Икона Богородицы «Феодоровская»

О, Пресвята́я Влады́чице Богоро́дице и Присноде́во Мари́е, еди́ная наде́ждо нам гре́шным! К Тебе́ прибега́ем и Тебе́ мо́лим, я́ко ве́лие и́маши дерзнове́ние к ро́ждшемуся от Тебе́ по пло́ти Го́споду Бо́гу и Спаси́телю на́шему Иису́су Христу́. Не пре́зри слез на́ших, не возгнуша́йся воздыха́ний на́ших, не отри́ни ско́рби на́шея, не посрами́ упова́ния на́шего на Тя, но Ма́терними моле́нии Твои́ми умоли́ Го́спода Бо́га, да сподо́бит нас, гре́шных и недосто́йных, свободи́тися от грехо́в и страсте́й душе́вных и теле́сных, и ми́ру у́бо умре́ти96, а Ему́ Еди́ному жи́ти по вся дни жи́зни на́шея. О Пресвята́я Влады́чице Богоро́дице! Путеше́ствующим спутеше́ствуй и огражда́й и охраня́й о́ныя, изба́ви плене́нных от плене́ния, свободи́ стра́ждущих от бед, уте́ши су́щих в печа́ли, ско́рбех и напа́стех, облегчи́ нищету́ и вся́ко злострада́ние теле́сное, и да́руй всем вся потре́бная к животу́, благоче́стию и жи́зни вре́менней. Спаси́, Влады́чице, вся страны́ и гра́ды, и сию́ страну́ и сей град, и́мже сия́ чудотво́рная и свята́я ико́на Твоя́ даде́ся во утеше́ние и огражде́ние: изба́ви я от гла́да, губи́тельства, тру́са, пото́па, огня́, меча́, наше́ствия иноплеме́нных, междоусо́бныя бра́ни, и отврати́ вся́кий гнев, на ны пра́ведно дви́жимый. Да́руй нам вре́мя на покая́ние и обраще́ние, изба́ви нас от внеза́пныя сме́рти и во вре́мя исхо́да на́шего предста́ни нам я́вльшися, Де́во Богоро́дице, и изба́ви нас от возду́шных мыта́рств князе́й ве́ка сего́, сподо́би на Стра́шнем Суде́ Христо́ве ста́ти одесну́ю, и соде́лай нас насле́дники ве́чных благ, да сла́вим великоле́пое и́мя Сы́на Твоего́ и Бо́га на́шего со Безнача́льным Его́ Отце́м, и Святы́м и Благи́м и Животворя́щим Его́ Ду́хом, ны́не и при́сно, и во ве́ки веко́в. Ами́нь.

Кондак 1

Взбра́нней Воево́де, Пренепоро́чней Де́ве Богоро́дице, Засту́пнице на́шей и Предста́тельству христиа́н непосты́дному, явле́нием чу́дныя ико́ны Своея́ ра́дование пода́вшей земле́ Росси́йстей и вся ве́рная ча́да Це́ркве просвети́вшей, благодаре́ние усе́рдно прино́сим Ти, Богоро́дице, и припа́дающе пречу́дному о́бразу Твоему́, уми́льно глаго́лем: спаси́, Госпоже́, и поми́луй рабы́ Твоя́, зову́щия:

Ра́дуйся, Ма́терь Бо́жия, Предста́тельнице и Засту́пнице на́ша усе́рдная.

Икос 1

Арха́нгел Гаврии́л от Бо́га по́слан бысть во град Назаре́т ко Пречи́стей Де́ве Мари́и, и вшед к Ней рече́: Ра́дуйся, Благода́тная, Госпо́дь с Тобо́ю, благослове́нна Ты в жена́х. Арха́нгельскому гла́су подража́юще, и мы, гре́шнии, ра́дости и благодаре́ния в се́рдце свое́м испо́лнени, пред явле́нным о́бразом Твои́м благохвале́ния на́ша возноси́ти к Тебе́ дерза́ем, Пресвята́я Богоро́дице:

Ра́дуйся, о́трасле от ко́рене Дави́дова благослове́нная; ра́дуйся, обе́том роди́телей в же́ртву Бо́гу принесе́нная.

Ра́дуйся, святы́х пра́ведных Иоаки́ма и А́нны Дщи Богода́нная; ра́дуйся, трие́х лет во храм Бо́жий введе́нная и та́мо воспита́нная.

Ра́дуйся, та́мо смире́нием и чистото́ю всех удиви́вшая; ра́дуйся, та́мо арха́нгельския бесе́ды сподо́бльшаяся.

Ра́дуйся, Де́во, о зача́тии Бо́га Сло́ва благове́стие во смире́нии прии́мшая; ра́дуйся, избра́нная Отрокови́це, к зача́тию Бо́га Сло́ва си́лою свы́ше осене́нная.

Ра́дуйся, та́йну воплоще́ния Сы́на Бо́жия, от веко́в в Бо́зе сокрове́нную, откры́вшая; ра́дуйся, А́гнице, ро́ждшая А́гнца Христа́, взе́мшаго грехи́ ми́ра.

Ра́дуйся, Тобо́ю бо избавля́емся мук а́довых; ра́дуйся, Тобо́ю бо сподобля́емся ве́чныя жи́зни.

Ра́дуйся, Ма́ти Бо́жия, Предста́тельнице и Засту́пнице на́ша усе́рдная.

Кондак 2

Ви́дя ико́ну Твою́, Пресвята́я Де́во, на дре́ве стоя́щу, князь благочести́вый Костромски́й у́жасом мно́гим содрога́шеся недоуме́я, что бысть ви́дение сие́. Хотя́щу же ему́ прия́ти ю́ и от сего́ свы́ше уде́ржану ему́ бы́вшу, не можа́ше; уве́дев, я́ко чу́дно есть ико́ны тоя́ явле́ние, воззва́ к Бо́гу: Аллилу́иа.

Икос 2

Ра́зумом жела́я разуме́ти князь благочести́вый прише́ствие пречу́днаго Твоего́ о́браза во град Кострому́, Богоро́дице, душе́ю ра́дования преиспо́лненною себе́ предаде́ води́тельству Бо́жию, и прекло́нь коле́на, со стра́хом вопия́ше Тебе́:

Ра́дуйся, Де́во, я́вльшая о́браз Свой чу́дно; ра́дуйся, Благослове́нная, в явле́нии о́браза Своего́ милосе́рдие нам явля́ющая.

Ра́дуйся, о всех чту́щих Сы́на Твоего́ промышля́ющая; ра́дуйся, всем прося́щим у Тебе́ да́ры, в ме́ру ве́ры, ко спасе́нию подаю́щая.

Ра́дуйся, путь и́стины заблу́дшим показу́ющая; ра́дуйся, к го́рнему ми́ру чудесы́ Твои́ми ум наш возводя́щая.

Ра́дуйся, смуще́ния помышле́ний сумни́тельных удаля́ющая; ра́дуйся, сла́вящих Тя всегда́ прославля́ющая.

Ра́дуйся, чистото́ю Твое́ю чистоте́ нас науча́ющая; ра́дуйся, чистото́ю Твое́ю нечистоту́ на́шу облича́ющая.

Ра́дуйся, моле́ния на́ша прие́млющая; ра́дуйся, рыда́ний и слез не отмета́ющая.

Ра́дуйся, Ма́ти Бо́жия, Предста́тельнице и Засту́пнице на́ша усе́рдная.

