Преподобный Аристоклий (Амвросиев), старец Московский

На малой вечерни
На Господи, воззвах: стихиры на 4, глас 2:
Мира земнаго красоту отринув/ и славы, яже едина от Бога, взыскав,/ стопы ко Святей горе Афонской направил еси/ и милостию Владычицы Богородицы/ сего пристанища спасения достигл еси,/ в радости славя Бога Благодетеля,/ хотящаго всем спастися и в разум истины приити.
Песньми церковными прославляюще в радовании,/ восхвалим, вернии людие,/ преблаженнаго старца Афонскаго/ и чудотворца Московскаго Аристоклия,/ Божия избранника и возлюбленное чадо Богородицы,/ той бо, имея дерзновение ко Господу,/ молится о спасении душ наших.
Плоть ветхаго человека/ в поте трудов твоих смирил еси,/ преподобне Аристоклие,/ душу же в подвизех веры и любве,/ якоже древнии отцы, укрепил еси,/ сего ради Богу угодил еси,/ Егоже моли спастися душам нашим.
Слава, глас 6:
Егда достигл еси в меру возраста духовнаго,/ послаша тя старцы обители Афонския/ во град первопрестольный Москву,/ да подъемлеши труды пастырския/ и утвердиши веру людей православных,/ многими обдержимых напастьми.
И ныне, Богородичен, глас тойже:
Богородице, Ты еси Лоза истинная,/ возрастившая нам Плод живота,/ Тебе молимся, молися, Владычице,/ со святыми апостолы,/ помиловати души наша.
На стиховне стихиры, глас 6.
Подобен: Тридневен:
Преблаженне отче Аристоклие,/ пространный путь суеты мирския оставив/ и всего себе воли Божией предав,/ стезю монашескаго многотруднаго жития,/ не обинуяся, избрал еси/ и, во дни и нощи Господеви неленостно поработав,/ Царство Небесное унаследовал еси,/ идеже есть всех веселящихся жилище.
Стих: Честна пред Господем/ смерть преподобных Его.
Днесь торжествует Святая гора Афонская/ и радуется первопрестольный град Москва,/ празднующе честную память преподобнаго Аристоклия,/ той бо дерзновенно молится/ пред Престолом Бога Вышняго/ о спасении душ наших.
Стих: Блажен муж, бояйся Господа,/ в заповедех Его восхощет зело.
Преподобне отче Аристоклие,/ приими моление наше,/ да избавимся от бури бед и искушений/ и всяких напастей вражиих,/ ты бо имаши дерзновение ко Владыце Христу,/ спасающему род человеческий.
Слава, и ныне, глас 8:
Владычице, приими молитвы раб Твоих/ и избави нас/ от всякия нужды и печали.
На велицей вечерни
Блажен муж: 1-й антифон. На Господи, воззвах: стихиры на 8, глас 2:
Преподобне отче Аристоклие,/ ты, издетска Богу в любви прилежав,/ силу благодати Божия познал еси,/ еюже со одра болезни тяжкия/ здрав востал еси/ и в радости воспел еси:/ слава Тебе, Господи, благодеявшему ми.
Преблаженне отче Аристоклие,/ измлада верою душу утвердив,/ великому угоднику Божию Николаю/ материю твоею молитися научен был еси,/ егоже ходатайством воздвиже тя Господь/ от недуга тяжка и мучительна.
Мира сего славу возненавидев/ и душу твою горе устремив,/ единаго Бога зрети вожделел еси/ и Тому единому служити поревновал еси,/темже дарова ти Господь по сердцу твоему/ зрети славу Небесную/ и благодатию тя яве просвети,/ сего ради ублажаем тя,/ угодниче Божий Аристоклие.
Ныне славит тя земля Оренбургская,/ идеже ты, избранниче Божий, родился еси,/ и в благочестии материю своею воспитан быв,/ в меру мужа совершенна достигл еси,/ жития иноческаго возжадал еси/ и имже вшел еси в чертог славы Небесныя.
Глас 8:
Преподобне отче Аристоклие,/ прият тя Святая гора Афонская,/ идеже сподоби тя Пречистая Богородица/ чин ангельский восприяти./ Ты же, от силы в силу восходя,/ демонския полки победил еси/ и в подвизех Христа Бога прославил еси,/ Егоже днесь с лики горних сил присно воспеваеши.
Радуйся, священная главо,/ преподобне отче Аристоклие,/ иноков изрядный наставниче/ и усердный о людех пред Богом предстателю!/ Ты бо, красотою духовною обитель твою озаряя/ и лукавых духов силою молитв сокрушая,/ дерзновение велие к Человеколюбцу Христу стяжал еси,/ Егоже моли спастися душам нашим.
Преславне отче Аристоклие,/ ублажает тя земля Московская,/ в нюже вселился еси,/ идеже, исполняя послушание отцев святогорских/ во устроении подвория Афонскаго,/ наипаче же в окормлении душ человеческих,/ усердно потрудился еси,/ многия бо привел еси ко спасению/ и наследию Царствия Небеснаго.
Воспоим любовию, братие,/ подвиги преподобнаго отца Аристоклия,/ пречестнаго старца Афонскаго/ и прехвальнаго чудотворца Московскаго,/ той бо многое попечение о страждущих/ и от демонов мучимых в житии своем яви./ И ныне присно молится Христу Богу/ о спасении душ наших.
Слава, глас 6:
Бог, прославляемый в совете святых/ и преподобными гласы воспеваемый,/ ныне приемлет тя, преподобне отче Аристоклие,/ яко цевницу духовную,/ с лики ангельскими славящую/ Троицу Живоначальную,/ Отца и Сына и Святаго Духа.
И ныне, Богородичен, глас тойже: Кто Тебе не ублажит:
На литии стихиры, глас 5:
Подобен: Радуйся:
Радуйся, священная главо,/ преподобне отче Аристоклие,/ горних чинов собеседниче,/ монахов богомудрый наставниче,/ скорбящих утешение,/ недугующих исцелителю,/ заблудших вразумление/ и о всех, хотящих спасения,/ усердный молитвенниче.
