Икона Богородицы «Знамение» Курская-Коренная

О, Цари́це Небе́сная! Кто́ изочте́т вели́кое мно́жество чуде́с Твои́х, кто́ исчи́слит во́пли моли́твенных проше́ний, то́ки умиле́нных сле́з, благода́рных воздыха́ний, пролитых пред ико́ною Твое́ю. Ове́яна у́бо вся́ она́ ско́рбию наро́дною, пла́чем угнете́нных и ра́достною хвало́ю уте́шенных. Припа́даху к не́й лю́дие, поне́сшие ага́рянское и́го, пла́каху Москва́ в сму́тное вре́мя, взыва́ше Ку́рск в наше́ствие вра́жеское. Вопия́ше вся́ о́бласть во дни́ смертоно́сных боле́зней и бе́д, и вся́ ско́рби на ра́дость прелага́ла еси́. Те́мже и ны́не благослови́ зе́млю Ру́сскую. Спаси́ от греха́, поги́бели и собла́знов страну́ на́шу. Изле́й благода́ть на тру́д земледельческий и на вся́кое благо́е начина́ние обще́ственное. Помяни́, Пресвята́я Де́во, по и́мени все́х предстоя́щих и моля́щихся и вся́ лю́ди, тре́бующия Твоего́ утеше́ния, по́мощи и милосе́рдия. Ты́ у́бо ве́си та́йная серде́ц на́ших. Те́мже все́м по потре́бе и́х проше́ния испо́лни. Изря́днее же заблу́ждших обрати́ к покая́нию, на́с же все́х умудри́ све́том Ева́нгельския любви́ и до́брых де́л. Архипа́стыри и па́стыри и вся́ ве́рныя в Правосла́вии до сме́рти тве́рды покажи́, в Ца́рство Небе́сное упра́ви и со Христо́м жи́ти сотвори́ во ве́ки веко́в. Ами́нь.

Кондак 1

Избранной Воеводе и благой Одигитрии, путеводящей нас к Небесному Граду, приидите, припадем вси, града зде пребывающего не имущии, Тоя всесильнаго заступления просяще, чудеса же, от лет древних даже доныне от иконы Ея бываемыя, поминающе, велегласно возопиим:

Радуйся, Владычице, знамения милости Твоея миру присно являющая.

Икос 1

Ангели удивишася, зряще Тя, Владычице, иконою Твоею, яко столпом огненным, нам предходящую в великом исходе нашем из земли, беззаконники порабощенныя. Не Моисея бо, но Самую Тя имамы Путеводительницу в скорбном странствовании нашем, темже Ти благодарне зовем:

Радуйся, благословенная Одигитрие; радуйся, истиннаго Пути Мати.

Радуйся, сквозе пустыню мира сего нас провождающая; радуйся, Амалика мысленнаго преславно побеждающая.

Радуйся, источники благодати от иконы Твоея источающая; радуйся, закон Сына Твоего, Христа Бога нашего, на скрижалех сердец наших написующая.

Радуйся, зноем страстей палимых благодатное окропление; радуйся, изнемогающих всемощное укрепление.

Радуйся, сердец смятенных тишайшая усладо; радуйся, странных и сирых Божественная отрадо.

Радуйся, землю обетованную нам приуготовляющая; радуйся, небеснаго Иерусалима врата нам отверзающая.

Радуйся, Владычице, знамения милости Твоея миру присно являющая.

Кондак 2

Видехом, видехом выну чудеса и знамения Твоя, Владычице, исповедуем милость, не таим благодеяний Твоих, обаче велегласно вопием: Аллилуиа.

Икос 2

Разум Божий кто постиже и тайну судеб Его кто повесть? Возводит бо и низводит, смиряет и возносит, поражает и исцеляет, и кто бысть советник Ему? Темже и нас, грех наших ради, смири и царство наше низложи, сыны наша по всему лицу земли разсеяв. К кому убо прибегнем в скорби нашей, к кому руце прострем, аще не к Тебе, Всеблагая. Обаче сердцем сокрушенным вопием Ти таковая:

Радуйся, Сына Твоего за нас умоляющая; радуйся, праведный гнев Божий утоляющая.

Радуйся, беззаконий наших очищение; радуйся, грешным Ходатаице прощения.

Радуйся, светильник упования немеркнущий нам возжегшая; радуйся, во исходе и странствовании нашем иконою Твоею нам предтекшая.

Радуйся, вся разсеянныя воедино собирающая; радуйся, омофором Твоим светообразным вся покрывающая.

Радуйся, раздоры и нестроения умиряющая; радуйся, советы нечестивых разоряющая.

Радуйся, плавающих в житейском море окормляющая; радуйся, попечением Твоим ни единаго же оставляющая.

Радуйся, Владычице, знамения милости Твоея миру присно являющая.

Кондак 3

Силы Тобою деются и благодать от честныя иконы Твоея неоскудно изливается, Преблагословенная Дево, вся подвизая о Тебе вопити: Аллилуиа.

Икос З

Имущи милосердие неизреченное, тамо благодать Твою возсияваеши, Всеблагая, идеже тьма огустевает и скорби преумножаются, темже не оставила еси нас сирых, обаче во иконе Твоей к нам убогим пришла еси, славящим Твое снисхождение и вопиющим сице:

Радуйся, чудес море; радуйся, милости пучино.

Радуйся, благодати приснотекущий источниче; радуйся, исцелений кладезю неисчерпаемый.

Радуйся, естества уставы победшая; радуйся, законы естественныя пременившая.

Радуйся, скорби наша на радость прелагающая; радуйся, плач и стенание в веселие духовное претворяющая.

