Икона Богородицы «Всех скорбящих Радость» (с грошиками)

Содержание

Аннотация
Молитвы ко Пресвятой Богородице
Молитва первая, святого Ефрема Сирина
Молитва вторая
Молитва третья
Молитва четвертая
Молитва пятая
Молитва шестая
Молитва седьмая
Молитва восьмая
Молитва девятая
Молитва десятая
Молитва одиннадцатая
Молитва двенадцатая
Молитва тринадцатая
Молитва четырнадцатая
Молитва пятнадцатая
Молитва шестнадцатая
Молитва семнадцатая
Молитва восемнадцатая, схииеромонаха Киевского отца Парфения
Молитва девятнадцатая, преподобного Максима Грека
Молитва двадцатая, кающегося грешника

Аннотация

«Молитвы Божией Матери, учение Церкви о Ней, и новые чудеса Ее» – этот подзаголовок вполне описывает содержание книги Вениамина (Федченкова). «Эта книжечка издается с единственной целью: чтобы молились Заступнице». В таких словах митрополит Вениамин (Федченков), выдающийся иерарх Русской Православной Церкви, богослов, оставивший обширное литературное наследие, сообщает читателю о причинах, побудивших его написать книгу о Пресвятой Богородице. «Исчезает из жизни молитва», – с горечью говорил владыка. В книге «Всех скорбящих Радость» он всеми возможными способами стремится показать, что молитвенное делание есть истинная жизнь души, основание духовного возрастания, и даже нарушает каноны повествования, помещая молитвословия в первые главы, а не в приложение, как это обычно делается. «Всех скорбящих Радость» начинается молитвами ко Пресвятой Богородице преподобных Ефрема Сирина, Парфения Киево-Печерского, Максима Грека. Вдохновленный песнопениями Октоиха, владыка составил «Молитвенный вопль» к Царице Небесной. Митрополит Вениамин приводит живое описание земного пути Девы Марии, опираясь на свидетельства Ее современников – священномучеников Дионисия Ареопагита, апостола от 70–ти († 96), и Игнатия Богоносца († 107), – что позволяет уйти от схематизма, подчас присущего агиографическим сочинениям. В сборнике цитируются высказывания святых отцов Церкви о Божией Матери. Книга рассказывает также о чудотворных иконах Пресвятой Богородицы, о знамениях и удивительных событиях последнего времени.

Митрополит Вениамин писал эту книгу в Нью–Йорке около 1940 г., будучи экзархом Русской Православной Церкви в США. В России «Всех скорбящих Радость» печатается впервые. Текст дополнен примечаниями и недостающими ссылками на библейские и богослужебные источники.

Молитвы ко Пресвятой Богородице

Молитва первая, святого Ефрема Сирина1

О Дево Владычице Богородице, Творца и Господа видимых всех и невидимых, Единаго от Троицы, Бога же и Человека рождшая! Обиталище Божие, вместилище святыни и благодати, в не́мже, благоволением Бога Отца и содействием Святаго Духа, теле́сне вселися полнота Божества! Всякое создание высотою превосходящая! Славо и утешение, радость и веселие Ангелов! Апостолов и пророков царственный ве́нче; преестественная крепосте мучеников; ублажение и хвало преподобных, споборнице в их подвизех и побед подательнице; непрелестная путеводительнице спасения, безмолвия наставнице, две́ре откровений и тайн духовных; источниче света, врата жизни вечныя; неистощимая реко́ милосердия, море дарований и чудес неисчерпаемое!..

Яко Матерь Человеколюбиваго Владыки, зело́ всем состраждущую, умоляю Тя: милостива буди мне, уничиженному и недостойному рабу Твоему (или рабе, – аще жена молящаяся); преклонися к смирению моему; разжени́ видимых и невидимых врагов моих, стани за мя непотребнаго пред лице́м их, я́ко возбранное оружие, крепкое защищение, необоримая поборница.

