Зачатие прав. Анною Пресвятой Богородицы

Тропарь, глас 4

Днесь безча́дия у́зы разреша́ются,/ Иоаки́ма бо и А́нну услы́шав Бог,/ па́че наде́жды,/ роди́ти тем я́ве обещава́ет Богоотрокови́цу,/ из Нея́же Сам роди́ся Неопи́санный,/ Челове́к быв, А́нгелом повеле́в вопи́ти Ей:// ра́дуйся. Благода́тная, Госпо́дь с Тобо́ю.

Перевод: В сей день узы бездетности расторгнуты, ибо, услышав Иоакима и Анну, Бог ясно уверяет их в рождении сверх ожидания Богоотроковицы, от Которой Сам, Беспредельный родился, став Человеком, когда Ангелу повелел Ей возгласить: «Радуйся, благодатная, Господь с Тобою!»

Кондак, глас 4

Пра́зднует днесь вселе́нная А́ннино зача́тие,/ бы́вшее от Бо́га:// и́бо та породи́ па́че сло́ва Сло́во ро́ждшую.

Перевод: Празднует в сей день вселенная зачатие Анны, бывшее от Бога: ибо родила она Родившую Слово превыше разума!

Величание

Велича́ем Тя,/ Пресвята́я Де́во,/ и чтим святы́х Твои́х роди́телей,/ и всесла́вное сла́вим// зача́тие Твое́.

Минея, 9 Декабря, Кано́н святы́я А́нны

Глас 1

Песнь 1

Ирмос: Песнь побе́дную пои́м вси Бо́гу,/ сотво́ршему ди́вная чудеса́ мы́шцею высо́кою/ и спа́сшему Изра́иля,/ я́ко просла́вися.

Припев: Свята́я прáведная Áнно, моли́ Бо́га о на́с.

Зача́тие днесь, Богому́драя А́нно, твое́ пра́зднуем,/ я́ко Вмести́вшую нигде́же Вмести́маго зачала́ еси́,/ непло́дных отре́шшися уз.

Припев: Свята́я прáведная Áнно, моли́ Бо́га о на́с.

Пра́ведных услы́шал еси́ моли́тву,/ святы́х испо́лнил еси́ обеща́ние, Го́споди, праоте́ц Твои́х/ и сим дал еси́ плод Тебе́ ро́ждшую, Чи́стую.

Сла́ва Отцу́ и Сы́ну и Свято́му Ду́ху.

А́нна сла́вная ны́не зачина́ет Чи́стую,/ безпло́тнаго заче́ншую Го́спода Преблага́го,/ и роди́ти и́мать пло́тию иму́щую роди́ти Христа́.

И ны́не и при́сно и во ве́ки веко́в. Ами́нь.

От тле́нных возсия́ла еси́, Де́во, ложе́сн;/ в нетле́нне бо чре́ве сла́вы Со́лнце носи́ла еси́,/ бы́вша, я́коже есмы́, кроме́ враще́ния и смеше́ния.

Песнь 3

Ирмос: Да утверди́тся се́рдце мое́ в во́ли Твое́й, Христе́ Бо́же,/ и́же над вода́ми Не́бо утвержде́й второ́е/ и основа́вый на вода́х зе́млю, Всеси́льне.

Припев: Свята́я прáведная Áнно, моли́ Бо́га о на́с.

Плод чре́ва а́ще по́даси мне, – вопия́ше А́нна ко Го́споду, –/ возвели́чуся и Тебе́ принесу́ сей./ Сего́ ра́ди зачина́ет Чи́стую Богома́терь.

Припев: Свята́я прáведная Áнно, моли́ Бо́га о на́с.

Я́же по зако́ну сконча́вши и Бо́гу непоро́чно рабо́тавши,/ чревоно́сиши вои́стинну Законода́вца ро́ждшую, А́нно всечестна́я,/ те́мже тя, ве́рнии, ублажа́ем.

Сла́ва Отцу́ и Сы́ну и Свято́му Ду́ху.

В саду моля́щейся тебе́,/ глас услы́ша высоча́йший, А́нно Богому́драя,/ и плод чре́ву Твоему́ дае́т –/ ра́я Отве́рзшую дверь благода́тию.

И ны́не и при́сно и во ве́ки веко́в. Ами́нь.