Радуйся, озлобления и беды на пользу нам обращающая; радуйся, враги наша преславно смиряющая.

Радуйся, чаяния врагов посрамляющая; радуйся, поющия Тя возвеселяющая.

Радуйся, Владычице, знамения милости Твоея миру присно являющая.

Кондак 4

Бури искушений, на нас находящия, скорбям же и болезням, нас посещающим, егда терпению в нас оскудевати и духу нашему смущатися, притецем ко образу Пречистыя Девы и слезы точаще Той, от сердца возопиим: Богоноснеи руце Твои нам простирающи, из глубины зол возведи ны, яко да благодарными усты зовем: Аллилуиа.

Икос 4

Слышаху древле людие российстии слух явления святаго Твоего образа в дубраве Курстей и текше к нему со тщанием, умильно взываху: «Откуду нам сие, да прииде к нам Мати Господа нашего», узрев же икону Твою, Владычице, при корене древеснем лежащую, и приемше ю, яко сокровище великое, возопиша Тебе, Первообразней:

Радуйся, раю светлейший, древо Жизни израстивший; радуйся, вертограде Божественный, древо Церкви прозябший.

Радуйся, Цвете благовонный, мир весь облагоухаяй; радуйся, крине непорочный, вселенную украшаяй.

Радуйся, лозо благоплодная, вином умиления всех напоившая; радуйся, розго освященная, плоды сладостными род человеческий напитавшая.

Радуйся, кореню домостроительства Божия; радуйся, спасения нашего верх и главизно.

Радуйся, злыя наши страсти из корене посекающая; радуйся, добродетелей сад насаждающая.

Радуйся, добрые обычаи в нас вкореняющая; радуйся, причастники райския жизни быти нас сподобляющая.

Радуйся, Владычице, знамения милости Твоея миру присно являющая.

Кондак 5

Боготочней звезде подобящеся, икона Твоя честная, Госпоже, землю Русскую и грады ея обтекаше, царие сей благоговейно поклоняхуся, царицы любовию ту благоукрашаху, архиереи страхом сретаху, верных же множества, духовно торжествующе, вопияху: Аллилуиа.

Икос 5

Видяще безбожников безумный совет икону Твою, Пречистая, разорити, от Тебе, Дево, посрамленный, и обретше образ Твой святый, от всякаго действа сокрушительна невредим, монаси и мирстии страхом и любовию возопиша Ти сицевая:

Радуйся, крепосте несокрушимая; радуйся, стено нерушимая.

Радуйся, лютых безбожников совет посрамившая; радуйся, чаяния врагов осуетившая.

Радуйся, хулителей уста заградившая; радуйся, икону Твою святую невредимо сохраншая.

Радуйся, от руки злодейской сия соблюдшая; радуйся, очи Твои от скверных дел человеческих обращающая.

Радуйся, лица Твоего Пречистаго от нас, убогих, не отвращающая; радуйся, из руки диаволи грешныя исхищающая.

Радуйся, прощение кающимся возсиявающая; радуйся, двери милосердия Божия ходатайством Твоим отверзающая.

Радуйся, Владычице, знамения милости Твоея миру присно являющая.

Кондак 6

Проповедует мир весь милости, от иконы Твоея изливаемыя, Всецарице! Отнелиже бо изшла еси тою из земли Русския, несть град, ниже весь, в нихже не бе являема сила Твоя. Темже от всех язык спасеннии и Тобою вопиют благодарно Богу: Аллилуиа.

Икос 6

Возсияй нам паки свет упования, Богородице Пречистая, зарю спасения миру возвестившая во Твоем рождестве. Не предаждь нас до конца в руце врагов наших и советы нечестивых и лютых отступников скоро разори. Да будет и страна наша Российская, якоже древле дом Твой, да процветет в ней благочестие, святыя обители и храмы да благоукрасятся, людие же, от лютых безбожников избавльшеся, да торжествуют с веселием, славяще Твое заступление и зовуще Ти таковая:

Радуйся, любовию Твоею всему миру возсиявшая; радуйся, из уст Божественных Сына Твоего всыновление рода человеческаго приявшая.

Радуйся, Мати Божия и Мати христианом; радуйся, недугов отъятие и Целительнице раном.

Радуйся, в темницах сущих незаходимый Свете; радуйся, узников отрадо и пространство клетей.

Радуйся, за правду гонимых дерзновение; радуйся, за веру страждущих терпение.

Радуйся, мучеников венчание; радуйся, мучителей грозное воздаяние.

Радуйся, связнем узы разрешающая; радуйся, телом и душою плененных свобождающая.

Радуйся, Владычице, знамения милости Твоея миру присно являющая.

Кондак 7

Хотящу праведному Судии и Богу человеки, Того забывающия, вразумити, попусти бранем велиим на земли воздвигнутися. Языцы бо смятошася и царства поколебашася. Смерть и ужас по лицу земли проидоша, плач и стенание воздух огласи. Тогда убо вси, иже на Тя упование возложиша, Богородице, ко образу Твоему усердно притекаху и, от Тебе единыя спасения чающе, Богу, давшему Тя людем Заступницу, вопияху: Аллилуиа.

Икос 7

Новые знамения и чудеса велия явила еси от иконы Твоея честныя, Богомати, егда услышахом глас брани. Градом бо горящим и земли трясущейся, чертогом разрушаемым и пругом, воздух исполняющим, соблюла еси церковь, в нейже образ Твой, Всецарице, пребываше, невредиму: вси же в ней молящиися, чудо видяще, едиными усты возопиша Ти таковая:

Радуйся, Державная Воеводо; радуйся, на Нюже уповают вси народи.