Слава, глас 6:
Яко ангел во плоти,/ на земли пожил еси,/ преподобне отче Аристоклие,/ и, Духа Всесвятаго благодать стяжав,/ сокровище некрадомое обрел еси./ Темже и Христос Бог прослави тя,/ яко вернаго слугу Своего,/ и введе в Чертог славы вечныя.
И ныне, Богородичен, глас тойже: Творец и Избавитель:
На стиховне стихиры, глас 2:
Приидите, возрадуемся, людие,/ празднующе память добропобеднаго мужа,/ преподобнаго отца нашего Аристоклия,/ той бо, многотрудным путем земнаго странствия шествуя,/ силою смирения, терпения и послушания/ лютыя козни вражия посрами./ Сего ради славою вечною/ увенча Человеколюбец Господь угодника Своего.
Стих: Праведник яко финикс процветет/ и, яко кедр, иже в Ливане, умножится.
Отче святый Аристоклие,/ настави нас на путь правый,/ имже добре шествуя,/ стяжал еси велия добродетели,/ веру, надежду и любовь,/ и возшел еси враты райскими в Небесный чертог,/ уготованный Господем всем, любящим Его.
Стих: Честна пред Господем/ смерть преподобных Его.
Славят тя, преблаженне отче Аристоклие,/ земля Московская и Святая гора Афонская,/ ты бо, подвиги монашескаго жития подъем,/ повеленная от Господа исполнил еси,/ Егоже моли спастися душам нашим.
Слава, глас 1:
Кто возможет изрещи труды и подвиги твоя,/ преподобне старче Аристоклие?/ Кто познает брани твоя/ с похотию плоти, очес и гордостию житейскою?/ Кто не удивится неустанному попечению твоему/ о спасении чад духовных?/ Ты бо, яко пастырь добрый,/ душу полагал еси за овцы своя./ Темже восхваляем тя,/ яко небеснаго молитвенника/ о чтущих любовию святую память твою.
И ныне, глас тойже, Богородичен: Се исполнися Исаиино проречение:
Тропарь, глас 4:
На Святей горе Афонской духовне утвердився,/ яко звезда пресветлая, во граде Москве просиял еси,/ Духа же Святаго благодать стяжав,/ мир Христов в души твоей восприял еси,/ преподобне отче Аристоклие,/ моли Христа Бога/ спастися душам нашим.
На утрени
На Бог Господь: тропарь святаго дважды. Слава, и ныне, Богородичен: Еже от века утаенное:
По 1-м стихословии седален, глас 8:
Мира сего суету презрев, нетленных Небесных благ ревностне вожделел еси, богоносе отче Аристоклие, и, Подвигоположнику Христу невозвратно последовав, Царствие Божие внутрь себе стяжал еси, добродетельми же многими душу твою украсив, Троицу Живоначальную прославил еси, Ейже молися о спасении душ наших.
Слава, и ныне, Богородичен, глас тойже:
Яко Всенепорочная Невеста Творца, яко Неискусомужная Мати Избавителя, Приятилище яко сущи Утешителя, Всепетая, беззакония мя суща скверно жилище и демонов игралище в разуме бывша, потщися и сих злодействия мя избавити, светло жилище добродетельми соделавши. Светодательная и нетленная, разжени облак страстей и Вышняго причастия сподоби, и Света Невечерняго молитвами Твоими.
По 2-м стихословии седален, глас 3:
Взем иго Христово на рамо свое, смирению и кротости от Божественнаго Пастыреначальника научился еси, и в терпении душу твою стяжав, в радость Господа Вседержителя вшел еси и жилище вечных благ, уготованное верным чадам Божиим от сложения мира, наследовал еси. Сего ради вопием ти, отче преблаженне Аристоклие: радуйся и веселися, яко мзда твоя многа на Небесех.
Слава, и ныне, Богородичен, глас тойже:
Яко невозделанная, Дево, Лоза, прекрасный Грозд, Христа, возрастила еси, источающа нам вино спасительное, всех веселящее души и телеса. Темже, яко виновну Тя добрых ублажающе, присно со Ангелом вопием Ти: радуйся, Обрадованная, Господь с Тобою.
По полиелеи, седален, глас 8:
Славит тя, угодниче Божий Аристоклие, первопрестольный град, обретый в радости велией твоя цельбоносныя мощи. Темже не забуди нас, чтущих твою святую память, но присно поминай, да твоими молитвами Человеколюбец Христос спасет души наша.
Слава, и ныне, Богородичен:
О Тебе радуется, Благодатная, всякая тварь, ангельский собор и человеческий род, освященный Храме и Раю словесный, девственная Похвало, из Неяже Бог воплотися и Младенец бысть, прежде век Сый Бог наш, ложесна бо Твоя престол сотвори и чрево Твое пространнее небес содела. О Тебе радуется, Благодатная, всякая тварь, слава Тебе.
Степенна, 1-й антифон 4-го гласа. Прокимен, глас 4: Честна пред Господем/ смерть преподобных Его. Стих: Что воздам Господеви о всех, яже воздаде ми? Всякое дыхание: Евангелие от Матфеа, зачало 43.
По 50-м псалме стихира, глас 6:
Возжелав града Небеснаго,/ прелестнаго мира сего, во зле страстей лежащаго,/ мужественне отреклся еси/ и в удел Пресвятыя Богородицы/ с радостию вселился еси,/ Еяже Покровом вся стрелы разженныя угасил еси/ и, яко крин сельный, процвел еси/ в преподобстве и правде.
Канон  преподобнаго, глас 8.
Песнь 1
Ирмос: Колесницегонителя фараоня погрузи/ чудотворяй иногда/ Моисейский жезл, крестообразно поразив/ и разделив море,/ Израиля же беглеца, пешеходца спасе,/ песнь Богови воспевающа.
Богоблаженне отче Аристоклие, измлада скорбная обстояния претерпевая, Христа всем сердцем возлюбил еси, Егоже с лики ангельских сил на Небесех непрестанно ныне славословиши.
