходатаице о обители Твоей; радуйся, милость Сына Твоего до скончания века месту сему обещавшая. Радуйся, Радосте душ и телес наших.
Песнь 5
Ирмос: Утренююще, вопием Ти:/ Господи, спаси ны,/ Ты бо еси Бог наш,/ разве Тебе, иного не вемы.
Стезю тесную прошедши в пощении, к широте приспела еси райстей, Елено всечестная.
Монашескаго чина украшение и обители Дивеевския слава ты явилася еси, Елено преподобная.
Ангельскому житию подражающи, псалмопение Богу непрестанно возносила еси, богоблаженная мати. Помози и нам чистым сердцем песнь Ему воспевати.
Богородичен: Радуйся, Дево, яко благословением Твоим осени Дивеево сила Вышняго; радуйся, яко обитель Твоя наполнися подвизающимися. Радуйся, яко просия зде множество преподобных, молящихся о спасении душ наших.
Песнь 6
Ирмос: Ризу мне подаждь светлу,/ одеяйся светом, яко ризою,/ Многомилостиве Христе Боже наш.
Добрыми делы и словесы евангельския заповеди хранящи, образу Спасову навыкла еси благоговейне покланятися, блаженная мати Елено.
Любве Господни подражающи, богатно ближним послужила еси, заповедь Христову совершенне исполнивши.
Облак тя Христос показа, мати Елено, дождь живоносный источаяй, верою просящим у тебе помощи и заступления.
Богородичен: Радуйся, яко наследие Твое присно призираеши; радуйся, яко благодати и милости Своея нас сподобляеши. Радуйся, благословение Сына Твоего на нас Низводящая.
Кондак, глас 5:
В монашестве благочестно поживши/ и в юных летех путь свой скончавши,/ послушанием, постом и молитвою непрестанною/ к сретению Жениха себе предуготовившая,/ богомудрая Елено, молим тя:/ от бед избави нас/ твоими молитвами, блаженная.
                                                      Икос:
Струи мне слова даждь, Боже мой,/ и источник благочиния сотвори мой ум,/ и благослови язык мой, да воспою Твою агницу, юже венчал еси благостию Твоею;/ аще бо Сам не даси ми слова достойнаго, како принесу дар нищий, богатней в словесех и деяниих!/ Темже подаждь ми силу, исповедати ея подвиги,/ безплотнаго врага победившую и Царствия Небеснаго достигшую.
Песнь 7
Ирмос: Отроцы еврейстии в пещи/ попраша пламень дерзновенно/ и на росу огнь преложиша, вопиюще:/ благословен еси, Господи Боже, во веки.
О доброте тлеющей, преподобная, небрегла еси, смотряющи тамо сущая воздаяния и свет, и славу Божию нестареющуюся и красоту, и божественное селение.
Мир тлеющий пременила еси премирным нестареющим животом и временную пищу пребывающим существом, плотскаго же обручника Небесным Женихом.
Разум боголюбив стяжала еси, Елено славная, во плоти сущи, ангелом уподобилася еси, любовию взывающи: благословен еси, Господи Боже, во веки.
Богородичен: Радуйся, всяких даров рабом Твоим Всещедрая Подательнице; радуйся, во брани и болезнех, и трудех их премилосердая Утешительнице. Радуйся, надеждо и спасение душ наших.
Песнь 8
Ирмос: Богоглаголивии отроцы, в пещи/ со огнем пламень попирающе, пояху:/ благословите, дела Господня, Господа.
Украшена сиянием чистоты и чистым житием просвещена, мати Елено, предстоиши Жениху твоему, Христу Богу нашему, поющи: благословите Господа во веки.
Господа лицезрети сподобилася еси, преподобная Елено, видевши Его яко Огнь Неизреченный, и во Обители Небесныя прежде кончины Пречистою Девою введена была еси, зовущи: благословите Господа во веки.
Яко священная жертва и светлое приношение и кадило благоуханное принеслася еси, преподобная мати Елено, всех Владыце Христу Богу нашему, Егоже благословим во веки.
Богородичен: Радуйся, Хранительнице наша в настоящем веце; радуйся, Предстательнице и непостыдное упование в будущем. Радуйся, прилог всякаго зла от жребия Своего отражающая.
Песнь 9
Ирмос: Устрашися всяк слух/ неизреченна Божия снизхождения,/ яко Вышний волею сниде даже и до плоти,/ от девическаго чрева быв Человек./ Темже Пречистую Богородицу, вернии, величаем.
Возжелела еси доброту мысленную Жениха и чисто Того возлюбила еси, тепле вопиющи: да почию у Тебе и в Твоих светлостех наслаждуся, величающи Твою благость.
Разум просвещен, смирение и божественную кротость, веру несумненну, надежду и любовь, юже к Богу, стяжала еси, имиже Тому угодила еси, блаженная Елено.
Днесь людие собрашася хвалами возвеличити Господа, возвеличившаго твое святое торжество; в немже поминай нас, поминающих тя, предстоящи Христу Жениху твоему, преподобная Елено всечестная.
Богородичен: Песни благодарственныя приносим Ти, Мати Божия, яко спасаеши нас присно от всякаго обстояния, и питаеши, и о нас промышляеши, и молим Тя: Обителей Небесных по кончине нас сподоби.
Светилен:
Радуйся, обителе Дивеевская, заступницу имущи, просиявшую в тебе, Елену славную, еяже молитвами озари омраченная сердца наша, да во свете невечернем узрим Христа Бога нашего.
Слава, и ныне, праздника, или Богородичен:
Свет истинный рождшая, Богородице,/ помраченных нас тьмою греховною просвети/ и причастниками вечных благ соделай.
На хвалитех стихиры, глас 8.
Подобен: О, преславнаго чудесе:
О, преславнаго чудесе!/ Житие твое, преподобная мати Елено, чудно явися,/ воистину и кончина твоя чудесна,/ юже за повеление от старца Серафима прияла еси,/ познание истинныя любве показующи/ и исполнение совершеннаго послушания,/ понеже благодарение смиренно воздавала еси/ и упование на милосердие Бога возлагала еси./ Егоже моли даровати нам велию милость.
О, преславнаго чудесе!/ Егда Пречистая Всецарица Богородица/ показа ти Обители Небесныя/ и Царствия свет несказанный осия тя, всеблаженная,/ тогда молилася еси прилежно:/ Святая Игумение, обитель нашу не остави!/ Ныне же, в Чертозех Небесных пребывающи,/ моли Бога, преподобная Елено,/ даровати нам велию милость.
Дивных откровений славная причастница/ воистину явилася еси, преподобная Елено,/ внегда Господа, яко Огнь Неизреченный, узрела еси/ и Царицу Небесную и святых ангелов./ Ныне же с лики преподобных и праведных/ Престолу Божию предстоиши/ и славословие Святей Троице возносиши,/ Юже моли, блаженная мати,/ даровати нам велию милость.
Днесь украшается светло обитель Дивеевская,/ сокровище многоценное имущи,/ раку святых мощей твоих,/ яже неоскудную благодать исцелений источает,/ темже песненными похвалами венчаем тя, зовущи:/ мати наша Елено, с преподобными Александрою и Марфою,/ вкупе же и с Серафимом богоблаженным/ молитеся Господу за обитель вашу земную,/ во спасение душ наших.
Слава, глас тойже:
Тихостию нрава украшена,/ тихаго пристанища достигла еси,/ преподобная мати Елено,/ ты бо, смиренномудрием сопротивных сетей избежавши,/ яко голубица чистая,/ святою душею на Небеса возлетела еси,/ идеже Христу предстоиши,/ Егоже моли спастися нам,/ почитающим святую память твою.
И ныне, праздника, или Богородичен, глас тойже:
         Владычице, приими молитвы раб Твоих,/ и избави нас/ от всякия нужды и печали.
На Литургии
Блаженны от канона, песни 3-я и 6-я, на 4. Прокимен, глас 4: Дивен Бог во святых Своих,/ Бог Израилев. Стих: В церквах благословите Бога, Господа от источник Израилевых. Апостол к Галатом, зачало 208. Аллилуиа, глас 1: Терпя, потерпех Господа, и внят ми и услыша молитву мою. Евангелие от Луки, зачало 33. Причастен: В память вечную будет праведник:  
Молитва
О, преславная мати, скорая наша помощнице и заступнице и неусыпная о нас молитвеннице! Предстояще раце мощей твоих и на сия со умилением, яко живей ти сущей, взирающе, молимся усердно: приими прошения наша и принеси я ко Престолу Милосердаго Отца Небеснаго, яко дерзновение многое к Нему имущая; испроси притекающим к тебе и всем православным христианом вечное спасение и временное благоденствие, на вся же благая дела и начинания щедрое благословение, и от всяких бед и скорбей скорое избавление.
Ей, чадолюбивая мати наша! Тебе, предстоящей Престолу Божию, ведомы суть нужды наша духовныя и житейския; призри на нас матерним оком и твоими молитвами вся злая от нас отврати, паче же злых и богопротивных обычаев избави; утверди же во всех веры согласное ведение, взаимную любовь и единомыслие, да во всем житии нашем, словесы же и писании и делы, славится Всесвятое Имя Отца и Сына и Святаго Духа во веки веков. Аминь.

