Икона Богородицы «Трубчевская»

Кондак 1

Взбра́нной Воево́де, Пречи́стей Влады́чице на́шей Богоро́дице, Засту́пнице христиа́н ско́рей, изба́вльшей зе́млю Ска́нову от смертоно́сныя я́звы хода́тайством Свои́м ко Всеми́лостивому Бо́гу, благода́рственное пе́ние прино́сим недосто́йнии раби́ Твои́, Ты же, я́ко имуща́я Держа́ву Непобеди́мую, от вся́ких зол и скорбе́й спаса́й нас молитвами Твои́ми, да зове́м Ти:

Радуйся, Всеми́лостивая Влады́чице, любовь Бо́жию нам явля́ющая.

Икос 1

Арха́нгелов и Ангелов превы́шшую, вся Си́лы Небе́сныя немо́лчно воспева́ют Тя, Всеми́лостивая Влады́чице, и мы, гре́шнии, дивя́щеся ско́рому заступле́нию Твоему́, чрез о́браз чудотво́рный Твой Трубче́вский избавля́емся бед и зол. Те́мже в ра́дости серде́чней, с любо́вию припа́дающе ко пречестно́му о́бразу Твоему́, со умиле́нием прино́сим Ти благохвале́ния сицева́я:

Радуйся, Боже́ственное обетова́ние,

Радуйся, проро́честв исполне́ние.

Радуйся, несве́домая Та́йно Боговоплоще́ния, Радуйся, с Бо́гом вражды́ прекраще́ние.

Радуйся, мира всего́ от греха́ очище́ние,

Радуйся, нам в Ма́терь Богодарова́нная.

Радуйся, ра́йских врат отверзе́ние,

Радуйся, Небе́сных и земны́х при́сное ра́дование.

Радуйся, Всеми́лостивая Влады́чице, любо́вь Бо́жию нам явля́ющая.

Кондак 2

Ви́дящи, Пресвята́я Де́во, скорбь бра́тии пу́стыни Ска́новы, от запале́ния о́гненнаго быва́емую, благоволи́ла еси́ во гра́де Трубче́вске Евфи́мием иере́ем о́браз Свой написа́ти и оби́тели Ска́новой даровати, да избавля́еми и храни́ми Твои́м заступле́нием и Покро́вом, вы́ну зове́м Бо́гу: Аллилуиа.

Икос 2

Ра́зум челове́ческий не возмо́жет пости́гнути, ка́ко Огнь Божества́ неопа́льно в ложесна́х Твои́х вмести́ла еси́, Богоро́дице, ико́ною бо Твое́ю Трубче́вскою мно́гия неду́ги врачу́еши, от огня́ же и гро́ма защища́еши. Сего́ ра́ди вопие́м Ти такова́я:

Радуйся,Купино́ неопали́мая и несгара́емая,

Радуйся, Богоро́дице Присноде́вственная.

Радуйся, от о́гненнаго запале́ния сохраня́ющая,

Радуйся, пла́мень страсте́й на́ших угаша́ющая.

Радуйся, любве́ к Бо́гу огнь воспламеня́ющая,

Радуйся, на ны дви́жимый гнев Бо́жий утоля́ющая.

Радуйся, Хода́таице к нам Бо́жия благоволе́ния,

Радуйся, всего́ мира умире́ние.

Радуйся, Всеми́лостивая Влады́чице, любо́вь Бо́жию нам явля́ющая.

Кондак 3

Си́ла Вы́шняго осени́ зе́млю Ска́нову, егда́ изнесе́нием из оби́тели о́браза Твоего́ Трубче́вскаго с пе́нием моле́бным на сто́гны гра́да Наровча́та па́губа смертоно́сная прекрати́ся и множа́йшая скорбь рабо́в Твои́х в ра́дость ве́лию преложи́ся. Ти́и бо возопи́ша Бо́гу: Аллилуиа.

Икос 3

Иму́щи Богоприя́тное и Богоприе́мное дерзнове́ние ко Христу́ Бо́гу, Богоневе́стная Ма́ти и Де́во, чудотвори́ти не престае́ши ны́не, я́коже и дре́вле, ико́ною Твое́ю пречестно́ю, исцеле́ние, отра́ду и утеше́ние е́ю стра́нником земны́м в юдо́ли ско́рби и пла́ча да́руеши. Сего́ ра́ди вопие́м Ти умиле́нно:

Радуйся, я́ко Рождество́м Твои́м тля сме́ртная в нас прекрати́ся,

Радуйся, я́ко Тобо́ю от земли́ Ска́новы смерть отгна́ся.

