Преподобный Аркадий Новоторжский, Вяземский

Составлен священномучеником Аркадием (Остальским), епископом Бежецким.

Кондак 1

Избранный Господем сил и Царем славы, подвиги своими предивный образ иноческаго жития явивый и равноангельски на земли поживый, блаженне Аркадие, достойно восхвалити тя не возможем мы, любовию чтущии тя. Ты же предстательством твоим ко Господу от всяких бед свобождай всех, зовущих ти:

Радуйся, преподобне отче Аркадие, Новоторжский чудотворче.

Икос 1

Архангел и ангел лики со умилением зряху на пречудное житие твое, преподобне Аркадие; во плоти бо, аки безплотен, пожил еси и еще во отроческих летех, всем сердцем и душею Господа своего возлюбив, чистоту души и тела твоего соблюл еси и тако дивное житие твое, Господеви работая, проводил еси. Сего ради слышиши от нас пение сицево:

Радуйся, православныя веры утверждение;

Радуйся, града Вязьмы благодатное возращение.

Радуйся, корени благодатного прозябение;

Радуйся, Божия благодати сосуде избранный.

Радуйся, свещник, Божественною благодатию возжженный;

Радуйся, луче солнца правды возсиявый.

Радуйся, на земли, аки ангел поживый;

Радуйся, Духа Всесвятаго приятелище и жилище бывый.

Радуйся, яко ко Христу прилепился еси;

Радуйся, яко умными очима Бога зрети научился еси.

Радуйся, преподобне отче Аркадие, Новоторжский чудотворче.

Кондак 2

Видя непостоянство и суету мирскую, земную же красоту и славу ни во что же вменив, подвиг юродства измлада на себе подъял еси и в безмолвии мнозе, непрестающих слезах и постояннем плаче о гресех своих подвизался еси, поя Богу: Аллилуия.

Икос 2

Разумом просвещенным своим уразумел еси, яко век, иже на земли, преходящ есть, век же он, яко непреходящий возлюбил еси; сего ради еще юн сый телом и млад летами, обаче велик и силен пред Богом и человеки был еси. О сем убо дивимся и восхваляем тя сице:

Радуйся, яко светильник граду Вязьме юный был еси;

Радуйся, яко от юности твоея Господа возлюбил еси.

Радуйся, Тому Единому себе совершенно предавый;

Радуйся, славу маловременную презревый.

Радуйся, духови плоть свою покоривый;

Радуйся, душу свою от страстей очистивый.

Радуйся, желанием отечества небеснаго утвердивыйся;

Радуйся, нетленных благ насладивыйся.

Радуйся, душегубительнаго и гордаго змия смирением своим убивый;

Радуйся, подвиги своими жителей града своего удививый.

Радуйся, преподобне отче Аркадие, Новоторжский чудотворче.

Кондак 3

Силою Божиею укрепляемый, преподобный Ефрем, от града Торжка в славный град Киев научения ради иноческаго хождаше; пришед же в град твой и видев тя, аще и юна суща, обаче подвиг многих исполнена, благослови тя именем Божиим на путь духовнаго преуспеяния и прослави Бога, вопия Тому: Аллилуия.

Икос 3

Имел еси, преподобне, наставника твоего и руководителя и старца мудраго Ефрема архимандрита, и к тому наставления ради духовнаго от града своего во обитель Новоторжскую многажды притекал еси; темже и в добродетели возрастал еси, и от людей ведущих тя, слышал еси таковая:

Радуйся, великаго учителя доблий учениче;

Радуйся, неусыпный к Богу молитвенниче.

Радуйся, в послушании наставнику твоему добре пребывый;

Радуйся, постом и воздержанием плоть свою смиривый.

Радуйся, кротостию сердца твоего изряднее солнечнаго сияния просиявый;

Радуйся, вся в мире суетная возненавидевый.

Радуйся, духовные подвиги паче всего возлюбивый;

Радуйся, воинства небесныя подвиги своими удививый.

Радуйся, яко добродетелей многих сокровищем обогатился еси;

Радуйся, яко еще в юности многолетних духовным житием превзошел еси.

Радуйся, преподобне отче Аркадие, Новоторжский чудотворче.

Кондак 4

Бурю мирскаго жития и страстей юношеских нощными стоянии и подвигом воздержания укротил еси, преблаженне Аркадие, и постом сугубым и чистотою телесною душу твою украсил еси: темже прежде принятия ангельскаго образа, уже инок изрядный был еси и научил еси всех воспевати Богу: Аллилуия.

Икос 4

Слышаще и видяще Вяземстии людие чистое житие твое, преподобне Аркадие, прославляху Всемилостиваго Бога, даровавшего им таковаго юного подвижника и теплаго молитвенника, понеже убо ты, отче, псаломскую песнь исполняя, не давал еси сна очима своима, ни дремания веждома своима, обаче на камени велицем, иже бе при церкви Божии, по вся нощи в пении и молении подвизался еси. Сего ради любовию вопием ти:

Радуйся, денно и нощно в молитве пребывый;

Радуйся, человече Божий, в мире сем ангельски поживый.