Месяца июня в 14-й день
Собор Дивеевских святых
Преподобных Александры, Марфы и Елены Дивеевских
                                          
На малей вечерни
На Господи, воззвах: стихиры на 4, глас 2:
Кая духовная пения/ принесем ти, преподобная Александро,/ яко явлением тебе Царицы Небесныя/ место сие освятися/ и жребием земным Ея наречеся?/ Ты же, мати, первоначальнице,/ многими труды в покаянии слезнем/ основание обители Дивеевския положила еси/ и благодать Духа Святаго стяжала еси./ Ныне же, в Чертозех Небесных ликующи,/ молися о спасении душ наших.
Киими недостойными усты/ восхвалим вселюбезную матерь нашу Марфу,/ чистотою, кротостию, послушанием совершенным/ во отрочестве Богу угодившую,/ дивную молчальницу,/ собеседницу великаго старца Серафима,/ откровения того о обители Дивеевстей в тайне хранившую,/ ныне же молящуюся о спасении душ наших?
Како по достоинству воспоим/ матерь нашу Елену,/ паче земныя славы и тленнаго богатства/ Христа всем сердцем возлюбившую,/ добрым подвигом подвизавшуюся/ и дивно начальницею Мельничныя девическия обители явившуюся,/ ныне же во Царствии Небеснем с мудрыми девами ликующую/ и молящуюся о спасении душ наших?
Киими похвальными венцы/ увенчаем преподобных Александру, Марфу и Елену?/ Тыя бо на Небеси Богу во славе предстоят,/ на земли же духом любве с нами пребывают/ и молятся о спасении душ наших.
                                                         Слава, глас 3:
Яко звезды многосветлыя,/ украсисте обитель Дивеевскую,/ всечестныя матери наша Александро, Марфо и Елено,/ вы бо, сиянии духовными сердца верных просвещающя,/ молите Всемилостиваго Бога спастися душам нашим.
                          И ныне, Богородичен, глас тойже: Како не дивимся:
На стиховне стихиры, глас 1:
Велия подвиги твоя и труды,/ преподобная Александро,/ обители Дивеевския основательнице,/ како прославим мы, недостойнии?/ Темже, дух молитвы чистыя стяжавши,/ молися о верою призывающих тя.
Стих: Дивен Бог во святых Своих,/ Бог Израилев.
Великий ангельский образ восприимши/ и в пристанище божественное устремившися,/ подвижница славная явилася еси,/ преподобная мати наша Марфо,/ темже молися о любовию чтущих тя.
Стих: Честна пред Господем/ смерть преподобных Его.
Душу свою за Христа полагающи/ и послушание совершенное показующи,/ житием твоим Богу угодила еси,/ преподобная Елено досточудная,/ темже молися о верою славящих тя.
                                               Слава, глас 3:
    Веру истинную, надежду светлую и любовь богомудрую,/ сия три добродетели, яко сокровища духовная,/ принесоша в дар всех Содетелю/ пречестныя матери нашя,/ Егоже и ныне в Чертозех Небесных прославляют,/ воспевающя Троицу Всесвятую.
                             И ныне, Богородичен, глас тойже: Се исполнися:
Тропарь писан на велицей вечерни
                                            На велицей вечерни
На Господи, воззвах: стихиры на 8, глас 8.
Подобен: О, преславнаго чудесе:
О, преславнаго чудесе!/ Небесе и земли Царица/ омофором Своея милости / обитель Дивеевскую покрывает./ О, таинств Твоих, Дево, и чудес Твоих!/ Како повелением Твоим удел возлюбленный являеши,/ в немже дивно  прославишася/ преподобныя Александра, Марфа и Елена,/ земли Русския похвала и украшение?
О, преподобныя Александро, Марфо и Елено!/ Вы, во обители Божия Матере/ подвигом добрым подвизавшяся/ и усердно Ей послужившя,/ любве Божественныя исполнилися есте./ Темже непрестанно молитеся,/ да и мы единеми усты и единем сердцем/ восхвалим Троицу Единосущную и Нераздельную,/ во еже спастися душам нашим.
                                                       Глас 1:
Преподобная мати наша Александро,/ ты, Божественною благодатию просветившися/ и мятеж мира отвергши,/ евангельски Христу последовала еси,/ Егоже и нищету возлюбила еси/ и, тесным путем шествовавши,/ к Богородице в молитвах неустанно пребывала еси./ Тем и обители Ея первоначальница явилася еси,/ нам же небесная заступница и богомудрая наставница.
Любовию восхвалим труды твоя и болезни,/ преподобная мати Александро,/ яко в келлии твоей тесней пред Крестом Спасовым/ со слезами нощию усердно молилася еси/ и, на камень главу твою полагающи,/ одеждею ветхою в стужу покрывалася еси./ Темже научи нас, богоблаженная,/ по слову апостола жити,/ ведуще Единаго Христа и Сего распята,/ в покаянии истиннем житие скончати/ и Царствия Небеснаго достигнути.
                                                        Глас 4:
Преподобная мати наша Марфо,/ измлада Господа возлюбившая/ и Ему усердно послужившая,/ непрестанную молитву Иисусову стяжавшая,/ собеседнице юная и послушнице кроткая/ преподобнаго Серафима, старца Саровскаго,/ имже начальница Небеснаго Дивеева нареченная./ Ныне же, мощами во обители твоей почивающи,/ исцеление всем источаеши,/ верою и любовию к тебе притекающим./ Помяни и нас во Царствии Небеснем.
       Преподобная мати наша Марфо,/ ты, благодатию Святаго Духа блистающи/ и Жениха Христа от юности возжелевши,/ всю себе в жертву Тому принесла еси./ Ныне же, на Небесех радующися/ и велие дерзновение ко Господу имеющи,/ молися от бед избавитися/ любовию тя величающим.
       Преподобная мати наша Елено,/ ты, яко звезда утренняя, светло просиявши,/ послушанием, смирением и молитвою/ благодать Духа Святаго стяжала еси/ и  даже до смерти воли Божией покорилася еси./ Темже, вся козни диавольския победивши,/ Обители райския прежде кончины лицезрети сподобилася еси/ и, многими венцы украшенная,/ ангельскаго чина достигла еси./ Молися о спасении душ наших.
Ангельский образ восприимши,/ всенощно в молитвах пребывала еси/ и в храме Рождества Богородицы/ по заповеди преподобнаго Серафима/ псалмы неустанно воспевала еси/ и пресветлый храм Духа Святаго/ душу твою, мати Елено, сотворила еси./ Темже усердно моли Христа Бога,/ еже просветитися нам светом Божественныя благодати/ и спастися душам нашим.
Слава, глас 6:
Приидите, вернии людие,/ во святую обитель Дивеевскую,/ яже земный жребий Божия Матере нарицается,/ ублажим избранницы Пресвятыя Владычицы Богородицы,/ Александру, Марфу и Елену,/ начальницы святаго места сего,/ и, припадающе к их честным и многоцелебным мощем,/ усердно возопиим:/ помяните нас, матери нашя, во Царствии Небеснем.
И ныне, Богородичен, глас тойже: Кто Тебе не ублажит:
Вход. Прокимен дне. И чтения три мученическая.
На стиховне стихиры, глас 4:
Приидите, монахов множество,/ единодушно прославим преподобных Александру, Марфу и Елену/ и к ним тепле возопиим:/ во Христа, всехвальныя, облекшяся,/ духовною благодатию просвещаемыя,/ яко звезды многосветлыя,/ в мире просияли есте,/ темже молите Троицу Единосущную/ о спасении душ наших.  
Стих: Дивен Бог во святых Своих,/ Бог Израилев.
Еже любити Бога и ближняго,/ весь закон исполняется, рече Христос./ Вы же, преподобныя, Творца всех возлюбившя,/ заповедь сию исполнили есте./ Тако и нам помозите в любви Божией утвердитися/ и улучити спасение душ наших.
Стих: Честна пред Господем/ смерть преподобных Его.
Приидите, вси людие,/ прославим преподобных матерей Дивеевских,/ многоцелебныя мощи тех обстояще, любезно облобызаем,/ и, яко цветы, песньми увязем, рекуще:/ о, теплейшыя нашя предстательницы,/ молите Троицу Святую/ о спасении душ наших.
Слава, глас 3:
Александру дивную восхвалим,/ Марфу кроткую и Елену славную воспоим,/ собор жен Дивеевских предначинающих,/ и, сих подвиги и труды прославляюще,/ добродетелем поревнуим, Христу взывающе:/ Господи, молитвами обручниц Твоих,/ Царствия Твоего причастники нас сотвори.