Радуйся, милосе́рдие Твое́ ико́ною запечатле́вшая,

Радуйся, оби́тели Ска́новой Стено́ неруши́мая.

Кондак 3

Радуйся, зной страсте́й на́ших охлажда́ющая,

Радуйся, греховны́я я́звы на́ша врачу́ющая.

Радуйся, люде́й Твои́х печа́ль на ра́дость прелага́ющая,

Радуйся, на ми́лость к нам гре́шным Бо́га прекланя́ющая.

Радуйся, Всеми́лостивая Влады́чице, любо́вь Божию нам явля́ющая.

Кондак 4

Бу́ря недоуме́ний смуща́ет нас, о, Преблагослове́нная Цари́це, ка́ко возмо́жем воспева́ти недосто́йными усты́ вели́чие сла́вы Твоея́; и́бо ико́ною Твое́ю свято́ю мно́жество чуде́с нам яви́ла еси́. Сего́ ра́ди, со умиле́нием взира́юще на ико́ну святу́ю Твою́, я́ко от исто́чника неоскудева́емаго в ско́рбех отра́ду почерпне́м, в печа́лех утеше́ние, в неду́зех тя́жких врачевство́ оби́льное и воззове́м благода́рственными гла́сы Сы́ну Твоему́ и Бо́гу на́шему: Аллилуиа.

Икос 4

Слы́ша, Всеми́лостивая Госпоже́, о чудесе́х мно́гих, от ико́ны Твоея́ явля́емых, строи́тель оби́тели сея́ Филаре́т устро́и на о́браз Твой чудотво́рный ри́зы посре́бряны, верху́ с венце́м позлаще́нным, и драгоце́нными каме́ниями украси́. Приими́, Пречи́стая, от усте́н ску́дных и благода́рных серде́ц на́ших похвалы́ сия́:

Радуйся, Боже́ственною сла́вою преукраше́нная,

Радуйся, я́ко ря́сны златы́ми доброде́тельми преиспещре́нная.

Радуйся, Боже́ственная Порфи́ро Боготка́нная,

Радуйся, Пречи́стая Неве́сто Неневе́стная.

Радуйся, я́ко ико́на Твоя́ оби́тели огражде́ние и украше́ние,

Радуйся, я́ко подоба́ет Тебе́ достоле́пное че́ствование.

Радуйся, оскуде́ние душ на́ших еле́ем ми́лости восполня́ющая,

Радуйся, ду́ши на́ша благоукраша́ющая.

Радуйся, Всеми́лостивая Влады́чице, любо́вь Бо́жию нам явля́ющая.

Кондак 5

Боготе́чная звезда́ яви́ся нам, Богоро́дице, честна́я ико́на Твоя́ Трубче́вская, луча́ми чуде́с Твои́х всех осиява́еши, мрак печа́лей и уны́ния прогоня́еши, всем ко спасе́нию ве́чному путь указу́еши, с ве́рою к Тебе́ притека́ющим и пою́щим Бо́гу: Аллилуиа.

Икос 5

Ви́дя ве́лия чудеса́, в земли́ Ска́новой от ико́ны Твоея́ явля́емая, возра́довася зело́ Амвро́сий Преосвяще́нный, и ра́ди чудотво́рнаго о́браза Твоего́ Трубче́вскаго созда́ храм святы́й близ оби́тели, да́ вси с любо́вию возсыла́ют Ти похвалы́ сия́:

Радуйся, всех ве́рных воскликнове́ние,

Радуйся, Храме всесвяты́й, Божества́ Прия́телище.

Радуйся, Черто́же Ца́рский и Святы́й,

Радуйся, Неви́димаго Царя́ Престо́ле Богоно́сный.

Радуйся, Высото́ Богомы́слия,

Радуйся, Ра́досте Богопозна́ния.

Радуйся, Руководи́тельнице Богове́дения,

Радуйся, одушевле́нная Ски́ние Бо́жия снисхожде́ния.