Богородичен: Непло́дствующия мы́сли мое́й непло́дие вся́кое отжени́/ и плодоно́сну доброде́тельми ду́шу мою́ покажи́, Всесвята́я Богоро́дице,/ ве́рных по́моще.

Седален, глас 1

Но́вое Не́бо во чре́ве А́нны зи́ждется/ Бо́га Вседе́теля повеле́нием,/ из него́же возсия́ет Невече́рнее Со́лнце,/ ми́р весь просвеща́ющее луча́ми Божества́,/ премно́жеством благоутро́бия, Еди́н Человеколю́бец.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богородичен: Лик проро́ческий пропове́да дре́вле/ Непоро́чную Чи́стую и Богоотрокови́цу Де́ву,/ ю́же А́нна зача́т, непло́ды́ су́щи и безча́дна;/ сию́ днесь весе́лием се́рдца ублажи́м, спа́сшеся ея́ ра́ди,/ я́ко Еди́ну Непоро́чную.

Песнь 4

Ирмос: Ду́хом прови́дя, проро́че Авваку́ме, Словесе́ вопло́щение,/ пропове́дал еси́, вопия́:/ внегда́ прибли́житися ле́том – познае́шися,/ внегда́ приити́ вре́мени – пока́жешися./ Сла́ва си́ле Твое́й, Го́споди.

Припев: Свята́я прáведная Áнно, моли́ Бо́га о на́с.

О, Боже́ственнаго веща́ния!/ О, стра́ннаго глаго́лания! а́ще и аз зачну́. А́нгелу к ней посла́вшуся, А́нна, удивля́ющися, велегла́сно вопия́ше:/ Бо́гу моему́ сла́ва, творя́щему пресла́вная.

Припев: Свята́я прáведная Áнно, моли́ Бо́га о на́с.

Сра́дуйтеся мне, вся племена́ Изра́илева:/ во утро́бе зача́х но́вое Не́бо,/ из него́же Звезда́ возсия́ет пома́ле спасе́ния – Иису́с Светода́вец, – А́нна, ра́дующися, взыва́ше.

Сла́ва Отцу́ и Сы́ну и Свято́му Ду́ху.

Услы́ша А́ннино Бог стена́ние,/ и внят Госпо́дь моли́тве ея́/ и, безча́дия о́блак разори́в,/ све́том озаря́ет бла́гочадия пресла́вно./ Те́мже зачина́ет Еди́ну Чи́стую.

И ны́не и при́сно и во ве́ки веко́в. Ами́нь.

Богородичен: Де́во Богоро́дице, нескве́рная ски́ние,/ оскверне́ннаго прегреше́ньми очи́сти мя ны́не/ щедро́т Твои́х чисте́йшими кропле́ньми/ и даждь ми ру́ку по́мощи, да зову́:/ сла́ва Тебе́, Чи́стая Богопросла́вленная.

Песнь 5

Ирмос: Твой ми́р даждь нам,/ Сы́не Бо́жий:/ ино́го бо, ра́зве Тебе́, Бо́га не знае́м,/ и́мя Твое́ имену́ем,/ я́ко Бог живы́х и ме́ртвых еси́.

Припев: Свята́я прáведная Áнно, моли́ Бо́га о на́с.

Из ко́рене прозя́бшая Дави́дова и Иессе́ева,/ А́нна ны́не расти́ти начина́ет Боже́ственный Жезл,/ прозя́бший та́инственный Цвет –/ Христа́, всех Зижди́теля.

Припев: Свята́я прáведная Áнно, моли́ Бо́га о на́с.

Ма́терь бы́вшую мя, – А́нна вопия́ше, – узрят лю́дие и учудя́тся:/ се бо рожду́,/ я́ко благоволи́ соу́зы Разреши́вый непло́дствия моего́.

Сла́ва Отцу́ и Сы́ну и Свято́му Ду́ху.

Отрокови́цу, ю́же зача́х аз,/ проро́честии гла́си издале́ча провозвести́ша,/ гору и дверь непрохо́дную, –/ прера́достно А́нна вопия́ше приходя́щим.

И ны́не и при́сно и во ве́ки веко́в. Ами́нь.

Богородичен: О́блак, и рай, и дверь Тя Све́та,/ трапе́зу, и руно́ ве́мы,/ и ста́мну, внутрь ма́нну нося́щую, сла́дость ми́ра,/ Чи́стая Де́во Ма́ти.