Кондак 3

Си́лу Бо́жию благочести́вый князь позна́в в восхожде́нии о́браза чу́днаго Твоего́, Богома́ти, в явле́нии же ви́дев милосе́рдие Твое́ ко всем спасе́ние хотя́щим получи́ти, рече́: Аллилу́иа.

Икос 3

Име́в по́мысл стяжа́ти да́руемое Небе́сное сокро́вище, лик Твой све́тлый, Богома́ти, второ́е простре́ держа́вный руку́ к о́бразу нисше́дшему; узре́в же па́ки его́ восхожде́ние, ско́ро по́йде во град и пове́да о бы́вших ему́ освяще́нному собо́ру, да прише́дше и ви́дяще ико́ны Твоея́ явле́ние возопию́т с ним ве́рнии:

Ра́дуйся, Цари́це Небесе́ и земли́; ра́дуйся, Престо́ле Царя́ ца́рствующих.

Ра́дуйся, Пренепоро́чная Де́во; ра́дуйся, Ма́ти Непристу́пнаго Све́та.

Ра́дуйся, честне́йшая Херуви́м; ра́дуйся, сла́внейшая без сравне́ния Серафи́м.

Ра́дуйся, Небе́сными Си́лами велича́емая; ра́дуйся, от всех земноро́дных ублажа́емая.

Ра́дуйся, неизрече́нное Весе́лие А́нгелов; ра́дуйся, Ве́нче ца́рственный всех проро́ков и апо́столов.

Ра́дуйся, правосла́вия Христо́вы Це́ркве огражде́ние; ра́дуйся, всех суему́дрых уче́ний и ересе́й низложе́ние.

Ра́дуйся, Ма́ти Бо́жия, Предста́тельнице и Засту́пнице на́ша усе́рдная.

Кондак 4

Бу́рю внутрь име́я помышле́ний недоуме́нных, освяще́нный собо́р со псалмы́ и пе́сньми духо́вными а́бие притече́ ви́дети о́браз Твой, Неискусобра́чная. Узре́в же его́ на дре́ве ди́вно стоя́ща и благоле́пно красото́ю сия́юща, рече́: Аллилу́иа.

Икос 4

Слы́шаша лю́дие честны́я ико́ны Твоея́, Богоотрокови́це, прише́ствие и, ко о́ной те́кше, поклоня́хуся, а́ки Саме́й Тебе́ су́щей, и со умиле́нием и слеза́ми вопия́ху к Тебе́:

Ра́дуйся, Де́во, Благослове́нная в жена́х, во чре́ве Твое́м Носи́теля вся́ческих носи́вшая; ра́дуйся, рожде́нием Сы́на Твоего́ спасе́ние ми́ру всему́ я́вльшая.

Ра́дуйся, челове́ки с Бо́гом соедини́вшая; ра́дуйся, превы́шшая небе́с, изба́вльшая нас от кля́твы.

Ра́дуйся, нас к ве́чной жи́зни руководя́щая; ра́дуйся, Влады́чице ми́ра.

Ра́дуйся, Бо́жие к сме́ртным благоволе́ние; ра́дуйся, сме́ртных к Бо́гу дерзнове́ние.

Ра́дуйся, благи́х во бла́гости соблюда́ющая; ра́дуйся, лука́вых на путь благи́й обраща́ющая.

Ра́дуйся, под сень кро́ва Твоего́ прибега́ющих ми́лующая; ра́дуйся, упова́ющих на Тя вся потре́бная к животу́ и благоче́стию да́рующая.

Ра́дуйся, Ма́ти Бо́жия, Предста́тельнице и Засту́пнице на́ша усе́рдная.

Кондак 5

Я́ко боготе́чную звезду́ узре́ша лю́дие ико́ну Твою́, Безневе́стная Де́во, и, я́ко многосве́тлый свети́льник, поста́виша ю́ во святе́м собо́рнем хра́ме, ра́дующеся и вопию́ще Бо́гу: Аллилу́иа.

Икос 5

Ви́девше жи́телие гра́да Городца́ о́браз Твой, Влады́чице, во хра́ме гра́да Костромы́ стоя́щий, и на руку́ Твое́ю держи́ма Богомладе́нца Иису́са, ско́рбию одержи́ма бе́ша, зане́ отше́ствие его́ бысть из гра́да их. Мы же, обра́довани благоволе́нием Твои́м ко гра́ду на́шему, прино́сим Ти да́ры, и, с любо́вию лобыза́юще Твой святы́й о́браз, вопие́м Ти:

Ра́дуйся, Звездо́, Со́лнце пра́вды нам я́вльшая; ра́дуйся, возлюби́вшая сию́ страну́.

Ра́дуйся, обре́тение Тебе́ и́щущих; ра́дуйся, ра́достию неизрече́нною ве́рных сердца́ исполня́ющая.

Ра́дуйся, сокро́вище благода́ти неистощи́мое; ра́дуйся, ми́лости приснотеку́щий исто́чниче.

Ра́дуйся, от тя́жких бед спаса́ющая; ра́дуйся, от смертно́сныя я́звы избавля́ющая.

Ра́дуйся, всего́ ми́ра Хода́таице; ра́дуйся, всех неду́гов Цели́тельнице.

Ра́дуйся, Красото́ несравне́нная; ра́дуйся, Добро́то несказа́нная.

Ра́дуйся, Ма́ти Бо́жия, Предста́тельнице и Засту́пнице на́ша усе́рдная.

Кондак 6

Пропове́дницы богоно́снии бы́ша ви́девшии о́браз Твой, Богоро́дице. Возвра́щся бо ки́йждо во страну́ свою́, возвеща́ше о прише́ствии его́ и чудесе́х от него́ быва́емых, воспева́я Бо́гу: Аллилу́иа.

Икос 6

Возсия́вши благода́ть от чу́днаго о́браза Твоего́, Чи́стая, ве́ру немощству́ющих утверди́, ве́рных же возвесели́ сердца́ любо́вию. Сего́ ра́ди ра́дующеся вопие́м Ти:

Ра́дуйся, Пресвята́я Де́во, све́том Небе́сныя и́стины нас озаря́ющая; ра́дуйся, мглу грехо́вную от нас отгоня́ющая.

Ра́дуйся, чудесы́ Твои́ми к богове́дению нас приводя́щая; ра́дуйся, всех ка́ющихся гре́шников ко благоче́стию подвиза́ющая.

Ра́дуйся, всех притека́ющих к Тебе́ кре́пкое заступле́ние; ра́дуйся, немощству́ющих умо́м утвержде́ние.

Ра́дуйся, изнемога́ющих в ве́ре возставля́ющая; ра́дуйся, ти́хое приста́нище в мо́ре жите́йстем обурева́емым.

Ра́дуйся, злы́я сове́ты сыно́в поги́бельных открыва́ющая; ра́дуйся, вознесе́нную горды́ню враго́в оте́чества на́шего смиря́ющая.

Ра́дуйся, правосла́вных царе́й Держа́во; ра́дуйся, всех христиа́н Похвало́.

Ра́дуйся, Ма́ти Бо́жия, Предста́тельнице и Засту́пнице на́ша усе́рдная.

Кондак 7

Хотя́ просла́вити Сын Твой, Богоро́дице, святу́ю ико́ну Твою́ во гра́де Костроме́, повеле́ ю́ в день Успе́ния Твоего́ свято́му великому́ченику Фео́дору Стратила́ту носи́ти по гра́ду сему́, да вси, ви́дяще чу́до сие́, благода́рным се́рдцем возопию́т Ему́: Аллилу́иа.