Радуйся, Всеми́лостивая Влады́чице, любо́вь Бо́жию нам явля́ющая.

Кондак 6

Пропове́дует земля́ Наровча́тская богатыя ми́лости Твоя́, и ско́рое предста́тельство пред Сы́ном Твои́м и Бо́гом, Пресвята́я Влады́чице, зане́ изба́вила еси́ от смертоно́сныя я́звы ве́рныя лю́ди, к о́бразу Твоему́ честно́му притека́вшыя и по́мощи проси́вшыя. Та́ко и нас, призыва́ющих и́мя Твое́ свято́е, ми́лостивно уврачу́й от вся́кия боле́зни душе́вныя и теле́сныя. Не таи́м бо Твои́х к нам благодея́ний, но прославля́юще Бо́га, благода́рственно вопи́ем Ему́: Аллилуиа.

Икос 6

Возсия́ наро́ду на́шему ра́дость ве́лия, егда́ по́слежде лет мно́гих, скорбе́й лю́тых и злых обстоя́ний и́га Хода́таице Преблага́я, умоли́ти Христа́ Бо́га на́шего, оби́тель возроди́ти и лю́ди Своя́ возвесели́ти. Сего́ ра́ди вопие́м Ти такова́я:

Радуйся, благоволе́ния Бо́жия возвраще́ние,

Радуйся, Про́мысла Бо́жия исполне́ние.

Радуйся, на́ше с Бо́гом примире́ние,

Радуйся, ве́ры Правосла́вныя возрожде́ние.

Радуйся, богопроти́вных низложе́ние,

Радуйся, бесо́в прогна́ние и устраше́ние.

Радуйся, богобо́рных попра́ние,

Радуйся, правосла́вных ликова́ние.

Радуйся, Всеми́лостивая Влады́чице, любо́вь Бо́жию нам явля́ющая.

Кондак 7

Хотя́ всем челове́ком спасти́ся и в ра́зум позна́ния Истины приити́, Преми́лостивый Госпо́дь и Спас наш возврати́л есть во оби́тель Ска́нову ико́ну святу́ю Трубче́вскую, да вси, моля́щиися пред нею, утеша́ются, иму́ще по́мощь и ми́лость Ма́тере Бо́жия, и вопию́ще Бо́гу: Аллилуиа.

Икос 7

Но́вое се́рдце и но́вый дух по проро́ку возсозида́я Госпо́дь в челове́цех, жен благочести́вых и дев благогове́йных во оби́тель Ска́нову призва́, да вси, взира́юще на ико́ну обновле́нную Трубче́вскую, вопию́т благода́рне ко Преблагослове́нней:

Радуйся, Пречестна́я Игу́мение и́ноческих оби́телей,

Радуйся, во́ли Бо́жия в лю́дех соверше́ние.

Радуйся, ко и́ноческому по́двигу Бо́жие призыва́ние,

Радуйся, Богоизбра́нная, избира́ющая из мира Бо́гу на служе́ние.

Радуйся, и́ночествующих о́браз во спасе́ние,

Радуйся, святы́х дев Предводи́тельнице.

Радуйся, подвиза́ющихся смиренному́дрие и духо́вное трезве́ние,

Радуйся, душ на́ших преображе́ние и обновле́ние.

Радуйся, Всеми́лостивая Влады́чице, любо́вь Бо́жию нам явля́ющая.

Кондак 8

Стра́нное и пресла́вное сотвори́ Госпо́дь, богобо́рнаго бо зми́я попра́, и лю́ди к Себе́, моли́твами Богоро́дицы, а́ки из небытия́ па́ки призва́. Сея ми́лости ра́ди устрани́мся су́етнаго и богобо́рственнаго мира сего́, ум на Небеса́ прело́жше, и вопию́ще Бо́гу: Аллилуиа.

Икос 8

Вся к Небе́сным взята́ еси́, но и земны́х не оставля́еши, Пречи́стая Богома́ти, те́мже утверди́ в Правосла́вии наро́д наш, и в ве́рности Влады́це Христу́ сохрани́, да, восхваля́юще, воспева́ем Ти сицева́я:

Радуйся, Земли́ Ру́сския Держа́вная Храни́тельнице,

Радуйся, наро́да на́шего Покрови́тельнице.