Радуйся, чистоты и праведности благоуханный цвете;

Радуйся, Божественно дарованное сокровище.

Радуйся, девство свое непорочно соблюдый;

Радуйся, плачем и слезами душу свою от греховныя скверны омывый.

Радуйся, безмолвия твердаго хранителю;

Радуйся, заповедей Божиих усердный исполнителю.

Радуйся, яко житием твоим ангелы возвеселил еси;

Радуйся, яко подвиги твоими духов злобы посрамил еси.

Радуйся, преподобне отче Аркадие, Новоторжский чудотворче.

Кондак 5

Боготечней звезде уподобился еси, досточудне Аркадие, всем хотящим о Господе подвизатися и спасения вечнаго ищущим: якоже бо солнце многосветное просветися житие твое светом твоих добродетелей и подвиг чудесных сияньми. Темже и мы, невечерним светом славы твоея озаряеми, просветившему тя Своею благодатию Богу согласно вопием: Аллилуия.

Икос 5

Видев некия вдовицы сына, мала отрока, ядуща млеко, и из того же сосуда ядуща млеко гада, святе Аркадие, воздохнув рекл еси: в Троице славимый Боже, да не будет сего гада в граде Вязьме и за тридесять поприщ. И от того часа град сей и область его от змиев и гадов избавил еси даже до днесь. Таковому твоему чудодействию дивяшеся, со умилением взываем ти сице:

Радуйся, дар чудес измлада от Господа восприявый;

Радуйся, чистотою и смирением Богу угодивый.

Радуйся, Духа Пресвятаго пресветлое озарение;

Радуйся, града своего Божественное благословение.

Радуйся, чудес предивных совершителю;

Радуйся, у Престола Царя Небеснаго за нас теплый ходатаю.

Радуйся, от десницы Вседержительныя увенчанный;

Радуйся, от нас грешных на земли прославленный.

Радуйся, яко крест свой взем, Христу Богу последовал еси;

Радуйся, яко козни демонские крестом низложил еси.

Радуйся, преподобне отче Аркадие, Новоторжский чудотворче.

Кондак 6

Проповедник евангельскаго терпения, кротости и смирения был еси, блаженне Аркадие, егда в подвизе юродства твоего глумления, поругания и презрение от людей злых претерпел еси, иже духовными очима ослеплени бывше, не мняху тя быти светильника Божия благодати и святых юродства подражателя и не ведяху укрепляющему тя Богу пети: Аллилуия.

Икос 6

Возсия тебе свет новыя благодати, преподобне Аркадие, егда отеческий град, дом и род твой оставив и к наставнику твоему, преподобному Ефрему, пришед, во обители Новоторжстей вселился еси, и от рук сего старца пострига монашескаго сподобился еси, и образ многих добродетелей иноческих в себе носил еси. Сего ради слышиши от нас похвалы сия:

Радуйся, уставов иноческих крепкий хранителю;

Радуйся, кротости предивный учителю.

Радуйся, подвигов монашеских ревнителю;

Радуйся, смирения добрый наставниче.

Радуйся, иноческаго жития добрый поборниче;

Радуйся, во всеоружия Божия одеявыйся.

Радуйся, щит веры и шлем спасения стяжавый;

Радуйся, меч духовный, еже есть слово Божие, сладце возлюбивый.

Радуйся, воздержанием удобренный;

Радуйся, нестяжанием украшенный.

Радуйся, преподобне отче Аркадие, Новоторжский чудотворче.

Кондак 7

Хотя быти инок совершен, в послушание отцу своему духовному весь вдался еси, достохвальне Аркадие, и тому усерднейший в подвизех иноческих подражатель быв, научился еси купно с ним выну взывати к Богу: Аллилуия.

Икос 7

Дивную двоицу, благодати Божией исполненную и добродетельми иноческаго жития украшенную, яви нам Новоторжская обитель: тя, блаженне Аркадие, и богомудраго учителя твоего, преподобнаго отца нашего Ефрема, ему же ты добре поревновав, на высоту духовнаго совершенства восшел еси. Сего ради слышал от всех похвалы сия:

Радуйся, преподобных красото;

Радуйся, духовнаго жития чистое зерцало.

Радуйся, молитв наших благоприятное кадило;

Радуйся, иноков благочестивых многосветлое солнце.

Радуйся, монашествующих предивное украшение;

Радуйся, подвижников образе благоугождения.

Радуйся, светом добродетелей твоих град и страну нашу озаривый;

Радуйся, житием твоим Отца Небеснаго прославивый.

Радуйся, любовь Христову в сердце своем имевый;

Радуйся, заповеди Того сохранивый.

Радуйся, преподобне отче Аркадие, Новоторжский чудотворче.

Кондак 8

Странник во юдоли земней быв, век сей, яко маловременен, оставил еси, и оное житие и век будущий нескончаемый мудрствуя, вся нетленная тленными стяжати потщался еси, отнюдуже и тело твое духови поработил еси, да Христа Единаго приобрящеши, поя Тому: Аллилуия.