О Владычице, Благаго, Всеблагаго и Преблагаго Бога Мати! Милостивно призри на молитву недостойнаго раба Твоего и яви́ неизреченное Твое на мне милосердие, презревши прегрешения моя, я́же соверших словом или делом, моим ли произволением или за немощь воли, ведением или неведением. И всего обнови мя; Всесвятому и Животворящему Духу, Иже есть сила Вышняго, прежде всех утробу Твою осенивый и в ней обитавый. Тому храм и мя сотвори. И тако да познают вси, верующии́ же и беззаконнии, яко вся, ели́ка восхощеши, возможна суть Тебе, Владычице, е́ще на небеси или на земли: Ты бо еси воистину Богородица, истиннаго Бога во плоти порождшая, Мати единаго Царя и Владыки всяческих, Емуже подобает всякая честь и поклонение во веки веков. Аминь.

Молитва вторая

О Мати Божия, всякаго разумения высшая! О Дево, всякое девство превосшедшая: я́ко Дева, прежде рождества Воплотившагося от Тебе, па́че всех дев была еси; и в рождестве и по рождестве паки Дева пребыла еси! О Владычице Богородице, Христа Спасителя и Господа нашего во чреве Твоем несказанно носившая и Бога во плоти непостижно родившая! О Пречистая Отрокови́це! Тобою естество человеческое, от Бога некогда отсту́пльшее, па́ки, неизреченнаго Его ради человеколюбия, с естеством Божественным соединися, ни слияния, ниже́ пременения во ипоста́сех претерпевши. О Мати и Дево! И примирившеся с Богом, Тобою милостива Сына Твоего и Господа нашего паки обретаем, егда́, завистию лукаваго, должная не творим.

Сего ради и аз, недостойный и многогрешный, оба́че милость получивый быти верен (верна, – аще жена) Спасителю моему и Богу, и благодатию во Святем Крещении одеянный, дерзаю принести Тебе от всего сердца сей глас молебный. Тя, Владычице, прошу; Тебе, милостивую и человеколюбивую Матерь Милосердаго и Человеколюбиваго Бога, умоляю: не отри́ни, Госпоже, смиреннаго моления моего. Буди ми избавительница: на Тя бо всю надежду мою возлагаю, на Тя уповаю. Своею Божественною благодатию покрый мя, Пречистая. И путево́дствуй по воли святей Сына Твоего и Бога всею жизнью моей. Отпущение грехов мне испроси; прибежище, покров, защищение зде, и в жизнь вечную руководительница буди. В страшный же час смертный не остави мене́, Владычице; но потщися на помощь и от рук бесо́в мучающих исторгни мя: можеши бо, яко сущая Мати Бога, вся сия совершити. И на праведнем Судищи неосужденна молитвами Твоими сохрани мя; яко, да спасе́н благодатию Твоею, прославлю Тя и восхвалю Всеблагую Троицу во веки веков. Аминь.

Молитва третья

Пресвятая Владычице Богородице, душе́ю и телом единая то́кмо чистая, едина всякое целомудрие и девство превозшедшая; едина обитель полноты благодати Всесвятаго Духа явльшаяся!

Не отрини мене недостоинаго, нечистаго, душу и тело сластолюбивым житием моим осквернившаго. Очисти мой ум от влечения ко страстям; блуждающия и омраченныя помыслы мои к непорочным стремлениям обрати; всем движениям души руководительница буди; от обдержащаго мя злаго и срамнаго уклонения к пожеланиям и порокам освободи; ослаби угнетающий мя грех и окаянному лепотствующему уму моему трезвение и разсуждение даруй; яко да, изба́влься от тьмы греховныя, сподоблюся прославляти Тя, истинную Матерь истиннаго Света, Христа Бога нашего: Тя бо едину с Ним и Его ради благословят видимыя и невидимыя твари, ныне и присно, и во веки веков. Аминь.

Молитва четвертая

Дево Владычице, Благодатная Богородительнице, Преблагословенная, Богообрадованная, Вместилище Божества, Единороднаго Сына Безсмертнаго Мати и Незримаго Отца Дщерь!