Икос 7

Чу́до но́вое яви́ нам Госпо́дь мольба́ми Твои́ми, Богоро́дице, егда́ сгоре́вшу хра́му, в не́мже бе поставлен святы́й о́браз Твой, сохрани́ его́ в пе́пле невреди́ма от огня́, и та́ко мне́вших сгоре́вша его́ печа́ль в ра́дость преложи́. Мы же, чу́до сие́ ве́дяще, воспева́ем Ти такова́я:

Ра́дуйся, Купино́ Неопали́мая; ра́дуйся, о́гненный сто́лпе, су́щия во тьме наставля́яй.

Ра́дуйся, Киво́те, Ду́хом позлаще́нный, Невмести́маго Бо́га вмести́вший; ра́дуйся, кади́льнице злата́я, я́ко фимиа́м благоуха́нный, моли́твы Твоя́ за ны к Бо́гу Сы́ну при́сно вознося́щая.

Ра́дуйся, Же́зле Ааро́нов, к явле́нию в ми́ре Сы́на Твоего́ прозя́бший; ра́дуйся, Руно́ Гедео́ново, благода́тию Бо́жиею во спасе́ние на́ше ороше́нное.

Ра́дуйся, Горо́ несеко́мая, от Нея́же отсече́ся краеуго́льный ка́мень Христо́с; ра́дуйся, Хра́ме одушевле́нный, в Не́мже всели́ся Божество́ теле́сне.

Ра́дуйся, де́вства охране́ние; ра́дуйся, супру́жества благослове́ние.

Ра́дуйся, па́че всех Го́спода возлюби́вшая; ра́дуйся, па́че всех от Него́ превознесе́нная.

Ра́дуйся, Ма́ти Бо́жия, Предста́тельнице и Засту́пнице на́ша усе́рдная.

Кондак 8

Стра́нное чу́до ви́девше, на возду́се ико́ну Богома́тери стоя́щу, а́ки рука́ми а́нгельскими держи́му, егда́ второ́е сгоре́ храм, в не́мже стоя́ явле́нная сия́ ико́на, отве́ржемся, лю́дие, ми́ра сего́, ум на Небеса́ прело́жше; сего́ бо ра́ди и дадеся нам чу́дная ико́на Богоро́дицы, да, взира́юще на ню, Го́рняя му́дрствуем, а не земна́я, вопию́ще к Бо́гу: Аллилу́иа.

Икос 8

В вы́шних пребыва́ющи селе́ниих, и ни́жних не разлучи́лася еси́, Богоро́дице, чудесы́ Твои́ми всех просвеща́ющи приходя́щих к Тебе́ с ве́рою, сего́ ра́ди и слы́шиши от нас сия́:

Ра́дуйся, Ма́ти Христа́ Бо́га на́шего, на Небеси́ пребыва́ющая; ра́дуйся, на земли́ нас не оставля́ющая.

Ра́дуйся, ра́ди вели́чества Твоего́ на Небеси́ А́нгелы окруже́нная; ра́дуйся, ра́ди сла́вы Твоея́ на земли́ от челове́к прославля́емая.

Ра́дуйся, Тебе́ бо слу́жат вся Небе́сныя Си́лы; ра́дуйся, Тебе́ бо, по Бо́зе, хвале́ние возно́сят Херуви́ми и Серафи́ми.

Ра́дуйся, лице́ Бо́жие вы́ну на Небеси́ созерца́ющая; ра́дуйся, пред престо́лом Сы́на Твоего́ Ма́тернии ру́це Твои́, за ны моля́щися, простира́ющая.

Ра́дуйся, нас, су́щих на земли́, от вся́каго зла омофо́ром Твои́м покрыва́ющая; ра́дуйся, ве́рных от вся́ких душепа́губных дел удаля́ющая.

Ра́дуйся, рожде́нием Сы́на Бо́жия две́ри Ца́рства Христо́ва нам отве́рзшая; ра́дуйся, наде́ждою прия́тия Небе́сных благ ве́рных ду́ши услажда́ющая.

Ра́дуйся, Ма́ти Бо́жия, Предста́тельнице и Засту́пнице на́ша усе́рдная.

Кондак 9

Вся́кое естество́ а́нгельское превозно́сит Тя, Де́во, вели́кия ра́ди любве́ Твоея́ к ро́ду христиа́нскому; незри́ма бо и непристу́пна, я́ко Ма́ти Бо́га от земли́ к Небеси́ возше́дшая, пречи́стым Твои́м о́бразом зри́му и присту́пну Себе́ явля́еши всем воспева́ющим Сы́ну Твоему́: Аллилу́иа.

Икос 9

Вити́я многовеща́нныя, я́ко ры́бы безгла́сны, зрим о Тебе́, Богоро́дице, недоуме́ют бо глаго́лати о сла́вных чудесе́х, от явле́нныя Твоея́ ико́ны быва́емых. Мы же о́ным дивя́щеся благода́рно вопие́м Ти:

Ра́дуйся, слепы́х прозре́ние; ра́дуйся, хромы́х хожде́ние.

Ра́дуйся, от те́мных и лука́вых духо́в исцеля́ющая; ра́дуйся, луча́ми от Твоего́ пречи́стаго о́браза изше́дшими враго́в земли́ на́шея отгна́вшая.

Ра́дуйся, больны́м виде́ние Твое́ дарова́вшая; ра́дуйся, моля́щимся явле́нней ико́не Твое́й исцеле́ние подаю́щая.

Ра́дуйся, разсла́бленных от одра́ боле́зни воздвига́ющая; ра́дуйся, немы́м разреша́ющая уста́.

Ра́дуйся, от пле́на вра́жия возвраща́ющая; ра́дуйся, лю́тыя пло́ти стра́сти утоля́ющая.

Ра́дуйся, ду́ши ве́рных неизрече́нным милосе́рдием Твои́м умиля́ющая; ра́дуйся, неизглаго́ланным Твои́м человеколю́бием уныва́ющих ободря́ющая.

Ра́дуйся, Ма́ти Бо́жия, Предста́тельнице и Засту́пнице на́ша усе́рдная.

Кондак 10

Соблюсти́ хотя́щи в чистоте́ домострои́тельство Це́ркве Правосла́вныя, Чи́стая, и, утверди́ти ски́петр держа́вы Росси́йския, чу́дною ико́ною Твое́ю вложи́ла еси́ в се́рдце благове́рнаго госуда́ря Михаи́ла Фео́доровича прия́ти вене́ц ца́рский земли́ Росси́йския, да вси ви́дящии ви́дят, я́ко Вы́шний владе́ет ца́рством, и ему́же хо́щет дае́т е́, и возопию́т Ему́: Аллилу́иа.

Икос 10

Стена́ еси́ необори́мая, Богоро́дице Де́во, всем к Тебе́ прибега́ющим: никто́же бо притека́яй к Тебе́ тощ отхо́дит. Сего́ ра́ди ущедря́еми ми́лостию Твое́ю, во умиле́нии души́ возглаша́ем Тебе́:

Ра́дуйся, тве́рдая Стено́, от враг ви́димых и неви́димых охраня́ющая; ра́дуйся, кре́пкая Защи́то упова́ние на Тя возложи́вшим.

Ра́дуйся, позна́ния и́стины чи́стое Зерца́ло; ра́дуйся, сохране́ния ве́ры кре́пкое Забра́ло.

Ра́дуйся, гра́ды и страны́ христиа́нския предста́тельством Твои́м от враго́в спаса́ющая; ра́дуйся, царе́м благове́рным побора́ющая.