Радуйся, правосла́вных во́инов му́жество и на враги́ одоле́ние,

Радуйся, Святы́я Руси́ возстановле́ние.

Радуйся, ма́терей му́дросте и благо́е наставле́ние,

Радуйся, младе́нцев послуша́ние и благогове́ние.

Радуйся, дев правосла́вных кро́тосте и целому́дрие,

Радуйся, всем ве́рным Покро́в и свяще́нное прибе́жище.

Радуйся, Всеми́лостивая Влады́чице, любо́вь Бо́жию нам явля́ющая.

Кондак 9

Всяк земноро́дный да возра́дуется Богома́териею утеша́емь, да радуются Росси́йстии собо́ри, я́ко дарова́л еси́, Всеми́лостиве Го́споди, те́плую Засту́пницу ро́ду христи́нскому, Пречи́стую Влады́чицу Богоро́дицу, ми́лостию Свое́ю с на́ми вы́ну сопребыва́ющую, слы́шащую же Тебе́ вопию́щих: Аллилуиа.

Икос 9

Вети́и многовеща́ннии не довле́ют благохвали́ти по достоя́нию Тя, Пренепоро́чная Ма́ти Де́во, ка́ко ико́ною Твое́ю, Трубче́вскою имену́емою, зна́мения ди́вная и чудеса́ в земли́ Ска́новой сотвори́ла еси́. Те́мже за премно́гую любо́вь Твою́ к нам, ико́ну Твою́ благоче́стно почита́ем и, ра́дующеся благода́тному заступле́нию Твоему́, благода́рственную песнь воспева́ем Ти си́це:

Радуйся, ико́ну сию́ во оби́тели чудесы́ мно́гими просла́вившая,

Радуйся, притека́ющым к Тебе́ ми́лость излива́ющая.

Радуйся, неду́жных исцеля́ющая,

Радуйся, слеза́ми покая́ния грехо́вную скве́рну омыва́ющая.

Радуйся, обурева́емых страстьми́ небу́рное Приста́нище,

Радуйся, из пле́на грехо́внаго избавле́ние.

Радуйся, неви́нных ве́рная Засту́пнице,

Радуйся, в ско́рбех утеше́ние.

Радуйся, Всеми́лостивая Влады́чице, любо́вь Бо́жию нам явля́ющая.

Кондак 10

Спасти́ хотя́ лю́ди Твоя́ от греха́, и́же в мире сем, благослови́л еси́, Го́споди, достоя́ние Твое́ дарова́нием Предста́тельницы о нас, Препе́тыя Богоро́дицы. Моли́твами Ея́, Спа́се, душ на́ших боле́зни исцели́, прича́стники насле́дия Небе́снаго покажи́, да пое́м Ти: Аллилуиа.

Икос 10

Стена́ еси́, Богоро́дице Де́во, лю́дем Твои́м от по́хоти, гне́ва и го́рдости житейския, в сыне́х противле́ния де́йствуемых: низложи́ прило́ги бесо́вския, огнь нечистоты́ угаси́, от растле́ния ду́хом мира сего́ сохрани́, вся́кий вид зло́бы, гнездя́щийся в нас, искорени́, да прославля́ем Тя си́це:

Радуйся, оби́тели сей Сто́лпе целому́дрия,

Радуйся, Взбра́нная Воево́до непобеди́мая.

Радуйся, дев богому́дрых велича́ние,

Радуйся, и́ночествующих Боже́ственное увенча́ние.

Радуйся, хла́дность душе́вную благода́тно возгрева́ющая,

Радуйся, окамене́ние серде́чное умягча́ющая.

Радуйся, чистоту́ душе́вную нам да́рующая,

Радуйся, изнемога́ющих си́лою свы́ше укрепля́ющая.

Радуйся, Всеми́лостивая Влады́чице, любо́вь Бо́жию нам явля́ющая.

Кондак 11

Пе́ние хвале́бное и благода́рственное прино́сим Ти, Ма́ти Всепе́тая, велегла́сно пропове́дуем чудеса́ Твоя́ и ми́лость мно́гу к ро́ду христиа́нскому, чрез ико́ны святы́я Твоя́ и о́браз чудотво́рный Трубче́вский явля́емыя. Те́мже пе́сньми хвале́бными немо́лчно велича́юще Тя, взыва́ем к Бо́гу: Аллилуиа.