Приклони ухо Твое мне и внемли́ словам сим, скверными и нечистыми усты моими глаго́лемым: с сердцем сокрушенным и смиренными помышленьми прибегаю к благоутробию Твоему. Не пренебрези мене жалости достойнаго; не попусти погибнути ми, непотребному рабу Твоему. Исцели окаянную душу мою, злыми страстьми одержимую: се бо враг попра́ ю, грехми сластолюбия сокрушив; и сам аз храм телесный оскверних, непристойными похоте́ниями окаля́х, и вся чувствия моя делы́ немыслимыми растли́х. И уже не дерзаю вознести к небу ру́це мои, сту́дными2 деяньми опрокаже́нныя. На молитвы еще отверзаю уста; но и сия злоречием и осуждением ближних опоро́чена суть. Сердцем воздохнути хотел бых; оба́че срамныя нечистоты пригнетают е. И горестно и студно ми есть! И уже не смею просити множеству грехов моих прощения и неизлечимых язв исцеления от Человеколюбиваго и без числа миловавшаго Бога моего. Сего ради к Твоим щедротам припа́даю в прахе, злосчастный и заблуждший: разве бо Тебе ина́го упования, инаго прибежища не и́мам. Ты еси единое мое утешение, радость души моея, избавление скорбей, искупление от плена страстей, возстание падших, обновление души и тела, лучезарный светильник духа моего, освящение оскверненных, облагодатствование кающихся, обожествление смертных, прикровение наготы моея, рыданий моих прекращение, горестнаго жребия моего пременение. На Тя – вся моя надежда!

Не лиши мя предстательства Твоего, но помогай ми и покрывай пред лицем Сына Твоего: моления бо Твои приятны суть Ему, ибо благоволивый зрак3 раба от Тебе восприяти всегда хранит милость Свою к Тебе, неизреченным рождением Ему послужившей. Па́че же и радуется Он ходатайствам Твоим и благою волею исполняет их, славу Тебе яко Себе Самому вменяя. Токмо Ты убо не презри мне окаяннаго, да не прекратит безобразие зол моих еще и Твоея милости: яко иныя помощи, крепльшия Тебе, воистину нигдеже вем и не зрю. Сего ради аще и повинен есмь во множестве прегрешений; обаче в покаянии к Тебе, скорой помощнице в ско́рбех притекаю и из глубины сердца вопию: помилуй мя, всяких грехов и разслабления исполненнаго; приими убогое моление сие от безпомощныя души моея; услыши вопль болезнующаго сердца моего. И молитвами Твоими не отвержена сотвори мя от Сына Твоего и Бога, грешников Спасителя; еще же и Царствия Небеснаго причастника быти сподоби, вое́же в благодарении славословити Единаго в Троице Бога, и ныне, и присно, и во веки веков. Аминь.

Молитва пятая

О Дево Владычице, Господа моего Иисуса Христа Мати! Вем, яко и нечист и осквернен, и непотребен есмь: всяку бо меру превзыдо́ша, паче числа песка морскаго умножишася беззакония моя. Обаче к Тебе прибегаю, покаяние принося и грехи моя исповедуя: прости мя, Владычице! Помилуй мя, человеколюбно всех милующая! Не отврати лица Твоего от мене! Да не возрадуются врази мои! Но на большее покаяние возбуди дух мой и на путь спасения направи мя; да паки возвратився на него, Твоею помощию надежно спасуся, Тебе сопутнице мне сущей. О Владычице, Человеколюбиваго Бога Мати! Смири мое сердце и исполни его сокрушением; даждь очам моим сле́зы и светом молитв Твоих просвети их; окропи и очисти мя иссо́пом милосердия Твоего; и моими слезами по благодати Твоей омый мя. О Мати Господа моего Иисуса Христа! Приими смиренное испове́дание сие и моление мое; сохрани в покаянии прочее время живота моего. Во время же исхода души моея от телесе воззри на мя милосердно; заступница моя буди и рукописание грехов раздери. И тако спасенна мя приведи к Престолу Сына Твоего и Собезначальнаго Его Отца, и Всесвятаго Духа, Светоначальныя и Единосущныя Троицы, Ейже подобает всякая слава, честь и поклонение во век и в век века. Аминь.