И ныне, Богородичен, глас тойже: Без семене:
Тропарь, глас 4:
Явилися есте земли Русския украшение,/ начальницы обители Дивеевския,/ преподобныя матери нашя Александро, Марфо и Елено,/ благословение Царицы Небесныя исполнившыя/ и дерзновение ко Господу стяжавшыя,/ молитеся у Престола Пресвятыя Троицы/ о спасении душ наших.
Слава, и ныне, Богородичен, глас тойже: Еже от века утаеное:
На утрени
По 1-м стихословии седален, глас 1:
Возсиявши, яко звезда утренняя, память честных жен Дивеевских, просвещает, яко солнце светлое, жительствующих на месте сем и согревает сердца монашествующих, яже житию их постническому подражают.
Слава и ныне, Богородичен:
Яко птица своя птенцы собирает и покрывает матерски, тако Ты, Пречистая, покрый крилома Твоима вся, во обители Твоей жительствующих, и избави от всяких бед и скорбей, и возведи во град Небесный молитвами Твоими.
По 2-м стихословии, седален, глас 1:
Осияемы ныне непрестанною славою Пресвятыя Троицы и Божественнаго веселия и радости исполняемы, богоблаженныя матери, о нас молитеся прилежно, избавитися нам муки вечныя.
Слава, и ныне, Богородичен:
Благодарим Тя, Преблагословенная Дево, присное промышление о жребии Твоем земнем имущую, яко безбедны храниши зде живущыя, и вся, яже к пользе и спасению нам устрояеши, подающи мир и велию милость.
                                                 Величание:
Ублажаем вас,/ преподобныя матери наша Александро, Марфо и Елено,/ и чтим святую память вашу,/ вы бо молите за нас/ Христа Бога нашего.
Псалом избранный: Терпя потерпех Господа:
                                           По полиелеи седален, глас 1:
Невесты прекрасныя Чертога Царскаго, преподобныя Александро, Марфо и Елено, вы, послушанию, воздержанию и молитве навыкшя, во обители Дивеевстей просияли есте и милость от Господа улучили есте. Темже молитеся прилежно о спасении душ наших.
                                      Слава, и ныне, Богородичен:
      Многими содержими напастьми, во всякой скорби и обстоянии к Тебе прибегаем, Пресвятая Богородице, молебное пение Тебе, по заповеди преподобнаго Серафима, приносяще: О, Мати Слова и Дево, от тяжких и лютых нас спаси!
      Степенна, 1-й антифон, 4-го гласа. Прокимен: Дивен Бог во святых Своих,/ Бог Израилев. Стих: В церквах благословите Бога, Господа от источник Израилевых. Всякое дыхание: Евангелие от Матфеа, зачало 104.
                             По 50-м псалме стихира, глас 6:
       Песни духовныя приносяще,/ днесь умиленно вопием вам,/ угодницы Христовы, Александро, Марфо и Елено,/ земли нашея похвало/ и обители Дивеевския украшение,/ молитеся о нас, любовию вас почитающих,/ да наследницы будем Царствия Небеснаго.
Канон, глас 8.
                                                            Песнь 1
Ирмос: Колесницегонителя фараоня погрузи/ чудотворяй иногда/ Моисейский жезл, крестообразно поразив,/ и разделив море,/ Израиля же беглеца, пешеходца спасе,/ песнь Богови воспевающа.
Припев: Преподобныя матери нашя Александро, Марфо и Елено, молите Бога о нас.
Подаждь ми, Господи, словесе дар, да в песнех прославлю жен честных, волю Твою соблюдших и во уделе Матере Твоея во благочестии просиявших.
Дивеевских жен святое собрание песньми почтим, благословение Пресвятыя Девы исполнивших, яже ныне суть нашя теплыя предстательницы и молитвенницы непрестанныя о спасении душ наших.
Возсиявшя яко солнце, монашеским житием украсисте подвижническая множества, преподобныя матери нашя. Темже с ними прославляетеся, наслаждающяся славы Божественныя и молящяся о спасении душ наших.
Богородичен: Радуйся, Пресвятая Госпоже, освятившая весь Дивеевскую Твоим пришествием; радуйся, насадившая веру истинную. Радуйся, собравшая монашествующих множество.
Песнь 3
Ирмос: Небеснаго круга Верхотворче, Господи,/ и Церкве Зиждителю,/ Ты мене утверди в любви Твоей,/ желаний краю, верных утверждение,/ Едине Человеколюбче.
       Обители первоначальницу в песнех воспоим, Александру славную, давшую монашествующим образ и начертание во бдениих и молитвах.
Подобает по достоянию восхвалити преподобную Марфу, отроковицу непорочную и досточудную, Небеснаго Дивеева начальницу.
Да почтим днесь и преподобную Елену, девственными добротами просветившуюся и Жениху Небесному уневестившуюся!
Богородичен: Радуйся, во удел Себе Дивеево избравшая; радуйся, верным, пребывающим зде, Подательнице благ земных. Радуйся, Споручнице вечнаго спасения.
Седален, глас 6:
О, преподобныя жены!/ Кто изочтет подвиги вашя?/ Кто исповесть молитвы вашя и воздыхания,/ терпение, кротость и смирение,/ мира и плоти отвержение,/ и к Богу совершенную любовь?/ Недоумеем бо благохвалити вас по достоянию,/ обаче, пение сие приносяще, к вам припадаем и вопием:/ Христа Бога усердно молите/ низпослати душам нашим мир и велию милость.
Слава и ныне, Богородичен:
Спаси от бед рабы Твоя, Богородице,/ яко вси по Бозе к Тебе прибегаем,/ яко нерушимей стене и предстательству.
Песнь 4
Ирмос: Ты моя крепость, Господи,/ Ты моя и сила,/ Ты мой Бог, Ты мое радование,/ не оставль недра Отча/ и нашу нищету посетив./ Тем с пророком Аввакумом зову ти:/ силе Твоей слава, Человеколюбче.
Преподобная Александро, ты, богатство и славу мира сего отвергши, путем скорбным ко спасению потекла еси, велию любовь ко Господу являющи.
Преподобная Марфо, собеседнице добрая и послушнице смиренная старца Серафима, ты, постом и молитвою страсти умертвивши, в безстрастных светлостех водворилася еси, смирение совершенное показующи.
Преподобная Елено, благочестием украсившися, благословение старца Серафима на жительство во обители терпеливо ожидала еси, терпением твоим всех удивляющи.
Богородичен: Радуйся, теплая Ходатаице о подвизающихся во обители Твоей; радуйся, милость Сына Твоего до скончания века нам обещавшая. Радуйся, Заступнице рода христианскаго.
                                                             Песнь 5
Ирмос: Вскую мя отринул еси/ от лица Твоего, Свете Незаходимый,/ и покрыла мя есть чуждая тьма, окаяннаго,/ но обрати мя и к свету заповедей Твоих/ пути моя направи, молюся.
Богородицу очима твоима видевши и обетования о обители Дивеевстей услышати от Нея сподобившися, богатыми дары Духа Святаго просияла еси, Александро богоблаженная, подвиг молитвы непрестанныя совершающи.
Измлада Господа возлюбивши, во обители изрядно потрудилася еси и в молчании непрестанно пребывала еси, Марфо досточудная, откровения будущаго благоденствия обители Дивеевския в тайне сохраняющи.
В послушании церковнем пребывающи, вся заповеданная ти преподобным Серафимом ревностно соблюдала еси, Елено достохвальная.
Богородичен: Радуйся, Дево, яко благословением Твоим осени Дивеево сила Вышняго; радуйся, яко обитель Твоя наполнися подвизающимися. Радуйся, яко просия зде множество преподобных, молящихся о спасении душ наших.
                                                              Песнь 6
Ирмос: Очисти мя, Спасе,/ многа бо беззакония моя,/ и из глубины зол возведи, молюся,/ к Тебе бо возопих, и услыши мя,/ Боже спасения моего.
Смирение совершенное имущи, и любовь нелицемерную, и слез источник непрестанный, сердце твое обитель Духа Святаго соделала еси, Александро. Темже и нам помози очиститися от скверны греховныя.