Радуйся, Церкве Столп и Утверждение; радуйся, всякия святыни защито и ограждение.

Радуйся, победо, мир побеждающая; радуйся, и неимущия упования спасающая.

Радуйся, благая Послушательнице молений прилежных; радуйся, безпомощных помоще и надеждо ненадежных.

Радуйся, сатану под нозе наша сокрушающая; радуйся, огню и стихиям повелевающая.

Радуйся, иконою Твоею нас остеняющая; радуйся, Покровом Твоим нас осеняющая.

Радуйся, Владычице, знамения милости Твоея миру присно являющая.

Кондак 8

Странное и страшное знамение явила еси, Всесвятая, егда домом разрушаемым, храмину малую, юже освятила еси прежде иконы Твоея пребыванием, сохранила еси невредиму, старицу же и сына ея, в той крыющихся, целых представила еси. Тем же вси, зрящия и слышащия сия, ужасахуся ужасом, страхом вопиюще: Аллилуиа.

Икос 8

Весь мир любовию Твоею Богоподобною объемлеши, Приснодево, ближняя и дальняя посещающи и всю поднебесную во иконе Твоей приснопоклоняемей обтекающи. Тем же от восток даже до запад шествие Твое бысть, да вси невозбранно к той припадают, Тебе же Первообразней припевают сицевая:

Радуйся, всех радостей Радосте; радуйся, Чаше неупиваемая сладости.

Радуйся, нынешняго века скорбнаго утешение; радуйся, будущия жизни наслаждение.

Радуйся, веселящихся на небеси нас ради оставляющая; радуйся, к земли многоскорбней и многобедствующей приникающая.

Радуйся, со иконою Твоею благодатными стопы невидимо в домы наша входящая; радуйся, благословение и радование тем приносящая.

Радуйся, келии монашеския образом Твоим честным освящающая; радуйся, клети убогия паче палат царских тем украшающая.

Радуйся, храмы Божии Ликом Твоим Пресвятым облистающая; радуйся, в жилищах чтущих Тя незримо пребывающая.

Радуйся, Владычице, знамения милости Твоея миру присно являющая.

Кондак 9

Всяк возраст и всяк чин притекает к Тебе, Богоневесто Владычице, всем бо простерты суть Богоноснеи Твои руце, всем вся подаеши независтно, вся светлиши и утешаеши, Всецарице. Темже, о Тебе веселящеся, вопием Богу: Аллилуиа.

Икос 9

Вития многовещанныя увядоша и ритори благоглаголивии изнемогоша, по долгу Тя прославити хотящии, Марие Богородице, недоумеет бо всяк ум благохвалити Тя по достоянию, обаче аще мы умолкнем — камение возопиют. Темже, аще и недостойнии суще, бренными усты дерзаем взывати Ти таковая:

Радуйся, пророков огнедохновенный глаголе; радуйся, апостолов проповеде неумолкаемая.

Радуйся, преподобных сердечное пение; радуйся, исповедников крепосте и дерзновение.

Радуйся, молчальников тайнолепная беседо; радуйся, риторов и Богопроповедников златыя уста.

Радуйся, на страсти подвизающихся превознесенная наградо; радуйся, всех праведников Божественная отрадо.

Радуйся, матерей славо и девства похвало; радуйся, старцев покое и юных Водительнице.

Радуйся, Адама смертнаго Дщи, Богу же Родительнице; радуйся, славою неизреченною близ Бога сияющая.

Радуйся, Владычице, знамения милости Твоея миру присно являющая.

Кондак 10

Спастися миру тепле помолися, Богородице, помощи бо Твоея требует, сетям лукаваго, по всему лицу земли распростертым, языком же шатающимся и бурям напастей, на Церковь Божию воздвигаемым; темже, якоже в Кане Галилейстей иногда, рцы слово к Сыну Твоему и Богу, да воду искушений же и скорбей в вино умиления и веселия Божественнаго претворит, да поем Ему выну: Аллилуиа.

Икос 10

Стена необорима нам буди, Всенепорочная, сопротив ополчений видимых и невидимых враг, державно по нас поборающи, любовию вопиющих Ти таковая:

Радуйся, Богоноснеи руце Твои о нас к Богу присно воздвигающая; радуйся, духов злобы под нозе наша покоряющая.

Радуйся, князя тьмы хитросплетенные советы посрамляющая; радуйся, тучи помыслов Духом Божиим развевающая.

Радуйся, уныние от нас отгоняющая; радуйся, треволнения житейския смиряющая.

Радуйся, бурем напастей повелевающая; радуйся, обуреваемых благодатно окормляющая.

Радуйся, из глубины зол извлачающая; радуйся, погибающим длани милостивно простирающая.

Радуйся, нози наша на пути спасения наставляющая; радуйся, руце наша во бранех укрепляющая.

Радуйся, Владычице, знамения милости Твоея миру присно являющая.

Кондак 11

Пения наша, якоже Сын Твой вдовичу лепту, приими, Всесвятая, и подаждъ нам всегда Тебе сия приносити, живот наш в мире управляющи и грехом прощение дарующи, яко да в небесныя обители вшедше, воскликнем Богу: Аллилуиа.

Икос 11

Светообразный омофор Твой, Всеблагая, над землею нашею невидимо простри, нечестия безлунную ночь прогоняющи, зарю же пакибытия возсиявающи, да в радости немолчно зовем:

Радуйся, воистину в Солнце облеченная; радуйся, венцем от звезд увязенная.

Радуйся, рясны златыми преиспещренная; радуйся, красото неизреченная.

Радуйся, Светлосте, денницы светлейшая; радуйся, теплото, солнца любезнейшая.