Ра́дуйся, мир во гра́дех селя́щая; ра́дуйся, благонра́вным благопоспеша́ющая.

Ра́дуйся, си́лою моли́тв Твои́х злы́я по́мыслы в ничто́же обраща́ющая; ра́дуйся, си́лы враго́в бли́жняго сокруша́ющая.

Ра́дуйся, ю́ности наставле́ние; ра́дуйся ста́рости поддержа́ние.

Ра́дуйся Ма́ти Бо́жия, Предста́тельнице и Засту́пнице на́ша усе́рдная.

Кондак 11

Пе́ние вся́кое побежда́ется спростре́тися тща́щееся мно́жеству мно́гих щедро́т Твои́х; равночи́сленныя бо песку́ морско́му пе́сни а́ще прино́сим Ти, Богоро́дице Де́во, ничто́же соверша́ем досто́йно, я́же дарова́ла еси́ нам, вопию́щим к Бо́гу: Аллилу́иа.

Икос 11

Светоприе́мную свещу́, дре́вле я́вльшуюся, зрим во святе́й ико́не Твое́й, Богоро́дице Де́во, егда́ град наш защити́ла еси́ от разоре́ния враго́в земли́ на́шея луча́ми, от святы́я Твоея́ ико́ны исходя́щими. Сего́ ра́ди с ве́рою припа́дающе к ней и с любо́вию лобыза́юще ю́, вопие́м Ти:

Ра́дуйся, Ма́ти Преве́чнаго Све́та Христа́, уче́нием Его́ ду́ши просвеща́ющая; ра́дуйся, благода́тию Бо́жиею неве́рующих к ве́ре в Бо́га приводя́щая.

Ра́дуйся, путеше́ствующим спутеше́ствующая; ра́дуйся, ну́ждно пла́вающих Ко́рмчая.

Ра́дуйся, от вся́кия ско́рби, гне́ва и ну́жды спаса́ющая; ра́дуйся, от гла́да, губи́тельства, тру́са и огня́ сохраня́ющая.

Ра́дуйся, избавля́ющая от иноплеме́нных; ра́дуйся, охраня́ющая от междоусо́бныя бра́ни.

Ра́дуйся, во святе́й ико́не Твое́й, я́ко со́лнце, в Костромски́х преде́лех возсия́вшая; ра́дуйся, зде о́трасль ца́рственную возвели́чившая.

Ра́дуйся, Тобо́ю бо утвержда́ются ца́рства; ра́дуйся, Тобо́ю бо венча́ются ца́рие.

Ра́дуйся, Ма́ти Бо́жия, Предста́тельнице и Засту́пнице на́ша усе́рдная.

Кондак 12

Благода́ть прия́вшая от Бо́га Сы́на Твоего́, Де́во Богоро́дице, и ту дре́вле излия́вшая на всех прибега́ющих к о́бразу Твоему́, не лиши́ ны́не и нас бога́тыя Твоея́ ми́лости, да́руй нам покая́ние о гресе́х, да чи́стым се́рдцем и устны́ взыва́ем к возлю́бленному Сы́ну Твоему́ и Бо́гу на́шему: Аллилу́иа.

Икос 12

Пою́ще Твоея́ ми́лости и чудеса́, хва́лим Тя вси, Богоро́дице, и, я́ко дре́влий Изра́иль к киво́ту Заве́та, притека́ем ко о́бразу лица́ Твоего́, и из глубины́ ду́ши вопие́м: воздви́гни ру́це Твоя́ к Сы́ну Твоему́, да пода́ст нам вся блага́я и спаси́тельная с ве́рою и любо́вию вопию́щим Ти:

Ра́дуйся, Утеше́ние на́ше в ско́рбех; ра́дуйся, Утоле́ние печа́лей на́ших.

Ра́дуйся, Ра́досте на́ша безконе́чная; ра́дуйся, Све́тлосте и Отра́до серде́чная.

Ра́дуйся, Наде́ждо на́ша кре́пкая; ра́дуйся, си́рым Прия́телище.

Ра́дуйся, стра́нным Прибе́жище; ра́дуйся, оби́димым Покрови́тельнице.

Ра́дуйся, оклевета́емых Оправда́ние; ра́дуйся, благи́х Защище́ние.

Ра́дуйся, те́ла моего́ Врачева́ние; ра́дуйся, ду́ши моея́ Спасе́ние.

Ра́дуйся, Ма́ти Бо́жия, Предста́тельнице и Засту́пнице на́ша усе́рдная.

Кондак 13

О, Премилосе́рдая Засту́пнице на́ша, вели́кия ра́ди ми́лости Твоея́ дарова́вшая оте́честву и гра́ду на́шему чудотво́рную ико́ну Твою́ во освяще́ние, утеше́ние и огражде́ние на́ше, ны́нешнее прие́мши славосло́вие, от вся́каго зла́го обстоя́ния изба́ви рабы́ Твоя́. Ски́петр благове́рнаго Импера́тора на́шего утверди́, да́руй ему́ здра́вие и спасе́ние, на враги́ побе́ду и одоле́ние и всех нас ве́чных мук свободи́, устна́ми, душе́ю же и се́рдцем вопию́щих: Аллилу́иа.

[Се́й конда́к глаго́лется три́жды.]
[Далее повторяем 1‑е икос и кондак:]

Икос 1

Арха́нгел Гаврии́л от Бо́га по́слан бысть во град Назаре́т ко Пречи́стей Де́ве Мари́и, и вшед к Ней рече́: Ра́дуйся, Благода́тная, Госпо́дь с Тобо́ю, благослове́нна Ты в жена́х. Арха́нгельскому гла́су подража́юще, и мы, гре́шнии, ра́дости и благодаре́ния в се́рдце свое́м испо́лнени, пред явле́нным о́бразом Твои́м благохвале́ния на́ша возноси́ти к Тебе́ дерза́ем, Пресвята́я Богоро́дице:

Ра́дуйся, о́трасле от ко́рене Дави́дова благослове́нная; ра́дуйся, обе́том роди́телей в же́ртву Бо́гу принесе́нная.

Ра́дуйся, святы́х пра́ведных Иоаки́ма и А́нны Дщи Богода́нная; ра́дуйся, трие́х лет во храм Бо́жий введе́нная и та́мо воспита́нная.

Ра́дуйся, та́мо смире́нием и чистото́ю всех удиви́вшая; ра́дуйся, та́мо арха́нгельския бесе́ды сподо́бльшаяся.

Ра́дуйся, Де́во, о зача́тии Бо́га Сло́ва благове́стие во смире́нии прии́мшая; ра́дуйся, избра́нная Отрокови́це, к зача́тию Бо́га Сло́ва си́лою свы́ше осене́нная.

Ра́дуйся, та́йну воплоще́ния Сы́на Бо́жия, от веко́в в Бо́зе сокрове́нную, откры́вшая; ра́дуйся, А́гнице, ро́ждшая А́гнца Христа́, взе́мшаго грехи́ ми́ра.

Ра́дуйся, Тобо́ю бо избавля́емся мук а́довых; ра́дуйся, Тобо́ю бо сподобля́емся ве́чныя жи́зни.

Ра́дуйся, Ма́ти Бо́жия, Предста́тельнице и Засту́пнице на́ша усе́рдная.