Преподобнаго Серафима воспитание, безплотная во плоти Марфо досточудная, огнь Божественныя любве в души своей имущи, Небесному Жениху уневестилася еси.
Господа лицезрети сподобилася еси, преподобная Елено, видевши Его, яко огнь неизследимый, и Небесныя Обители прежде кончины твоея Пресвятая Дева неизреченно ти показа.
Богородичен: Радуйся, яко наследие Твое присно призираеши; радуйся, яко благодати и милости Своея нас сподобляеши. Радуйся, благословение Сына Твоего на нас низводящая.
Кондак, глас 8:
Дивеевстии светильницы всесветлии,/ преподобныя матери нашя Александро, Марфо и Елено,/ вы в посте, бдении и молитве добре подвизастеся,/ по кончине же вашей источением чудес/ к вам прибегающих освящаете и исцеляете./ Молитеся ко Господу грехов оставление даровати/ любовию чтущим святую память вашу.
                                                              Икос:
О, коль добро соединение ваше, матери богомудрыя! О, коль красен и сладок сей общий ваш праздник, в немже вы, в Дивеевстей обители просиявшыя, общее хваление приемлете! Подобает бо, во единем месте Господеви угодившим, во един день праздновати! Сего ради и мы, монаси и мирстии, по долгу вас ублажаем, вопиюще: место сие, в немже пожисте, и всю Русскую землю от всякаго зла спасайте и молитеся ко Господу грехов оставление даровати любовию чтущим святую память вашу.
Песнь 7
Ирмос: Отроцы еврейстии в пещи/ попраша пламень дерзновенно/ и на росу огнь преложиша, вопиюще:/ благословен еси, Господи Боже, во веки.
Иноческое пострижение пред кончиною восприимши, Александра наречена бысть, преподобная мати, еже защитница именуется. Воистину бо воинство демонское победила еси и почесть победы прияла еси, поющи: благословен еси, Господи Боже, во веки.
Великий образ ангельский от рук старца Серафима прияла еси, Марфо досточудная, Единаго Жениха Небеснаго всем сердцем возлюбила еси, воспевающи: благословен еси, Господи Боже во веки.
Желание велие к житию монашескому имела еси, преподобная мати Елено, темже, во иночество облеченная, подвиги твоя усугубила еси, поющи: благословен еси, Господи Боже, во веки.
Богородичен: Радуйся, обильных даров рабом Твоим Всещедрая Подательнице; радуйся, в болезнех и трудех их премилосердая Утешительнице. Радуйся, надеждо и спасение душ наших.
                                                              Песнь 8
Ирмос: Седмерицею пещь/ халдейский мучитель/ Богочестивым неистовно разжже,/ силою же лучшею спасены, сия видев,/ Творцу и Избавителю вопияше:/ отроцы, благословите,/ священницы, воспойте,/ людие, превозносите во вся веки.
Пресвятая Дева Богородица дивно управи отшествие твое от жития сего временнаго, преподобная Александро, ты бо, в час кончины Святых Христовых Таин приобщившися и Казанскую икону на перси возложивши, душу святую в руце Божии предала еси, зовущи: благословите Господа во веки.
Плакаше преподобный Серафим, кончину блаженныя Марфы духом предуведевый, дондеже узре душу ея во Царствии Небеснем, воспевающую: благословите Господа во веки.
Душу свою за Христа положивши и послушание даже до смерти исполнивши, в юных летех преставилася еси, преподобная Елено, песнь победную вопиющи: благословите Господа во веки.
Богородичен: Радуйся, Хранительнице нашя в настоящем веце; радуйся, Предстательнице и непостыдное упование в будущем. Радуйся, прилог всякаго зла от удела Своего земнаго отражающая.
                                                              Песнь 9
Ирмос: Ужасеся о сем Небо,/ и земли удивишася концы,/ яко Бог явися человеком плотски/ и чрево Твое бысть пространнейшее Небес./ Тем Тя, Богородицу,/ Ангелов и человек чиноначалия величают.
Преподобныя матери нашя, Царицы Небесныя истинныя послушницы, вы, начала тьмы пособием Ея победившя, плоть умертвившя и дух оживившя, благодати Божественное действо прияли есте. Не престайте молящяся за ны ко Господу, помиловатися душам нашим.
Радуйся, обителе Дивеевская, покровительниц таковых на Небеси имущи, яже мощами своими в храме Пресвятыя Богородицы почивают и исцелений благодать источают в молитве к ним прибегающим.
Ликуй ныне, земле Нижегородская, и веселися, се бо чада твоя Христу приведошася, яже суть молитвенницы непрестанныя о нас ко Господу.
Троичен: Приими, Всесвятая Троице, ихже Дивеевская обитель приносит Ти, яко начатки жертвы избранныя, преподобныя Александру, Марфу и Елену, и молитвами их от всякаго зла всех нас сохрани.
Богородичен: Песни благодарственныя приносим Ти, Мати Божия, яко спасаеши нас присно от всяких бед и скорбей и любовию врачуеши немощи наша.
                                                           Светилен:
Радуйся, славная обителе Дивеевская, молитвенницы имущи в тебе просиявшыя, преподобныя матери наша Александру, Марфу и Елену, днесь молящихся прилежно, о еже избавитися нам от всякия нужды и печали.
Слава, и ныне, Богородичен:
Радуйся, Приснодево, проречение Твое, яко место сие свято будет, видим днесь исполняемо, подвизавшыяся бо в ней преподобныя матери нашя, ихже днесь почитаем, явишася воистину святы и, яко невещественнии ангели на земли пожившя, Царствие Небесное улучиша.
На хвалитех стихиры на 4, глас 5.
Подобен: Радуйся, Живоносный Кресте:
Радуйся, преславная обителе Дивеевская,/ процветшая добродетельми молитвенниц усердных,/ преподобных Александры, Марфы и Елены,/ к нимже припадаем, тепле взывающе:/ радуйтеся, красотою любве сердца наша украшающыя,/ к долготерпению и мужеству призывающыя,/ уверяющя, яко ничтоже возможет разлучити ны от любве Божия./ И ныне, вечныя радости и веселия сподобльшыяся,/ светильницы свои возжегша, с мудрыми девами радуетеся./ Дадите же и нам от елея вашего, матери нашя,/ во еже не себе любити,/ но ближним своим послужити/ во спасение душ наших.
Радуйтеся, начальницы обители Дивеевския:/ преподобная мати Александро, первоначальнице,/ повеление Преблагословенныя Владычицы исполнившая/ о святей Ея обители основании;/ и ты, Марфо, отроковице чудная,/ Серафимовых сирот госпожа в Дивееве Небеснем;/ и ты, Елено всехвальная,/ Мельничныя общины дивная начальнице./ На земли союзом любве связуемыя,/ на Небесех Божественныя светлости сподобистеся,/ идеже   молитеся Пресвятей Троице,/ даровати душам нашим/ мир и велию милость.
Приидите, Святыя Троицы вернии служителие,/ земную троицу преподобных жен Дивеевских восхвалим,/ светом Божественным просвещенных,/ ихже песньми почтим, сице взывающе:/ радуйтеся, обители нашея покровительницы,/ дев Дивеевских красото и благолепие,/ скорбящих сладкое утешение,/ в бедах сущих скорое заступление,/ в болезнех лютых врачество преизобильное,/ иноком тихое пристанище./ Радуйтеся, Богородицею избранныя,/ не престайте о нас молитися,/ вы бо есте заступницы нашя.
Слава, глас 8:
Дивеево дивное,/ украшенное мощами преподобнаго Серафима/ и сотаинниц его, преподобных  Александры, Марфы и Елены,/ удел избранный Богородицы,/ днесь красуется и ликует,/ и благодарне Христу Богу вопиет:/ Ты еси преподобных Похвала, Всесильне.
И ныне, Богородичен, глас тойже:
Владычице, приими молитвы раб Твоих/ и избави нас/ от всякия нужды и печали.
На Литургии
    Блаженны от канона, песни 3-я и 6-я, на 4. Прокимен, глас 4: Дивен Бог во святых Своих,/ Бог Израилев. Стих: В церквах благословите Бога, Господа от источник Израилевых. Апостол к Галатом, зачало 208. Аллилуиа, глас 1: Терпя, потерпех Господа, и внят ми и услыша молитву мою. Евангелие от Луки, зачало 33. Причастен: В память вечную будет праведник:  

