Чин молебного пения о заблудших чадах

Молебное пение о заблуждших чадех

Иерей начинает: Благословен Бог наш:
Чтец: Царю Небесный: Трисвятое. По Отче наш: Господи, помилуй, 12 раз. Слава, и ныне: Приидите, поклонимся:

Псалом 50:
Помилуй мя, Боже, по велицей милости Твоей, и по множеству щедрот Твоих очисти беззаконие мое. Наипаче омый мя от беззакония моего, и от греха моего очисти мя; яко беззаконие мое аз знаю, и грех мой предо мною есть выну. Тебе единому согреших и лукавое пред Тобою сотворих; яко да оправдишися во словесех Твоих и победиши, внегда судити Ти. Се бо, в беззакониих зачат есмь, и во гресех роди мя мати моя. Се бо, истину возлюбил еси, безвестная и тайная премудрости Твоея явил ми еси. Окропиши мя иссопом, и очищуся; омыеши мя, и паче снега убелюся. Слуху моему даси радость и веселие; возрадуются кости смиренныя. Отврати лице Твое от грех моих и вся беззакония моя очисти. Сердце чисто созижди во мне, Боже, и дух прав обнови во утробе моей. Не отвержи мене от лица Твоего и Духа Твоего Святаго не отыми от мене. Воздаждь ми радость спасения Твоего и Духом Владычним утверди мя. Научу беззаконныя путем Твоим, и нечестивии к Тебе обратятся. Избави мя от кровей, Боже, Боже спасения моего; возрадуется язык мой правде Твоей. Господи, устне мои отверзеши, и уста моя возвестят хвалу Твою. Яко аще бы восхотел еси жертвы, дал бых убо: всесожжения не благоволиши. Жертва Богу дух сокрушен; сердце сокрушенно и смиренно Бог не уничижит. Ублажи, Господи, благоволением Твоим Сиона, и да созиждутся стены Иерусалимския: тогда благоволиши жертву правды, возношение и всесожегаемая; тогда возложат на олтарь Твой тельцы.
Слава, и ныне: Аллилуиа, аллилуиа, аллилуиа, слава Тебе, Боже. (Трижды).

Таже ектениа:
Миром Господу помолимся.
Лик: Господи, помилуй.
О свышнем мире:
О мире всего мира:
О святем храме сем:
О великом Господине:
О богохранимей стране нашей:
О еже низпослати заблуждшим чадом нашим (имярек) духа премудрости и разума и всадити в сердца их страх Божий, Господу помолимся.
О еже отвратити их от пути погибельнаго и привести во ограду Церкве Твоея, да истинною верою и благочестием духовное жительство пройдут, Господу помолимся.
О еже возсияти в сердцах чад наших свету богоразумия, да, от развращения ума удалившеся и мирския сласти оставивше, сладость любве Твоея познают и в покаяние приидут, Господу помолимся.
О избавитися имже и нам от всякия скорби:
Заступи, спаси, помилуй:
Пресвятyю, Пречиcтую, Преблагословeнную, слaвную Владычицу нaшу Богородицу и Приснодеву Марию со всеми святыми помянyвше, сaми себе и дрyг дрyга, и вeсь живот нaш Христу Богу предадим.
Возглaс: Яко Милоcтив и Человеколюбец Бог еси, и Тебе слaву возсылaем, Отцу, и Сыну, и Святому Духу, ныне и присно, и во веки веков.
Лик: Аминь.

Таже, Бог Господь: и тропaрь, глaс 3:
Иже вольною нищетою обнищав,/ милосердия ради многаго,/ сшел еси на землю, Христе Боже,/ еже спасти человека,/ темже и чада наша, верою и любовию обнищавшая,/ избави от смерти духовныя,/ яко Благ и Человеколюбец.
Слава, глас тойже:
Отеческия славы Твоея удалихся безумно,/ в злых расточив, еже ми предал еси, богатство./ Темже Ти блуднаго глас приношу:/ согреших пред Тобою, Отче Щедрый,/ приими мя, кающася,/ и сотвори мя яко единаго от наемник Твоих.
И ныне, глас 4:
Взыщи нас, погибающих, Пресвятая Дево,/ не по грехом бо нашим наказуеши нас,/ но по человеколюбию милуеши,/ избави нас от ада, болезни и нужды/ и спаси нас.

Таже прокимен, глас 6: Блажени, ихже оставишася беззакония,/ и ихже прикрышася греси. Стих: Ты еси Прибежище мое от скорби, обдержащия мя.

К Колоссаем послания святаго апостола Павла чтение
зачало 259-260 (глава 3, 17-21, 23,24; 4, 2):
Братие, все еже аще что творите словом или делом, вся во имя Господа Иисуса Христа, благодаряще Бога и Отца Тем. Жены, повинуйтеся своим мужем, якоже подобает о Господе. Мужие, любите жены ваша, и не огорчайтеся к ним. Чада, послушайте родителей своих во всем, сие бо угодно есть Господеви. Отцы, не раздражайте чад ваших, да не унывают. И всяко, еже аще что творите, от души делайте, якоже Господу, а не человеком; ведяще, яко от Господа приимете воздаяние достояния, Господу бо Христу работаете. И в молитве терпите, бодрствующе в ней со благодарением.

