Канон святителям Московским Петру, Алексию, Ионе, Филиппу и Ермогену

Минея, 5 Октября, Канон святителей

Глас 8

Песнь 1

Ирмос: Воду прошед, яко сушу,/ и египетскаго зла избежав,/ израильтянин вопияше:/ Изба́вителю и Богу нашему поим.

Припев: Святи́телие Моско́встии Пе́тре, Алекси́е, Ио́но, Фили́ппе и Ермоге́не, моли́те Бо́га о на́с.

Многими содержи́ми напа́стьми,/ к вам прибегаем спасение получити,/ о велиции святителие, Петре, Алексие, Ионо, Филиппе и Ермогене!/ От лютыя ну́жды и бед спасите нас.

Припев: Святи́телие Моско́встии Пе́тре, Алекси́е, Ио́но, Фили́ппе и Ермоге́не, моли́те Бо́га о на́с.

Страсте́й прило́зи/ и многия печали и беды́ погубляют мою душу;/ умири́те, святии святителие, к Богу вашими молитвами,/ и от печали на веселие преложи́те.

Сла́ва Отцу́ и Сы́ну и Свято́му Ду́ху.

Спаса Христа моли́те, вели́ции чудотворцы и избра́ннии,/ Петре, Алексие, Ионо, Филиппе и Ермогене,/ избавитися нам от бед и скорбей/ и варварскаго нахождения вашими молитвами.

И ны́не и при́сно и во ве́ки веко́в. Ами́нь.

Богородичен: В скорби ны и болезни суща,/ посещения Божественнаго и промышления/ еже от Тебе сподоби, о Богомати, Владычице.

Песнь 3

Ирмос: Небеснаго кру́га Верхотво́рче, Господи,/ и Церкве Зижди́телю,/ Ты мене́ утверди́ в любви Тво́ей,/ желаний краю,/ верных утверждение,/ Едине Человеколюбче.

Припев: Святи́телие Моско́встии Пе́тре, Алекси́е, Ио́но, Фили́ппе и Ермоге́не, моли́те Бо́га о на́с.

Заступницы и покрови́телие граду Москве вы есте́ по Бо́зе,/ Божии угодницы,/ направите нас на приста́нище спасения:/ вы бо есте́ верным ограждение.

Припев: Святи́телие Моско́встии Пе́тре, Алекси́е, Ио́но, Фили́ппе и Ермоге́не, моли́те Бо́га о на́с.

Молим вас, святии чудотворцы, Петре, Алексие, Ионо, Филиппе и Ермогене,/ душевное смущение и печали бурю разорите нам/ и тишину подати/ к Богу вашими молитвами.

Сла́ва Отцу́ и Сы́ну и Свято́му Ду́ху.

Благоро́днейший и благим подража́телие бывше,/ от Бога чудесы́ обогатившеся,/ всем помога́йте, молящеся Богу,/ вас прославляющему, Своя угодники.

И ны́не и при́сно и во ве́ки веко́в. Ами́нь.

Богородичен: Лютыми неду́ги/ и болезненными тяжкими варварскими нахо́ды истязаемым,/ Дево Богородице, Ты нам помози/ и печаль на радость преложи́.

Седален, глас 5

Яко царское украше́ние Церкве,/ святителей Господних восхвалим,/ преданием сокровище неоскуде́емо,/ сими бо тии наказаше нас Троицу чести́ Святую,/ соедине́ну убо Существом,/ разделену же Ипоста́сьми.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богородичен: Пресвятая Дево, помилуй нас,/ прибегающих верою к Тебе, Милосердой/ и прося́щих теплаго Твоего заступления,/ можеши бо яко Блага вся спасти,/ яко сущи Мати Бога Вышняго,/ Ма́терними Твоими молитвами присно объе́млющи, Богора́дованная.

Песнь 4

Ирмос: Услы́шах, Господи,/ смотрения Твоего та́инство,/ разуме́х дела Твоя/ и просла́вих Твое Божество.

Припев: Святи́телие Моско́встии Пе́тре, Алекси́е, Ио́но, Фили́ппе и Ермоге́не, моли́те Бо́га о на́с.

Страстей моих смущение/ и многих бед нахождения бурю утиши́ти/ моли́теся, святии отцы, к Богу вашими молитвами.

Припев: Святи́телие Моско́встии Пе́тре, Алекси́е, Ио́но, Фили́ппе и Ермоге́не, моли́те Бо́га о на́с.