Молитва
О, преподобныя Александро, Марфо и Елено, подвижницы Христовы, инокинь Дивеевских наставницы и всех прибегающих к вам скорыя помощницы! Вы от юности Бога возлюбившя, иноческаго жития возжелали есте и молитвами и наставлении преподобнаго Серафима Саровскаго обитель Дивеевскую устроили есте. В нейже, усердно потрудившяся, молитвою, постом и бдением сердца очистили есте и образ благонравнаго жития показали есте. Темже, яко имеющя дерзновение ко Всемилостивому Спасу и Преблагословенней Владычице Богородице, Иже и место сие благословиша, не оставите обитель сию святую и инокинь, чающих вашея помощи и заступления. Сохраните Отечество наше земное от всяких бед и напастей, междоусобныя брани и нашествия иноплеменников. Нам же, почитающым вас любовию, даруйте мир и единомыслие, да, вашими молитвами соблюдаеми и сохраняеми, исповедуем Святую Троицу, Отца и Сына и Святаго Духа. Аминь.

Акафист преподобной Елене Дивеевской

Кондак 1

Избра́нная неве́сто Христо́ва и помо́щнице на́ша ско́рая, ди́вным житие́м Бо́гу угоди́вшая и бли́жним послужи́вшая, преподо́бная ма́ти на́ша Еле́но, похва́льное прино́сим тебе́ пе́ние; ты же я́ко дерзнове́ние ко Го́споду иму́щая, от вся́ких нас бед свободи́, с любо́вию зову́щих: Ра́дуйся, препо́добная ма́ти Еле́но, обру́чнице Жениха́ Небе́снаго.