Тяжкую болезнь во отрочестве претерпев, молитвами матере твоея от святителя Николая исцеление получил еси, темже, Чудотворцу великому подражая, правило веры и образ благочестия людем явил еси.
Плоть распяв со страстьми и похотьми, в вертоград Святыя горы Афонския вселился еси и всего себе воли старцев обители покорил еси. Темже Господь твое сердце чисто содела и дух прав обнови во утробе твоей.
Богородичен: Чудес Твоих Божественных множество благохвалити предначиная, Тя, Дево, со умилением молю: благодать Твою подаждь ми, недостойному.
Песнь 3
Ирмос: Утверждей в начале Небеса разумом/ и землю на водах основавый,/ на камени мя, Христе, заповедей Твоих утверди,/ яко несть свят паче Тебе,/ Едине Человеколюбче.
В подвизех монашескаго жития преуспевая, вся козни демонския силою веры и упованием на Христа превозмогл еси, Имже и вечною славою увенчан был еси.
Послушания отцем богомудрым добрый рачитель быв, иго Христово благое на рамо подъял еси и во брани с духами злобы поднебесными, яко столп непоколебим, явился еси.
Гора Святая Афонская торжествует, земля же Московская проповедует великия подвиги твоя, имиже вся злокозненная искушения, яко доблий воин Христов, препобедил еси.
Богородичен: Неизреченно зачала еси, Богоневесто Пречистая, Господа и Спаса, от лютых зол избавляющаго с верою призывающих Тя.
По 3-й песни седален, глас 4:
Имже образом желает елень на источники водныя, сице возжада душа твоя, преподобне отче Аристоклие, к Богу Жизнодавцу, сего ради, вся красная мира земнаго презрев, на благословенней горе Афонской и в земли Русской усердне потрудился еси и тако житием твоим праведным Господа Бога прославил еси.
Слава, и ныне, Богородичен:
Владычицу Тя мира вемы, Дево Всепетая, яко родила еси нам всех Творца и Спасителя мира, Иже и прослави Тя, Пречистую Матерь Свою, подая нам Тобою благодать и велию милость.
Песнь 4
Ирмос: Ты моя крепость, Господи,/ Ты моя и сила,/ Ты мой Бог, Ты мое радование,/ не оставль недра Отча/ и нашу нищету посетив./ Тем с пророком Аввакумом зову Ти:/ силе Твоей слава, Человеколюбче.
Всего себе всеблазей воли Божией покорив и вся повеления отцев духовных исполнив, в землю Русскую возвратился еси и многоскорбный труд пастырства подъял еси.
Людие, многими болезньми душевными и телесными одержимии, отче святый, притекаху к тебе, просяще скорыя помощи, и исцеляхуся.
Силою благодати, данною тебе свыше, болезнующих из нездравия во здравие приводил еси, иже и славляху Многомилостиваго Бога.
Богородичен: Не имамы, раби Твои, инаго предстательства и покрова разве Тебе, Владычице. Темже, Чистая, от сердца вопием: всякия беды свободи всех верных, к Тебе прибегающих.
Песнь 5
Ирмос: Вскую мя отринул еси/ от лица Твоего, Свете Незаходимый,/ и покрыла мя есть чуждая тьма, окаяннаго?/ Но обрати мя и к свету заповедей Твоих/ пути моя направи, молюся.
Многи скорби претерпел еси, егда супостат диавол наусти людей оглаголати тя, отче преподобне, обаче смирением вся вражия козни препобедил еси и венец победный от Господа приял еси.
Егда обличися неправда, воздвигнутая на тя, отче святый, паки послаху тя старцы афонстии во град Москву, идеже паче преждняго в добродетелех подвизался еси.
Недугующии притекаху к тебе, отче праведне, и никтоже тощь отхождаше, чудесем, тобою сотворенным, дивящеся и Бога, дивнаго во святых Своих, славяще.
Богородичен: Несть, иже к Твоему притече покрову, и не улучи, Отроковице, многих Твоих щедрот. Темже и аз молюся, не лиши мя Твоего заступления.
Песнь 6
Ирмос: Очисти мя, Спасе,/ многа бо беззакония моя,/ и из глубины зол возведи, молюся,/ к Тебе бо возопих, и услыши мя,/ Боже спасения моего.
Христовою любовию уязвився, отче преподобне, оставил еси вся, яже в мире сем и, горе ум вперив, точию о Небеснем помышлял еси.
Многия труды во граде Москве подъял еси, подворие Святыя горы Афонския устрояя, да молитвою послужит братия людем страждущим и в нуждех сущим.
Возлюбленное чадо Пречистыя Богородицы был еси, отче, присно моляся пред святою иконою Скоропослушницею и храм в честь Ея воздвигл еси, да присно славится имя Богоотроковицы Марии.
Богородичен: Радуйся, Купино Неопалимая, юже Моисей виде на Синаи, и Лествице высокая, юже Иаков виде, Преблагословенная Богородице Приснодево.
Кондак, глас 8:
Яко звезда на тверди небесней возсиял еси/ и, путь многотруднаго монашескаго жития прошед,/ подвигами добродетелей венец нетленный стяжал еси,/ темже и Христос Бог даром чудес обогати тя./ Поминай нас, чтущих святую память твою, преподобне отче Аристоклие,/ горы Афонския похвало и земли Русския украшение.
Икос:
В страсе Божием соделовая путь спасения, преподобне, утвердился еси словом апостольским, яко любы мира сего вражда Богу есть и, иже восхощет друг быти миру, враг Божий бывает. Темже, вся блага земная во уметы вменив, руку свою на рало возложил еси и отнюдь вспять не зрел еси, но, прямо стопы твоя по словеси Господню направляя, мир и покой в души твоей обрел еси. Сего ради и Бог тя прослави, яко вернаго раба Своего, и увенча, яко добропобеднаго воина Царя Небеснаго.