Икос 8

Всем сердцем твоим и всею душею твоею обители святых и благоверных князей Бориса и Глеба послужил еси, блаженне, иноческую братию послушанию, кротости, терпению и непрестанней молитве научая, наставнику же твоему во устроении обители неленостно помогая, темже и благоукрасися обитель сия елико домовным строением, тако и жития иноческаго насаждением. Сего ради вопием ти:

Радуйся, постников похвало;

Радуйся, обители Новоторжския предивная красото.

Радуйся, всем святым подражателю;

Радуйся, грядущаго града взыскателю.

Радуйся, яко бденными молитвами и постными подвиги, яко благовонными ароматы, душу твою облагоухал еси;

Радуйся, яко тую от страстей пагубных свободил еси.

Радуйся, духовную доброту соблюдый;

Радуйся, телесную чистоту сохранивый.

Радуйся, плоть свою возненавидевый;

Радуйся, вся красная мира сего презревый.

Радуйся, преподобне отче Аркадие, Новоторжский чудотворче.

Кондак 9

Весь от юности Господеви предался еси, преподобне Аркадие, и к Нему добродетелию приблизился еси, тленная бо яже на земли оставив, нетленное обрел еси богатство, и ныне во обителех небесных водворился еси со ангелы святыми и всеми праведниками, купно с ними ликовствуя и поя Богу: Аллилуия.

Икос 9

Витии земнороднии не возмогут по достоянию восхвалити досточудное житие твое, преподобне отче, твоя подвиги и добродетели, имиже дух твой возвысив, в горния скинии вселился еси. Мы же таковым дивящеся, во умилении сердец наших приносим ти хваления сия:

Радуйся, добродетельная маслино, в дому Божии возращенная;

Радуйся, шипок благовонный в пустынных удолиях процветший.

Радуйся, тленная вся земная оставивый;

Радуйся, нетленную славу от Господа восприявый.

Радуйся, граду нашему столпе непоколебимый;

Радуйся, обители нашея молитвенниче усердный.

Радуйся, небесных чертогов обитателю;

Радуйся, райских селений гражданине.

Радуйся, любовию твоею всех нас покрываяй;

Радуйся, исцеления неоскудно нам источаяй.

Радуйся, преподобне отче Аркадие, Новоторжский чудотворче.

Кондак 10

Спасение вечное восприим от Христа, Царя славы, Того моли, преподобне отче, да благочестно в сем веце поживше, в будущем наследие вечное обрящем, купно с тобою вопия Христу Богу: Аллилуия.

Икос 10

Стена еси и твердое заступление всем с молитвою притекающим к тебе, богомудре Аркадие; не презри убо и наша моления, с любовию к тебе возносимая, и предстательством твоим испроси у Христа Бога всем по коегождо потребе даровати, да зовем ти сице:

Радуйся, прошения наша добре исполняй;

Радуйся, всем нам скорую помощь подаваяй.

Радуйся, прибегающим к тебе скорый помощниче;

Радуйся, предивный чудотворче.

Радуйся, неусыпный о нас со ангелы предстателю;

Радуйся, на демонские полки победный воителю.

Радуйся, града Торжка пресветлый светильниче;

Радуйся, обители твоея крепкое ограждение.

Радуйся, елеем радования духовнаго нас умащаяй;

Радуйся, блистанием чудес твоих нас озаряяй.

Радуйся, преподобне отче Аркадие, Новоторжский чудотворче.

Кондак 11

Пение сие похвальное не презри, досточудне отче Аркадие, но приими е милостивно и покажи твое о нас отеческое милование; не можем бо по достоинству восхвалити тя, но елика возможем от усердия нашего дерзнухом, да тако восхваляюще тя, прославльшему тя Богу выну вопием: Аллилуия.

Икос 11

Светозарна светильника Церкви Своея яви тя Солнце Правды Христос Господь, преблаженне Аркадие, невещественным светом благодати Божией горяща и мглу неведения нашего озаряюща. Темже просим тя: просвети нас, омраченных греховными страстьми, да выну воспоем тебе:

Радуйся, звездо, на путь спасения приводящая;

Радуйся, деннице, просвещати Церковь Христову восшедшая.

Радуйся, яко свет учения Христова в сердце своем носил еси;

Радуйся, яко тем просвещаем, тьму страстей всегубительных разогнал еси.

Радуйся чудес дарований сподобивыйся;

Радуйся, во свете невечернем водворивыйся.

Радуйся, заблуждших путеводителю;

Радуйся, немощствующих исцелителю.

Радуйся, печальных утешителю;

Радуйся, помощниче наш и покровителю.

Радуйся, преподобне отче Аркадие, Новоторжский чудотворче.

Кондак 12

Благодатию данною ти от Бога, всех чтущих священную память твою и молитвенно тя призывающих, от бед избавляеши, недуги исцеляеши, ко спасению руководствуеши и научаеши со умилением и благодарением взывати к Богу: Аллилуия.