Икос 1

А́нгельскую чистоту́ возлюби́вши, ева́нгельски после́довала еси́ Влады́це Христу́, по́двига и́ночества о́браз и пра́вило яви́лася еси́ и Бо́жией Ма́тери угоди́ла еси́. Мы же с благогове́нием и ра́достию глаго́лем ти сицева́я:

Ра́дуйся, Небе́сныя Игу́мении послу́шнице ве́рная;

ра́дуйся, благоче́стия красото́ пресве́тлая.

Ра́дуйся, пресла́вное ве́рных велича́ние;

ра́дуйся, прелюби́мое и́нокинь ра́дование.

Ра́дуйся, доброде́телей цве́те неувяда́емый;

ра́дуйся, любве́ сокро́вище неисчерпа́емое.

Ра́дуйся, се́стер диве́евских заступле́ние;

ра́дуйся, земли́ Ру́сския украше́ние.

Ра́дуйся, препо́добная ма́ти Еле́но, обру́чнице Жениха́ Небе́снаго.

Кондак 2

Ви́дящи, преподо́бная ма́ти Еле́но, зми́я о́гненнаго, хотя́ща тя поглоти́ти, к Богоро́дице из глубины́ души́ воззва́ла еси́, всем житие́м свои́м послужи́ти Засту́пнице ми́ра и Сы́ну Ея́ и Бо́гу на́шему обеща́ющи, Ему́ же вси со умиле́нием зове́м: Аллилу́иа.

Икос 2

Ра́зум небе́сный стяжа́ла еси́, преподо́бная ма́ти, егда́ от ю́ности твоея́ чу́дно измени́вшися, к ре́вности непоро́чнаго жития́ и́ноческаго себе́ воздви́гла еси́. Сего́ ра́ди приими́ от нас похвалы́ сия́:

Ра́дуйся, Цари́цею Небе́сною на путь спасе́ния поста́вленная;

ра́дуйся, Бо́жия прему́дрости испо́лненная.

Ра́дуйся, све́том покая́ния се́рдце озари́вшая;

ра́дуйся, Жениха́ Кра́снаго возлюби́вшая.

Ра́дуйся, смире́ния высото́ всесве́тлая;

ра́дуйся, ми́лости глубино́ неоскудева́емая.

Ра́дуйся, подви́жнице ве́лия и пресла́вная;

ра́дуйся, преди́внаго благоуха́ния ли́лие непоро́чная.

Ра́дуйся, препо́добная ма́ти Еле́но, обру́чнице Жениха́ Небе́снаго.

Кондак 3

Си́ла Вы́шняго от ю́ности сохрани́ тя, преподо́бная, егда́, любо́вию Христо́вою утвержда́ема, во оби́тель Саро́вскую прише́дши, ста́рца Серафи́ма проси́ла еси́ неотсту́пно на путь мона́шеский благослове́ния, да непреста́нно возмо́жеши пе́ти Бо́гу: Аллилу́иа.

Икос 3

Име́я тща́ние о спасе́нии души́ твоея́, преподо́бный Серафи́м, весь путь прови́дя твой боголюби́вый, испыта́в тя три ле́та и че́стно предугото́вив, благослови́ во общи́ну Диве́евскую. Мы же, дивя́щеся таково́му о тебе́ Бо́жию промышле́нию, вопие́м:

Ра́дуйся, от ю́ности Христу́ Бо́гу послужи́вшая;

ра́дуйся, Небе́снаго Оте́чества возжеле́вшая.

Ра́дуйся, а́нгельски на земли́ пожи́вшая;

ра́дуйся, плод доброде́телей Всецарю́ прине́сшая.

Ра́дуйся, оби́тели Диве́евския пресла́вная похвало́;

ра́дуйся, и́ноческаго жития́ пра́вило.

Ра́дуйся, дар благода́тных слез стяжа́вшая;

ра́дуйся, чистото́ю непоро́чною просия́вшая.

Ра́дуйся, препо́добная ма́ти Еле́но, обру́чнице Жениха́ Небе́снаго.

Кондак 4

Бу́рю волн жите́йских избежа́вши, ти́хаго приста́нища оби́тели Диве́евския дости́гла еси́ и, та́мо благоче́стно пожи́вши, Небе́сному Жениху́ Христу́ обручи́лася еси́, вы́ну взыва́ющи Ему́: Аллилу́иа.

Икос 4

Слы́шащи запове́данное ста́рцем Серафи́мом и того́ уче́ние слага́ющи в се́рдце свое́м, преподо́бная ма́ти Еле́но, Ме́льничныя общи́ны нача́льницею им нарече́нная, в по́двизех неосла́бно пребыва́ющи, вся поруче́ния его исполня́ла еси́. И мы вси с ве́рою и любо́вию восхваля́ем тя си́це:

Ра́дуйся, Ме́льничныя общи́ны та́инственная нача́льнице;

ра́дуйся, Пресвяты́я Богоро́дицы ди́вная избра́ннице.

Ра́дуйся, испо́лнившая во́лю Всенепоро́чныя Влады́чицы;

ра́дуйся, послужи́вшая устрое́нию святы́я оби́тели.

Ра́дуйся, заве́ты ста́рца Серафи́ма свя́то храни́вшая;

ра́дуйся, наставле́нием его́ ве́рно после́довавшая.

Ра́дуйся, же́ртвенней любви́ науча́ющая;

ра́дуйся, мрак печа́лей прогоня́ющая.

Ра́дуйся, препо́добная ма́ти Еле́но, обру́чнице Жениха́ Небе́снаго.

Кондак 5

Боже́ственная по́мощь вы́ну дарова́лася есть тебе́ во оби́тели [сей] чу́дней, иде́же Сама́ Пренепоро́чная Влады́чица стопа́ма пречи́стыма земли́ каса́лася есть, и ты, блаже́нная ма́ти Еле́но, усе́рдно подвиза́лася еси́ во устрое́нии кинови́и и огражде́нии ея́ кана́вкою и ва́лом, благода́рно пою́щи Го́сподеви: Аллилу́иа.

Икос 5

Ви́дя враг ро́да челове́ча по́двиги и труды́ твоя́, препо́добная Еле́но, восхоте́ устраши́ти тя. Ты же вся претерпе́ла еси́, Взбра́нной Воево́де и Го́споду Вседержи́телю неуста́нно моля́щися, в хра́ме Бо́жием день и нощь пребыва́ющи и Псалти́рь неусы́пно пою́щи. Мы же, сему́ дивя́щеся, вопие́м ти:

Ра́дуйся, на святе́й кана́вке ре́вностно труди́вшаяся;

ра́дуйся, послуша́ние церко́вное усе́рдно исполня́вшая.

