Святитель Феодор, епископ Ростовский и Суздальский

Кондак 1

Избраннии угодницы Господни и пастырие предобрии Церкве Христовы, града Суждаля заступницы и теплии о душах наших молитвенницы Феодоре и Иоанне, отцы богоноснии, пение похвальное вам от усердия приносяще, молим вы и просим: яко имущии дерзновение ко Пресвятей Троице, предстательством вашим от всяких бед нас свободите, и наследники Царствия Небеснаго нас соделайте, да благодарственно вам вопием:

Радуйтеся, святителие Феодоре и Иоанне, предивнии чудотворцы.

Икос 1

Ангелов подражатели и человеков наставницы святителие божественнии, вы, яко ангели благии хранители, Отечество ваше земное свыше отечески назираете, богоприятными молитвами вашими, вся благая и душеполезная нам у Господа ходатайствуете, нетлением мощей ваших и чудесы преславными уверяюще нас, яко и по смерти живы суще, вся можете о укрепляющем вас Христе. Темже и зовем к вам с любовию теплою:

Радуйтеся, православия насадители.

Радуйтеся, благочестия подвижницы.

Радуйтеся, апостолов достойнии преемницы.

Радуйтеся, Евангелиа Христова неутомимии благовестницы.

Радуйтеся, первопастырие святыя Суждальския Церкве.

Радуйтеся, столпи непоколебимии непорочныя веры.

Радуйтеся, вдов и сирот питателие и заступницы.

Радуйтеся, безпомощных скории помощницы.

Радуйтеся, болящих врачеве благодатнии.

Радуйтеся, о любящих и чтущих вас предстателие.

Радуйтеся, светильницы богосветлии, душы наша озаряющии.

Радуйтеся, отцы премилостивии, дары спасительныя обильно нам низпосылающии.

Радуйтеся, святителие Феодоре и Иоанне, предивнии чудотворцы.

Кондак 2

Видя Господь всю пагубу душ человеческих, идолослужением языческим омраченных, по неизреченному человеколюбию Своему, восхоте призвати я к свету истинныя веры, и тебе, отче Феодоре, избрав в сие великое служение, да благовестиши людем Суждальским Евангелие Христово, и будеши пастырь добрый новопросвещенным и словесным овцам, словом и примером наставляя их богоугодно пети всех Творцу: Аллилуиа.

Икос 2

Разум благодатный воистину являете отцы богоноснии, делы и словесы вашими, все бо житие ваше земное бысть исполнено всяких добродетелей. Темже и Христос, видя ваша добрая дела, чудесы преславными обогати вас при жизни и по смерти, и сподоби вечнаго предстояния у Престола Своего Божественнаго, идеже созерцающе величество славы Его, и наслаждающеся блаженства райскаго, помяните ны чтущыя вас звании сими:

Радуйтеся, нищету духовную возлюбившии.

Радуйтеся, непорочное сердце стяжавшии.

Радуйтеся, милости и сострадания преисполненнии.

Радуйтеся, сотворившии и научившии, и велии нареченнии во Царствии Небеснем.

Радуйтеся, Духа Святаго сосуди избраннии.

Радуйтеся, друзи Христови возлюбленнии.

Радуйтеся, терпения и кротости образы преизящнии.

Радуйтеся, святителям похвало и иноком наставницы.

Радуйтеся, христоименитым людем ко спасению руководителие.

Радуйтеся, скории о душах наших предстателие.

Радуйтеся, безмезднии телес наших целебницы.

Радуйтеся, святителие Феодоре и Иоанне, предивнии чудотворцы.

Кондак 3

Сила Божия осени тя, святителю отче наш Иоанне, егда напрасное изгнание от престола твоего святительскаго незлобиво претерпел еси, подражая Агнцу Божию, вземшему грехи мира и от иудей пострадавшему даже до смерти на Кресте, Егоже Крест и страдания поминая, нивочтоже вменил еси поругания и изгнание, зовый скорбьми испытывающему тя Подвигоположнику Иисусу: Аллилуиа.

Икос 3

Имея вас святителие Христови, светильники чудесы присно сияющыя, Церковь Суждальская светло о вас красуется, яко невеста преукрашенная ваших подвигов красотою, и благодаряще Церкве Зиждителя, вам, Его избранным угодником, сия песненныя дары приносит, глаголюще:

Радуйтеся, иерарси богомудрии, тьму языческую разгнавшии.

Радуйтеся, архипастырие ревностнии, ко Христу приведшии многия душы человеческия.

Радуйтеся, яко мзда ваша многа на небесех есть.

Радуйтеся, яко восприясте почести вышняго звания.

Радуйтеся, наследницы славы невечерния.

Радуйтеся, сопричастницы радости нетленныя всех святых.

Радуйтеся, пищи райския обильно наслаждающиися в селениих праведных.

Радуйтеся, обретшии вечное всесветлое место упокоения.

Радуйтеся, благодатию Божиею ведущии вся наша скорби и нужды.

Радуйтеся, не оставляющии нас своею любовию и отеческим состраданием.

Радуйтеся, присно просящии нам у Господа дары благости Его.