Икос 11

Светоно́сная лампа́да, еле́ем ми́лости к ро́ду челове́ческому преиспо́лненная, яви́лася еси в Це́ркви Христо́вой, Госпоже́ Богоро́дице, дарова́вши оби́тели Ска́новой изображе́ние честны́я ико́ны Твоея́, да вси, ви́дяще ми́лость, Тобо́ю к нам явля́емую, со слеза́ми мо́лятся: помози́, Преблага́я, напо́лни сосу́ды душ на́ших благи́ми делы, па́че же милосе́рдием и смире́нием, да ра́достно вопие́м Ти си́це:

Радуйся, уныва́ющих благо́е упова́ние,

Радуйся, даю́щая любо́вь и смире́ние.

Радуйся, правосла́вных жен тишино́ и незло́бие,

Радуйся, Храни́тельнице в мире милосе́рдия.

Радуйся, душе́вный мир с Бо́гом храни́ти науча́ющая,

Радуйся, во благоче́стии укрепля́ющая и утвержда́ющая.

Радуйся, подаю́щая благоду́шное терпе́ние,

Радуйся, Отра́до на́ша и Умиле́ние.

Радуйся, Всеми́лостивая Влады́чице, любо́вь Бо́жию нам явля́ющая.

Кондак 12

Благода́ть Бо́жия подае́тся оби́льно от честны́я ико́ны Твоея́ Трубче́вския, Богоро́дице. Лю́дие христолюби́вии с любо́вию ей покланя́ются, почерпа́юще оби́льныя от нея́ да́ры щедро́т Твои́х, и́бо всем вся блага́я и душеполе́зная да́руеши, и побужда́еши воспева́ти Бо́гу: Аллилуиа.

Икос 12

Пою́ще чудеса́, от ико́ны Твоея́ соверша́емая, Ма́ти Христа́ Бо́га на́шего, припа́даем Ти, и мо́лим Ти ся пред о́бразом Твои́м чудотво́рным: не отврати́ Пречи́стаго Ли́ка Твоего́ от оби́тели на́шея, и от всех ве́рных рабо́в Твои́х. Бу́ди, Влады́чице, нам защише́ние по исхо́де души́ из мира сего́, и егда́ и́мамы предста́ти на Суди́щи Стра́шнем пред Го́сподем и Сы́ном Твои́м. Спаси́, Госпоже́ Богоро́дице, от ве́чнаго осужде́ния и муче́ния гее́нскаго, да со умиле́нием и тре́петом душе́вным воспое́м Ти такова́я:

Радуйся, а́нгельских умо́в удивле́ние,

Радуйся, пра́отцев и проро́ков Ча́яние.

Радуйся, апо́столов Ра́досте благовествова́ния,

Радуйся, му́чеников укрепле́ние и дерзнове́ние.

Радуйся, преподо́бных Бо́гу уподобле́ние,

Радуйся, де́вствующих благоле́пная чистото́.

Радуйся, гре́шных к Бо́гу обраще́ние и всыновле́ние,

Радуйся, всех святы́х Сла́во и Похвало́.

Радуйся, Всеми́лостивая Влады́чице, любо́вь Бо́жию нам явля́ющая.

Кондак 13

О Премилосе́рдая Засту́пнице ро́да христиа́нскаго, честне́йшая Херуви́м и сла́внейшая без сравне́ния Серафи́м, Де́во Богоро́дице! Приими́ ми́лостивно моле́бное пе́ние, с ве́рою и благогове́нием Тебе́ возноси́мое пред чудотво́рным Твои́м о́бразом, защити́ от враго́в ви́димых и неви́димых, сохрани́ от искуше́ний и грехопаде́ний, и гряду́щаго пра́веднаго гне́ва Бо́жия, за лю́тая беззако́ния на́ша, ми́лостию Твое́ю изба́ви, умоли́ Го́спода Сла́вы изба́вити нас ве́чнаго муче́ния, да спасе́нии Тобо́ю, с ли́ки а́нгельскими воспое́м Бо́гу: Аллилуиа.