Икос 12

Поюще дивнаго во святых Бога, явльшего тя стране нашей чудотворца преславнаго, милостиваго ходатая и теплаго заступника, ублажаем пречудное житие твое, преподобне, и просим тя: буди молитвенник присный о нас пред Господем, да любовию вопием ти:

Радуйся, Царствия Христова наследниче;

Радуйся, чудотворений неиссякаемый источниче.

Радуйся, со ангелы Троице Пресвятей ныне предстояй;

Радуйся, венцем славы небесныя увенчанный.

Радуйся, яко благодатию Божиею благоухаеши;

Радуйся, яко тою мрак греховный разгоняеши.

Радуйся, яко верных сердца утверждаеши;

Радуйся, яко неверных ко Христу приводиши.

Радуйся, яко на земли и на небеси славу безсмертную достойно восприял еси;

Радуйся, яко радостей небесных сподобился еси.

Радуйся, преподобне отче Аркадие, Новоторжский чудотворче.

Кондак 13

О, великий угодниче Христов и преславный чудотворче, преподобне отче наш Аркадие, приими недостойное сие моление наше, с любовию ти приносимое, и благоприятными твоими к Богу молитвами огради обитель сию, град сей и всю страну нашу от междоусобий гибельных, от всяких зол и обстояний, от враг видимых и невидимых; даруй же нам в веце сем жития нашего исправление, заповедей Божиих соблюдение, в грядущем же вечных мук избавление и Царствия Христова наследие, да вкупе с тобою в скиниях небесных вопием Богу: Аллилуия.

[Се́й конда́к глаго́лется три́жды.]
[Далее повторяем 1‑е икос и кондак:]

Икос 1

Архангел и ангел лики со умилением зряху на пречудное житие твое, преподобне Аркадие; во плоти бо, аки безплотен, пожил еси и еще во отроческих летех, всем сердцем и душею Господа своего возлюбив, чистоту души и тела твоего соблюл еси и тако дивное житие твое, Господеви работая, проводил еси. Сего ради слышиши от нас пение сицево:

Радуйся, православныя веры утверждение;

Радуйся, града Вязьмы благодатное возращение.

Радуйся, корени благодатного прозябение;

Радуйся, Божия благодати сосуде избранный.

Радуйся, свещник, Божественною благодатию возжженный;

Радуйся, луче солнца правды возсиявый.

Радуйся, на земли, аки ангел поживый;

Радуйся, Духа Всесвятаго приятелище и жилище бывый.

Радуйся, яко ко Христу прилепился еси;

Радуйся, яко умными очима Бога зрети научился еси.

Радуйся, преподобне отче Аркадие, Новоторжский чудотворче.

Кондак 1

Избранный Господем сил и Царем славы, подвиги своими предивный образ иноческаго жития явивый и равноангельски на земли поживый, блаженне Аркадие, достойно восхвалити тя не возможем мы, любовию чтущии тя. Ты же предстательством твоим ко Господу от всяких бед свобождай всех, зовущих ти:

Радуйся, преподобне отче Аркадие, Новоторжский чудотворче.

Молитва преподобному Аркадию Вяземскому и Новоторжскому

Небеснаго вертограда Христова юная лозо, Церкви Православныя похвало превознесенная, града и обители нашея крепкое забрало и утверждение, всех с верою и любовию притекающих к тебе тихая отрада и утешение, преподобне и богоносне отче наш Аркадие. Во дни тяжких зол, обышедших страну нашу, к тебе, яко к молитвеннику благодатному и скорому помощнику, усердно прибегаем и усердно просим тя: пролей теплое твое ходатайство ко Всемилостивому Спасу, да милостив будет к неправдам нашим, да утвердит миром и любовию страну нашу, град сей, обитель сию и вся грады и веси наши от всякаго злаго обстояния, от глада и пагубы и междоусобныя свары добре да сохранит; Церковь же Свою святую да избавит от лютаго гонения, от смертоносныя и душегубительныя язвы неверия, да укрепит и возрастит ю; всех же нас от обидящих и ненавидящих нас да свободит и вся полезная к временному житию и спасению вечному дарует твоим предстательством и заступлением, да тако прославится тобою пречестное и великолепое имя Святыя Троицы Отца и Сына и Святаго Духа во веки веков. Аминь.

глас 4

От духо́внаго наста́вника, отца́ преподо́бнаго Ефре́ма, наставля́емь,/ послуша́ния до́брый рачи́телю, о́тче Арка́дие,/ от мирска́го мяте́жа удали́лся еси́/ и, и́нок быв изря́дный,/ до́брым по́двигом ревну́яй,/ от Христа́ Бо́га прия́л еси́ вене́ц сла́вы Небе́сныя;/ и ны́не, вку́пе с преподо́бным отце́м Ефре́мом у Престо́ла Вы́шняго предстоя́,/ о нас моли́ся, изба́витися нам от всех бед и скорбе́й// и спасти́ся душа́м на́шим.