Песнь 7
Ирмос: Божия снизхождения/ огнь устыдеся в Вавилоне иногда,/ сего ради отроцы в пещи, радованною ногою,/ яко во цветнице, ликующе, пояху:/ благословен еси, Боже отец наших.
В годину тяжких гонений в земли нашей яко свеща горящая просиял еси, мрак неверия прогоняя, немощныя укрепляя, малодушныя утверждая и унывающия к Богу подвигая.
Твердо веру Христову исповедуя, бурю, от богопротивник воздвизаемую, утишал еси и всех, притекающих к тебе, во уповании на Бога Промыслителя утверждал еси.
Добрый пастырь явился еси, отче преблаженне, душу свою за овцы полагая, и до последняго воздыхания стадо, еже собрал еси, окормлял еси и от сетей вражиих ограждал еси.
Богородичен: Сына Отча Единороднаго, безматерня первее и из Тебе рожденна, уведевше безотча, Божию Матерь исповедуем Тя, безстрастно рождшую и Деву пребывшу паче слова, Марие Богоневесто.
Песнь 8
Ирмос: Седмерицею пещь/ халдейский мучитель/ богочестивым неистовно разжже,/ силою же лучшею спасены сия видев,/ Творцу и Избавителю вопияше:/ отроцы, благословите,/ священницы, воспойте,/ людие, превозносите во вся веки.
Со ангелы вселися душа твоя, отче святый, идеже несть печаль, болезнь и воздыхание. Темже молим тя: предстательствуй пред Престолом Бога живаго о нас, любовию чтущих память твою.
Исполнив закон Христов, веру соблюл еси, течение земное скончал еси, Царствие Небесное наследовал еси. Не забуди и нас, убогих чад твоих, отче преподобне, но молися Всемилостивому Богу, да спасет души наша.
Воли своея до конца совлекся, преподобне отче, Богови покорился еси и крест земнаго жития в терпении пронесл еси. Темже прослави тя Христос, премудре спасаяй род человеческий.
Богородичен: Чудес паче всех, Всенепорочная,/ в Тебе новосодеявшееся чудо показася явственно:/ Бога бо родила еси телесне,/ земным за милосердие соединившася в неслитнем соединении, Богоневесто.
Песнь 9
Ирмос: Ужасеся о сем Небо,/ и земли удивишася концы,/ яко Бог явися человеком плотски/ и чрево Твое бысть пространнейшее Небес./ Тем Тя, Богородицу,/ Ангелов и человек чиноначалия величают.
В преставлении твоем, отче святый, возрадовашася Небесныя Силы, сретающе душу твою, и Господь введе тя в райския обители, яко вернаго раба Своего.
Новое чудо яви нам Господь молитвами твоими, преподобне, даровав обрести цельбоносныя мощи твоя, во утешение всех, чтущих святую память твою и благодарящих Бога, дивнаго во святых Своих.
Рака святых мощей твоих, отче досточудне, источает милости всем, с верою к тебе притекающим, иже и воспевают велие твое дерзновение пред Владыкою Христом о спасении душ погибающих.
Богородичен: Небо небес вышшее явилася еси Божественною Твоею славою, Богоневесто Владычице, в Тя бо Бог наш вселися и явися нам.
Светилен:
На Святей горе Афонской усердно подвизаяся, братию обители, яко наставник изрядный, ко спасению приводил еси; в земли же Русской свое богоугодное житие скончал еси. Ныне с высоты Небесныя посылаеши помощь чтущим твою святую память, отче святый Аристоклие.
Слава, и ныне, Богородичен:
Тя Заступницу вси имамы, грешнии, о Пресвятая Дево! Благоуветлива нам соделай Сына Твоего матерними Твоими мольбами.
На хвалитех стихиры на 4, глас 2:
Приидите, людие, прославим днесь/ праведнаго и богоноснаго Аристоклия,/ доброславнаго угодника Божия,/ Афонскаго древа жизни благую отрасль/ и Русския земли цвет благоуханный,/ и тому с верою возопиим:/ спасай нас, отче преподобне, молитвами твоими/ от всякаго зла и лютых обстояний.
Измлада милость Божию познав/ и исцеление от тяжкаго недуга улучив,/ всею душею Творцу всяческих прилепился еси/ и, суетная мира сего оставив,/ стопы твоя, блаженне отче, к горе Афонской направил еси,/ идеже сладость жития во Христе обрел еси.
Послушания добрый рачитель быв,/ николиже отцем духовным прекословил еси,/ темже, от силы в силу восходя,/ мир и покой души твоей обрел еси/ и чадо возлюбленное Пресвятыя Богородицы явился еси./ Молися о нас, преподобне отче Аристоклие,/ да терпением скорбей смирим себе/ и наследницы Царствия Небеснаго соделаемся.
Слава, глас 6:
Восхвалим днесь вернии,/ преподобнаго старца Аристоклия,/ чадо возлюбленное Пресвятыя Богородицы,/ горы Афонския похвалу/ и земли Московския украшение,/ иже, предстоя Престолу Божию,/ прославляет Троицу Единосущную/ и молится о душах наших.
И ныне, Богородичен, глас тойже:
Богородице, Ты еси Лоза истинная,/ возрастившая нам плод живота,/ Тебе молимся, молися, Владычице,/ со святыми апостолы и преподобным Аристоклием/ помиловати души наша.
Славословие великое, ектении и отпуст.
На Литургии
Блаженны от канона святаго, песни 3-я и 6-я. Прокимен, глас 7: Честна пред Господем/ смерть преподобных Его. Стих: Что воздам Господеви о всех, яже воздаде ми? Апостол к Галатом, зачало 213. Аллилуиа, глас 6: Блажен муж, бояйся Господа, в заповедех Его восхощет зело. Стих: Сильно на земли будет семя его. Евангелие от Луки, зачало 24. Причастен: В память вечную будет праведник:

Кондак 1

Избранниче Божий и дивный подвижниче благочестия, скорый заспупниче в нуждах и напастех сущий, усердный молитвенниче о всех чающих твоея помощи, к тебе припадаем и молимся, во еже спастися нам, избави нас от належащия мглы греховных обстояний, с любовию и умилением тебе зовущих:

Радуйся, преподобне Аристоклие, старче Афонский и Московский чудотворче.

Икос 1

Ангелом небесным уподобился еси в земном житии и благое иго Христово на рамо свое подъял еси, всю надежду на Бога возложив, и шед за Христом, достигл еси Царствия Небеснаго. Сего ради с верою приносим ти песнь сию:

Радуйся, равноангельнаго жития ревнителю, радуйся, спасительнаго ига Христова безропотный носителю.

Радуйся, яко вся скорогибнущая земная блага возненавидел еси, радуйся, яко райская жилища взыскал еси.

Радуйся, сладость житейскую отвергнувый, радуйся, Хлеба небеснаго Христа вкусивый.

Радуйся, Источнику живыя воды приобщивыйся, радуйся, на камени веры утвердивыйся.

Радуйся, преподобне Аристоклие, старче Афонский и Московский чудотворче.

Кондак 2

Видев Господь ревность яже по Бозе благочестивыя твоея матере, молящияся о тебе, тяжко недугующем, прия слезное ея прошение и дарова предстательством святителя Николая тебе исцеление. Ты же, востав от одра болезни здрав, воспел еси Врачу душ и телес Богу: Аллилуия.

Икос 2

Разум возраста совершеннаго стяжав, познал еси тщету мира, лежащаго во зле, и, Христа возлюбив, стопы своя направил еси по словеси Его: «Иже хощет по Мне ити, да отвержется себе и возмет крест свой и по Мне грядет», и тако обрел еси в сердце своем Спаса Христа. Мы же, видяще твое произволение, поем ти сице:

Радуйся, измлада сладчайшаго Иисуса возлюбивый, радуйся, Тому единому смиренно последовавый.

Радуйся, молитвою матере попечению святителя Николая врученный, радуйся, завет ея чтити сего Угодника Божия исполнивый.

Радуйся, яко в часы напастей к нему с верою притекал еси, радуйся, яко многою помощию от него душу твою спасал еси.

Радуйся, многоразличныя беды от лукавых духов претерпевый, радуйся, христоподражательным крестоношением славу от Царя Небеснаго улучивый.

Радуйся, преподобне Аристоклие, старче Афонский и Московский чудотворче.

Кондак 3

Силою любве Божия влекомый и хотяй всего себе предати служению в Троице славимому Богу, избрал еси узкий путь богоугоднаго монашескаго жития и, оставив суету многомятежнаго мира, пришел еси во удел Пресвятыя Богородицы, на святую гору Афонскую, в радости Спасителю Богу поя: Аллилуия.