[Се́й конда́к глаго́лется три́жды.]
[Далее повторяем 1‑е икос и кондак:]

Икос 1

Арха́нгелов и Ангелов превы́шшую, вся Си́лы Небе́сныя немо́лчно воспева́ют Тя, Всеми́лостивая Влады́чице, и мы, гре́шнии, дивя́щеся ско́рому заступле́нию Твоему́, чрез о́браз чудотво́рный Твой Трубче́вский избавля́емся бед и зол. Те́мже в ра́дости серде́чней, с любо́вию припа́дающе ко пречестно́му о́бразу Твоему́, со умиле́нием прино́сим Ти благохвале́ния сицева́я:

Радуйся, Боже́ственное обетова́ние,

Радуйся, проро́честв исполне́ние.

Радуйся, несве́домая Та́йно Боговоплоще́ния, Радуйся, с Бо́гом вражды́ прекраще́ние.

Радуйся, мира всего́ от греха́ очище́ние,

Радуйся, нам в Ма́терь Богодарова́нная.

Радуйся, ра́йских врат отверзе́ние,

Радуйся, Небе́сных и земны́х при́сное ра́дование.

Радуйся, Всеми́лостивая Влады́чице, любо́вь Бо́жию нам явля́ющая.

Кондак 1

Взбра́нной Воево́де, Пречи́стей Влады́чице на́шей Богоро́дице, Засту́пнице христиа́н ско́рей, изба́вльшей зе́млю Ска́нову от смертоно́сныя я́звы хода́тайством Свои́м ко Всеми́лостивому Бо́гу, благода́рственное пе́ние прино́сим недосто́йнии раби́ Твои́, Ты же, я́ко имуща́я Держа́ву Непобеди́мую, от вся́ких зол и скорбе́й спаса́й нас молитвами Твои́ми, да зове́м Ти:

Радуйся, Всеми́лостивая Влады́чице, любовь Бо́жию нам явля́ющая.

Молитва

О Пречи́стая Госпоже́, мира Засту́пнице, Ма́ти Всепе́тая! Воззри́ ми́лостивно на предстоя́щыя со стра́хом лю́ди Твоя́, ве́рою и любо́вию припа́дающыя пред чудотво́рною ико́ною Твое́ю. Вонми́ многоболе́зненному воздыха́нию душ на́ших, при́зри с высоты́ святы́я Твоея́ на нас. Се бо грехми́ погружа́емии и скорбьми́ обурева́емии, взира́юще на о́браз Твой честны́й, я́ко живе́й Ти су́щей с на́ми, смире́нная моле́ния прино́сим Тебе́, Влады́чице. Мо́лим Тя: не отврати́ лица́ Твоего́ от прибега́ющих к Тебе́, бу́ди Хода́таица и Покрови́тельница за нас гре́шных пред Бо́гом, и гнев Его́ пра́ведный, за беззако́ния на́ша дви́жимый на ны, ско́ро умягчи́ и отврати́. Якоже не́когда поми́ловала еси́ прибега́вших к Тебе́ люде́й земли́ Ска́новы, и изба́вила еси́ их от смертоно́сныя я́звы, та́ко и нас всех, с ве́рою моля́щихся Тебе́, изба́ви от паде́ний грехо́вных, от наве́та злых челове́к, от собла́знов мира и искуше́ний, скорбе́й и бед, и от внеза́пныя сме́рти. Вразуми́ и научи́ ходи́ти без поро́ка по пути́ земна́го сего́ жития́, вложи́ в сердца́ на́ша дух стра́ха Бо́жия, дух благоче́стия, дух кро́тости, смире́ния, терпе́ния, непамятозло́бия, умягчи́ зла́я сердца́ на́ша, низпосли́ ре́вность о душа́х на́ших и о спасе́нии бли́жних. Да́руй всем нам, моля́щымся Тебе́, христиа́нскую кончи́ну жития́ на́шего, и до́брый отве́т на Стра́шнем Суди́щи Христо́ве. Вруча́ем бо живо́т свой Твоему́ Покро́ву и промышле́нию, да ра́достно всегда пое́м Тебе́ со все́ми святы́ми: ра́дуйся, Благода́тная, ра́дуйся, Обра́дованная, ра́дуйся, Преблагослове́нная, ра́дуйся, Препросла́вленная во ве́ки. Аминь.