Перевод: Руководимый духовным наставником, преподобным отцом Ефремом, прекрасный ревнитель послушания, отче Аркадий, ты удалился от мирской суеты и был превосходным монахом, усердно подвизаясь, от Христа Бога получил ты венец славы Небесной и сейчас, вместе с преподобным отцом Ефремом у Престола Всевышнего предстоя, молись о нас, об избавлении нашем от всех бед и скорбей и о спасении душ наших.

Минея, 14 Августа, Кано́н преподо́бному Арка́дию

Глас 2

Песнь 1

Ирмос: Гряди́те, лю́дие,/ пои́м песнь Христу́ Бо́гу,/ разде́льшему мо́ре и наста́вльшему лю́ди,/ я́же изведе́ из рабо́ты еги́петския,/ я́ко просла́вися.

Припев: Преподо́бне о́тче Арка́дие, моли́ Бо́га о на́с.

Сло́ве Бо́жий, молю́тися:/ даждь ми сло́во и отве́рзи ми устне́, недосто́йному рабу́,/ да восхвалю́ уго́дника Твоего́, преподо́бнаго отца́ Арка́дия,/ я́ко в Тебе́ и Тобо́ю просла́вися.

Припев: Преподо́бне о́тче Арка́дие, моли́ Бо́га о на́с.

О́тче преподо́бне Арка́дие,/ приими́ от недосто́йнаго, ю́же воспою́, песнь с любо́вию/ и моли́ за мя, гре́шнаго раба́ твоего́,/ от усе́рдия дерзну́вшаго восхва́лити тя,/ его́ же Христо́с просла́ви.

Припев: Преподо́бне о́тче Арка́дие, моли́ Бо́га о на́с.

Си́лою Христо́вою укрепля́емь, преподо́бне Арка́дие,/ вся кова́рства лука́ваго низве́ргл еси́ сле́зными твои́ми моли́твами,/ Богоблаже́нне Арка́дие преподо́бне.

Сла́ва Отцу́ и Сы́ну и Свято́му Ду́ху.

Безстра́стия умо́м просвеще́нным предстои́ши Бо́гу Вседержи́телю,/ от него́же знаме́ния и чудотворе́ния испроси́в, уго́дниче Христо́в, о́тче Арка́дие,/ пресве́тлый яви́ся, я́ко просла́вися.

И ны́не и при́сно и во ве́ки веко́в. Ами́нь.

Богородичен: О, па́че ума́ чуде́с Твои́х, Ма́ти Де́во!/ Бо́жие бо ипоста́сное Сло́во прия́вши во утро́бу твою́,/ родила́ еси́ па́че естества́ Безле́тнаго Сы́на,/ вся́ческая Боже́ственною Свое́ю си́лою прему́дре содержа́ща и окормляюща.

Песнь 3

Ирмос: На ка́мени мя ве́ры утверди́в,/ разшири́л еси́ уста́ моя́ на враги́ моя́,/ возвесели́бося дух мой, внегда́ пе́ти:/ несть свят, я́коже Бог наш,/ и несть пра́веден, па́че Тебе́, Го́споди.

Припев: Преподо́бне о́тче Арка́дие, моли́ Бо́га о на́с.

Совесть име́л еси́ благу́, преподо́бне о́тче,/ и о́ко серде́чное, взира́ющее к Бо́гу,/ и в послуша́нии до́бре пребы́л еси́ отцу́ своему́, наста́внику преподо́бному Ефре́му,/ с ни́мже ны́не предстоя́ у Престо́ла Вседержи́теля,/ о нас Христу́ Бо́гу моли́ся дарова́ти нам ве́лию ми́лость.

Припев: Преподо́бне о́тче Арка́дие, моли́ Бо́га о на́с.

Стягну́в те́ло свое воздержа́нием и чистото́ю,/ в Вы́шняя селе́ния, о́тче, дости́гл еси́/ и на Небесе́х со А́нгелы лику́еши./ Те́мже о нас Христу́ Бо́гу моли́ся,/ от него́ же испроси́ нам ве́лию ми́лость.

Сла́ва Отцу́ и Сы́ну и Свято́му Ду́ху.

Нака́зан Боже́ственными уче́ньми, посту́, и воздержа́нию,/ и вся́кой доброде́тели от отца́ своего́, наста́вника духо́внаго, преподо́бнаго Ефре́ма,/ от млады́х ногте́й навы́кл еси́ и тем Бо́гу угоди́л еси́./ О́тче преподо́бне Арка́дие, моли́ся о душа́х на́ших.

И ны́не и при́сно и во ве́ки веко́в. Ами́нь.

Богородичен: Просвети́, Чи́стая, се́тующее се́рдце мое́,/ при́сно преступле́ньми и жите́йскими мно́гими молва́ми оскверня́емое,/ и не оста́ви мене́ враго́м бы́ти в ра́дость,/ я́ко да просла́влю и любо́вию воспою́ Тя, Всепе́тая.