Икос 3

Имеяй ревность в подвизех иноческаго жития, всего себе вверил еси духовному водительству богомудрых афонских старцев русския обители Макария и Иеронима и их молитвами, стяжав мир Христов в сердце своем, преуспел и умножил еси добродетели души своея. Сего ради вопием ти, во умилении зовуще:

Радуйся, красоту мира сего презревый, радуйся, славу земную нивочтоже вменивый.

Радуйся, в духовный вертоград Божия Матере вселивыйся, радуйся, под Ея Богоматерним омофором добропобедно подвизавыйся.

Радуйся, отсечением воли своея диавола препобедивый, радуйся, силою послушания старцем вся козни его посрамивый.

Радуйся, воздержанием похоть плоти и очес своих укротивый, радуйся, смиренномудрием гордость житейскую поправый.

Радуйся, преподобне Аристоклие, старче Афонский и Московский чудотворче.

Кондак 4

Бурю многострастнаго житейскаго моря преплыв, обрел еси немятежное пристанище страны Афонския, восходя тамо на гору духовнаго совершенства, ничтоже помышляя земная, точию горняя взыскуя, и тако угодил еси Человеколюбцу Богу, немолчно воспевая Ему: Аллилуия.

Икос 4

Слыша Господь твоя усердныя молитвы, сподоби тя пострига монашескаго и великия схимы и возведе на степень иерейскаго служения, ущедрив многими дары духовными, аки пятию талантами, да умножиши их в поте трудов монашескаго жития во спасение не токмо души своея, но и многих братий и ближних. Мы же, видяще плоды подвигов твоих, взываем ти сице:

Радуйся, монашеских обетов непреложный блюстителю, радуйся, чистоты сердца своего неуклонный хранителю.

Радуйся, многих даров Духа Святаго сподобивыйся, радуйся, на поприще старчества неослабне потрудивыйся.

Радуйся, в служении Богу дарованные ти таланты зело умноживый, радуйся, вся повеления Домовладыки Господа прилежно исполнивый.

Радуйся, Бога в души своей и телеси прославивый, радуйся, храм Духа Святаго в себе благодатию Божиею устроивый.

Радуйся, преподобне Аристоклие, старче Афонский и Московский чудотворче.

Кондак 5

Богоугодное бысть житие твое, преподобне отче Аристоклие, и яко раб, ведый волю Господина своего, в послушании отцем обители быв, притекл еси во град Москву подъяти труд устроения Афонскаго подвория и тамо послужити призвавшему тя Богу Небесному, к Нему же приводил еси всех ищущих спасения, воспевая: Аллилуия.

Икос 5

Видеша людие твое богоугодное житие, узреша тя великаго светильника веры, надежды и любве и текоша к тебе яко к целебному источнику, да обретут себе богопросвещеннаго утешителя и наставника в богоугодном житии. Сего ради и мы взываем к тебе, в благодарении зовуще:

Радуйся, седящим во тьме луче умнаго Солнца Христа, радуйся, всего себе воли Его покоривый.

Радуйся, повелению отцев духовных вопреки ничтоже глаголавый, радуйся, в кротости стопы своя во град Москву абие направивый.

Радуйся, во смирении бремя служения в нуждах сущим понесый, радуйся, любовию во Христе и молитвами многия к Богу приведый.

Радуйся, заповедей евангельских ревнителю, радуйся, добродетелей христианских неленостный учителю.

Радуйся, преподобне Аристоклие, старче Афонский и Московский чудотворче.

Кондак 6

Проповедник любве и милосердия неотступно был еси, егда дух ненависти и злобы обдержа в помрачении страну российскую и вверже корабль Церкве в пучину лютых бед и напастей, мнози же в страсе смятошася, ищуще избавления от скорыя погибели, и текоша к тебе яко к доброму пастырю. Приимше же тобою утверждение в православней вере, с радостию возопиша Богу Спасителю: Аллилуия.

Икос 6

Возсия неизреченным светом яко велия свеща твоя жизнь во Христе, прогоняя в людех тьму неверия и заблуждения, по множеству беззаконий нашедшую на ня, постави бо тебе Господь на свещнице, да видят тя вси обремененнии грехми и исходят от тьмы нечестия к свету Божественныя Истины. Мы же, ведуще толикую благодать в тебе, вопием ти сице:

Радуйся, свеще неугасимая веры и благочестия, радуйся, светило духовное, тьму греха прогоняющее.

Радуйся, зерцало Солнца Правды Христа, милость и любовь Его отражающее, радуйся, смирением и терпением вся искушения побеждаяй.

Радуйся, огнем ревностнаго служения терния безверия попаляяй, радуйся, путевождю, от сетей врага заблудшия избавляяй.

Радуйся, яко предстательством твоим вся ложная и суетная изгоняется, радуйся, яко тобою вера христианская утверждается.

Радуйся, преподобне Аристоклие, старче Афонский и Московский чудотворче.

Кондак 7

Хотя Многомилостивый Господь избавити от работы вражия всех ищущих спасения, дарова ти великую силу чудотворений, да обратятся людие всем сердцем своим в покаянии ко Всемилосердному Богу, глаголющу: Не хощу смерти грешника, но еже обратитися и живу быти ему, да воспевают вси Человеколюбцу Христу: Аллилуия.

Икос 7

Новаго чудотворца московскаго и богоноснаго старца афонскаго яви тя Господь, егда пришел еси в меру преспеяния духовнаго и стяжал еси Духа Святаго в непорочнем сердце своем. Мы же, видяще велию силу благодати в тебе, со умилением поем:

Радуйся, Бога Промыслителя дивный избранниче, радуйся, заповедей Христовых неустанный проповедниче.