Кондак 1

Взбра́нней Воево́де, Пренепоро́чней Де́ве Богоро́дице, Засту́пнице на́шей и Предста́тельству христиа́н непосты́дному, явле́нием чу́дныя ико́ны Своея́ ра́дование пода́вшей земле́ Росси́йстей и вся ве́рная ча́да Це́ркве просвети́вшей, благодаре́ние усе́рдно прино́сим Ти, Богоро́дице, и припа́дающе пречу́дному о́бразу Твоему́, уми́льно глаго́лем: спаси́, Госпоже́, и поми́луй рабы́ Твоя́, зову́щия:

Ра́дуйся, Ма́терь Бо́жия, Предста́тельнице и Засту́пнице на́ша усе́рдная.

Моли́тва 1‑я

О, Премилосе́рдая Госпоже́, Цари́це, Богоро́дице, приими́ смире́нное моле́ние на́ше, и не отри́ни нас, Заступле́ние и Прибе́жище на́ше, и не возгнуша́йся нас, недосто́йных, но, я́ко Милосе́рдая, не преста́ни моля́щи, Его́же родила́ еси́, да да́рует нам проще́ние мно́гих согреше́ний на́ших, да спасе́т нас, и́миже весть судьба́ми. Поми́луй нас, Влады́чице, поми́луй нас, несть бо нам спасе́ние от дел. Те́мже ве́рно вопие́м Ти: поми́луй рабы́ Твоя́ и непло́дное се́рдце на́ше покажи́ плодоно́сно благи́х дел. При́зри на нас, недосто́йных, Ты бо упова́ние и покро́в наш, жизнь и свет се́рдцу на́шему. Я́ко Невече́рний Свет от чре́ва Твоего́ воздви́гшая, озари́ ду́шу на́шу, Чи́стая, и отжени́ вся́ку мглу сердца́ на́шего. Да́руй нам умиле́ние, покая́ние и сокруше́ние серде́чное. Сподо́би нас по вся дни живота́ на́шего твори́ти во́лю Сы́на Твоего́ и Бо́га на́шего и во всем благоугожда́ти Ему́ Еди́ному. О, Богома́ти, не преста́ни моля́щи Ро́ждшагося от Тебе́ за вся, притека́ющия с ве́рою к сему́ чудотво́рному о́бразу Твоему́, и подавай им ско́рую по́мощь и утеше́ние в ско́рбех и напа́стех и злострада́ниих, изба́ви их от клеветы́ и зло́бы челове́ческия, от враг ви́димых и неви́димых и вся́кия ну́жды и печа́ли. Спаси́ оте́чество на́ше, град сей и вся гра́ды и страны́ от вся́ких бед и нужд и сотвори́ ми́лостива нам бы́ти Бо́га на́шего, отврати́ вся́кий гнев Его́, на ны дви́жимый, и изба́ви ны от належа́щаго и пра́веднаго Его́ преще́ния. О, Боголюби́вая Влады́чице, А́нгелов украше́ние, му́чеников сла́во и всех святы́х ра́досте, с ни́ми моли́ Го́спода, да сподо́бит нас в покая́нии сконча́ти живота́ на́шего тече́ние. В сме́рти же час, Пресвята́я Де́во, изба́ви нас от вла́сти бесо́вския и осужде́ния, и отве́та, и стра́шнаго испыта́ния, и мыта́рств го́рьких, и огня́ ве́чнаго, да, сподо́бльшеся сла́внаго Ца́рствия Бо́жия, велича́ем Тя и сла́вим вопло́щшагося от Тебе́ Христа́, Бо́га на́шего, Ему́же сла́ва со Отце́м и Святы́м Ду́хом, ны́не, и при́сно, и во ве́ки веко́в. Ами́нь.

Моли́тва 2‑я

О, Пресвята́я Влады́чице Богоро́дице и Присноде́во Мари́е, еди́ная Наде́ждо нам, гре́шным, к Тебе́ прибега́ем и Тебе́ мо́лим, я́ко ве́лие и́маши дерзнове́ние пред ро́ждшимся от Тебе́ по пло́ти Го́сподом Бо́гом и Спаси́телем на́шим Иису́сом Христо́м. Не пре́зри слез на́ших, не возгнуша́йся воздыха́ний на́ших, не отри́ни ско́рби на́шея, не посрами́ упова́ния на́шего на Тя, но Ма́терними моле́нии Твои́ми умоли́ Го́спода Бо́га, да сподо́бит нас гре́шных и недосто́йных свободи́тися от грехо́в и страсте́й душе́вных и теле́сных, умре́ти ми́ру и жи́ти Ему́ Еди́ному во вся дни живота́ на́шего.

О, Пресвята́я Влады́чице Богоро́дице, путеше́ствующим спутеше́ствуй и огражда́й и охраня́й о́ныя, изба́ви плене́нных от плене́ния, свободи́ стра́ждущих от бед, уте́ши су́щих в печа́ли, ско́рбех и напа́стех, облегчи́ нищету́ и вся́ко злострада́ние теле́сное и да́руй всем вся потре́бная к животу́, благоче́стию и жи́зни вре́менней. Спаси́, Влады́чице, вся страны́ и гра́ды и сию́ страну́ и сей град, и́мже сия́ чудотво́рная и свята́я ико́на Твоя́ дадеся во утеше́ние и огражде́ние, изба́ви я́ от гла́да, губи́тельства, тру́са, пото́па, огня́, меча́, наше́ствия иноплеме́нных, междоусо́бныя бра́ни и отврати́ вся́кий гнев на ны пра́ведно дви́жимый. Да́руй нам вре́мя на покая́ние и обраще́ние, изба́ви нас от внеза́пныя сме́рти и во вре́мя исхо́да на́шего предста́ни нам я́вльшися, Де́во Богоро́дице, и изба́ви нас от воздушных мыта́рств князей ве́ка сего́, сподо́би на Стра́шнем Суди́щи Христо́вем ста́ти одесну́ю и соде́лай нас снасле́дники ве́чных благ, да сла́вим во ве́ки великоле́пое и́мя Сы́на Твоего́ и Бо́га на́шего со Безнача́льным Его́ Отце́м и Святы́м и Благи́м и Животворя́щим Его́ Ду́хом, ны́не и при́сно и во ве́ки веко́в. Ами́нь.

Минея, 14 Марта, Канон Богородицы

Глас 4

Песнь 1

Ирмос: Отве́рзу уста́ моя́,/ и напо́лнятся Ду́ха,/ и сло́во отры́гну Цари́це Ма́тери,/ и явлю́ся, све́тло торжеству́я,/ и воспою́, ра́дуяся, Тоя́ чудеса́.

Припев: Пресвята́я Богоро́дице, спаси́ на́с.

Отве́рзый ум разуме́ти Писа́ния ученико́м Твои́м, Го́споди,/ отве́рзи ны́не и на́ша се́рдца к разуме́нию вели́чия Твоего́ и Ма́тери Твое́я,/ да с Не́ю боголе́пно просла́вим Тя.

Припев: Пресвята́я Богоро́дице, спаси́ на́с.

Отве́рсти толку́щим две́ри милосе́рдия Твоего́ обетова́вый, Влады́ко наш,/ отве́рзи нам утро́бы человеколю́бия Твоего́,/ име́я на сие́ моля́щую Тя Хода́таицу.

Сла́ва Отцу́ и Сы́ну и Свято́му Ду́ху.

Отве́рсто иногда́ бы́сть моли́твою Илиино́ю не́бо,/ ра́ди беззако́нновавшаго Изра́иля заключе́нное,/ отве́рст да бу́дет и нам, гре́шным, вход в Небе́сная предста́тельством Твои́м, Богороди́тельнице.

И ны́не и при́сно и во ве́ки веко́в. Ами́нь.