Радуйся, зарнице будущаго века; радуйся, Свете невечерний ангелов и человеков.

Радуйся, темныя демонския полки далече отгоняющая; радуйся, неверия тьму просвещающая.

Радуйся, во оружия света нас облекающая; радуйся, Святыне, цветы всех добродетелей благоухающая.

Радуйся, Владычице, знамения милости Твоея миру присно являющая.

Кондак 12

Благодать возблагодать от иконы Твоея прияхом, Богородице Пречистая. Никтоже бо, притекаяй к той с верою, тощь отходит, но кийждо по потребе своей дар Божественный приемлет и радостию венчается, вопия к Богу: Аллилуиа.

Икос 12

Поем Тя, величаем Тя, поклоняем Ти ся, Госпоже Пречистая, сытости похвал Твоих отнюдь не знающе, и припадающи пред честным Твоим образом, умильно взываем Ти сице:

Радуйся, душ наших сладчайшая весно; радуйся, сердец наших светлейшее утро.

Радуйся, высото недомышляемая; радуйся, славо неувядаемая.

Радуйся, блаженство нескончаемое; радуйся, благосте неизсякаемая.

Радуйся, веселие неизреченное; радуйся, воистину едина Преблагословенная.

Радуйся, превыше всей твари Превознесенная; радуйся, в житии сем нас заступающая.

Радуйся, в час смертный верныя сретающая; радуйся, яко и на Страшнем Судищи спасаеши на Тя уповающия.

Радуйся, Владычице, знамения милости Твоея миру присно являющая.

Кондак 13

О, Всепетая Мати и Мати всем христианом, Сына Твоего и Бога любовию подражающи, вопиеши к нам милостивно: не бойся, малое стадо, Аз есмь с вами и никтоже на вы! Темже Ти любовию припадающе и со слезами благодаряще, велегласно зовем: Аллилуиа.

[Се́й конда́к глаго́лется три́жды.]
[Далее повторяем 1‑е икос и кондак:]

Икос 1

Ангели удивишася, зряще Тя, Владычице, иконою Твоею, яко столпом огненным, нам предходящую в великом исходе нашем из земли, беззаконники порабощенныя. Не Моисея бо, но Самую Тя имамы Путеводительницу в скорбном странствовании нашем, темже Ти благодарне зовем:

Радуйся, благословенная Одигитрие; радуйся, истиннаго Пути Мати.

Радуйся, сквозе пустыню мира сего нас провождающая; радуйся, Амалика мысленнаго преславно побеждающая.

Радуйся, источники благодати от иконы Твоея источающая; радуйся, закон Сына Твоего, Христа Бога нашего, на скрижалех сердец наших написующая.

Радуйся, зноем страстей палимых благодатное окропление; радуйся, изнемогающих всемощное укрепление.

Радуйся, сердец смятенных тишайшая усладо; радуйся, странных и сирых Божественная отрадо.

Радуйся, землю обетованную нам приуготовляющая; радуйся, небеснаго Иерусалима врата нам отверзающая.

Радуйся, Владычице, знамения милости Твоея миру присно являющая.

Кондак 1

Избранной Воеводе и благой Одигитрии, путеводящей нас к Небесному Граду, приидите, припадем вси, града зде пребывающего не имущии, Тоя всесильнаго заступления просяще, чудеса же, от лет древних даже доныне от иконы Ея бываемыя, поминающе, велегласно возопиим:

Радуйся, Владычице, знамения милости Твоея миру присно являющая.

Молитва 1‑я

О, Царице Небесная! Кто изочтет великое множество чудес Твоих, кто исчислит вопли молитвенных прошений, токи умиленных слез, благодарных воздыханий, пролитых пред иконою Твоею. Овеяна убо вся она скорбию народною, плачем угнетенных и радостною хвалою утешенных. Припадаху к ней людие, понесшие агарянское иго, плакаху Москва в смутное время, взываше Курск в нашествие вражеское. Вопияше вся область во дни смертоносных болезней и бед, и вся скорби на радость прелагала еси. Темже и ныне благослови землю Русскую. Спаси от греха, погибели и соблазнов страну нашу. Излей благодать на труд земледельческий и на всякое благое начинание общественное. Помяни, Пресвятая Дево, по имени всех предстоящих и молящихся и вся люди, требующия Твоего утешения, помощи и милосердия. Ты убо веси тайная сердец наших. Темже всем по потребе их прошения исполни. Изряднее же заблудших обрати к покаянию, нас же всех умудри светом Евангельския любви и добрых дел. Архипастыри и пастыри и вся верныя в Православии до смерти тверды покажи, в Царство Небесное управи и со Христом жити сотвори во веки веков. Аминь.

Молитва 2‑я

Царица наша преблагая, надеждо наша, Богородице, приятелище сирых и странных предстательнице, скорбящих радосте, обидимых покровительнице! Зриши нашу беду, зриши нашу скорбь; помози нам яко немощным, окорми нас яко странных. Обиду нашу веси, разреши ту, яко волиши, избави отечество наше, страждущую землю Российскую от лютаго безбожников обстояния, спаси и сохрани рабы Твоя (имярек) и всех нас, зде предстоящих и молящихся, и покрый нас от всякаго зла честным Твоим омофором, яко не имамы иныя помощи разве Тебе, ни иныя предстательницы, ни благия утешительницы, токмо Тебе, о, Богомати, яко да сохраниши ны и покрыеши во веки веков. Аминь.

глас 4

Кано́н Богоро́дицы, его́же краегране́сие: Хвалу́ Ти приноси́ти дерза́ю, Богоро́дице.

Пе́снь 1.