Радуйся, алчущих правды Божия напитавый, радуйся, жаждущих от источника истины Христовой напоивый.

Радуйся, нагих одеяние и гладных насыщение, радуйся, болящих исцеление и страждущих утешение.

Радуйся, гонимых за веру укрепление, радуйся, во отчаяние впадших доброе вразумление.

Радуйся, преподобне Аристоклие, старче Афонский и Московский чудотворче.

Кондак 8

Странника и пришельца себе в мире сем помышляя, Аристоклие преблаженне, взыскал еси Града Небеснаго и многую паству свою вел еси на пажити духовныя, уча служити точию Богу, а не мамоне, работати же Господу со страхом и радоватися Ему с трепетом, да вси вернии раби поют Христу Богу: Аллилуия.

Икос 8

Весь в Бозе пребыв, яко благий и верный слуга Господина своего, в посте, бдении и молитве подвизаяся, многая искушения претерпел еси, яко истинный пастырь, входяй дверьми ко овцам своим, душу за овец полагал еси. То ведуще чада твоя, с любовию воспеша тебе песнь сию:

Радуйся, от Бога к пастырству призванный, радуйся, доме спасения для чад духовных назданный.

Радуйся, Пастыреначальнику Христу уподобивыйся, радуйся, подвигом душепопечения духоносных пастырей научивыйся.

Радуйся, яко никогоже приходящих к тебе изгонял еси. Радуйся, яко многих пастырским словом ко Христу приводил еси.

Радуйся, яко горохищных овец во едино стадо собрал еси, радуйся, яко из рва погибели заблудших свободил еси.

Радуйся, преподобне Аристоклие, старче Афонский и Московский чудотворче.

Кондак 9

Всякое естество ангельское славит твое равноангельное житие, и, видев деяния твоя в деле спасения погибающих, радуется даже о единем грешнице кающемся, наипаче же о множестве словесных овец твоего стада, тобою спасаемых, Богу же, дивному во святых Своих, непрестанными гласы воспевает: Аллилуия.

Икос 9

Ветии велеречивии не могут изрещи достойную похвалу Богу Промыслителю, премудре спасающему род человеческий и благовременне призывающему избранников своих к служению Церкви Христовой, да ни един от сынов света звероуловлен будет волки мысленными. Ты бо воистинну явился еси, отче Аристоклие, яко древний Моисей, изводяй заблудших из египетскаго рабства греху, ничесоже страшася, токмо единаго Бога. Сего ради вопием ти:

Радуйся, Бога Промыслителя дивный избранниче, радуйся, Пастыреначальника Христа к погибшим овцам посланниче.

Радуйся, розго, от лозы Христа произрастившаяся, радуйся, храмине, токи благодати Божия исполненная.

Радуйся, древо афонское, на земли русстей насажденное, радуйся, ниво, благословением Божиим мног плод принесшая.

Радуйся, странствующих в пустыни неведения Истины управителю, радуйся, добродетелей в душах ищущих спасения насадителю.

Радуйся, преподобне Аристоклие, старче Афонский и Московский чудотворче.

Кондак 10

Спасти хотя души христианския от вечныя погибели, преподобне отче Аристоклие, болезновал еси о всех согрешающих, изрядно же почитая образ Пресвятыя Богородицы «Скоропослушницы», со Афона принесенный, многочастне к Ней притекаше с велием дерзновением, да Ея предстательством Всемилостивый Господь помилует всех, о нихже ты молитву со слезами проливал еси, взывая Ему: Аллилуия.

Икос 10

Стена несокрушимая веры и упования на Бога был еси, блаженне Аристоклие, егда сотворил, еси велие чудо: исцелил еси отрока слепорожденнаго, помазав его елеем от чудотворныя иконы «Скоропослушницы» и тем паки прославил еси Христа Бога, даровавшаго древле зрение слепу от рождения во свидетельство Божества Своего пред неверовавшими иудеи, и то ведуще, в веселии зовем ти сице:

Радуйся, неразрушимая крепосте веры, радуйся, непоколебимый каменю надежды.

Радуйся, слепоту телесную силою свыше врачуяй, радуйся, слепоту духовную благодатиею Божиею исцеляяй.

Радуйся, от святыя иконы Богородицы токи милости удостоивыйся, радуйся, Ея милосердием многих в смятении сущих умиротворивый.

Радуйся, яко в часы недоумения со тщанием к Ней прибегал еси, радуйся, яко мысль благу в сердце от Нея влагаемую сохранял еси.

Радуйся, преподобне Аристоклие, старче Афонский и Московский чудотворче.

Кондак 11

Пение умиленное и благодарение Богу приносяще, радуются чада твоя духовная, великаго и неустаннаго в трудех тя старца имущая. Книзи, тщанием твоим изданныя, утоляша алчущих и жаждущих правды Божия, да вси чтущии их, аки пищу духовную вкушающе, Господу Человеколюбцу поют: Аллилуия.

Икос 11

Светозарный образ твоего богоугоднаго жития паче луч солнечных сияет в стране российстей, такожде и на святей горе Афонстей, просвещая всякаго человека, с верою тя просяща, по блаженней же кончине твоей никакоже оставил еси паству твою, с любовию чтущую тя и в хвалении поющую ти:

Радуйся, верныя от тлетворных духов злобы ограждаяй, радуйся, неверныя глаголами вечной жизни просвещаяй.