Отве́рзшая рождество́м Твои́м врата́ ве́чная, Богороди́тельница Пречи́стая,/ отве́рзи предста́тельством Твои́м заключе́нный серде́ц на́ших две́ри,/ да Сын Твой и Бог наш вни́дет и освяти́т я.

Песнь 3

Ирмос: Твоя́ песносло́вцы, Богоро́дице,/ Живы́й и Незави́стный Исто́чниче,/ лик себе́ совоку́пльшия, духо́вно утверди́,/ в Боже́ственней Твое́й сла́ве/ венце́в сла́вы сподо́би.

Припев: Пресвята́я Богоро́дице, спаси́ на́с.

Твоего́ плотска́го е́же на земли́ смотре́ния/ да незабве́нно устро́иши воспомина́ние,/ дал еси́ нам, Влады́ко, ико́ну Твою́ и Ро́ждшия Тя,/ те́мже, взира́юще на о́ную, мо́лим Тя:/ руководи́ нас к позна́нию и любле́нию Тебе́,/ воплоще́ннаго Бо́га и Спа́са душ на́ших.

Припев: Пресвята́я Богоро́дице, спаси́ на́с.

Твое́й Пренепоро́чныя Ма́тере всечестны́й о́браз любо́вию объе́млюще,/ из глубины́ души́ взыва́ем к Тебе́, живу́щему на Небесе́х:/ начертай на сердца́х на́ших кра́сный о́браз доброде́телей Ея́,/ да велича́ем Тя, Го́спода и Спа́са на́шего.

Сла́ва Отцу́ и Сы́ну и Свято́му Ду́ху.

Твой всечестны́й о́браз, Влады́чице, любе́зно на земли́ прие́млюще,/ зове́м к Тебе́, су́щей во сла́ве Небе́сней,/ да при́сно хода́тайствуеши нам благода́ть мы́слити и твори́ти досто́йная Твоего́ вели́чия,/ е́же сотвори́ Тебе́ Си́льный.

И ны́не и при́сно и во ве́ки веко́в. Ами́нь.

Твои́х благодея́ний воспомина́ние, твори́мое дне́сь,/ дви́жет се́рдца на́ша со устна́ми к благохвале́нию Твоему́, Влады́чице,/ но сотвори́, да и кра́сный лик Твои́х доброде́телей/ привлече́т се́рдца на́ша к любле́нию и подража́нию о́ных.

Седален, глас 3

Си́и лю́дие устна́ми чтут Мя,/ се́рдце же их дале́че отстои́т от Мене́, –/ рече́ иногда́ Госпо́дь Вседержи́тель ко иуде́ем, еди́н вне́шний вид благоче́стия являющим./ Но да и мы не ту́южде с ни́ми ча́сть и осужде́ние восприи́мем, бра́тие,/ вся́чески блюде́мся дел, подо́бных лицеме́рию./ Сего́ ра́ди пра́зднующе и всечестны́й сей пра́здник,/ да не яви́мся извне́ то́чию благогове́йны,/ вну́трь же у́ду зли и нечести́вии пред Испыту́ющим се́рдца и утро́бы,/ в простоте́ се́рдца поклони́мся Ему́, я́коже Сам рече́, Ду́хом и и́стиною,/ да та́ко бу́дем подража́тели Пресвяте́й Де́ве,/ в Не́йже не глас то́чию, но па́че душа́ велича́ше Го́спода/ и Дух ра́довашеся о Бо́зе, Спа́се Свое́м.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богородичен: Покро́ва Твоего́ Боже́ственнаго, Пречи́стая Богоро́дице Влады́чице,/ да не отъи́меши от рабо́в Твои́х, мо́лят Тя уго́дники Сы́на Твоего́:/ великому́ченик Фео́дор Стратила́т и преподо́бнии чудотво́рцы,/ страны́ сея́ Костромски́я и Га́лицкия засту́пницы,/ и́хже моле́ние приими́ и поми́луй нас.

Песнь 4

Ирмос: Седя́й в сла́ве на Престо́ле Божества́/ во о́блаце ле́гце,/ прии́де Иису́с Пребоже́ственный/ Нетле́нною Дла́нию и спа́се зову́щия:/ сла́ва, Христе́, си́ле Твое́й.

Припев: Пресвята́я Богоро́дице, спаси́ на́с.

Седя́й одесну́ю Престо́ла вели́чествия на высо́ких,/ снизше́л еси́ к дольнейшим страна́м земли́/ и, всели́вся во чре́во смиренному́дрыя Ма́тере Де́вы,/ яви́л еси́ ми́рови, я́ко Ты призира́еши на смире́ние рабо́в Твои́х/ и дае́ши им благода́ть Твою́,/ ея́же да и мы сподо́бимся, да́руй нам бы́ти ревни́тели смиренному́дрыя Твое́я Ма́тере.

Припев: Пресвята́я Богоро́дице, спаси́ на́с.

Седя́й на ра́мех Херуви́м и Серафи́м,/ благоволи́л еси́ пло́тию седе́ти на объя́тиях Чисте́йшия Отрокови́цы,/ да сим пока́жеши нам, я́ко Ты, Свя́те святы́х,/ обита́еши в сердца́х еди́ных любителей чистоты́ и целому́дрия,/ его́же рачи́тели и нас покажи́ моли́твами ро́ждшия Тя.

Сла́ва Отцу́ и Сы́ну и Свято́му Ду́ху.

Седя́щему во сла́ве на Престо́ле Божества́/ сподо́билася еси́ Ма́терь бы́ти,/ ра́ди изя́щнейшия чистоты́ и смиренному́дрия,/ и́хже люби́тели и нас покажи́ моли́твами Твои́ми,/ да и мы сподо́бимся ча́сти, угото́ванной рачи́телем чистоты́ и смиренному́дрия Твоего́.

И ны́не и при́сно и во ве́ки веко́в. Ами́нь.

Седе́ти во сла́ве Сы́на Твоего́ сподо́бившаяся, Пренепоро́чная Де́во,/ не преста́й моля́щи бла́гость Его́,/ да и мы, взира́юще на о́браз святы́я жи́зни Твое́я/ и о́ному на́шим жи́тельством сообразу́ющеся,/ тоя́жде сла́вы на Небесе́х бу́дем прича́стницы.

Песнь 5

Ирмос: Ужасо́шася вся́ческая/ о Боже́ственней сла́ве Твое́й:/ Ты бо, Неискусобра́чная Де́во,/ име́ла еси́ во утро́бе над все́ми Бо́га/ и родила́ еси́ Безле́тнаго Сы́на,/ всем воспева́ющим Тя/ мир подава́ющая.

Припев: Пресвята́я Богоро́дице, спаси́ на́с.

Ужаса́хуся и смуща́хуся костромсти́и жи́телие,/ мне́вше зна́мение Твоего́ о них про́мысла,/ ико́ну Ма́тере Твое́й, во пла́мени сгоре́вшу,/ но сие́ смуще́ние премени́л еси́ в ра́дость, Го́споди,/ показа́в им а́бие о́браз сей, от огня́ и пе́пела невреди́м./ Си́це да и мы, по обурева́ющих нас искуше́ниях и напа́стех,/ при́сно ра́дуемся о Твое́м, е́же о нас благоволе́нии,/ мо́лим Тя, Человеколю́бче.

Припев: Пресвята́я Богоро́дице, спаси́ на́с.