Песнь 6

Ирмос: Проро́ка Ио́ну подража́я, вопию́:/ живо́т мой, Бла́же, свободи́ из тли/ и спаси́ мя, Спа́се ми́ра, зову́ща: сла́ва Тебе́.

Припев: Свята́я прáведная Áнно, моли́ Бо́га о на́с.

Ка́ко вмеща́ется во чре́ве Вмести́вшая Бо́га?/ ка́ко ражда́ется Христа́ Роди́вшая пло́тию?/ ка́ко же сосцами пита́ется, я́же Зижди́теля млеко́м Напои́вшая?

Припев: Свята́я прáведная Áнно, моли́ Бо́га о на́с.

Мольбу́ вашу услы́шав, Бог/ плодови́т плод ны́не да́рует вам,/ всехва́льнии Иоаки́ме и А́нно, днесь.

Сла́ва Отцу́ и Сы́ну и Свято́му Ду́ху.

Чи́стую Голуби́цу заче́нши во чре́ве,/ ра́дости духо́вныя испо́лнися и́стинно,/ принося́щи пе́сни благода́рныя А́нна Бо́гу.

И ны́не и при́сно и во ве́ки веко́в. Ами́нь.

Богородичен: Треволне́ния по́мыслов, и страсте́й наведе́ния,/ и глубина́ грехо́в окая́нную ду́шу мою́ обурева́ют:/ помози́ ми, Свята́я Влады́чице.

Кондак, глас 4

Пра́зднует днесь вселе́нная А́ннино зача́тие,/ бы́вшее от Бо́га,/ и́бо та породи́ па́че сло́ва Сло́во Ро́ждшую.

Икос

Иоаки́м чу́дный и А́нна Богому́драя,/ оба живу́ще во вся́ком благоче́стии, по зако́ну Моисе́еву,/ непло́дии бя́ху и моля́хуся Бо́гу все́ю душе́ю, глаго́люще:/ Го́споди Савао́ф Преблаги́й, вся́ческих наде́жда,/ безча́дствия боле́знь и укори́зну ве́си и печа́ль,/ пода́ждь у́бо нам плод из чре́ва,/ и принесе́м того́ в храм Твой – дар свяще́н,/ и приноше́ние испо́лнено, па́че сло́ва Сло́во Ро́ждшую.

Песнь 7

Ирмос: Су́щим в пещи́ отроко́м Твои́м, Спа́се,/ не прикосну́ся, ниже́ стужи́ огнь./ Тогда́ трие́, я́ко еди́неми усты́, поя́ху/ и благословля́ху, глаго́люще:/ благослове́н Бог оте́ц на́ших.

Припев: Свята́я прáведная Áнно, моли́ Бо́га о на́с.

Безча́дства укори́зны убежа́ти моля́ше А́нна всех Влады́ку,/ и сея́ ми́лостивый глас услы́шав,/ Того Ро́ждшую, плод подаде́ той, я́коже благоволи́.

Припев: Свята́я прáведная Áнно, моли́ Бо́га о на́с.

Ца́рская порфи́ра в твое́м чре́ве истка́тися, А́нно, начина́ется,/ ю́же Бог и Царь всех поне́с, челове́ком яви́тся/ и смири́т враги́, борю́щия ны.

Сла́ва Отцу́ и Сы́ну и Свято́му Ду́ху.

Ми́ро благово́нное во утро́бе зачала́ еси́, А́нно,/ ми́ро жи́зни преесте́ственно восприе́мшую – Влады́ку,/ дыха́ньми благода́ти помышле́ния на́ша облагоуха́вшаго.

И ны́не и при́сно и во ве́ки веко́в. Ами́нь.

Богородичен: Я́ко от Тро́ицы Еди́наго Тя, Христе́, сла́вим, я́ко из Де́вы вопло́щся,/ кроме́ враще́ния челове́ческа, вся поне́сл еси́,/ не отступи́в Естества́ Оте́ческаго, Иису́се,/ а́ще и соедини́лся еси́ нам.

Песнь 8

Ирмос: Его́же ужаса́ются А́нгели и вся во́инства,/ я́ко Творца́ и Го́спода,/ по́йте, свяще́нницы, просла́вите, о́троцы,/ благослови́те, лю́дие,/ и превозноси́те во вся ве́ки.

Припев: Свята́я прáведная Áнно, моли́ Бо́га о на́с.