Молитва шестая

О Дево Владычице Богородице! Вем, яко недостоин есмь и взирати на образ Твой; Ты бо душе́ю и телом пречиста еси, и воистину праведно Ти есть возгнушатися мною, отовсюду отверженным. Но поне́же рожденный Тобою Бог того ради Человек бысть, да грешники призовет к покаянию; и Ты убо приими испове́дание множества тяжких грехов моих и умоли Сына Своего и Бога, да явит Он милость Свою и бедней души моей; великое бо множество обеззаконий моих недостойна мя творит, вое́же возвести к Нему очи мои и самому просити прощения от Него: яко многими дарми от создавшаго мя Бога насладився, вся сия забых, неблагодарный; и ныне нищ есмь добродетельми, страстьми же сый богат; в самем себе весьма срамля́юся и осуждаюся от Бога, обличает мя совесть, постыждают деяния. Слезят надо мною Ангели, посмеваются демони. Прежде смерти мертвец аз есмь; прежде суда осужде́н; прежде безконечныя муки отчаянием терзаем есмь!

Сего ради к Твоей, о Владычице Богородице, скорой помощи притекаю: преклонися к недостоинству моему, Пречистая; яви́ жалость мне безпомощному, Непорочная: великое бо и́маши к Рожденному Тобою дерзновение, яковаго никтоже иный отнюдь и́мать. Ты, яко Мати Божия, вся можеши! Ничтоже невозможно Ти есть, а́ще то́кмо восхо́щеши! Не презри у́бо воздыханий, слез и рыданий моих; не отрини скорби и утеснений сердца моего; не тщетну остави надежду на Тя! Но молением Твоим милосердие Сына Твоего ко мне приклони; и сподоби мя, горестнаго и недостойнаго раба Твоего, паки восприяти первую красоту духовную, совлещи́ же с себе безобразие страстей, из ко́рене исторгнути сластолюбие, приклонитися же к правде, во святыню безстрастия облещи́ся, умрети миру греховному и к жизни добродетельней воскреснути. И по сем не остави мене, немощнаго, Владычице, но буди ми спутница, на земли странствующему, и плавающаго по морю житейскому окормляй мя; бодрствующа укрепляй и спяща охраняй; оскорбляемаго избавляй, оклеветуема защищай; падающа удержи, изнемогшаго возстави и паки утверди; воюющих на мя бесо́в победи и от смертныя напасти свободи, врагом видимым и невидимым страшна мя на всякий час показующи: да известно познают ти́и, я́ко аз раб Твой, Богомати, Бога и Царя всех рождшая, Емуже подобает честь и поклонение во веки веков. Аминь.

Молитва седьмая

Се умоляю Тя, Родительница невечерняго Света: внемли́, ели́ка хощу́ поведати Ти!

В тину погружаюся аз, окаянный! Землю множеством грехов оскверних! Се вижу: стенает земля от мене, с воздыханиями показует мя Судии; во свидетели солнце и небо с звезда́ми призывает!

Буря помышлений моих в отчаяние мя погружает! С трепетом приговора душа ожидает! Страшное чудо! Воистину страшное! Ка́ко еще́ грехи мои терпел есть Господь?! Како не све́л еще́ мя жи́ва во дно адово?! Како и свыше не посла невидимаго оружия поразити мя, всю жизнь осквернившаго?!

Верую, яко несумненно Ты, Владычице, мольбами Своими жизнь исходатаила еси мне, надежду имущи на мое покаяние. И се ныне, о Богородице, токмо на Тя – все мое упование! Аще и стыда лице Твоего служителя исполнена есть, оба́че к Тебе прибегаю с мольбою. Ты же, о Мати, и Сама Рожденнаго Тобою всегда умоляеши: да подаст Он и мне, недостойному, едину крупицу от щедрот Своих. Разреши нерешимыя узы моя! Яже жизнь мою Христа рождшая, воскреси мя, нерадением умерщвленнаго! Слезами покаяния убели мя, страстьми очерне́ннаго! Сокрушение сердечное, рыдания и сле́зы Сама подаждь ми, Владычице! Яко Жена, во чреве имевшая Воплотившагося на спасение наше Бога, даруй ми совершенное грехов оставление! Отчужде́ннаго мя от Ангелов, паки возведи к ним, Богородице! И Сама светом Божественнаго лица Твоего озари, яко да и во дни и в нощи́ восклицаю Ти песнопения. Сподоби мя и ныне и в о́ный день у́мныма очи́ма у́зрети Тя, Пречистая, да обрадован буду Тобою аз немощный и унылый.