Ирмо́с: Отве́рзу уста́ моя́, и напо́лнятся Ду́ха, и сло́во отры́гну Цари́це Ма́тери, и явлю́ся, све́тло торжеству́я, и воспою́, ра́дуяся, Тоя́ чудеса́.

Припев: Пресвятая Богородице, спаси нас.

Ху́дость мою́ не пре́зри, Богоро́дице, и не́мощь мою́ воспо́лни, се́рдце же и у́м освяти́ и уста́ моя́ отве́рзи, пе́сни Ти́ приноси́ти дерза́ющу.

Ве́рою серде́чною пречи́стый Тво́й о́браз почита́ем, и тому́ со умиле́нием покланя́емся, я́ко и́стинную Самую Тя́, зря́ще Богоро́дице, ка́пли же сле́зныя точа́ще, взыва́ем: ра́дуйся, Благода́тная Мари́е, Ма́ти Бо́жия благослове́нная.

Ангельския си́лы подража́юще, обстои́м Тво́й о́браз стра́хом и любо́вию, Тебе́, Первообра́зную, согла́сно велича́юще, и и́мя Твое́ пресла́дкое призыва́юще: ра́дуйся, Всенепоро́чная Богоневе́сто.

Любо́вию, ве́рнии прииди́те, святу́ю ико́ну Богома́тере облобыза́им, то́чит бо от тоя́ исцеле́ния неоску́дно, и неисче́тная соверша́ет чудеса́ ве́рою и наде́ждою к не́й притека́ющим, те́мже зове́м Присноде́ве: ра́дуйся, Упова́ние нело́жное христиа́ном.

Пе́снь 3.

Ирмо́с: Твоя́ песносло́вцы, Богоро́дице, живы́й и незави́стный Исто́чниче, ли́к Себе́ совоку́пльшия, духо́вно утверди́, в боже́ственней Твое́й сла́ве, венце́в сла́вы сподо́би.

Умныя о́чи во глубину́ веко́в устремля́юще, зри́м у́бо и та́мо ико́ну Твою́, Пречи́стая, луча́ми ми́лости па́че со́лнца сия́ющу, и зе́млю Росси́йскую — До́м Тво́й, Богоро́дице, озаря́ющу, те́мже зове́м Ти́: ра́дуйся, Покро́ве на́ш и Заступле́ние.

Те́мная дубра́ва Ку́рская в не́драх свои́х храня́ще све́тлое чу́до — пречи́стую ико́ну Богома́тере, нечести́выми у́бо разсече́нную, си́лою же Бо́жиею пресла́вно сраще́нную, те́мже и обре́тше ю́, я́ко сокро́вище вели́кое, лю́дие Росси́йстии взыва́ху: отку́ду на́м сие́, я́ко прии́де к на́м Преблагослове́нная Ма́ти Бо́жия.

Исто́чник воды́ живы́я истече́ на ме́сте, иде́же пребыва́ше о́браз Богоро́дицы, цельбоно́сными струя́ми ве́рныя напоя́я, и вся́кую я́зю и неду́г врачу́я, те́мже возопии́м Благода́тней: ра́дуйся, и́стинный Живоно́сный Исто́чниче.

При ко́рени дре́ва ико́на обре́теся, дре́во Жи́зни неизрече́нно прозя́бшия и ми́рови благослове́нный Пло́д израсти́вшая, те́мже ны́не тоя́ явле́ния пра́здник соверша́юще, вопие́м Пречи́стей: о, Всеблага́я Влады́чице, злы́я на́ша стра́сти из ко́рене посецы́, до́брыя обы́чаи в на́с вкореня́ющи, и доброде́телей са́д насажда́ющи, и прича́стники ра́йския жи́зни бы́ти на́с сподобля́ющи.

По 3‑й пе́сни, седа́лен, гла́с 7:

Ки́й у́бо пра́здник светле́йший и красне́йший, па́че пра́здника Пречи́стыя Богома́тере? ко́е же у́бо и́мя по и́мени Сладча́йшаго Иису́са сладча́йшее, па́че и́мене Богоро́дицы Мари́и? Се́ бо чистото́ю и сла́вою вся́ ли́цы Ангельския превозше́дши, я́ко Ма́ти сия́ющи Вседержи́теля, ве́сь ми́р любо́вию Ма́тернею объе́млет, гре́шники спаса́ет и пра́ведныя в небе́сныя оби́тели вво́дит, враги́ низлага́ет и главу́ зми́еву пресла́вно попира́ет, те́мже зове́м Ей: о Тебе́ ра́дуется, Благода́тная, вся́кая тва́рь, сла́ва Тебе́.

[Сла́ва, и ны́не, то́йже.]

Пе́снь 4.

Ирмо́с: Седя́й в сла́ве на престо́ле Божества́ во о́блаце ле́гце, при́иде Иису́с Пребоже́ственный, Нетле́нною Дла́нию и спасе́ зову́щия: сла́ва, Христе́, си́ле Твое́й.

Росси́йская Це́рковь дне́сь торжеству́ет, сла́вою новоявле́нныя, Богоро́дичныя ико́ны, боголе́пно украша́яся, пе́сни же богокра́сныя воспева́ющи, ве́рныя вся́ призыва́ет, глаго́ля: прииди́те, возра́дуемся Ма́тери Бо́га на́шего, и честно́му Ея́ о́бразу поклони́мся, от него́же Пречи́стая Де́ва благода́тныя да́ры бога́тно подае́т христоимени́тым лю́дем, взыва́юще: сла́ва си́ле Твое́й, Го́споди.