Дави́д ю́же прорече́ Цари́цу,/ се, во чре́ве прие́млю, – А́нна вопия́ше, –/ и рожду́ всех Предста́тельницу ве́рных,/ Царя́ Христа́ иму́щую роди́ти.

Припев: Свята́я прáведная Áнно, моли́ Бо́га о на́с.

Земля́, в ню́же всели́ся земли́ Соде́тель,/ Ски́птр Святы́й, но́вый Киво́т,/ Ста́мна ма́нны в ложесна́х ма́тере,/ сего́ Ро́ждшую, начина́ет прозяба́ти.

Сла́ва Отцу́ и Сы́ну и Свято́му Ду́ху.

Купина́ неопа́льная, Све́щник златы́й,/ одушевле́нный Черто́г Го́спода Бо́га,/ честны́й Жезл во чре́ве ма́тере,/ сего́ Ро́ждшую, начина́ет прозяба́ти.

И ны́не и при́сно и во ве́ки веко́в. Ами́нь.

Богородичен: Возста́ви лежа́щаго мя во глубине́ зол,/ ны́не борю́щия мя победи́ враги́./ Уя́звена безме́стными сластьми́, Бла́гая Чи́стая, не пре́зри,/ но уще́дри и спаси́.

Песнь 9

Ирмос: Живоприе́мный исто́чник приснотеку́щий,/ светоно́сный свети́льник благода́ти,/ храм одушевле́нный, сень Пречи́стую,/ Небесе́ и земли́ простра́ннейшую,/ Богоро́дицу, ве́рнии, велича́ем.

Припев: Свята́я прáведная Áнно, моли́ Бо́га о на́с.

Живоприе́мный Исто́чник зачина́ющи, А́нно Богому́драя,/ ра́дость ны́не приими́,/ Храм святы́й внутрь во чре́ве твое́м прие́млющи,/ све́том пра́вды облиста́ему, Созда́теля велича́ющи.

Припев: Свята́я прáведная Áнно, моли́ Бо́га о на́с.

Сопру́г честны́й и пресла́вный,/ Преве́чнаго Сы́на пра́отцы,/ зако́на храни́телие изве́стнии бы́вше,/ нача́ток ра́дости ро́ждшии,/ Иоаки́м же и А́нна почте́ни да бу́дут.

Сла́ва Отцу́ и Сы́ну и Свято́му Ду́ху.

Ю́же Дани́ил Го́ру вели́кую ви́де,/ и Ио́иль Зе́млю святу́ю узре́, Дверь непрохо́дну,/ ин же прорече́ запеча́танный Исто́чник и Боже́ственное руно́, –/ Богоро́дицу Де́ву воспои́м.

И ны́не и при́сно и во ве́ки веко́в. Ами́нь.

Богородичен: Порфи́ра, я́же руно́ обагри́вшая, неизрече́ннаго Сло́ва вопло́щения,/ Кади́льница зла́тая, Трапе́за, на не́йже Хлеб Христо́с возложи́ся, –/ Богоро́дица Де́ва сла́вится.

Светилен

Свет Ро́ждшая, всю озаря́ющий тварь,/ днесь начина́ет прозяба́ти А́нна непло́дными ложесны́./ Те́мже стецемся вси,/ и́бо прии́де избавле́ние осужде́ния Е́вина.

Минея, 9 Декабря, Други́й кано́н

Глас 1

Песнь 1

Ирмос: Христо́с ражда́ется – сла́вите!/ Христо́с с Небе́с – сря́щите!/ Христо́с на земли́ – возноси́теся!/ По́йте Господе́ви, вся земля́,/ и весе́лием воспо́йте, лю́дие,/ я́ко просла́вися.

Припев: Свята́я прáведная Áнно, моли́ Бо́га о на́с.

Чи́стую Де́ву Богоотрокови́цу,/ Ма́терь бы́ти хотя́щую Созда́теля,/ во чре́ве прие́мши А́нна, ра́достно вопия́ше:/ коле́на вся Изра́илева, сра́дуйтеся мне,/ се бо и аз зача́х.

Сла́ва Отцу́ и Сы́ну и Свято́му Ду́ху.

Кни́гу, ю́же прорече́ проро́к,/ запеча́тану Ду́хом Боже́ственным,/ в ложесна́х свои́х содержа́щи, А́нна всем вопия́ше:/ ю́же вся Списа́ния проявля́ют,/ возвелича́юся аз, прозяба́ющи днесь.