Радуйтеся, никогдаже забывающии нас в молитвах ваших благоприятных у Престола Христова.

Радуйтеся, святителие Феодоре и Иоанне, предивнии чудотворцы.

Кондак 4

Буря злобы языческия возшуме на тя, святителю Феодоре, егда пастырски подвизался еси о просвещении верою Христовой людей Суждальских: обаче ты, яко воин добрый Царя Небеснаго, кротостию злобу побеждал еси, старцы и юныя умоляя с долготерпением многим и любовию отеческою, оставити суетное служение идолом, и познати истиннаго Бога, в Троице славимаго и покланяемаго, Емуже присно пел еси: Аллилуиа.

Икос 4

Слышим вы, отцы богоноснии, и по смерти, яко трубами многогласными, чудесы вашими блговествующыя нам всемощную Силу Христову, Еюже смерть попрася и живот вечный даровася человеком, Еюже и ваша телеса нетленна пребывают, подвизающе на чада ваша чествовати вас похвалами сими:

Радуйтеся, нетления благоухающии цветы.

Радуйтеся, безсмертия богосветлии и немерцающии лучи.

Радуйтеся, смирением высокая стяжавшии.

Радуйтеся, нищетою временною богатство вечное улучившии.

Радуйтеся, яко память ваша с похвалами до днесь во Святей Церкви.

Радуйтеся, яко имена ваша честна и благословенна в пастве вашей.

Радуйтеся, Российския страны благодатное удобрение.

Радуйтеся, града Суждаля сокровища пребогатая.

Радуйтеся, соборнаго храма Богоматере первейшая украшения.

Радуйтеся, подателие неоскуднии исцелений.

Радуйтеся, источницы неистощимии чудес.

Радуйтеся, молитвами вашими спасающии нас от всяких бед.

Радуйтеся, святителие Феодоре и Иоанне, предивнии чудотворцы.

Кондак 5

Боготечней звезде подобен был еси, святителю Иоанне, сиянием кротости твоея, мрак злобы и клеветы разогнавый. Егда бо клеветницы лукавии на тя возсташа, и на изгнание поносное тя осудиша, ты молитву усердную о них ко Господу принесл еси, и став пред всеми людьми Суждальскими руце твои преподобныя горе воздвигл еси: и абие клеветницы твои слепотою объяти быша, и вину свою пред всеми исповедаша, людие же вси, заблуждение свое познавше, прощения у тебе просиша и на престол святительский с честью тя возвратиша. Ты же и врагов твоих ослепших помиловал еси, и исцеление им подал еси, зовущым в покаянии глубоцем: Аллилуиа.

Икос 5

Видим вы, святителие Христови, очами веры у Престола Божия предстоящыя и за нас грешных молящыяся, и вашим заступлением обретающе в скорбех утешение, в недузех исцеление, в бедах скорое вспоможение, величаем возвеличившаго вас Царя Славы Христа, вам же, теплым предстателем нашым, от любве сердечныя вопием:

Радуйтеся, ангелов сожителие.

Радуйтеся, святых всех приснии друзи.

Радуйтеся, Божия благодати таинницы.

Радуйтеся, во благоухании святыни почивающии.

Радуйтеся, вся благая прошения наша исполняющии.

Радуйтеся, скории утешители скорбных сердец.

Радуйтеся, скоропослушливии предстатели сущих в бедах.

Радуйтеся, старых в изнеможении укрепление.

Радуйтеся, юных к благочестию утверждение.

Радуйтеся, младенцев милостивии наказателие.

Радуйтеся, грешных к покаянию наставницы.

Радуйтеся, святителие Феодоре и Иоанне, предивнии чудотворцы.

Кондак 6

Проповедника богопросвещенна и апостолом Христовым единонравна, вемы тя святителю Феодоре: благодать бо Господня излияся во устех твоих, преподобне, и дар Божий спасительный, по имени твоему, воистину был еси людем Суждальским, словом и примером равноангельскаго жития твоего приводя их к познанию Христову, и поучая сердцем и усты воспевати Спасителю мира: Аллилуиа.

Икос 6

Возсиясте отцы всеблаженнии, в стране Суждальстей, светом добродетельнаго жития вашего, яко светила богосветлая, и просветисте нощь глубокую идолослужения, лучами познания Христова: но и ныне, аще вратами смерти и во гробы снидосте, не престаете озаряти наша темныя душы благодатными лучами, да вас немолчно ублажаем благохвалении сицевыми:

Радуйтеся, милость и сострадание ко всем являющии.

Радуйтеся, тяжкия грешники от рова погибельнаго исхищающии.

Радуйтеся, пастырие добрии, присно готовии спасати от бед словесную вашу паству.

Радуйтеся, волку душегубительному не попускающии расхитити Богом врученное вам стадо.

Радуйтеся, звезды непрелестнии, путь ко спасению нам верно указующии в житейстем плавании.

Радуйтеся, облацы росоноснии, зной страстей наших прогоняющии.

Радуйтеся, фимиам молитв за нас Богу приносящии.