Седален, глас 4

Разуме́в, я́ко век, и́же на земли́, преходя́щ есть, блаже́нне,/ век он, я́ко не преходя́щий, от се́рдца возлюби́л еси́,/ ему́же и насле́дник яви́лся еси́./ Те́мже о всех нас Христа́ Бо́га моли́,/ в пе́снех, преподо́бне, твою́ па́мять почита́ющих.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богородичен: Обнови́ла еси́, Чи́стая, Боже́ственным Рождество́м Свои́м истле́вшее страстьми́ земноро́дных естество́/ и су́щим ме́ртвым прегреше́ньми жи́знь и нетле́ние породила́ еси́./ Те́мже Тя по до́лгу, Де́во Пречи́стая, вси ублажа́ем.

Песнь 4

Ирмос: Прише́л еси́ от Де́вы не хода́тай, ни А́нгел,/ но Сам, Го́споди, вопло́щся,/ и спасл еси́ всего́ мя, челове́ка./ Тем зову́ Ти: сла́ва си́ле Твое́й, Го́споди.

Припев: Преподо́бне о́тче Арка́дие, моли́ Бо́га о на́с.

Поще́нием и бде́нием те́ло свое́ изнури́л еси́, о́тче Арка́дие,/ А́нгелов сожи́тельниче, и по́стником ревни́телю, и всем святы́м подража́телю,/ с ни́ми же моли́ Христа́ Бо́га ве́лию и бога́тую ми́лость пода́ти нам.

Припев: Преподо́бне о́тче Арка́дие, моли́ Бо́га о на́с.

Чистото́ю и смире́нием Бо́гу угоди́л еси́/ и наста́внику своему́ во всем повину́лся еси́,/ с ни́мже моли́ся, преподо́бне, пода́ти нам ми́р и ве́лию ми́лость.

Сла́ва Отцу́ и Сы́ну и Свято́му Ду́ху.

Чистото́ю и смире́нием Бо́гу угоди́л еси́/ и наста́внику своему́ во всем повину́лся еси́,/ с ни́мже моли́ся, преподо́бне, пода́ти нам ми́р и ве́лию ми́лость.

И ны́не и при́сно и во ве́ки веко́в. Ами́нь.

Богородичен: Ма́ти Бо́жия Чи́стая,/ страсте́й мои́х сою́зы грехо́вныя, молвы́ и неду́ги отжени́:/ и́маши бо к Нему́ дерзнове́ние и благода́ть ми́ловати ны, Госпоже́ Милосе́рдая,/ Спа́са поро́ждши пло́тию,/ Его́ же непреста́нно моли́ спасти́ся нам.

Песнь 5

Ирмос: Просвеще́ние во тьме лежа́щих,/ спасе́ние отча́янных, Христе́, Спа́се мой,/ к Тебе́ у́тренюю, Царю́ ми́ра,/ просвети́ мя сия́нием Твои́м,/ ино́го бо, ра́зве Тебе́, Бо́га не знаю.

Припев: Преподо́бне о́тче Арка́дие, моли́ Бо́га о на́с.

Помоли́ся Христу́ Бо́гу, преподо́бне Арка́дие, о приходя́щих к тебе́ с ве́рою и любо́вию/ и ча́ющих в предста́тельстве твое́м грехо́в разреше́ние и неду́гов исцеле́ние получи́ти,/ е́же моли́твами твои́ми подае́ши всем незави́стно.

Припев: Преподо́бне о́тче Арка́дие, моли́ Бо́га о на́с.

Измла́да Христу́ после́довав и наста́внику своему́ во всем повину́яся,/ поще́нием и моли́твами проти́ву ко́знем де́монским вооружи́лся еси́/ и сего́ ра́ди был еси́ свети́льник, сия́я чудесы́, Арка́дие,/ испроси́ стране́ на́шей на враги́ побе́ду и душа́м на́шим ве́лию ми́лость.

Сла́ва Отцу́ и Сы́ну и Свято́му Ду́ху.

Сна очи́ма свои́ма не дал еси́, о́тче Арка́дие,/ ни ве́ждома свои́ма дрема́ния, до́ндеже Бо́гу угоди́л еси́,/ в тве́рдом пребыва́я послуша́нии Богому́дрому учи́телю твоему́,/ с ни́мже моли́ся о хваля́щих тя Христу́ Бо́гу на́шему,/ пода́ти нам ми́р и ве́лию ми́лость.

И ны́не и при́сно и во ве́ки веко́в. Ами́нь.

Богородичен: Пло́тию ро́ждши Безпло́тнаго, Богороди́тельнице Пречи́стая,/ теле́сных нас и душе́вных скве́рн омы́й/ окропле́нием Боже́ственныя благода́ти Сы́на Твоего́.

Песнь 6

Ирмос: Ко Го́споду от ки́та Ио́на возопи́:/ Ты мя возведи́ из глубины́ а́да, молю́ся,/ да я́ко Изба́вителю во гласе хвале́ния/ и́стины же ду́хом пожру́ Тебе́.

Припев: Преподо́бне о́тче Арка́дие, моли́ Бо́га о на́с.