И ны́не и при́сно и во ве́ки веко́в. Ами́нь.

Во чре́ве вмеща́ется и созида́ется храм/ Боже́ственный и спаси́тельный,/ в ложесна́х ма́терних насажда́ется Ле́ствица, я́же к Вы́шним вся челове́ки возводя́щая./ Ея́же зача́тие ве́рно да торжеству́ем.

Песнь 3

Ирмос: Пре́жде век от Отца́ рожде́нному нетле́нно Сы́ну/ и в после́дняя от Де́вы/ воплоще́нному безсе́менно,/ Христу́ Бо́гу возопии́м:/ вознесы́й рог наш,/ Свят еси́, Го́споди.

Припев: Свята́я прáведная Áнно, моли́ Бо́га о на́с.

Прие́млет с высоты́ моля́йся Го́споду Иоаки́м вожделе́нное веща́ние,/ предста́вшу А́нгелу ему́ и глаго́лющу:/ отыди́, твоя́ проше́ния, пра́ведне, всех Бог испо́лни.

Сла́ва Отцу́ и Сы́ну и Свято́му Ду́ху.

Призыва́ющи всех Бо́га, А́нна иногда́ в саду стоя́щи,/ предста́вша зря́ше себе́ А́нгела и глаго́люща:/ да не скорби́ши,/ Ма́тери бо Бо́жией ма́ти и́маши бы́ти.

И ны́не и при́сно и во ве́ки веко́в. Ами́нь.

Ревну́ющи А́нне, су́щей пре́жде тебе́,/ моле́ния к Бо́гу принесла́ еси́/ и, безсе́менно прие́мшую Сло́во Невмести́мое,/ Чи́стую во утро́бе зачала́ еси́,/ бла́гочадием твои́м вся ны, А́нно, облагода́тивши.

Седален, глас 1

Но́вое Не́бо во чре́ве А́нны зи́ждется/ Бо́га Вседе́теля повеле́нием,/ из него́же возсия́ет Невече́рнее Со́лнце,/ ми́р весь просвеща́ющее луча́ми Божества́,/ премно́жеством благоутро́бия, Еди́н Человеколю́бец.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богородичен: Лик проро́ческий пропове́да дре́вле/ Непоро́чную Чи́стую и Богоотрокови́цу Де́ву,/ ю́же А́нна зача́т, непло́ды́ су́щи и безча́дна;/ сию́ днесь весе́лием се́рдца ублажи́м, спа́сшеся ея́ ра́ди,/ я́ко Еди́ну Непоро́чную.

Песнь 4

Ирмос: Жезл из ко́рене Иессе́ова/ и цвет от него́, Христе́,/ от Де́вы прозя́бл еси́,/ из горы, Хва́льный, приосене́нныя ча́щи/ прише́л еси́, вопло́щся от Неискусому́жныя,/ Невеще́ственный и Бо́же,/ сла́ва си́ле Твое́й, Го́споди.

Припев: Свята́я прáведная Áнно, моли́ Бо́га о на́с.

Отве́рзеся утро́ба твоя́, я́же пре́жде неражда́ющая,/ и прие́млеши, А́нно, О́блак Небе́сный,/ из него́же нам све́тлое, возсия́в, Со́лнце/ вся све́том и́стины озари́/ и глубоку́ю тьму безбо́жия отгна́.

Сла́ва Отцу́ и Сы́ну и Свято́му Ду́ху.

Престо́л огнеобра́зный Бо́жий в ложесна́х Твои́х водрузи́ся,/ на не́мже сед, воспочи́,/ и всех благочести́вых труд отъя́т,/ и чи́стое Богозна́ние водрузи́ на земли́, А́нно блаже́нная, Богоприя́тная.

И ны́не и при́сно и во ве́ки веко́в. Ами́нь.

Се, его́же прорече́ Соломо́н, во утро́бе Одр прия́ла еси́,/ сохраня́емь и́стиннейше И́стинному Царю́/ к Боже́ственному воззва́нию, ро́да челове́ча обраще́нию,/ те́мже тя ра́достно, А́нно, ве́рнии, ублажа́ем.

Песнь 5

Ирмос: Бог Сый мира, Оте́ц щедро́т,/ Вели́каго Сове́та Твоего́ А́нгела,/ ми́р подава́юща, посла́л еси́ нам;/ тем, Богоразу́мия к све́ту наста́вльшеся,/ от но́щи у́тренююще,/ славосло́вим Тя, Человеколю́бче.