Аллилуиа, глас 8: Боже ущедри ны и благослови ны. Стих: Просвети лице Твое на ны, и помилуй ны.

От Луки святаго Евангелиа чтение
зачало 79 (глава 15, 11-32):
Рече Господь притчу сию: человек некий име два сына. И рече юнейший ею отцу: отче, даждь ми достойную часть имения. И раздели има имение. И не по мнозех днех собрав все мний сын, отыде на страну далече, и ту расточи имение свое, живый блудно. Изжившу же ему все, бысть глад крепок на стране той, и той начат лишатися. И шед прилепися единому от житель тоя страны: и посла его на села своя пасти свиния: И желаше насытити чрево свое от рожец, яже ядяху свиния: и никтоже даяше ему. В себе же пришед, рече: колико наемником отца моего избывают хлебы, аз же гладом гиблю? Востав иду ко отцу моему, и реку ему: отче, согреших на небо и пред тобою, и уже несмь достоин нарещися сын твой, сотвори мя яко единаго от наемник твоих. И востав иде ко отцу своему. Еще же ему далече сущу, узре его отец его, и мил ему бысть: и тек нападе на выю его, и облобыза его. Рече же ему сын: отче, согреших на небо и пред тобою, и уже несмь достоин нарещися сын твой. Рече же отец к рабом своим: изнесите одежду первую и облецыте его, и дадите перстень на руку его и сапоги на нозе, и приведше телец упитенный заколите, и ядше веселимся. Яко сын мой сей мертв бе, и оживе: и изгибл бе, и обретеся. И начаша веселитися. Бе же сын его старей на селе: и яко грядый приближися к дому, слыша пение и лики. И призвав единаго от отрок, вопрошаше: что убо сия суть? Он же рече ему: яко брат твой прииде, и закла отец твой тельца упитанна, яко здрава его прият. Разгневався же, и не хотяше внити. Отец же его, изшед, моляше его. Он же отвещав, рече отцу: се толико лет работаю тебе, и николиже заповеди твоя преступих, и мне николиже дал еси козляте, да со други своими возвеселился бых. Егда же сын твой сей, изъядый твое имение с любодейцами, прииде, заклал еси ему тельца питомаго. Он же рече ему: чадо, ты всегда со мною еси, и вся моя твоя суть. Возвеселити же ся и возрадовати подобаше, яко брат твой сей мертв бе, и оживе: и изгибл бе, и обретеся.

Таже ектениа: Помилуй нас, Боже, по велицей милости Твоей:
Лик: Господи, помилуй. (Трижды).
Еще молимся о великом Господине:
Еще молимся о Богохранимей стране нашей:
Дождь посылаяй на благия и злыя и, яко солнце, сияяй на праведныя и неправедныя, милостив буди чадом нашим заблуждшим, Всесильный Творче, да, в себе пришедше, воспомянут отчий дом Твой, молим Ти ся, услыши и помилуй.
Не хотяй смерти грешных, но ожидаяй обращения и покаяния, Господи, обрати чада наша заблуждшая ко Святей Твоей Церкви, яко да истинною верою и благочестием Тя, Бога нашего, прославят, молим Ти ся, услыши и помилуй.
Объятия Отча блудному сыну отверзый, Милостивый Господи, сподоби и нас, грешных, с веселием иногда рещи: се чада наша мертва беша и ожиша, изгибли и обретошася: молим Ти ся, услыши и помилуй.
Возглас: Услыши ны, Боже Спасителю наш, Упование всех концев земли и сущих в мори далече, и Милостив, Милостив буди, Владыко, о гресех наших и помилуй ны, Милостив бо и Человеколюбец Бог еси, и Тебе славу возсылаем, Отцу и Сыну и Святому Духу ныне, и присно, и во веки веков. Аминь.

Молитва
Господи, Иисусе Христе, Сыне Единородный Безначальнаго Твоего Отца, в мир пришедый погибшее овча взыскати, грешныя к покаянию обратити, падшия воздвигнути, во тьме седящия просветити, малодушныя укрепити и вся на путь спасения наставити!
Призри и ныне на моление нас, недостойных рабов Твоих, о заблуждших чадех наших приносимое, яже от соблазнов мира сего, или от невежества, или от нагльства и уныния, или от недостатка любве нашея на страну далече отшедших и родителей своих презревших, наипаче же дом Отца своего Небеснаго, оставивших.
Ей, Владыко Всемилостиве! Виждь скорбь нашу и не даждь погибнути чадом нашим, но обрати их от пути греховнаго и настави на путь истины и благочестия, да, мирския сласти оставивше, сладость любве Твоея познают и в покаяние приидут. Мы же, возвращение их радостне восприимше, купно с ними прославим Тя, Спасителя нашего Иисуса Христа, со Безначальным Твоим Отцем и Пресвятым и Благим и Животворящим Твоим Духом ныне, и присно, и во веки веков. Аминь.

Таже Премудрость. Пресвятая Богородице: И отпуст.


Вернуться к списку