Ужасо́шася иногда́ полки́ наше́дших на град Кострому́ супоста́тов,/ егда́ от воображе́ния зра́ка лица́ Твоего́, Го́споди, и Пресвяты́я Твое́й Ма́тере/ пусти́л еси́ на сих стре́лы мо́лниины,/ но сей у́жас да вложи́ши в се́рдца/ и всех, стремящихся ратобо́рствовати достоя́ние Твое́,/ мо́лим Тя с Хода́таицею на́шего избавле́ния.

Сла́ва Отцу́ и Сы́ну и Свято́му Ду́ху.

Ужа́сни и ско́рбни бы́вше жи́телие Городца́,/ узре́вше ико́ну Твою́, Богома́ти, пренесе́ну во град Кострому́:/ мня́ху бо себе́ сим пренесе́нием лише́нных бы́ти Твоего́ о них Ма́терняго благоволе́ния,/ но да не и мы, таково́ю же иногда́ ско́рбию объя́ти,/ бу́дем лише́ни зна́мений Твоего́ покровительства,/ не преста́й, Влады́чице, пребыва́ющи с на́ми Твое́ю ми́лостию.

И ны́не и при́сно и во ве́ки веко́в. Ами́нь.

Я́ко о́чи рабы́ни в ру́ку госпожи́ свое́й,/ та́ко о́чи на́ши всегда́ к Тебе́ возводи́м,/ о Многоблагоутро́бная Госпоже́ на́ша и Спаси́тельнице Всесвята́я Богоро́дице!/ При́зри у́бо на ны ми́лостивно,/ ца́рствующая на Небеси́ с Сыно́м твои́м и Бо́гом,/ и уще́дрити ны, гре́шныя, потщи́ся,/ я́ко вся Тебе́ возмо́жна су́ть.

Песнь 6

Ирмос: Боже́ственное сие и всечестно́е/ соверша́юще пра́зднество,/ Богому́дрии, Богома́тере,/ прииди́те, рука́ми воспле́щим,/ от Нея́ ро́ждшагося Бо́га сла́вим.

Припев: Пресвята́я Богоро́дице, спаси́ на́с.

Боже́ственное Твое́ разуме́ем истоща́ние, Иису́се, Бо́же наш,/ егда́, взира́юще на о́браз Ма́тере Твое́я,/ зрим Тя с Не́ю я́ко Младе́нца, рука́ми Ея́ держи́ма,/ те́мже благодаря́ще сему́ Твоему́ е́же к нам снизхожде́нию,/ мо́лим Тя, нас ра́ди младе́нствовавшаго,/ бы́ти нам ми́лостива о гресе́х на́ших.

Сла́ва Отцу́ и Сы́ну и Свято́му Ду́ху.

Боже́ственнаго Твоего́ воплоще́ния е́же от Де́вы, да при́сно сла́вится та́инство,/ дарова́л еси́ нам, Христе́ Царю́, всечестну́ю Ма́тере Твое́я ико́ну/ с воображе́нным на ней ви́дом Пречи́стаго лица́ Твоего́,/ те́мже и мо́лим Тя, Вседарови́тый Го́споди,/ да да́си нам при́сно сла́вити воплоще́ние Твое́,/ и́мже челове́цы Божеству́ соединихомся.

И ны́не и при́сно и во ве́ки веко́в. Ами́нь.

Боже́ственнаго Твоего́ воплоще́ния е́же от Де́вы, да при́сно сла́вится та́инство,/ дарова́л еси́ нам, Христе́ Царю́, всечестну́ю Ма́тере Твое́я ико́ну/ с воображе́нным на ней ви́дом Пречи́стаго лица́ Твоего́,/ те́мже и мо́лим Тя, Вседарови́тый Го́споди,/ да да́си нам при́сно сла́вити воплоще́ние Твое́,/ и́мже челове́цы Божеству́ соединихомся.

Кондак, глас 8

Благода́рственная принося́ще Ти, раби́ Твои́, Богороди́тельнице, о всех,/ и́миже благоде́яла еси́ гра́ду на́шему,/ из глубины́ души́ взыва́ем к Тебе́ и ми́ли ся де́ем:/ не преста́ни, Влады́чице,/ Ма́терними к Сы́ну Твоему́ и Бо́гу на́шему моли́твами/ подава́ти вся блага́я и спаси́тельная всем,/ ве́рою и любо́вию вопию́щим Ти:/ ра́дуйся, Де́во, христиа́н похвале́.

Икос

Стена́ еси́ де́вам, Богоро́дице Де́во,/ и всем, к Тебе́ прибега́ющим,/ и́бо Небесе́ и земли́ Творе́ц устро́и Тя, Пречи́стая, все́лься во утро́бе Твое́й/ и вся приглаша́ти Тебе́ научи́в:/ ра́дуйся, сто́лпе де́вства;/ ра́дуйся, две́рь спасе́ния./ Ра́дуйся, Нача́льнице мы́сленнаго назда́ния;/ ра́дуйся, Пода́тельнице Боже́ственныя бла́гости./ Ра́дуйся, Ты бо обнови́ла еси́ зача́тыя сту́дно;/ ра́дуйся, Ты бо наказа́ла еси́ окра́денныя умо́м./ Ра́дуйся, тли́теля смы́слов упраждня́ющая;/ ра́дуйся, Се́ятеля чистоты́ ро́ждшая./ Ра́дуйся, черто́же безсе́меннаго уневе́щения;/ ра́дуйся, ве́рных Го́сподеви сочета́вшая./ Ра́дуйся, до́брая Младопита́тельнице де́вам;/ ра́дуйся, Невестокраси́тельнице душ святы́х./ Ра́дуйся, Неве́сто Неневе́стная.

Песнь 7

Ирмос: Не послужи́ша тва́ри Богому́дрии/ па́че Созда́вшаго,/ но, о́гненное преще́ние му́жески попра́вше,/ ра́довахуся, пою́ще:/ препе́тый отце́в Госпо́дь и Бог, благослове́н еси́.

Припев: Пресвята́я Богоро́дице, спаси́ на́с.

Не служи́ти тва́ри па́че Творца́ законоположи́вый челове́ком, Спа́се наш,/ сотвори́, усе́рдно мо́лим Тя с Богоро́дицею,/ да Ду́хом Твои́м просвеща́еми,/ не к рукотворе́нным изображе́нием отно́сим Боголе́пное служе́ние,/ но чрез о́браз Твой возно́симся умы́ и се́рдцы,/ к Еди́ному Тебе́, отце́в Бо́гу благослове́нному.

Припев: Пресвята́я Богоро́дице, спаси́ на́с.

Не послужи́ша бы́вшии в пещи́ Вавило́нстей му́дрии ю́ноши безду́шному истукану,/ но Еди́ному Тебе́, во о́бразе А́нгела посреде́ пла́мене я́вльшемуся Сы́ну Бо́жию, поклони́шася,/ и́хже ли́ку и ча́сти сопричти́ и всех, изображе́нием сладча́йшаго зра́ка Твоего́ дви́жимых/ к прославле́нию Тебе́, отце́в Бо́га благослове́ннаго.

Сла́ва Отцу́ и Сы́ну и Свято́му Ду́ху.

Не послужи́ла еси́ Бо́гу нра́вом плотски́х иуде́ев, Пренепоро́чная Де́во,/ но ду́хом и и́стиною, я́ко и́стинная Раба́ Его́, покланя́лася еси́ Ему́./ Те́мже да и мы с Тобо́ю и́стиннии бу́дем покло́нницы Его́,/ хода́тайствуй нам благода́ть,/ е́же не в суеве́рном Богопочита́нии, но во и́стинном благоче́стии и ве́ре/ служи́ти отце́в Бо́гу благослове́нному.