Милосердия бездну простри́те нам, святии отцы,/ призывающим вас на помощь,/ яко Милосе́рдаго Бога и́мате, послушающа ваших молитв.

Сла́ва Отцу́ и Сы́ну и Свято́му Ду́ху.

Надежду имуще вас, святии отцы,/ Петре, Алексие, Ионо, Филиппе и Ермогене,/ и яко сте́ну недви́жиму к Богу ваша молитвы,/ зол и всех бед избавляемся.

И ны́не и при́сно и во ве́ки веко́в. Ами́нь.

Богородичен: Исцели, Чистая, душевныя наша немощи и страсти телесныя,/ поспеши, Госпоже́, здравие подати молитвами Твоими.

Песнь 5

Ирмос: Просвети́ нас повеле́нии Твоими, Господи,/ и мы́шцею Твоею высо́кою/ Твой мир пода́ждь нам,/ Человеколюбче.

Припев: Святи́телие Моско́встии Пе́тре, Алекси́е, Ио́но, Фили́ппе и Ермоге́не, моли́те Бо́га о на́с.

Испо́лните, святии отцы, веселия живот наш,/ избавляюще нас варварскаго нахождения и междоусобныя брани.

Припев: Святи́телие Моско́встии Пе́тре, Алекси́е, Ио́но, Фили́ппе и Ермоге́не, моли́те Бо́га о на́с.

Избавите нас от бед, святии чудотворцы,/ яко предста́телие теплии и молитвенницы о душах наших.

Сла́ва Отцу́ и Сы́ну и Свято́му Ду́ху.

Разруши́те мглу прегрешений моих и безместных деяний/ вашими к Богу молитвами.

И ны́не и при́сно и во ве́ки веко́в. Ами́нь.

Богородичен: Яко сте́ну нерушиму и пристанище стяжахом,/ и душа́м Тя совершенное спасение,/ и простра́нство в ско́рбех, о Владычице,/ ныне нас от страстей и бед спаси.

Песнь 6

Ирмос: Моли́тву пролию́ ко Господу/ и Тому́ возвещу́ печа́ли моя,/ яко зол душа́ моя испо́лнися,/ и живо́т мой аду прибли́жися,/ и молю́ся, яко Ио́на:/ от тли, Боже, возведи́ мя.

Припев: Святи́телие Моско́встии Пе́тре, Алекси́е, Ио́но, Фили́ппе и Ермоге́не, моли́те Бо́га о на́с.

Смерти и тли, и варварскаго пленения изба́вите,/ и огненнаго запале́ния свой град сохрани́те/ к Богу вашими молитвами.

Припев: Святи́телие Моско́встии Пе́тре, Алекси́е, Ио́но, Фили́ппе и Ермоге́не, моли́те Бо́га о на́с.

Заступники вас ве́мы и твердыя хранители граду нашему,/ святителие Господни,/ тем к вам прибегающе, милость приемлем и бед избавляемся.

Сла́ва Отцу́ и Сы́ну и Свято́му Ду́ху.

Яко сте́ну и пристанище стяжа́хом вас, святим чудотворцы,/ пространство в ско́рбех/ подтверждение и спасение душам нашим.

И ны́не и при́сно и во ве́ки веко́в. Ами́нь.

Богородичен: Заступницу Тя живота вем и Хранительницу тверду, Дево,/ напастей решащу молвы и налоги бесов отгоняющу/ и молюся всегда страстей мя избавити, Всенепорочная.

Кондак, глас 3

Во святителех благоче́стно пожи́сте/ и люди к Богоразумию наста́висте, и до́бре Богу угоди́сте,/ сего ради от Него нетлением и чудесы прославистеся,/ яко ученицы́ Божия благодати.

Икос

Первозва́ннаго наме́стницы и Российстии первопрестольницы,/ велиции светильницы, Петре, Алексие, Ионо, Филиппе и Ермогене,/ Троице поборницы, православию наставницы,/ в мире благочестно пожи́сте и учением своим вселенную просветисте,/ сего ради Царствию Небесному наследницы бы́сте, нетлением и чудесы́ прославистеся, яко ученицы́ Божия благодати.

Песнь 7

Ирмос: От Иуде́и доше́дше о́троцы,/ в Вавило́не иногда́/ верою Тро́ическою пламень пе́щный попра́ша, пою́ще:/ отцев Боже, благословен еси.