О при́стане моя и оградо! О крепосте моя и надеждо! О сладкий свете и утешение рабу Твоему! О Пастырнице, и прокаженныя овцы Твоея не отрекающаяся! О целительнице, гнойных язв простирающаго к Тебе разслабленныя руки не гнушающаяся! О скоропослушная Мати мира, милосердно внемлющая горьким стенаниям и сле́зным молениям оскверне́нных уст раба Твоего! И на сей час прошение мое приими! Нощь жизни сей да будет ми день спасения Тобою, Богоневестная!

Воистину бо вем, ели́ка аще восхотела бы еси, вся пред лицем Рожденнаго Тобою возможеши; Емуже пе́ту быти подобает гласы преподобными. Оба́че и аз, отчаянный, но Тобою покрываемый, от всея́ души моея приношу Ему честь и поклонение ныне и во веки веков. Аминь.

Молитва восьмая

Ве́си, Владычице, яко несть во мне от дел моих спасения надежды; ибо волею своею растли́х душу и тело мое; от юности непотребен сосуд и негоден обрето́хся; вслед диавола во всем идо́х, окаянный: и в помышлениях моих и деяниих. Временем многим навыкновение ко грехом приобретох. И разве токмо на малый час во уме моем помраче́ннем свет покаяния озаряет. И тогда страшную клятву Сыну Твоему и Богу от всего сердца даю, вопия́: прости ми, Владыко, прегрешения моя: отселе престаю́ аз грешити пред Тобою!

Но, о долготерпения Бога моего, Христа Жизнодавца! Како терпит токмо Сын Твой, Владычице, зря непрестающее клятвопреступление и ложь, имже несть конца во мне, окаяннем?! О, каково безстрашие мое! Коль велико презо́рство4! Еще́ бо обещанию су́щу во усте́х моих, уже паки делом от него отрекаюся: лучшаго желая, к худшему и большему, паче прежняго, греху стремлюся, несытый! И тако в нечувствие всегда себе привожу, и яко сви́ния омывшаяся, паки в кал гнойный возвращаюся.

И что сотворю, о Владычице? Ты помози мне, Пречистая! Не попусти ми достояние лукавому до конца быти! Но аще и ослабевша, аще и противу воли моея, сотвори мя раба Сыну Твоему и сосуд потребный Духу Всесвятому. А еже како сие будет, Сама Ты ве́си и волиши. Токмо спаси мя; и дар подаждь ми, да прославлю Тя от всего сердца и от всея души моея, восклицая Тебе сице:

Радуйся, песне Херувимов и Ангелов гимне! Радуйся, мире и радосте человеков! Радуйся раю́ сладостей! Радуйся, древо жизни! Радуйся, стено́ верных и бедствующим пристанище! Радуйся, Адамово воззвание! Радуйся, Евы искупление! Радуйся, благодати и безсмертия источниче! Радуйся, Святаго Духа сосуде запечатленный! Радуйся, храме Божества! Радуйся, Господень Престоле! Радуйся, Непорочная, главу змия сокрушившая! Радуйся, прибежище тя́жце измученных! Радуйся, искупление клятвы! Радуйся, через Рожденнаго от Тебе миру радость явившая! Радуйся, Мати Христа, Сына Бога Живаго! Емуже подобает слава, честь и поклонение, ныне и присно, и во веки веков. Аминь.

Молитва девятая

Род человеческий Ходатаицу к Рождшемуся от Тебе Богу обре́те Тя, Богородице: в Тебе бо и предстательстве Твоем и́мут вси заступление, яко дерзновение стяжала еси к Сыну Твоему. Сего ради и аз пламенным сердцем к Тебе притекаю: не дерзая бо к Нему несредственне приступити, Тя о спасении умоляю, да посредничеством Твоим и аз узрю Его. Внемли́ рабу Твоему, всю надежду по Бозе на Тя возложившему! Помилуй служителя Твоего, Человеколюбиваго и Милосерднаго Бога Мати! Избави мя, совестию осужденнаго! Зной сластолюбия угаси во мне, воспламени же любовь к Сыну и Богу Твоему! От непристойных пожеланий чувства моя огради! Се умоляю Тя: да дастся ми время на покаяние! Да не поразит мя смерть еще неготоваго! Да не буду ввержен во огнь негасимый, яко никогдаже добраго плода приносящий! Но возжги паки светильник души моея; мрак скорбей моих разжени́; мглу страстей моих развей молитвами Твоими; даждь ми свет покаяния; к сокрушению направи; прочие дни живота моего сподоби во благоугождении Человеколюбцу Богу препроводити. Ели́ко еще и жизни сей пребываю, покрывай и сохраняй мя; в скитаниих моих сшествуй ми; ко граду небесному углади все пути моя. Егда же предстанет конец мой, явися, Владычице, на помощь: утоли болезни, облегчи мучения; и в вечныя обители путь укажи бедней души моей и тамо препроводи ю; да не одолеют мя темныя силы и увлекут во дно адово. Ни! Но да увижду и аз Судию милостива! И Тобою от вечнаго пламени избавлься, райским утешением в Троице наслаждуся и Небесное Царство восприиму.