Земна́я и мимотеку́щая, я́ко уме́ты, вмени́в,/ Христа́ еди́наго вожделе́л еси́,/ к Нему́же сою́зом любве́ прибли́зив ду́шу свою́,/ того́ обрести́ потща́лся еси́ ненасыща́емыя добро́ты.

Припев: Преподо́бне о́тче Арка́дие, моли́ Бо́га о на́с.

Процве́л в пусты́нных удо́лиях, прехва́льне о́тче наш, я́ко ши́пок благово́нен,/ и, я́коже крин, облагоуха́л еси́ со́вести ве́рных доброде́тельми и чудесы́./ Те́мже, преподо́бне, отжени́ от нас стра́сти смердя́щия.

Сла́ва Отцу́ и Сы́ну и Свято́му Ду́ху.

Жела́нием зе́льным, преблаже́нне, после́довал еси́ Богоно́снаго отца́ Ефре́ма житию́:/ того́ бо учени́к изря́дный был еси́,/ с ни́мже моли́ся Го́сподеви поми́ловати ду́ши на́ша.

И ны́не и при́сно и во ве́ки веко́в. Ами́нь.

Богородичен: Христа́ нам родила́ еси́, Пречи́стая Влады́чице, Богора́дованная Де́во./ Те́мже спаси́ град и лю́ди, на Тя упова́ющия.

Кондак, глас 2

К глубина́м Боже́ственнаго ра́зума впери́в ум свой,/ в Небе́сныя оби́тели восте́кл еси́/ и равноа́нгельно житие́, о́тче Арка́дие, на земли́ пожи́л еси́,/ и во всем пови́нулся еси́ духо́вному своему́ настоя́телю и наста́внику, преподо́бному отцу́ Ефре́му,/ и ны́не, вку́пе предстоя́ще у Престо́ла Влады́ки Христа́,/ моли́ся непреста́нно о всех нас.

Икос

Услы́шав Христо́в Ева́нгельский глас,/ оста́вив плотска́я мудрова́ния,/ бога́тство и сла́ву ми́ра сего́, я́ко прах, вмени́в,/ от мла́дости после́довав наста́внику и учи́телю своему́ духо́вному отцу́ Ефре́му/ и от того́ вся́кия доброде́тели навы́к,/ и бысть ему́ учени́к до́брым послуша́нием,/ и над страстьми́, я́ко Безпло́тен, подвиза́вся,/ и Безпло́тных ликостоя́нию сочета́вся,/ и́же пода́й ра́зум мне, недосто́йному рабу́ своему́,/ а́ще не ты ми по́даси и не просвети́ши ми ум,/ ка́ко тя восхвалю́ и воспою́, окая́нный?/ Дерза́ю на твое незло́бие и вопию́ си́це:/ ра́дуйся, Небе́сный челове́че и земны́й А́нгеле;/ ра́дуйся, я́ко после́довал духо́вному наста́внику своему́ во всем, посто́м и моли́твами,/ тем вку́пе с ним угоди́в Бо́гу,/ и бы́сте вели́кия свети́льники, сия́юще чудесы́,/ ны́не предстоя́ще у Престо́ла Христа́, Бо́га на́шего,/ моли́теся непреста́нно о всех нас.

Песнь 7

Ирмос: Купина́ в горе́ огненеопа́льная/ и росоно́сная пещь халде́йская/ я́ве предписа́ Тя, Богоневе́сто:/ Боже́ственный бо Невеще́ственный/ в веще́ственнем чре́ве Огнь неопа́льно прия́ла еси́./ Те́мже из Тебе́ Ро́ждшемуся пое́м:/ благослове́н еси́, Бо́же оте́ц на́ших.

Припев: Преподо́бне о́тче Арка́дие, моли́ Бо́га о на́с.

Я́ко вои́стинну тле́нных оста́вль/ и непостоя́нная ми́ра сего́ за уме́ты вмени́в,/ наста́внику своему́ после́довал еси́,/ те́мже с ним у Престо́ла Бо́жия предстои́ши, моли́ся спасти́ся всем нам.

Припев: Преподо́бне о́тче Арка́дие, моли́ Бо́га о на́с.

Я́ко добропло́дная ма́слина, в до́ме Бо́жии, преподо́бне, процве́л еси́,/ еле́ем у́бо ра́дования духо́внаго умаща́й ду́ши любо́вию пою́щих тя,/ преподо́бне о́тче Арка́дие.

Сла́ва Отцу́ и Сы́ну и Свято́му Ду́ху.

Житие́ твое́, о́тче Арка́дие преподо́бне, всече́стне, ди́вно на земли́ показа́л еси́:/ вели́кое бо поще́ние и смире́ние стяжа́л еси́./ Сего́ ра́ди на Небесе́х жи́знь ве́чную со учи́телем свои́м преподо́бным Ефре́мом насле́довал еси́./ Те́мже моли́ся при́сно ко Го́споду, от бед изба́вити ны, пою́щия тя.

И ны́не и при́сно и во ве́ки веко́в. Ами́нь.