Избра́нниче Ма́тере Бо́жия, преподо́бне о́тче Серафи́ме, моли́твенниче неусыпа́ющий за зе́млю Ру́сскую, зри́ши на́ше усе́рдие те́плое, слы́шиши моле́ния пред ико́ною Пречи́стыя на́ми возноси́мыя, от нея́же и тебе́ иногда́, о́троку лю́те стра́ждущу, исцеле́ние подаде́ся, те́мже у́бо ста́ни с на́ми, возде́я преподо́бнеи твои́ ру́це, и возопи́й о на́с к Богоро́дице, я́ко да тебе́ ра́ди моли́твы на́ша прия́ти благоволи́т.

Нечести́вых безбо́жник безу́мный сове́т, ико́ну Твою́, Влады́чице, разори́ти си́лою Твое́ю боже́ственною посрами́ла еси́, и соблюла́ еси́ сию́ от вся́каго де́йства сокруши́тельна невреди́му, земли́ у́бо сотря́сшейся и столпо́м разруша́емым, ико́на Твоя́ то́кмо лице́ свое́ от скве́рных де́л челове́ческих отвраща́ющи обрати́, те́мже, пресла́вному чу́ду дивя́щеся, мо́лим Ти́ ся приле́жно, лиц́а Твоего́ пречи́стаго не отврати́ от на́с, се́ бо се́рдцем сокруше́нным к Тебе́ прибега́ем, и пла́чем, и уми́льно вопие́м: да не одоле́ет на́ша зло́ба Твоему́ милосе́рдию, но поми́луй и спаси́ ны.

От руки́ злоде́й и лю́тых безбо́жник, вся́ святы́ни Бо́жия попра́вших, ико́ну Твою́ честну́ю соблюла́ еси́ невреди́му, и сию́ лю́дем Твои́м дарова́ла еси́, Богоро́дице, ю́же и храни́м, я́ко зе́ницу о́ка, те́мже, Влады́чице, то́ю на́м зна́мения ми́лости Твоея́ при́сно явля́й.

Пе́снь 5

Ирмо́с: Ужасо́шася вся́ческая о Боже́ственней сла́ве Твое́й: Ты́ бо, неискусобра́чная Де́во, име́ла еси́ во утро́бе над все́ми Бо́га, и родила́ еси́ Безле́тнаго Сы́на, все́м, воспева́ющим Тя́, ми́р подава́ющая.

Светоно́сный де́нь дне́шний све́тло да пра́зднуем, в о́ньже заря́ духо́вная во спасе́ние ми́ру возсия́ Рождество́м Пречи́стыя Богоневе́сты, в о́ньже и стране́ Росси́йстей, во тме́ бе́д и скорбе́й пребыва́ющей, я́ко звезда́ у́тренняя ико́на Богоро́дицы яви́ся, избавле́ния де́нь возвеща́ющи, те́мже зове́м Преблагослове́нней: ра́дуйся, я́ко свети́льник неме́ркнущий упова́ния на́м возжгла́ еси́.

Иде́же гре́х приумножа́ется, та́мо благода́ть Бо́жия преизбы́точествует, те́мже, Влады́чице, при́зри на не́мощь на́шу, ви́ждь уничиже́ние безме́рное, но и ве́ру ви́ждь и во́пль услы́ши, и на по́мощь на́м безпомо́щным ускори́, ми́лостию Твое́ю на́с облиста́ющи.

Те́мных си́л а́довых не убои́мся, па́че же во ору́жия све́та обо́лкшеся, те́м противоста́нем мужему́дренно, Воево́ду иму́ще Непобеди́мую — Всепе́тую Богоро́дицу: се́ бо враги́ держа́вно побора́ет и ве́рныя заступа́ет, и́мя Ея́ пречи́стое призыва́ющия.

Истинную Богоро́дицу Тя́ испове́дуем и зра́к лица́ Твоего́ пречи́стаго правосла́вно почита́ем, греха́ же и скве́рны вся́кия отвраща́емся, и блага́я соверша́ти мо́лимся пода́ти, и ду́ши на́ша смиря́юще, вопие́м: Пресвята́я Богоро́дице, спаси́ на́с.

Пе́снь 6.

Ирмо́с: Боже́ственное сие́ и всечестно́е соверша́юще пра́зднество, богому́дрии, Богома́тере, прииди́те, рука́ми воспле́щим, от Нея́ ро́ждшагося Бо́га сла́вим.

Да бежи́т от на́с, бра́тие, уны́ние, ту́чи по́мыслов Ду́хом Бо́жиим да развева́ются, се́ бо Сама́ Богома́терь посреде́ на́с пребыва́ет я́вственно, во ико́не Свое́й чудотво́рней поклоня́ема, и чудесы́ от тоя́ исходя́щими па́че со́лнца сия́ющи, те́мже из глубины́ се́рдца возопии́м: Пресвята́я Влады́чице, благода́тию Твое́ю неотсту́пно с на́ми пребу́ди.

Егда́ наити́ на на́с искуше́нию, егда́ впа́сти на́м в ско́рби и боле́зни, егда́ терпе́нию в на́с оскудева́ти и ду́ху на́шему смуща́тися, притеце́м к о́бразу Пречи́стыя Де́вы и сле́зы точа́ще, То́й от се́рдца возопии́м: богоно́снеи ру́це Твои́ на́м простира́ющи, из глубины́ зо́л возведи́ ны́.

Ра́дость у́бо еси́ все́х ра́достей, ве́чную Ра́дость ми́рови ро́ждшая, и грехо́вную печа́ль разори́вшая, и отра́ду Боже́ственную душа́м смяте́нным подаю́щая, в моли́твах за ми́р христиа́нский не усыпа́й, Богоро́дице, Тобо́ю бо по Бо́зе вся́к спаса́ется и из бе́здны паде́ний возво́дится.