И ны́не и при́сно и во ве́ки веко́в. Ами́нь.

Не послужи́ла еси́ ми́ру и суете́ его́, Богороди́тельнице,/ но, всему́ предпоче́тши еди́наго Бо́га и зако́н Его́,/ была́ еси́ усе́рднейшая всех Раба́ Госпо́дня,/ те́мже и сподо́билася еси́ послужи́ти ве́лией та́йне Бо́жия воплоще́ния, я́ко Богома́терь,/ но сотвори́, да и мы, отве́ргшеся ми́ра и я́же су́ть в ми́ре,/ вседу́шно прилепи́мся и послу́жим Еди́ному Отце́в Бо́гу благослове́нному.

Песнь 8

Ирмос: О́троки благочести́выя в пещи́/ Рождество́ Богоро́дичо спасло́ е́сть,/ тогда́ у́бо образу́емое,/ ны́не же де́йствуемое,/ вселе́нную всю воздвиза́ет пе́ти Тебе́: Го́спода по́йте, дела́,/ и превозноси́те Его́ во вся ве́ки.

Припев: Пресвята́я Богоро́дице, спаси́ на́с.

Отроча́ мла́до на́шего ра́ди спасе́ния был еси́, Безле́тный Бо́же наш Иису́се,/ Его́же воображе́ние зря́ще на свяще́нней ико́не,/ усе́рдною в Тя ве́рою вопие́м Ти:/ бу́ди Воспита́тель, Наста́вник и Покрови́тель младе́нцем и отроко́м на́шим,/ да и си́и во и́стинней ве́ре навы́кнут глаго́лати Тебе́:/ Го́спода по́йте, дела́,/ и превозноси́те Его́ во вся ве́ки.

Припев: Пресвята́я Богоро́дице, спаси́ на́с.

О́трок дванадесятоле́тен бы́вый, Иису́се,/ посреде́ ста́рец и учи́телей во святи́лищи пребыва́я, послу́шал еси́ их/ и, совопрошася с ни́ми, явля́л еси́ святу́ю ре́вность к Боже́ственному зако́ну,/ да сим и на́ша о́троки наста́вший/ тща́тися во вре́мя ю́ности стяжава́ти духо́вную, я́же от зако́на Твоего́ прему́дрость,/ да и они́ науча́тся се́рдцы и усты́,/ словесы́ же и де́лы превозноси́ти Тя во вся ве́ки.

Сла́ва Отцу́ и Сы́ну и Свято́му Ду́ху.

О́троки от пещи́ Вавило́нския изба́вльшему Го́споду/ моли́ся приле́жно, Богоневе́стная Отрокови́це,/ да да́рует всем, под кров Твой прибега́ющим,/ неврежде́нным бы́ти от огня́ искуше́ний и пла́мене похоте́й,/ да, та́ко Тобо́ю изба́вльшеся,/ чи́стыми душа́ми и нескве́рными устна́ми благослови́м с Тобо́ю Еди́наго Изба́вителя Го́спода/ и превозно́сим Его́ во вся ве́ки.

И ны́не и при́сно и во ве́ки веко́в. Ами́нь.

Отрокови́цам Твое́ целому́дрие и чистота́ да бу́дет красота́ и сла́ва,/ чревонося́щим Твое́ безболе́зненное и свято́е рождество́/ да бу́дет сла́дкое утеше́ние и отра́да,/ всем же, вся́каго по́ла и во́зраста чту́щим Тя, Богоневе́сто,/ доброде́тели Твоя́ да бу́дут еди́ным упражне́нием их,/ я́ко си́ми то́кмо досто́йне от челове́ка прославля́ется Госпо́дь, живы́й во ве́ки.

Песнь 9

Ирмос: Всяк земноро́дный/ да взыгра́ется, Ду́хом просвеща́емь,/ да торжеству́ет же Безпло́тных умо́в естество́,/ почита́ющее свяще́нное торжество́ Богома́тере и да вопие́т:/ ра́дуйся, Всеблаже́нная Богоро́дице,/ Чи́стая Присноде́во.

Припев: Пресвята́я Богоро́дице, спаси́ на́с.

Вся́кое коле́но Небе́сных, и земны́х, и преиспо́дних да покланя́ется Тебе́,/ я́ко нося́щему в Себе́ неизме́нный Преблаже́ннаго Отца́ Твоего́ о́браз, Иису́се./ С ни́миже и мы, ве́рою просвеща́еми,/ Тя, И́стиннаго Бо́га, о́браз челове́ч от Де́вы прии́мшаго, боголе́пно велича́ем.

Припев: Пресвята́я Богоро́дице, спаси́ на́с.

Вся́ка уста́ да заградя́тся суесло́вящих,/ я́ко не́сть досто́йно чествова́ти Твою́ и Пречи́стыя Ма́тере Твое́й ико́ну, Влады́ке:/ се бо, просла́вив сию́ чудеса́ми,/ научи́л еси́ достоя́ние Твое́ Тебе́ и во о́бразе пло́ти Твое́й/ с Пренепоро́чною Твое́ю Ма́терию прославля́ти и велича́ти.

Сла́ва Отцу́ и Сы́ну и Свято́му Ду́ху.

Вси ро́ди ве́рных, по прорече́нию Твоему́, блажа́т Тя,/ Благослове́нная, Христа́ Бо́га на́шего Ма́ти./ С ни́ми же и мы, ве́рою совоку́плени,/ благогове́йно чту́ще свяще́нное лица́ Твоего́ изображе́ние,/ прославля́ем Твоя́ вели́чия, я́же сотвори́ Тебе́ Госпо́дь сил,/ с Ним же Тя велича́ем.

И ны́не и при́сно и во ве́ки веко́в. Ами́нь.

Всяк язы́к сме́ртных, по достоя́нию, изнемога́ет велича́ти Тя,/ над все́ми превознесе́нную, о Богоневе́сто!/ Те́мже и мы, прославля́юще Тя дне́сь, испове́дуем на́ше кра́йнее неможе́ние,/ но, сие́ испове́дующе, мо́лим Тя,/ да по мно́жеству щедро́т Твои́х, прии́меши ма́лое сие́ приноше́ние,/ во зна́мение мно́гия любве́ и усе́рдия нас, велича́ющих Тя.

Светилен

Свет Лица́ Твоего́ и Пресвяты́я Твое́я Ма́тере/ яви́вый нам, Влады́ко, во всечестне́й ико́не сей,/ сотвори́ нас, я́ко ча́да све́та ходи́ти во све́те за́поведей Твои́х,/ да, егда́ яви́шися во сла́ве с Ро́ждшею Тя,/ сообра́зны бу́дем светле́йшему со́лнца о́бразу Твое́й сла́вы.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богородичен: Бо́жия тезоимени́тый да́ра страда́лец Христо́в Фео́дор/ Боже́ственный вои́стинну дар, пречестну́ю Пречи́стыя Богома́тере ико́ну,/ гра́ду на́шему Костроме́ прине́с, вруча́ет,/ ю́же мы с неизрече́нною ра́достию, я́ко Небе́сное сокро́вище, прие́млюще,/ играим духо́вне и ликовству́ем, просвеща́еми све́том Боже́ственнаго лица́ Мари́и При́сноде́вы,/ от Нея́же возсия́ Пра́ведное Со́лнце – Христо́с,/ просвеща́яй вся́каго челове́ка, гряду́щаго в мир.