Радуйтеся, сладкою вонею благоухания Христова, сердца наша услаждающии.

Радуйтеся, венцами рукою Вседержителя украшеннии.

Радуйтеся, на Небеси Престолу Владычню покланяющиися.

Радуйтеся, собеседницы пресветлых горних сил.

Радуйтеся, заступницы усерднии земнородных.

Радуйтеся, святителие Феодоре и Иоанне, предивнии чудотворцы.

Кондак 7

Хотя Господь явити житие твое ангелоподобное, отче Иоанне, благоволи послати сослужебника тебе во время совершения Божественныя Литургии, ангела святаго, егоже видети сподобився благоверный князь Суждальский Борис, позна тя избранника Божия и великаго иерарха Христова, достойнаго еще во плоти сослужения ангельскаго, и о сем благодарственно возгласи ангелов и человеков Создателю: Аллилуиа.

Икос 7

Новопросвещеннии люди Суждальстии вас обретоша святителие Божии, пестуны искусныя и попечители ревностныя, на спасения стезю их наставляющыя, и всяку тьму нечестия сиянием учений ваших разгоняющыя. Темже яко проповедников благословенных, мы чада суще оных, ихже вы ученьми своими ко Христу приведосте, ваши труды и подвиги усердно поминаем, и зовем:

Радуйтеся, Троицы Живоначальныя священнотаинницы честнии.

Радуйтеся, таинств божественных совершители непорочнии.

Радуйтеся, немудрых наказателие благоискуснии.

Радуйтеся, языческаго нечестия крепцыи искоренители.

Радуйтеся, сеятели благочестия христианскаго предобрии.

Радуйтеся, нивы Господней делателие трудолюбивии.

Радуйтеся, вернии раби Небеснаго Домовладыки.

Радуйтеся, Учителя Христа ученицы добропослушливии.

Радуйтеся, смирения Его нелицемернии подражатели.

Радуйтеся, кротости Его вернии последователи.

Радуйтеся, любовию Его преисполненнии.

Радуйтеся, милосердие Его себе стяжавшии.

Радуйтеся, святителие Феодоре и Иоанне, предивнии чудотворцы.

Кондак 8

Странник и пришлец в земли Суждальстей был еси, святителю отче Феодоре, вышняго града Иерусалима Небеснаго взыскуя злострадании многими, и сия мужески претерпевая любве ради Христовы, ово от потемненных злобою идолослужителей, ово же от исконнаго врага спасения человеческаго, егоже всю силу терпением крепким и молитвами непрестанными до конца победил еси, и ныне со ангелы и мученики песнь победную поеши Подвигоположнику Христу: Аллилуиа.

Икос 8

Всем к вам молитвенно прибегающым, чудотворцы святии, любовь и благосердие ваше обильно являете, и многажды самая прошения наша исполнением предваряете: ибо дадеся вам велия благодать от Господа, болезни исцеляти, духи нечистыя изгоняти, разслабленныя возставляти, яко воистинну преемником апостольским и верным последователем Евангелиа Христова, Егоже обетования неложная туне подаете всем требующым дары целебныя, и за сие слышите пение таковое:

Радуйтеся, маслины благоплодныя, елей милости Божия нам источающии.

Радуйтеся, кедри благосеннолиственнии, в зной страстей нас покрывающии.

Радуйтеся, крини благовоннии небеснаго прозябения.

Радуйтеся, чудная древеса рая Иисусова.

Радуйтеся, плод сторичный принесшии на пажити Святыя Церкви.

Радуйтеся, вертоград Церкве Святыя труды вашими благовозделавшии.

Радуйтеся, новосаждения спасительная в нем возрастившии.

Радуйтеся, благословия органи изряднии.

Радуйтеся, евангельския проповеди трубы доброгласныя.

Радуйтеся, истиннии хранителие апостольских преданий.

Радуйтеся, Суждальския церкве украшение неотъемлемое.

Радуйтеся, святителие Феодоре и Иоанне, предивнии чудотворцы.

Кондак 9

Всею душею возлюбив избранника Божия Евфимиа, ты отче Иоанне, был еси ему помощник усерден в устроении обители его святыя, и друг присный во вся дни живота твоего. Темже ныне, в обителех горних вкупе обретше вечное блаженное упокоение, неразлучно в Бозе пребываете, и поете святых святейшему Слову: Аллилуиа.

Икос 9

Витии многовещаннии и доброгласнии не возмогут воистинну изрещи все обилие чудес ваших, угодницы Божии, имиже при жизни и по смерти прославистеся от Господа, и прослависте имя Его Святое в стране Суждальстей, еяже просветители и хранители соделастеся благоволением всех Творца, подвизающаго нас вопити к вам хвалебно:

Радуйтеся, рукою крепкою люди Суждальския ко спасению путеводившии.

Радуйтеся, к спасительному познанию Христову тех приведшии.

Радуйтеся, яко Петр и Павел мрежею проповеди евангельския душы человеческия уловившии.

Радуйтеся, апостольски страну Суждальскую светом богопознания просветившии.

Радуйтеся, чудесы преславными проповеданнаго вами учения истину засвидетельствовавшии.