Радуйся, по отшествии твоем из мира сего в кровы небесныя чтущих тя не оставляяй. Радуйся, с горних обителей труды их во спасение души благословляяй.

Радуйся, святыя горы Афонския маслино многоплодная, радуйся, превопрестольнаго града Москвы лампадо богозданная.

Радуйся, яко кокош птенцы чад своих от хищных врагов покрываяй, радуйся, яко горлица, непорочностью души всех удивляяй.

Радуйся, преподобне Аристоклие, старче Афонский и Московский чудотворче.

Кондак 12

Благодать неоскудевающи излияся в месте твоего земнаго упокоения всем, в надежди помощи к тебе притекающим, и по всеблагой воли Бога Жизнодавца причисли тя, яко достойнаго праведника, к лику святых Церковь Русская, да ведает мир христианский тя истиннаго угодника и слугу Божия, вшедшаго в радость Господа своего – в обители Царя Небеснаго, идеже в веселии ты с ангельскими чины воспеваеши Ему непрестанно: Аллилуия.

Икос 12

Поет и торжествует Церковь православная, обрете бо твоя святыя мощи аки сокровище нетленное в утешение всех немощствующих телом и душею, да уведят, что есть слава Божия, и в благодарности да славословят Его всеблагую волю, еюже премудре устрояется душевное их спасение ходатайством и заступлением угодников святых. Темже и мы тебе ликующе поем:

Радуйся, неустанными подвиги, яко воин Христов, Бога Отца прославивый, радуйся, жертвенною любовию к ближним Богу Сыну последовавый.

Радуйся, добродетельми многими Духа Святаго стяжавый, радуйся, благодать Божию от своих мощей источаяй.

Радуйся, удела Богородицы благий делателю, радуйся, земли русския добрый сеятелю.

Радуйся, яко тобою святая гора Афонская украшается, радуйся, яко тобою земля московская духовне преображается.

Радуйся, преподобне Аристоклие, старче Афонский и Московский чудотворче.

Кондак 13

О, пречудный старче московский и святыя горы Афонския подвижниче, великославный наш заступниче и усердный пред Престолом Божиим молитвенниче. Твоими непрестанными о нас молитвами умоли Господа от всякия бесовския напасти нам избавитися, и грядущия муки свободитися, да вси мы, спасаемии твоим ходатайством, воспоем Богу: Аллилуия, Аллилуия, Аллилуия.

[Се́й конда́к глаго́лется три́жды.]
[Далее повторяем 1‑е икос и кондак:]

Икос 1

Ангелом небесным уподобился еси в земном житии и благое иго Христово на рамо свое подъял еси, всю надежду на Бога возложив, и шед за Христом, достигл еси Царствия Небеснаго. Сего ради с верою приносим ти песнь сию:

Радуйся, равноангельнаго жития ревнителю, радуйся, спасительнаго ига Христова безропотный носителю.

Радуйся, яко вся скорогибнущая земная блага возненавидел еси, радуйся, яко райская жилища взыскал еси.

Радуйся, сладость житейскую отвергнувый, радуйся, Хлеба небеснаго Христа вкусивый.

Радуйся, Источнику живыя воды приобщивыйся, радуйся, на камени веры утвердивыйся.

Радуйся, преподобне Аристоклие, старче Афонский и Московский чудотворче.

Кондак 1

Избранниче Божий и дивный подвижниче благочестия, скорый заспупниче в нуждах и напастех сущий, усердный молитвенниче о всех чающих твоея помощи, к тебе припадаем и молимся, во еже спастися нам, избави нас от належащия мглы греховных обстояний, с любовию и умилением тебе зовущих:

Радуйся, преподобне Аристоклие, старче Афонский и Московский чудотворче.

Молитва

О, святый угодниче Божий и преславный старче Аристоклие, святыя горы Афонския подвижниче и града Москвы неустанный молитвенниче! Прилежно чтуще твою честную память, припадаем к святым твоим мощем и тепле вопием: призри на нас, чад твоих духовных, ищущих в бедах твоея помощи и заступления, в болезнех душевных и телесных исцеления, в скорбех утешение и вразумление. Сотвори твоими молитвами нашу веру непоколебиму, да ею спасаемся от всякия напасти и действа вражия, соблюди нашу надежду непостыдну, да не впадем в уныние в час злых искушений, потщися возгревати в нас, малодушных и немощных, любовь нелицемерну, да не всуе подъемлем труды христианскаго подвига и во след Христа грядуще добропобедно понесем крест нашего земнаго жития, ты бо обещался еси по кончине своей слышати прошения всякаго, аще с верою приидет к месту твоего упокоения. И ныне по прославлении тя Церковию Божиею рака твоих честных мощей явися залогом твоея любве и попечения о нас, чающих твоего предстательства пред престолом Царя Небеснаго. Испроси у Бога Вседержителя стране нашей мир и тишину, пастырем мудрое окормление, монашествующим обетов соблюдение, народу нашему благочестие и вся, яже ко спасению полезная. Не премолчи о нас молитися в Троице славимому Богу, Емуже подобает всякая слава, честь и поклонение Отцу и Сыну и Святому Духу, ныне и присно и во веки веков. Аминь.