Зло́бнии де́монстии полцы́, на христиа́н вою́ющии, се́ стоя́т зря́ще издале́ча, не дерза́юще приступи́ти, трепе́щуще сла́вы Богоро́дичныя ико́ны, я́же нечести́выя и бе́сы попаля́ет, ве́рныя же держа́вно заступа́ет, от все́х вра́г покрыва́ющи.

Конда́к, гла́с 4:

Прииди́те, ве́рнии, све́тло да пра́зднуем всечестна́го о́браза Богома́тере чу́дное явле́ние и, от того́ благода́ть почерпа́юще, Первообра́зней уми́льно возопии́м: ра́дуйся, Мари́е Богоро́дице, Ма́ти Бо́жия, Благослове́нная.

Икос:

Тобо́ю, Богоро́дице, Сло́во предве́чное пло́ть бы́сть, Тобо́ю узре́ша челове́цы Со́лнце пра́вды, на Него́же Ангели не сме́ют взира́ти; на Твои́х бо объя́тиях херуви́мы Носи́мый ноша́шеся, и Твои́ма рука́ма пречи́стыма держи́мь бе́ Вседержи́тель и Творе́ц вся́ческих; Ада́ма сме́ртнаго дщи́, Бо́гу нарекла́ся еси́ Роди́тельница, те́мже, я́ко еди́на к Тому́ Ма́тернее дерзнове́ние иму́щи, в моли́твах за ми́р ве́сь не усыпа́еши, богоприя́тнеи Твои́ ру́це к Сы́ну воздева́ющи и Того́ человеколю́бие к рабо́м Твои́м преклоня́ющи, и́же Ти́ благода́рными усты́ непреста́нно зову́т: ра́дуйся, Мари́е Богоро́дице, Ма́ти Бо́жия, Благослове́нная.

Пе́снь 7.

Ирмо́с: Не послужи́ша тва́ри богому́дрии, па́че Созда́вшаго, но, о́гненное преще́ние му́жески попра́вше, ра́довахуся, пою́ще: препе́тый отце́в Госпо́дь и Бо́г, благослове́н еси́.

Ангели в служе́нии Тебе́ благогове́инствуют, серафи́ми стра́хом Тебе́ сла́вят, Богоро́дице, ка́ко у́бо мы́, земноро́днии, нечи́стыми усты́ воспе́ти Тя́ дерза́ем? Оба́че на ми́лость Твою́ упова́ем, и о Тебе́ непреста́нно Влады́це и Творцу́ вся́ческих вопие́м: Благослове́н еси́, Бо́же оте́ц на́ших.

Юже да́л еси́ на́м заступле́ние, Ма́терь Твою́ Пречи́стую, Христе́, приими́ ны́не за ны́ те́пле Моля́щуюся, да Тоя́ хода́тайствы в живо́т присносу́щный дости́гше, со все́ми, и́же спасе́ние улучи́ша, возопии́м: благослове́н еси́, Бо́же оте́ц на́ших.

Благослове́нную нареки́й Твою́ Ма́терь, Тоя́ мольба́ми, умоле́н бу́ди, Го́споди, и да зна́менуется на на́с све́т лица́ Твоего́, да от сна́ грехо́внаго, воспряну́вше, я́ко во дни́ благоче́стно ходи́ти на́чнем, в сердца́х на́ших непреста́нно зову́ще: благослове́н еси́, Бо́же оте́ц на́ших.

Отроко́м вавило́нским подо́бящеся, о́бразу злато́му мамо́ны и человекоуго́дия не поклони́мся, о́браз же Непоро́чныя Ма́тере Бо́га на́шего почти́м, преми́рныя ра́дости исполня́ющеся, и Благоде́телю все́х Христу́ возопии́м: благослове́н еси́, Бо́же оте́ц на́ших.

Пе́снь 8.

Ирмо́с: Отроки благочести́выя в пещи́ Рождество́ Богоро́дичо спасло́ е́сть, тогда́ у́бо образу́емое, ны́не же де́йствуемое, вселе́нную всю́ воздвиза́ет пе́ти Тебе́: Го́спода по́йте, дела́, и превозноси́те Его́ во вся́ ве́ки.

Гла́сы немо́лчными серафи́ми Тя́ пою́т, Присноде́во, святы́х ли́цы сы́тости похва́л Твои́х не ве́дят, вся́ тва́рь славосло́вит непреста́нно, мы́ ли у́бо еди́ны то́кмо в молча́нии пребу́дем? Оба́че на милосе́рдие Твое́ дерза́юще, а́ще и недосто́йни су́ще, Тя́ превозно́сим во ве́ки.

О Тебе́ хвали́тися, Богоро́дице, сотворе́нная вся́ николи́же преста́нут, се́ бо, по глаго́лу апо́столову, язы́цы умо́лкнут и зна́ние упраздни́тся, любы́ же непреста́нно пребу́дет, те́мже и славословле́ния, я́же от любве́ Тебе́ приноси́мая, воспева́тися и́мут во ве́ки.

Рцы́ у́бо на́м, Пречи́стая, ку́ю Ти́ похвалу́ досто́йную на́ше принесе́т неможе́ние? Ко́има ли очи́ма взира́ти на честны́й Тво́й о́браз дерзне́м? Но оба́че, Блага́я су́щи, и ны́не пе́ний на́ших не возгнуша́йся, и в земли́ земна́го прише́льствия зра́к лица́ Твоего́ пресве́тлаго яви́ на́м, я́ко да Тя́ славосло́вим во ве́ки.