Ра́дуйся, дев диве́евских красото́ и благоле́пие;

ра́дуйся, ве́рным в труде́х преди́вное поможе́ние.

Ра́дуйся, чи́стым се́рдцем Спаси́теля ми́ра воспе́вшая;

ра́дуйся, мироде́ржца тьмы си́лою Христа́ победи́вшая.

Ра́дуйся, венцено́сице златоза́рная и Богопросла́вленная;

ра́дуйся, неве́сто Христо́ва непоро́чная.

Ра́дуйся, препо́добная ма́ти Еле́но, обру́чнице Жениха́ Небе́снаго.

Кондак 6

Пропове́дует оби́тель Диве́евская те́плую любо́вь твою́ ко и́ноческому житию́: ты бо высоты́ дости́гла еси́ доброде́телей и я́ко мироно́сицы у́тру глубоку́, арома́ты взе́мша, гро́ба Христо́ва достиго́ша, та́ко и ты благоуха́ние моли́твы чисте́йшия вме́сто ми́ра Го́споду принесла́ еси́. Све́том богоразу́мия озари́ и на́ша сердца́, да вси зове́м Всеще́дрому Бо́гу: Аллилу́иа.

Икос 6

Возсия́ любы́ Боже́ственная в се́рдце твое́м, Еле́но Богому́драя, я́ко кротча́йшая нра́вом и кро́ткаго Христа́ подо́бница, ми́лостива душе́ю, подая́ния бе́дным раздава́ла еси́ та́йно, милосе́рдием бли́жним послужи́вши и Бо́гу угоди́вши. Те́мже мы с любо́вию воспева́ем ти си́це:

Ра́дуйся, простото́ю и смире́нием све́тло украше́нная;

ра́дуйся, соверше́нства чу́днаго дости́гшая.

Ра́дуйся, си́рыя и ни́щия напита́вшая;

ра́дуйся, тя́готы се́стер любвеоби́льно поне́сшая.

Ра́дуйся, любве́ и милосе́рдия глубино́ неисчерпа́емая;

ра́дуйся, преди́вное в го́рестех на́ших услы́шание.

Ра́дуйся, ко Христу́ путеводи́тельнице ве́рная;

ра́дуйся, спасе́ния наста́внице богому́драя.

Ра́дуйся, препо́добная ма́ти Еле́но, обру́чнице Жениха́ Небе́снаго.

Кондак 7

Хотя́щи испо́лнити повеле́ния духоно́снаго ста́рца Серафи́ма, в разли́чныя ве́си после́довала еси́, преподо́бная ма́ти, ревну́юще об устрое́нии оби́тели вели́кия, и́же четве́ртым уде́лом Бо́жия Ма́тери нарица́ется, да вси просла́вят Всеблагослове́нную Влады́чицу Богоро́дицу и Еди́наго Человеколю́бца Христа́, воспева́я песнь побе́дную: Аллилу́иа.

Икос 7

Но́вую избра́нницу Цари́цы Небе́сныя тя ви́дяще, к те́плому предста́тельству твоему́ усе́рдно прибега́ем, в ско́рбех и боле́знех тя на по́мощь призыва́ем, заступле́ния твоего́ ми́лостиваго прося́ще и с любо́вию велича́ем тя, зову́ще:

Ра́дуйся, подви́жнице преди́вная и ма́ти милосе́рдная;

ра́дуйся, моли́твеннице о нас усе́рдная.

Ра́дуйся, ти́хою ра́достию сердца́ исполня́ющая;

ра́дуйся, любо́вию свое́ю согрева́ющая.

Ра́дуйся, возлю́бленная Цари́цею Небе́сною;

ра́дуйся, по́мощь показу́ющая чуде́сную.

Ра́дуйся, преподо́бнаго Серафи́ма сотаи́ннице;

ра́дуйся, ми́лостивая в беда́х изба́вительнице.

Ра́дуйся, препо́добная ма́ти Еле́но, обру́чнице Жениха́ Небе́снаго.

Кондак 8

Стра́нное чу́до ви́дим на тебе́, преподо́бная, я́ко открове́ний ди́вных от преподо́бнаго Серафи́ма сподо́билася еси́ и, им на путь спасе́ния наставля́ема, ра́дости духо́вныя испо́лнилася еси́, вопию́щи Всеблаго́му Бо́гу: Аллилу́иа.

Икос 8

Все́ю душе́ю свое́ю Бо́га возлюби́вши, ма́ти Еле́но, к по́двигом неосла́бным потекла́ еси́, зову́щи: «Се́рдце мое́ да возвы́сится к Тебе́, Сло́ве» и о Го́рнем помышля́ла еси́, ве́дущи Еди́наго Христа́ и Сего́ ра́спята. Мы же, восхваля́ющи любо́вь твою́ ко Го́споду, си́це вопие́м ти:

Ра́дуйся, лю́бящим тя ве́чных благ хода́таице;

ра́дуйся, в моли́твах неусыпа́ющая предста́тельнице.

Ра́дуйся, в труде́х и по́двизех неутоми́мая;

ра́дуйся, Свята́го Ду́ха мирополо́жнице благода́тная.

Ра́дуйся, подража́тельнице а́нгельския чистоты́;

ра́дуйся, све́тлосте Ева́нгельскаго сия́ния.

Ра́дуйся, Це́ркве чу́дное похвале́ние;

ра́дуйся, во обстоя́ниих непрело́жное упова́ние.

Ра́дуйся, препо́добная ма́ти Еле́но, обру́чнице Жениха́ Небе́снаго.

Кондак 9

Вся А́нгельския си́лы удиви́шася, чу́дное житие́ твое́ зря́ще, ма́ти Еле́но, и ве́рная твоя́ служи́тельница Иусти́на в ди́внем виде́нии сад прекра́сный ви́дела есть, угото́ванный тебе́ от Влады́ки Христа́, да вме́сте с не́ю ве́чно прославля́ете Всесвяту́ю Тро́ицу, воспева́ющи ра́достно песнь: Аллилу́иа.

Икос 9

Вети́и многовеща́ннии не возмо́гут изрещи́ кре́пость любве́ твоея́, всесла́вная, всем бо се́страм, по́мощь подаю́щи, от чи́стаго се́рдца со смире́нием послужи́ла еси́. Та́ко и нас научи́ ми́лости твори́ти, страсте́й мра́чную бу́рю отжени́, стена́ния серде́чныя на ра́дость преложи́, да со умиле́нием вопие́м ти:

Ра́дуйся, помо́щнице всеблага́я и предо́брая;

ра́дуйся, ма́ти чадолюби́вая и кро́ткая.

Ра́дуйся, неду́гов и слез го́рьких утоле́ние;

ра́дуйся, скорбя́щим душа́м сла́дкое утеше́ние.

Ра́дуйся, звездо́, благода́тию Свята́го Ду́ха сия́ющая;

ра́дуйся, взаи́мную любо́вь и единомы́слие утвержда́ющая.