В жизни же сей отжени́ от мене, смиреннаго раба Твоего, уныние, забвение, неразумие, нерадение, тщеславие, блуд, прелюбодея́ние, чревоугодие, самолюбие, нетерпение и вся лукавыя помыслы окаяннаго сердца и помраченнаго ума моего. И избави мя от многих лютых предприятий, яко немощен есмь. Аз же, Тобою хранимый, возвеличу и прославлю Тя, яко Заступницу рода человеческаго; Тя бо вси язы́ци ублажают, Дево Владычице Богородице, упование всех христиан и паче всех смертных препрославленная, яко Мати еси Христа Бога нашего; Емуже подобает всякая честь и поклонение во веки веков. Аминь.

Молитва десятая

Милостивая Мати Человеколюбнаго и Милостиваго Бога! Услыши мя с высоты славы Твоея; да внидут в уши Твои словеса́ моя; внемли́ воплю моему, из глубины души исторгающемуся; и скорбнаго моления моего не отвержи! Ходатайством Твоим жизнь мне сохраняющи, повели отверсти уста моя, да еще прежде кончины возмогу испове́дати величие Твое.

Согреших аз, Всенепорочная, согреших; и беззакония моя вем, и грехи мои предо мною всегда суть. Но и еще возблаговоли на последнее прошение мое и исповедание раба Твоего: даждь ми источники сле́з и очисти ими тину грехов моих; всели благоговейный страх к Сыну Твоему и Богу; и внутрь души моея снизойди, да очищуся слезами и да возсозиждется во мне дух спасения. Возжги свет духовный в помраченней души моей; да в тишине и чистоте его сияния вознесу жертву, по заповеди Сына Твоего и Бога моего, грешных, а не праведных призвати к покаянию пришедшаго; да приимет Он ходатайством Твоим и мене недостойнаго. Аще бо и мнози от века быша согрешивший, Владычице; мнози во вся времена не сохраниша заповедей Сына Твоего; но ни единаго же несть, егоже не превзыдо́х мерою беззаконий. Вся Писания, Ветхая же и Новая, славят подвиги праведных; мене же обличает внутрь сущий суд совести, яко грехи и беззакония моя превзыдо́ша всех злых от века: Адам, прияв заповедь и закон, не соблюде́ их; оба́че той, Пречистая, никаковаго падения и осуждения прежде не веде. Что же реку́ аз, окаянный, в мое оправдание? Неудержим есмь и самоволен, аз сам прилежах вся злая творити. И ныне несть ми извинения! Окаяннейший есмь всех сынов Адамлих; беднейший содомлян, огне́м поглоще́нных.

Воистину помышляю себе несчастнейша всех несчастных и паче всех грешников в Ветхом и Новом Завете сущих грешнейша.

Крестився, аз паки сквернюся; восприятием благодати украшенный, в греховную срамоту облекаюся; и тако изнищева́ю благодать, в Крещении ми данную. И удовлеет ли ми помышлений и разума, времени и путей, имиже очистил бых грехи моя, якоже море многия сущия? И что будет ми? Камо пойду? Небесная стезя – неприступна мне; узок путь земный; подземная врата страшна суть; отовсюду в неизобразимей беде су́ща мя ви́жду; опасности неизбежныя везде стерегут мя! Мысль и слово мое изсякают...