Припев: Святи́телие Моско́встии Пе́тре, Алекси́е, Ио́но, Фили́ппе и Ермоге́не, моли́те Бо́га о на́с.

Наше спасение, якоже восхотел еси, Спа́се, устроити,/ прославляеши Твоя угодники чудесы́, вопиющия Ти:/ отец наших Боже, благословен еси.

Припев: Святи́телие Моско́встии Пе́тре, Алекси́е, Ио́но, Фили́ппе и Ермоге́не, моли́те Бо́га о на́с.

Воли́теля милости, егоже роди́ Мати,/ моли́те, святии Христовы святителие, Петре, Алексие, Ионо, Филиппе и Ермогене,/ избавити нас от прегрешений, и бед, и зол, зовущих:/ отец наших Боже, благословен еси.

Сла́ва Отцу́ и Сы́ну и Свято́му Ду́ху.

Сокровище спасения и источник исцеления,/ наставницы покаяния вы есте́, Божии уго́дницы, вопиющим:/ отец наших Боже, благословен еси.

И ны́не и при́сно и во ве́ки веко́в. Ами́нь.

Богородичен: Сокровище спасения, и источник нетления,/ Тебе рождшую/ и столп утверждения, и дверь покаяния вопиющим показа:/ отец наших Боже, благословен еси.

Песнь 8

Ирмос: Царя Небе́снаго,/ Его́же поют во́й Ангельстии,/ хвали́те и превозноси́те во вся веки.

Припев: Святи́телие Моско́встии Пе́тре, Алекси́е, Ио́но, Фили́ппе и Ермоге́не, моли́те Бо́га о на́с.

Помощи вашея требующия не пре́зрите, святии отцы и наставницы Православия,/ поющия и превозносящия Христа во веки.

Припев: Святи́телие Моско́встии Пе́тре, Алекси́е, Ио́но, Фили́ппе и Ермоге́не, моли́те Бо́га о на́с.

Неможение душ наших исцеля́ете и от телесных болезней возставляете/ вопиющих и превозносящих Христа во веки.

Сла́ва Отцу́ и Сы́ну и Свято́му Ду́ху.

Исцелений богатство источаете к вам притекающим, Божиим угодником,/ и верно поющим, и превозносящим Христа во веки.

И ны́не и при́сно и во ве́ки веко́в. Ами́нь.

Богородичен: Напа́стныя Ты прило́ги отгоняеши и страстныя находы, Дево,/ яко да Тя поем и превозносим Чистую во веки.

Песнь 9

Ирмос: Вои́стинну Богородицу/ Тя испове́дуем,/ спасе́ннии Тобою, Дево Чистая,/ с Беспло́тными ли́ки Тя величающе.

Припев: Святи́телие Моско́встии Пе́тре, Алекси́е, Ио́но, Фили́ппе и Ермоге́не, моли́те Бо́га о на́с.

Точе́ния слез не пре́зрите, молим вас, святии отцы,/ Петре, Алексие, Ионо, Филиппе и Ермогене,/ и всем утешение подати, блажа́щим вас.

Припев: Святи́телие Моско́встии Пе́тре, Алекси́е, Ио́но, Фили́ппе и Ермоге́не, моли́те Бо́га о на́с.

Радости сердца́ наша испо́лните вашими к Богу молитвами,/ святии отцы и заступницы те́плии.

Сла́ва Отцу́ и Сы́ну и Свято́му Ду́ху.

Светильницы пресветлии, Троицы побо́рницы,/ Петре, Алексие, Ионо, Филиппе и Ермогене,/ труды́ и подвиги вашими мрак неведения отгоняшеся, благоверно вас ублажающих.

И ны́не и при́сно и во ве́ки веко́в. Ами́нь.

Богородичен: Света Твоего заря́ми просвети, Дево,/ мрак неведения отгоняющи и лютых бед спасающи,/ иже благоверно Богородицу Тя исповедающих.

Светилен

Светоза́рныя светильники паче солнечных луч/ от Светонача́льныя Троицы и Трисо́лнечныя Еди́ницы паче естества сме́шены,/ Богоно́сныя восхвалим отцы.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богородичен: Тебе песньми немо́лчными ублажаем, Дево,/ Яже от Троицы Единаго во чреве прие́мши, Богородице,/ Божественными руками Пресу́щное Слово носи́вши,/ непреложно и неизменно.