Обстоя́ще о́браз Тво́й приснопоклоня́емый, Влады́чице, стра́хом и любо́вию, жите́йская попече́ния вся́ отло́жше, о́чи же мы́сленныя на небеса́ возводя́ще, ра́йскую сла́дость предвкуша́ем, ея́же наслади́тися на́с сподо́би, да спасе́ние и живо́т безконе́чный улучи́вше, в ра́дости Тя́ воспева́ем во ве́ки.

Пе́снь 9.

Ирмо́с: Вся́к земноро́дный да взыгра́ется, Ду́хом просвеща́емь, да торжеству́ет же безпло́тных умо́в естество́, почита́ющее свяще́нное торжество́ Богома́тере, и да вопие́т: ра́дуйся, Всеблаже́нная Богоро́дице, Чи́стая Присноде́во.

Де́во Всепе́тая, пе́ния на́ша приими́, я́коже Сы́н Тво́й вдови́чу ле́пту, и пода́ждь на́м всегда́ Тебе́ сия́ приноси́ти, живо́т на́ш в ми́ре управля́ющи и грехо́м проще́ние да́рующи, я́ко да в небе́сныя оби́тели Тобо́ю вше́дше, милосе́рдие Твое́ велича́ем.

Иже Тя́, Богоро́дице, не испове́дуют и ико́ны Твоея́ не почита́ют, да посра́мятся всеконе́чно, ве́рнии же о Тебе́ да возвеселя́тся, да бу́дет и страна́ Росси́йская, я́ко же дре́вле, До́м Тво́й, да умно́жатся святы́я оби́тели, и хра́мы да благоукра́сятся, лю́дие же да освятя́тся и да торжеству́ют с весе́лием, Тя́ велича́юще.

Цари́це Богоро́дице, одесну́ю Христа́ Бо́га в небе́снем Ца́рствии предстоя́щи, ца́рства христоимени́тая на земли́ утверди́, нечести́вых сове́ты разоря́ющи и ве́ру со благоче́стием укрепля́ющи, да вси́ земноро́днии Тя́ единомы́сленно велича́ют.

Еда́ Ти́ хвалу́, Влады́чице, досто́йную принесо́хом? Еда́ о́браз Тво́й честны́й по до́лгу просла́вихом? Ве́мы бо, я́ко пе́сни, а́ще и тмочи́сленныя, к прославле́нию Твоему́, Де́во, не су́ть дово́льны; а́ще бо на́м усе́рдия серде́чнаго послу́шати, пе́ниям на́шим то́кмо начина́тися подоба́ше, что́ у́бо сотвори́м, недоумева́ем и ужаса́емся, зна́мения ми́лости Твоея́ сла́вим, оба́че и усто́м умо́лкшим, любо́вию серде́чною при́сно Тя́ пое́м и велича́ем.

Свети́лен, гла́с 3:

Со́лнца светле́йшая Де́во Богоро́дице, ве́ры Христо́вы свети́льник неме́ркнущий во стране́ на́шей благода́тию Твое́ю возжги́, да те́м неве́рия тма́ просвети́тся, сердца́ же ве́рных о то́м да возра́дуются, благодаре́ние принося́ще Христу́ Человеколю́бцу, подаю́ще все́м ве́лию ми́лость.

Сла́ва, и ны́не, гла́с то́йже:

Ри́зы креще́ния грехми́ совлеко́хся, ка́ко вни́ду на ве́черю Госпо́дню, не имы́й одея́ния бра́чна? Аще не Ты́, Богоро́дице, ри́зою Твое́ю мя́ покры́еши и сло́во о мне́ окая́ннем к Царю́ сла́вы рече́ши. Те́мже на Тя́ еди́ну наде́яся, ру́це моя́ к Тебе́ простира́ю, услы́ши, покры́й и заступи́ мя.

Молитва 1‑я

О, Царице Небесная! Кто изочтет великое множество чудес Твоих, кто исчислит вопли молитвенных прошений, токи умиленных слез, благодарных воздыханий, пролитых пред иконою Твоею. Овеяна убо вся она скорбию народною, плачем угнетенных и радостною хвалою утешенных. Припадаху к ней людие, понесшие агарянское иго, плакаху Москва в смутное время, взываше Курск в нашествие вражеское. Вопияше вся область во дни смертоносных болезней и бед, и вся скорби на радость прелагала еси. Темже и ныне благослови землю Русскую. Спаси от греха, погибели и соблазнов страну нашу. Излей благодать на труд земледельческий и на всякое благое начинание общественное. Помяни, Пресвятая Дево, по имени всех предстоящих и молящихся и вся люди, требующия Твоего утешения, помощи и милосердия. Ты убо веси тайная сердец наших. Темже всем по потребе их прошения исполни. Изряднее же заблудших обрати к покаянию, нас же всех умудри светом Евангельския любви и добрых дел. Архипастыри и пастыри и вся верныя в Православии до смерти тверды покажи, в Царство Небесное управи и со Христом жити сотвори во веки веков. Аминь.

Молитва 2‑я

Царица наша преблагая, надеждо наша, Богородице, приятелище сирых и странных предстательнице, скорбящих радосте, обидимых покровительнице! Зриши нашу беду, зриши нашу скорбь; помози нам яко немощным, окорми нас яко странных. Обиду нашу веси, разреши ту, яко волиши, избави отечество наше, страждущую землю Российскую от лютаго безбожников обстояния, спаси и сохрани рабы Твоя (имярек) и всех нас, зде предстоящих и молящихся, и покрый нас от всякаго зла честным Твоим омофором, яко не имамы иныя помощи разве Тебе, ни иныя предстательницы, ни благия утешительницы, токмо Тебе, о, Богомати, яко да сохраниши ны и покрыеши во веки веков. Аминь.