Радуйтеся, всякое нечестие языческое истребившии.

Радуйтеся, православия святые догматы незыбленно утвердившии.

Радуйтеся, яко вашим предстательством и до ныне град ваш в православии нерушимо пребывает.

Радуйтеся, орли небеснии, крилами молитв ваших от бед нас покрывающии.

Радуйтеся, теплотою любве вашея нас согревающии.

Радуйтеся, пищею нетленною слова Божия нас напитавшии.

Радуйтеся, святителие Феодоре и Иоанне, предивнии чудотворцы.

Кондак 10

Спасительнаго учения Христова великопроповедник и чудотворец показался еси, святителю Феодоре, и свято пожил еси на земли в подвизех и трудех непрестанных, возращая посеянная тобою в стране Суждальстей семена благочестия Христианскаго, во еже принести им плод сторичный твоим благопопечением. И тако совершив подвиг свыше тебе назначенный, в старости маститей прешел еси к обителем небесным, со ангелы пети Триипостасному Богу: Аллилуиа.

Икос 10

Царя Небеснаго Христа служителие изряднии и воини добропобеднии, святителие божественнии Феодоре и Иоанне, темную силу душегубителя диавола крепко поправшии, и венцы победными свыше увенчаннии, подвизаете чудесы вашими верных соборы прославляти песньми духовными, подвиги святаго жития вашего, имже чудящеся, от любве сердечныя восклицаем вам радостно:

Радуйтеся, земнии ангели и небеснии человецы.

Радуйтеся, на небеси и на земли от Господа прославленнии.

Радуйтеся, блага нетленная унаследовавшии.

Радуйтеся, дары благодатныя щедро раздающии.

Радуйтеся, душевных и телесных недугов добрии целебницы.

Радуйтеся, милостивии страны Суждальския покровителие.

Радуйтеся, скорое вспоможение в бедах сущым являющии.

Радуйтеся, присно готовии на умоление прогневаннаго грехми нашими Творца.

Радуйтеся, со дерзновением многим предстательствующии за нас пред Престолом Вседержителя.

Радуйтеся, умилостивители известнии Небеснаго Отца.

Радуйтеся, непрестанно ходатайствующии пред благостию Его о мире всего мира.

Радуйтеся, праведно движимый на нас гнев Его молитвами вашими утоляющии.

Радуйтеся, святителие Феодоре и Иоанне, предивнии чудотворцы.

Кондак 11

Пение Пресвятей Троице в безмолвии ненарушимем возносити возжелев, святителю отче Иоанне, оставил еси престол твой святительский, и заключился еси в обители иночестей, да един Единому возлюбленному ти Иисусу послужиши в безмолвии и молитвах непрестанных, богомыслием восходя к совершенству духовному, и приуготовляяся к исходу радостному от земных к небесным, егоже улучив, со безплотными лики воспеваеши ныне вечнорадостную песнь Богу: Аллилуиа.

Икос 11

Светоподательным светильником подобны честныя раки, содержащыя в себе святыя и цельбоносныя мощи ваша иерарси Христови Феодоре и Иоанне: ибо свет невечерний возсияваете от них чудесы вашими, имже душы наша просвещаются познанием силы Христовой, еюже ваша тлению не причастная телеса, дивная и преславная знамения содевают, и вся приглашают песнословити к вам сице:

Радуйтеся, смертию временною пришедшии к жизни вечней.

Радуйтеся, облеченнии в светлую одежду чудотворнаго нетления.

Радуйтеся, от гробов ваших исцеления неоскудно источающии.

Радуйтеся, и самим призыванием честных имен ваших недуги врачующии.

Радуйтеся, слепых просветители.

Радуйтеся, разслабленных укрепители.

Радуйтеся, хромым правохождение подающии.

Радуйтеся, немым дар слова низпосылающии.

Радуйтеся, глухим слух отверзающии.

Радуйтеся, бесноватых от насилия демонскаго освобождающии.

Радуйтеся, многообразных немощей исцелители.

Радуйтеся, всем нам в час смерти усерднии защитницы.

Радуйтеся, святителие Феодоре и Иоанне, предивнии чудотворцы.

Кондак 12

Благодатных даров щедрии податели и милостивии отцы наши Феодоре и Иоанне, святителие всеблаженнии, Богу угодившии, и мзду небесную от Него восприявшии, и до ныне паству вашу отечески молитвенно назирающии и хранящии, молим вас, соделайте ны грешныя и недостойныя чада ваша, достойны последователи святаго жития вашего, и научите нас творити волю Божию, да покаянием очищени пред Господем, сподобимся вкупе с вами воспевати Ему на земли живых: Аллилуиа.

Икос 12

Поюще многая и преславная чудотворения ваша, угодницы Божии, поминаем велию любовь вашу к пастве вашей земной, юже при жизни и по смерти показасте, и покланяемся с любовию нетленным и многоцелебным мощем вашым, пред ними же яко живым вам сущым с нами, от усердия к вам вопием:

Радуйтеся, благодетели наши, блага временная и вечная нам свыше подающии.