Ра́дуйся, на по́мощь к нам поспеша́ющая;

ра́дуйся, Созда́теля о нас умоля́ющая.

Ра́дуйся, препо́добная ма́ти Еле́но, обру́чнице Жениха́ Небе́снаго.

Кондак 10

Спасе́ния ве́чнаго жела́ющи, житие́ Богоуго́дное яви́ла еси́, преподо́бная ма́ти Еле́но, вои́стину и кончи́на твоя́ бысть чуде́сна, ю́же за повеле́ние старца́ Серафи́ма прия́ла еси́, в соверше́ннем послуша́нии да́же до сме́рти пребы́вши и все упова́ние на милосе́рдие Бо́жие возложи́вши, со умиле́нием воспе́ла еси́ Ему́: Аллилу́иа.

Икос 10

Стена́ всем де́вам и ино́кинь отра́да, Пресвята́я Де́ва яви́ся ти, Небе́снаго Диве́ева сла́ву показу́ющи. Ты же я́ко Огнь Неизрече́нный

узре́ла еси́ Го́спода, и с Ним Цари́цу и святы́х А́нгелов. Те́мже приими́ от нас похвалы́ сия́:

Ра́дуйся, ди́вных открове́ний и виде́ний сла́вная прича́стнице;

ра́дуйся, о сестра́х диве́евских усе́рдная моли́твеннице.

Ра́дуйся, явле́нием Бо́жия Ма́тери обра́дованная;

ра́дуйся, Ца́рствие Бо́жие унасле́довавшая.

Ра́дуйся, подаю́щая ми́лость и оби́лие щедро́т;

ра́дуйся, го́рлице ти́хая и кро́ткая.

Ра́дуйся, ла́стовице, весну́ спасе́ния возвеща́ющая;

ра́дуйся, в Диве́еве Небе́снем нас ожида́ющая.

Ра́дуйся, препо́добная ма́ти Еле́но, обру́чнице Жениха́ Небе́снаго.

Кондак 11

Пе́ние всеумиле́нное а́ще и прино́сим ти, преподо́бная Еле́но, ничто́же соверша́ем досто́йно чудесе́м и милосе́рдию твоему́, всем бо, с ве́рою и любо́вию ко святы́м твои́м моще́м припа́дающим, исцеле́ния благода́тныя источа́еши. Мы же Созда́теля и Творца́ вся́ческих благодаря́ще, воспева́ем Ему́: Аллилу́иа.

Икос 11

Светоприе́мную свещу́ свою́ угото́вала еси́, богоблаже́нная ма́ти, и с му́дрыми де́вами в небе́сных черто́зех ны́не лику́еши. К ра́зуму Боже́ственному и нас наста́ви, наважде́ний вра́жиих избавля́ющи, да охраня́еми тобо́ю, вопие́м ти:

Ра́дуйся, ева́нгельския за́поведи испо́лнившая;

ра́дуйся, свеще́, любо́вию Христо́вою горя́щая.

Ра́дуйся, Ма́терь Све́та велича́ющая;

ра́дуйся, красото́ю любве́ сердца́ на́ша украша́ющая.

Ра́дуйся, изнемога́ющим отра́до и благода́тное укрепле́ние;

ра́дуйся, пла́чущим ра́досте и те́плое заступле́ние.

Ра́дуйся, бла́гости, ти́хости и любве́ испо́лненная;

ра́дуйся, венце́в нетле́нных удосто́енная.

Ра́дуйся, препо́добная ма́ти Еле́но, обру́чнице Жениха́ Небе́снаго.

Кондак 12

Благода́ть и ве́лию ми́лость всем подае́ши, преподо́бная ма́ти Еле́но, я́ко дерзнове́ние мно́гое ко Го́споду стяжа́вшая, и к покая́нию и́стинному нас призыва́еши, от бед и напа́стей оби́тель свою́ огражда́еши и науча́еши нас благода́рне пе́ти Всеми́лостивому Спа́су: Аллилу́иа.

Икос 12

Пою́ще твое́ прославле́ние, лику́ет и ра́дуется о тебе́ деви́ческий лик, и оби́тель Бо́жия Ма́тери духо́вно торжеству́ет, ю́же ми́лостивно посеща́еши и всех любо́вию свое́ю покрыва́еши, возглаша́ющих ти си́це:

Ра́дуйся, заре́, ко све́ту Христо́вы ве́ры наставля́ющая;

ра́дуйся, о́браз Богому́драго попече́ния явля́ющая.

Ра́дуйся, в гро́зных испыта́ниях преди́вное поможе́ние;

ра́дуйся, оби́тели побо́рнице и неруши́мая стено́.

Ра́дуйся, Де́вы Чи́стыя служи́тельнице ве́рная;

ра́дуйся, го́рния чистоты́ жемчу́жино многосве́тлая.

Ра́дуйся, Престо́лу Пресвяты́я Тро́ицы во сла́ве предстоя́щая;

ра́дуйся, ду́хом любве́ с на́ми пребыва́ющая.

Ра́дуйся, препо́добная ма́ти Еле́но, обру́чнице Жениха́ Небе́снаго.

Кондак 13

О преди́вная уго́днице и чадолюби́вая ма́ти на́ша Еле́но, приими́ ма́лое сие́ моле́ние на́ше, с любо́вию тебе́ возноси́мое, и предстоя́щи ны́не Престо́лу Пресвяты́я Тро́ицы, моли́ся о всех нас, да сподо́бимся дости́гнути Ца́рствия Небе́снаго, в ра́дости пою́ще Триеди́ному Бо́гу: Аллилу́иа.

Моли́тва

О пресла́вная ма́ти, ско́рая на́ша помо́щнице и засту́пнице и неусы́пная о нас моли́твеннице! Предстоя́ще честно́му о́бразу твоему́ и на сей [или́: ра́це моще́й твои́х и на сия́] со умиле́нием, я́ко живе́й ти су́щей, взира́юще, мо́лимся усе́рдно: приими́ проше́ния на́ша и принеси́ я́ ко Престо́лу Милосе́рдаго Отца́ Небе́снаго, я́ко дерзнове́ние мно́гое к Нему́ иму́щая; испроси́ притека́ющим к тебе́ и всем правосла́вным христиа́ном ве́чное спасе́ние и земно́е благоде́нствие, на вся же блага́я де́ла и начина́ния ще́дрое благослове́ние, и от вся́ких бед и ско́рбей ско́рое избавле́ние.

Ей, чадолюби́вая ма́ти на́ша! Тебе́, предстоя́щей Престо́лу Бо́жию, ве́домы суть ну́жды на́ша духо́вныя и жите́йския; при́зри на нас ма́терним о́ком и твои́ми моли́твами вся зла́я от нас отврати́, па́че же злых и богопроти́вных обы́чаев изба́ви; утверди́ же во всех ве́ры согла́сное ве́дение, взаи́мную любо́вь и единомы́слие, да во всем житии́ на́шем, словесы́ же и писа́нии и де́лы, сла́вится Всесвято́е И́мя Отца́ и Сы́на и Свята́го Ду́ха во ве́ки веко́в. Ами́нь.