Припев: Свята́я прáведная Áнно, моли́ Бо́га о на́с.

Сни́де с горы́ Иоаки́м,/ не скрижа́ли зако́на прие́мый, но ю́же зако́н преднаписа́/ и вся проро́ческая откры́ша рече́ния – Бо́жию Ма́терь Чи́стую,/ и, игра́я, вопия́ше:/ возвели́чися се́рдце мое́.

Сла́ва Отцу́ и Сы́ну и Свято́му Ду́ху.

В ложесна́х я́ко ощути́ А́нна иногда́ насажде́нную благопло́дную Ло́зу,/ из нея́же Грозд процвете́ зре́лый,/ нам вино́ безсме́ртия оби́льно иска́пающий,/ что Ти возда́м, благоутро́бне Го́споди, веща́ше?

И ны́не и при́сно и во ве́ки веко́в. Ами́нь.

Не терпя́ Иоаки́м тварь зре́ти, благоче́стием непло́дствующу,/ непло́дству А́ннину преити́ моля́шеся/ и сию́ возыме́ти Отрокови́цу, из Нея́же Сын даде́ся,/ вся сыноположи́вый Своему́ Отцу́, Высочайший.

Песнь 6

Ирмос: Из утро́бы Ио́ну младе́нца изблева́ морски́й зверь,/ якова́ прия́т;/ в Де́ву же все́льшееся Сло́во/ и плоть прие́мшее про́йде, сохра́ншее нетле́нну:/ его́же, бо не пострада́ истле́ния,/ Ро́ждшую сохрани́ невре́жде́нну.

Припев: Свята́я прáведная Áнно, моли́ Бо́га о на́с.

Зако́на се́ни я́ве преходя́т:/ се бо заря́ Боже́ственныя благода́ти показу́ется, Де́ва о́блак,/ из него́же све́тлое Божества́ возсия́ет вои́стинну Со́лнце, –/ А́нна,ра́дующися,взыва́ше, Бо́га Изра́илева велича́ющи.

Сла́ва Отцу́ и Сы́ну и Свято́му Ду́ху.

Стра́нное, а́ще и аз зачну, зре́ние, –/ я́же пре́жде непло́дна и неражда́ющая, А́нна глаго́лаше,/ веща́ющаго А́нгела я́ко услы́ша,/ я́ко отроча́ роди́тся, и взыва́ше:/ до́бре блага́го слы́шания, а́ще слове́с сбытие́ бу́дет.

И ны́не и при́сно и во ве́ки веко́в. Ами́нь.

Го́ры и хо́лми, поля́ и мо́ре,/ А́нгельское мно́жество и все естество́ челове́ческое да веселя́тся, –/ Влады́ки бо Боже́ственный храм,/ нача́ток прими́рения прия́т А́нна,/ егда́ ощути́ себе́ саму́ю заче́ншую, веща́ше.

Кондак, глас 4

Пра́зднует днесь вселе́нная А́ннино зача́тие,/ бы́вшее от Бо́га,/ и́бо та породи́ па́че сло́ва Сло́во Ро́ждшую.

Икос

Иоаки́м чу́дный и А́нна Богому́драя,/ оба живу́ще во вся́ком благоче́стии, по зако́ну Моисе́еву,/ непло́дии бя́ху и моля́хуся Бо́гу все́ю душе́ю, глаго́люще:/ Го́споди Савао́ф Преблаги́й, вся́ческих наде́жда,/ безча́дствия боле́знь и укори́зну ве́си и печа́ль,/ пода́ждь у́бо нам плод из чре́ва,/ и принесе́м того́ в храм Твой – дар свяще́н,/ и приноше́ние испо́лнено, па́че сло́ва Сло́во Ро́ждшую.

Песнь 7

Ирмос: О́троцы, благоче́стию совоспита́ни,/ злочести́ваго веле́ния небре́гше,/ о́гненнаго преще́ния не убоя́шася,/ но, посреди́ пла́мене стоя́ще, поя́ху:/ отце́в Бо́же, благослове́н еси́.

Припев: Свята́я прáведная Áнно, моли́ Бо́га о на́с.

Огнено́сную дре́вле купину́, Моисе́й на Сина́и ю́же ви́де,/ А́нна зача́т во чре́ве безча́дствия,/ огнь погаша́ющую я́ко не́кое злоче́стие, пою́щим:/ отце́в Бо́же, благослове́н еси́.