Радуйтеся, покровители наши, покровом молитв ваших, от всякаго зла нас соблюдающии.

Радуйтеся, руководители наши к горнему Иерусалиму нас путеводящии.

Радуйтеся, предстатели наши, от враг видимых и невидимых нас избавляющии.

Радуйтеся, сокровища нетленная, богатством милости вашея нас обогащающии.

Радуйтеся, одушевленнии храмы Святаго Духа, дарами Его светло блистающии.

Радуйтеся, Пресвятыя Троицы вернии служители и угодницы.

Радуйтеся, Пресвятыя Богородицы избраннии раби и угодницы.

Радуйтеся, архангелов и ангелов достойнии собеседницы.

Радуйтеся, пророков и апостолов истиннии подражатели.

Радуйтеся, великих учителей и святителей честнии последователи.

Радуйтеся, преподобных и праведных блаженнии сонаследницы.

Радуйтеся, святителие Феодоре и Иоанне, предивнии чудотворцы.

Кондак 13

О, чудотворцы предивнии и врачеве благодатнии, святителие Христови Феодоре и Иоанне! Зрите наша скорби и беды, наша болезни и озлобления, и благоутробно вонмите малому сему молению нашему и песнословию смиренному, еже милостивно приемше умолите всех Творца и Господа, избавити нас скорбей и болезней временных и вечных, и сподобити нас недостойных со ангелы и всеми святыми во Царствии Небеснем, пети Богу: Аллилуиа.

[Се́й конда́к глаго́лется три́жды.]
[Далее повторяем 1‑е икос и кондак:]

Икос 1

Ангелов подражатели и человеков наставницы святителие божественнии, вы, яко ангели благии хранители, Отечество ваше земное свыше отечески назираете, богоприятными молитвами вашими, вся благая и душеполезная нам у Господа ходатайствуете, нетлением мощей ваших и чудесы преславными уверяюще нас, яко и по смерти живы суще, вся можете о укрепляющем вас Христе. Темже и зовем к вам с любовию теплою:

Радуйтеся, православия насадители.

Радуйтеся, благочестия подвижницы.

Радуйтеся, апостолов достойнии преемницы.

Радуйтеся, Евангелиа Христова неутомимии благовестницы.

Радуйтеся, первопастырие святыя Суждальския Церкве.

Радуйтеся, столпи непоколебимии непорочныя веры.

Радуйтеся, вдов и сирот питателие и заступницы.

Радуйтеся, безпомощных скории помощницы.

Радуйтеся, болящих врачеве благодатнии.

Радуйтеся, о любящих и чтущих вас предстателие.

Радуйтеся, светильницы богосветлии, душы наша озаряющии.

Радуйтеся, отцы премилостивии, дары спасительныя обильно нам низпосылающии.

Радуйтеся, святителие Феодоре и Иоанне, предивнии чудотворцы.

Кондак 1

Избраннии угодницы Господни и пастырие предобрии Церкве Христовы, града Суждаля заступницы и теплии о душах наших молитвенницы Феодоре и Иоанне, отцы богоноснии, пение похвальное вам от усердия приносяще, молим вы и просим: яко имущии дерзновение ко Пресвятей Троице, предстательством вашим от всяких бед нас свободите, и наследники Царствия Небеснаго нас соделайте, да благодарственно вам вопием:

Радуйтеся, святителие Феодоре и Иоанне, предивнии чудотворцы.

Молитва святителем Феодору и Иоанну, епископом Суждальским, чудотворцем

О велицыи угодницы Христови и чудотворцы, святителие Феодоре и Иоанне! Се мы недостойнии и грешнии скорбьми многими угнетаемии, к вам усердно прибегаем, и с упованием крепким молимся: отцы богомилостивии и благопослушливии, милостивно услышите ныне глас наш молебный, и потщитеся на помощь нашу, и яко при жизни вашей всем скорбящым и озлобленным помощницы и утешителие бысте, тако и ныне любовь вашу к нам явите, благодатным действом благоприятных молитв ваших, претворяюще скорбь нашу в радость, печаль же на утешение: вся бо можете о укрепляющем вас Христе, Егоже вернии служители бысте; от Негоже приявше вся обетования благая, низпошлите и нам великую и богатую милость Господню, да воспоем и прославим дивнаго во святых Своих Бога, Отца и Сына и Святаго Духа, ныне и присно и во веки веков. Аминь.

глас 8

Я́ко апо́столом единонра́вных учи́телей Су́ждальския страны́,/ и цели́телей душ и теле́с прему́дрых,/ и служи́телей Бо́гу благоприя́тных,/ к ра́кам честны́х моще́й ва́ших притека́юще,/ ублажа́ем вас, святи́телие Богоблаже́ннии, Фео́доре и Иоа́нне,/ в пе́снех же и пе́ниих, ра́дующеся, сла́вим Христа́,/ дарова́вшаго вам благода́ть исцеле́ний// и гра́ду на́шему Су́ждалю вели́кое в вас утвержде́ние.