Богородичен: Тя Предста́тельницу и́мамы, гре́шнии, о Пресвята́я Де́во:/ Ты бо благопреме́нна к нам твори́ши Сы́на Своего́ и Бо́га на́шего/ ма́терними Твои́ми моли́твами.

Песнь 8

Ирмос: В пещь о́гненную ко отроко́м евре́йским снизше́дшаго/ и пла́мень в ро́су прело́жшаго Бо́га,/ по́йте, дела́, я́ко Го́спода/ и превозноси́те во вся ве́ки.

Припев: Преподо́бне о́тче Арка́дие, моли́ Бо́га о на́с.

Я́ко свети́льник све́та, ду́шу свою́ сия́ньми доброде́телей украси́в,/ нетле́нный вене́ц от Бо́га прия́л еси́,/ и ны́не со А́нгелы и со учи́телем свои́м Престо́лу его́ предстоя́ще,/ о нас моли́ся, воспева́ющих:/ благослове́н Бог оте́ц на́ших.

Припев: Преподо́бне о́тче Арка́дие, моли́ Бо́га о на́с.

Весь от ю́ности Бо́гови освяти́лся еси́/ и к Нему́ доброде́телию прибли́жился еси́,/ тле́нная бо, я́же на земли́, оста́вив,/ Небе́сное обре́л еси́ бога́тство.

Сла́ва Отцу́ и Сы́ну и Свято́му Ду́ху.

Обре́л еси́ возме́здие от Христа́ Бо́га, преподо́бне о́тче Арка́дие,/ ны́не со А́нгелы святы́ми и с наста́вником свои́м, со отце́м Ефре́мом, ликовству́я/ и со все́ми пра́ведными в Небе́сных оби́телех водворя́яся./ моли́ся у́бо ко Го́споду, пода́ти нам ве́лию ми́лость.

И ны́не и при́сно и во ве́ки веко́в. Ами́нь.

Богородичен: Ма́ти Бо́жия Всенепоро́чная, души́ мое́й я́звы исцели́/ и стремле́ние утоли́ стра́стныя пло́ти моея́,/ омраче́нное се́рдце просвети́, ум мой умири́/ и вра́жиих напа́стей изба́ви.

Песнь 9

Ирмос: Я́же пре́жде со́лнца свети́льника Бо́га возсия́вшаго,/ плотски́ к нам прише́дшаго из боку́ Деви́чу,/ неизрече́нно воплоти́вшая, Благослове́нная, Всечи́стая,/ Тя, Богоро́дице, велича́ем.

Припев: Преподо́бне о́тче Арка́дие, моли́ Бо́га о на́с.

Яви́лся еси́, о́тче Арка́дие, гра́ду на́шему столп непоколеби́м/ и прибе́жище всем, притека́ющим к тебе́:/ исцеле́ния бо благода́ть тобо́ю прие́млем/ и от лю́тых скорбе́й твои́ми моли́твами избавля́емся.

Припев: Преподо́бне о́тче Арка́дие, моли́ Бо́га о на́с.

Приими́, святы́й преблаже́нне, о́тче досточу́дне Арка́дие, пе́ние сие́ похва́льное/ и твое́ оте́ческое покажи́ о нас ми́лование:/ не можем бо по досто́инству похвали́ти тя,/ но ели́ко можем, от усердия дерзну́хом.

Сла́ва Отцу́ и Сы́ну и Свято́му Ду́ху.

Еже прино́сим ти, о́тче преподо́бне Арка́дие, пе́ния не пре́зри,/ но приими́ сие́ ми́лостивно/ и моли́ Творца́ на́шего, Влады́ку и Го́спода,/ изба́вити ны от вся́каго преще́ния/ и ми́лость обрести́ в день стра́шнаго его́ испыта́ния.

И ны́не и при́сно и во ве́ки веко́в. Ами́нь.

Богородичен: Богоро́дице Влады́чице,/ мене́, во глубину́ зла сластьми́ плотски́ми и страстьми́ жития́ впа́дша, возста́ви:/ на Тя бо, я́ко Ма́терь Бо́га на́шего, наде́жду и́мам, раб Твой./ Не пре́зри упова́ния на́шего, но сотвори́ спасти́ся всем нам.

Светилен

Святы́ни храм был еси́, преподо́бне,/ и по Боже́ственному прича́стию ра́йский граждани́н,/ в не́мже пита́ешися невозбра́нно дре́ва разу́мнаго и нетле́нныя сла́вы./ Те́мже па́мять твою́, Арка́дие преподо́бне, твори́ще/ и ве́рою и любо́вию хва́ляще тя, мо́лимся:/ моли́ся Го́сподеви спасти́ся всем нам.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богородичен: Ра́дуйся, кля́твы Е́виной разреше́ние;/ ра́дуйся, све́те су́щим во тьме./ Ра́дуйся, хра́ме живы́й жива́го Бо́га;/ ра́дуйся, ве́рным похвало́./ Ра́дуйся, преподо́бным утвержде́ние,/ ра́дуйся, правосла́вным сла́во, Благослове́нная Мари́е.