Сла́ва Отцу́ и Сы́ну и Свято́му Ду́ху.

Ка́пля твое́й утро́бе пресла́вно ны́не, А́нно, источи́ся,/ я́же Во́ду Жи́зни всю внутрь восприя́ше,/ ороша́ющую ве́рно тому́ зову́щия:/ отце́в Бо́же, благослове́н еси́.

И ны́не и при́сно и во ве́ки веко́в. Ами́нь.

Пте́нчее я́ко узре́ гнездо,/ впери́лася еси́ ду́хом и моли́твою,/ Голуби́цу прия́ла еси́ нескве́рну,/ Суче́ц, нося́щую Христа́, ма́слинный, А́нно,/ мы́сленнаго пото́па нас свобожда́ющий.

Песнь 8

Ирмос: Чу́да преесте́ственнаго/ росода́тельная изобрази́ пещь образ:/ не бо, я́же прия́т, пали́т ю́ныя,/ я́ко ниже́ огнь Божества́ – Де́вы,/ в Ню́же вни́де утро́бу./ Тем, воспева́юще, воспое́м:/ да благослови́т тварь вся Го́спода/ и превозно́си́т во вся ве́ки.

Припев: Свята́я прáведная Áнно, моли́ Бо́га о на́с.

Что ми утро́бу соде́лал еси́ безча́дствующу и сосцы́ сухи́я,/ я́коже проре́кл еси́ во пророцех, Влады́ко, –/ вопия́ше А́нна иногда́, –/ безча́дия моего́ укори́зну разреши́/ и даждь ми плод, с ни́мже вопию́:/ да благослови́т тварь вся Го́спода и превозно́си́т во вся ве́ки.

Сла́ва Отцу́ и Сы́ну и Свято́му Ду́ху.

Вни́де в твою́, А́нно, утро́бу Све́щник,/ и́же Свещу́ Боже́ственную та́йно вмести́,/ просвеща́ющую вся́ко дыха́ние сия́нии та́йными Боже́ственнаго зна́ния./ Те́мже, ра́дующися, взыва́ла еси́:/ да благослови́т тварь вся Го́спода и превозно́си́т во вся ве́ки.

И ны́не и при́сно и во ве́ки веко́в. Ами́нь.

Но́сят, я́коже красне́йший ны́не сопру́г, Боже́ственную Ю́ницу,/ из Нея́же Теле́ц кра́сный возсия́, за всех закла́выйся,/ сла́вный Иоаки́м и А́нна, пою́ще:/ да благослови́т тварь вся Го́спода и превозно́си́т во вся ве́ки.

Песнь 9

Ирмос: Та́инство стра́нное ви́жу и пресла́вное:/ Не́бо – вертеп; престо́л Херуви́мский – Де́ву;/ я́сли – вмести́лище,/ в ни́хже возлеже́ Невмести́мый – Христо́с Бог,/ его́же, воспева́юще, велича́ем.

Припев: Свята́я прáведная Áнно, моли́ Бо́га о на́с.

Ликовству́йте вся ду́ши и взыгра́йте:/ ны́не Земля́ созда́ся, я́же плодороди́т неора́нне Клас Жизноно́сный,/ от него́же я́дше, не вза́лчут когда/ бла́госты́ню того́ велича́ющии.

Сла́ва Отцу́ и Сы́ну и Свято́му Ду́ху.

Псалти́рь с гу́слию восприими́, Дави́де, и песновоспо́й:/ се, Киво́т яви́ся Бо́жий,/ его́же предре́кл еси́ я́ве бу́дущий в назда́ние,/ И́мже воста́хом мы от грехопаде́ния.

И ны́не и при́сно и во ве́ки веко́в. Ами́нь.

Я́ко велича́йшия две звезды́, изнесо́сте всесве́тлую Зарю́,/ Я́же возсия́ет вели́кое Со́лнце ми́ру./ Те́мже благохва́лим и сла́вим вас,/ Иоаки́ме и А́нно я́ко Богому́дрыя.

Светилен

Свет Ро́ждшая, всю озаря́ющий тварь,/ днесь начина́ет прозяба́ти А́нна непло́дными ложесны́./ Те́мже стецемся вси,/ и́бо прии́де избавле́ние осужде́ния Е́вина.