Перевод: Как единомысленных с апостолами учителей Суздальского края, и премудрых целителей душ и тел, и служителей Богу угодных, прославляем вас, приходя к ракам с почитаемыми мощами вашими, святители Богоблаженные, Феодор и Иоанн, в псалмопениях и песнопениях духовных, радуясь, славим Христа, даровавшего вам благодать исцелений и городу нашему Суздалю великую в вас силу.

глас 8

В моли́твах бдя, се́рдцем же о ста́де твое́м вы́ну боле́знуя,/ уче́нием свои́м всех просвети́л еси́, Фео́доре прему́дре,/ те́мже Христа́ Бо́га моли́,// в день па́мяти твоея́ дарова́ти нам ве́лию ми́лость.

Перевод: В молитвенном бдении ты всегда болел сердцем о стаде своем, учением своим всех просветил ты, Феодор премудрый, потому Христа Бога моли в день памяти твоей даровать нам великую милость.

Минея, 8 Июня, Кано́н свято́му

Глас 6

Песнь 1

Ирмос: Я́ко по су́ху, пешеше́ствовав Изра́иль/ по бе́здне стопа́ми,/ гони́теля фарао́на/ ви́дя потопля́ема,/ Бо́гу побе́дную пе́снь пои́м, вопия́ше.

Припев: Святи́телю, о́тче Феóдоре, моли́ Бо́га о на́с.

Непоро́чным твои́м житие́м/ Христу́ Бо́гу благоугоди́л еси́, всеблаже́нне Фео́доре,/ Его́же ны́не моли́ о рабе́х твои́х,/ ве́рою почита́ющих всечестну́ю твою́ па́мять.

Припев: Святи́телю, о́тче Феóдоре, моли́ Бо́га о на́с.

Прему́дростию, досточу́дне, украша́яся и ра́зумом просвеща́яся,/ смире́нием же се́рдца и высото́ю жития́ красу́яся, Фео́доре,/ в Небе́сныя селе́ния преше́л еси́.

Сла́ва Отцу́ и Сы́ну и Свято́му Ду́ху.

Избра́н быв Го́сподем служи́ти честно́му Ева́нгелию, блаже́нне Фео́доре,/ во благоразу́мии лю́ди уче́нии прему́дрыми, о́тче, возрасти́л еси́.

И ны́не и при́сно и во ве́ки веко́в. Ами́нь.

Богородичен: Му́дрость Пренебе́сную, и Сло́во Присносу́щное,/ и Врача́ всех Христа́ ро́ждшая, Де́во,/ стру́пы и я́звы души́ моея́ исцели́ лю́тыя.

Песнь 3

Ирмос: Не́сть свят,/ я́коже Ты, Го́споди Бо́же мой,/ вознесы́й рог ве́рных Твои́х, Бла́же,/ и утверди́вый нас на ка́мени/ испове́дания Твоего́.

Припев: Святи́телю, о́тче Феóдоре, моли́ Бо́га о на́с.

Моли́ся Вседержи́телю изба́вится ста́ду твоему́ от наве́та вра́жия,/ прему́дре Фео́доре, моли́твами твои́ми.

Припев: Святи́телю, о́тче Феóдоре, моли́ Бо́га о на́с.

Гроб, иде́же лежи́т честно́е те́ло твое́,/ в наде́жде на по́мощь твою́ нас укрепля́ет,/ и упова́нием обвеселя́ет ве́рныя,/ святи́телю пресла́вне и всече́стне Фео́доре.

Сла́ва Отцу́ и Сы́ну и Свято́му Ду́ху.

Всеблаже́нне Фео́доре,/ дерзнове́ние име́я к Триипоста́сному Божеству́,/ непреста́нно моли́ся о душа́х на́ших.

И ны́не и при́сно и во ве́ки веко́в. Ами́нь.

Богородичен: Зижди́тель мой во чре́ве Твое́м зи́ждется,/ и млеко́м пита́ется, пита́яй вся́кое дыха́ние,/ Ма́ти Де́во Богоро́дице.

Седален, глас 1

Служи́тель быв Христу́, вся́ческих Влады́це, о́тче Фео́доре,/ научи́л еси́ нас и́стинному Богове́дению/ и освяти́л еси́ Боже́ственным Креще́нием,/ те́мже тя вси, я́ко просвети́теля своего́,/ и́стинно почита́ем, святи́теля и уго́дника Христо́ва.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богородичен: Безневе́стная Чи́стая Богоро́дице Де́во,/ Еди́на Предста́тельнице ве́рных и покро́ве,/ от бед и скорбе́й и вся́ких лю́тых обстоя́ний изба́ви всех,/ на Тя упова́ние иму́щих, Отрокови́це,/ и ду́ши на́ша спаси́ Боже́ственными моли́твами Твои́ми.

Песнь 4

Ирмос: Христо́с моя́ си́ла,/ Бог и Госпо́дь,/ честна́я Це́рковь/ боголе́пно пое́т, взыва́ющи,/ от смы́сла чи́ста о Го́споде пра́зднующи.

Припев: Святи́телю, о́тче Феóдоре, моли́ Бо́га о на́с.

Млеко́м уче́ний твои́х, Фео́доре, жа́ждушия духо́внаго просвеще́ния ду́ши напои́л еси́/ и был еси́ нам просвети́тель/ и пути́ спасе́ния указа́тель пречу́дный.

Припев: Святи́телю, о́тче Феóдоре, моли́ Бо́га о на́с.

Ты испо́лнен Свята́го Ду́ха, свяще́нне о́тче Фео́доре,/ лука́выя ду́хи от челове́к отгна́л еси́,/ ве́рныя же духо́вными уче́нии твои́ми просвети́л еси́.

Сла́ва Отцу́ и Сы́ну и Свято́му Ду́ху.

Источи́л еси́, святи́телю, уче́ния ре́ки живо́тнаго/ и вся́ку ду́шу благочести́вых напои́л еси́.

И ны́не и при́сно и во ве́ки веко́в. Ами́нь.

Богородичен: Ра́дуйся, Пресвята́я Де́во,/ Го́рних чино́в удивле́ние,/ проро́ческая про́поведь, апо́стольская немо́лчная уста́.

Песнь 5

Ирмос: Бо́жиим све́том Твои́м, Бла́же,/ у́тренюющих Ти ду́ши любо́вию озари́, молю́ся,/ Тя ве́дети, Сло́ве Бо́жий,/ И́стиннаго Бо́га,/ от мра́ка грехо́внаго взыва́юща.

Припев: Святи́телю, о́тче Феóдоре, моли́ Бо́га о на́с.

Моли́, святи́телю, изба́витися ве́чнаго муче́ния/ па́мять твою́ любо́вию почита́ющим.

Припев: Святи́телю, о́тче Феóдоре, моли́ Бо́га о на́с.

Бо́жия боже́ственне соверша́я,/ и чисте́йшим по́мыслом чи́стым прикаса́яся,/ непоро́чен яви́лся еси́, служа́ Бо́гови,/ я́ко Бо́жий святи́тель свяще́ннейший.

Сла́ва Отцу́ и Сы́ну и Свято́му Ду́ху.

Не пре́зри, святи́телю Фео́доре, притека́ющих к предста́тельству твоему́/ и всем поле́зная моли́твами твои́ми испроси́.

И ны́не и при́сно и во ве́ки веко́в. Ами́нь.

Богородичен: Пресвята́я Де́во,/ моли́ся Сы́ну Твоему́ и Бо́гу на́шему,/ да сохрани́т град сей и лю́ди заступле́нием Твои́м.

Песнь 6

Ирмос: Жите́йское мо́ре,/ воздвиза́емое зря напа́стей бу́рею,/ к ти́хому приста́нищу Твоему́ прите́к, вопию́ Ти:/ возведи́ от тли живо́т мой,/ Многоми́лостиве.

Припев: Святи́телю, о́тче Феóдоре, моли́ Бо́га о на́с.

Неукло́нным ра́зумом простира́лся ко Христу́ Бо́гу,/ многоко́зненнаго врага́ стре́лы притупи́л еси́,/ Фео́доре, о́тче наш.

Припев: Святи́телю, о́тче Феóдоре, моли́ Бо́га о на́с.

Разреши́ ны от грехо́вных соу́з и зол безчи́сленных/ моли́твами твои́ми, святи́телю Фео́доре.

Сла́ва Отцу́ и Сы́ну и Свято́му Ду́ху.

Боже́ственным поуча́яся,/ в мы́сленная же свята́я святы́х восходя́,/ ве́рных озари́л еси́ смы́слы, откры́в им та́инство Пресвяты́я Тро́ицы,/ свяще́нный о́тче Фео́доре.

И ны́не и при́сно и во ве́ки веко́в. Ами́нь.

Богородичен: Воспо́йте, вси ве́рнии,/ по́йте же Возсия́вшему боголе́пно из чре́ва Неискусому́жныя.

Кондак, глас 3

Я́ко ве́лие со́лнце,/ возсия́ пресла́вная па́мять твоя́, прему́дре Фео́доре,/ в не́йже подава́еши в беда́х су́щим спасе́ние,/ притека́ющим к тебе́ усе́рдно,/ благода́тию, е́юже облагодати́ тя Христо́с/ в жи́зни несконча́емой.

Икос

Духо́вныя ра́ди му́дрости,/ Правосла́вныя ве́ры учи́тель яви́лся еси́, Фео́доре всеблаже́нне,/ чистоты́ же ра́ди душе́вныя и теле́сныя,/ досто́йна архиере́йства обре́те тя Христо́с Бог,/ и упа́сл еси́ вруче́нную ти па́ству,/ по преставле́нии же чуде́с дарова́нием обогати́лся еси́./ И нас прича́стники благода́ти сотвори́,/ е́юже облагодати́ тя Христо́с в жи́зни несконча́емой.

Песнь 7

Ирмос: Росода́тельну у́бо пе́щь/ соде́ла А́нгел/ преподо́бным отроко́м,/ халде́и же опаля́ющее/ веле́ние Бо́жие мучи́теля увеща́ вопи́ти:/ благослове́н еси́, Бо́же оте́ц на́ших.

Припев: Святи́телю, о́тче Феóдоре, моли́ Бо́га о на́с.

Боже́ственными заря́ми светоно́сными при́сно озаря́я ду́ши на́ша,/ научи́ нас пе́ти:/ благослове́н Бог оте́ц на́ших.

Припев: Святи́телю, о́тче Феóдоре, моли́ Бо́га о на́с.

Дрема́ние от о́чию на́шею оттря́с,/ Боже́ственными же бодростьми́ сердца́ на́ша оживи́в,/ непреста́нно пе́ти укрепи́:/ благослове́н Бог оте́ц на́ших.

Сла́ва Отцу́ и Сы́ну и Свято́му Ду́ху.

Сын дне быв, святи́телю,/ труды́ ва́ра 20 дневна́го поне́сл еси́,/ и́хже ра́ди благода́ть исцеле́ния прие́м,/ ще́дро подае́ши ю пою́щим:/ благослове́н Бог оте́ц на́ших.

И ны́не и при́сно и во ве́ки веко́в. Ами́нь.

Богородичен: Пло́тию ро́ждши Безпло́тнаго, Богоро́дице Пречи́стая,/ стра́сти утоли́, Де́во, в сердца́х всех, пою́щих:/ благослове́н Бог оте́ц на́ших.

Песнь 8

Ирмос: Из пла́мене преподо́бным ро́су источи́л еси́/ и пра́веднаго же́ртву водо́ю попали́л еси́:/ вся бо твори́ши, Христе́, то́кмо е́же хоте́ти./ Тя превозно́сим во вся ве́ки.

Припев: Святи́телю, о́тче Феóдоре, моли́ Бо́га о на́с.

Оста́вил еси́, святи́телю, вся жите́йския сла́сти,/ сего́ ра́ди от дре́ва живо́тнаго причаща́ешися во ве́ки.

Припев: Святи́телю, о́тче Феóдоре, моли́ Бо́га о на́с.

Влады́це твоему́ Христу́ подо́битися ревну́я/ и труды́ к трудо́м в де́лании за́поведей Его́ прилага́я,/ испо́лнь плодо́в благи́х, о́тче,/ в Вы́шняя преше́л еси́ поко́ища.

Сла́ва Отцу́ и Сы́ну и Свято́му Ду́ху.

Потща́лся еси́ души́ неве́рных под и́го Христо́во подклони́ти, Фео́доре,/ те́мже яви́лся еси́ столп Це́ркве, непоколеби́мый во ве́ки.

И ны́не и при́сно и во ве́ки веко́в. Ами́нь.

Богородичен: Тобо́ю нам, Де́во Пречи́стая, свет возсия́, во тьме́ седя́щим,/ и отпуще́ние согреше́ний устро́ися:/ Ты бо Зижди́теля, всех Бо́га, родила́ еси́,/ Его́же превозно́сим во вся ве́ки.

Песнь 9

Ирмос: Бо́га/ челове́ком невозмо́жно ви́дети,/ на Него́же не сме́ют чи́ни А́нгельстии взира́ти,/ Тобо́ю бо, Всечи́стая, яви́ся челове́ком/ Сло́во воплоще́нно,/ Его́же велича́юще,/ с Небе́сными во́и Тя ублажа́ем.

Припев: Святи́телю, о́тче Феóдоре, моли́ Бо́га о на́с.

Вседержи́телю Го́споди,/ моли́твами Твоего́ уго́дника прости́ нам грехо́в на́ших мно́жество,/ да непреста́нно Тя, ве́рнии, велича́ем.

Припев: Святи́телю, о́тче Феóдоре, моли́ Бо́га о на́с.

Вседержи́теля и Го́спода о нас моли́, святи́телю Фео́доре,/ дарова́ти нам оставле́ние прегреше́ний,/ да Того́ очище́нными уста́ми непреста́нно велича́ем.

Сла́ва Отцу́ и Сы́ну и Свято́му Ду́ху.

Святи́тельский престо́л во гра́де на́шем пе́рвый украси́л еси́ све́тло,/ в нем же пожи́в, я́ко А́нгел,/ святы́м житие́м и уче́нием Боже́ственным освяти́л еси́ лю́ди, Богому́дре.

И ны́не и при́сно и во ве́ки веко́в. Ами́нь.

Богородичен: Милосе́рдая Госпоже́ Де́во Богоро́дице,/ ро́ждшееся из Тебе́ Сло́во па́че сло́ва непреста́нно моли́ спасти́ся нам,/ да Тя непреста́нно велича́ем.

Светилен

Яви́лся еси́ ны́не в па́мяти твое́й гра́ду Су́ждалю, святи́телю Фео́доре,/ столп непоколеби́мый и стена́ неруши́мая,/ боля́щим утеше́ние, гре́шников спору́чниче,/ Бо́гу приле́жно за ны моля́щийся.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богородичен: Христа́ нам родила́ еси́, Пречи́стая Влады́чице, Богора́дованная Де́во,/ спаси́ град и лю́ди на Тя упова́ющия,/ Богоро́дице Пренепоро́чная.