Но, о многомощная Мати Всемогущаго Бога! Даждь ми руку помощи безпомощному! Воздвигни смятенную душу мою, рекши ей: Аз есмь спасение твое!

Внемли сей мольбе моей и из бездны скорбей исторгни мя! Аз же прославлю Тя, Преблагословенная Мати Христа Бога нашего, Емуже подобает честь и поклонение во веки веков. Аминь.

Молитва одиннадцатая

Пресвятая Владычице Богородице! Услыши моление мое и исполни е; на Тя бо, надеждо всех конце́в земли, уповаю.

Угаси пламень телесе́ моего. Укроти бурю гнева. До конца истреби суетное превозношение тщеславныя юности моея. Ослаби лукавая мечтания сердца, от злых духов наводимая. Изсуши непрестанно находящий поток нечистых помыслов, искушающих мя.

Научи язык мой глаголати токмо полезная, очи мои зрети едину красоту святыни. Отверзи уши мои, да возмогу насыщатися сладчайшими меда вещаниями Святаго Писания и творити я Твоею помощию. Очисти уста моя, да сподоблюся Вышняго Бога Отцем моим именовати. Даруй ми время покания и от внезапныя кончины избави мя. Очисти и омый от всякия скверны плоти и духа. Даждь рабу Твоему сердце сокрушенное, умирение помыслов, уму целомудрие, трезвение души, смирение в мыслех, правый дух, житие благоразсудное, еще же и мир, егоже дарова Господь наш учеником Своим. В тишине неволнуемей сохрани мя; отрадою несказанною и непрестающею радостью возрадуй мя; яко да пока́явся, шествую правым путе́м заповедей Сына Твоего, и прочее поприще жизни моея прейду уже непоносим судом совести моея. Даждь ми, ныне молящемуся Тебе, чистую молитву; да достойно славословлю Тя даже до самыя смерти вся дни спасительнаго подвига моего. По кончине же от злобных истязаний воздушных мытарей освободи мя.

Тебе, о Владычице Богородице, свете омраче́нных очей моих, утешение души моея, надеждо и спасение мое, приношу сия моления.

По сих же и еще о единем молю Тя, Путеводительнице моя Преблагая: сподоби мя, покаявшагося и о гресех сокрушающагося, неосужденно, аще и всячески недостоин есмь, причащатися Пречистыя Крове и Тела Сына и Бога Твоего, во спасение души и исцеление тела и в залог вечныя жизни. В будущем же веце сладости Небесныя Ве́чери причащатися и райских неизреченных благодатей Божия Царства удостой. Аз же, приятия сих благ сподо́бився, во век века воспрославлю Сына и Бога Твоего со Безначальным Его Отцем и Животворящим Духом, якоже и ныне, такожде и присно, и в безконечные веки. Аминь.

Молитва двенадцатая

О Дево Владычице Богородице, Христа Спаса нашего и Бога во чреве носившая! На Тя всю надежду мою возлагаю, на Тя уповаю: Ты бо и безплотных Сил превысит еси. Огради мя, Пречистая, Божественною Своею благодатию. Путеводствуй в жизни моей, по воле Сына Твоего и Бога нашего направляющи. Даруй ми отпущение грехов; буди прибежище, покров, защищение и окормительница в жизнь вечную.

Ты едина, Владычице Богородице, над всею земле́ю превознесенна еси! Аз же, Богоневестная, с верою благословляю Тя, с любовию величаю и со страхом поклоняюся Тебе: Ты бо хвала всех похвал и всех высот вершина еси...

О Владычице, Богом дарованная ми отрадо, Божественное прохлаждение сущаго внутрь мене зноя; стру́е, источник сле́з моих исторгшая; лучезарный светоче души моея; богатство в нищете моей; сила в немощех; него исцельных язв исцеление; конец рыданием, разрешение уз! Внемли молитвенным воздыханиям моим, умилосердися воплю моему; и на сле́зы моя призревши, к прошению моему преклонися; яко Мати Человеколюбца Бога, яви ми милость Свою. Утоли неутолимыя похотения мои: свободи мя от терзающих мя страстей, умерщвляющих душу мою; и на земли живых, в лоне праведных возсоедини мя с Собою. О общая всех радосте, общее всем предстательнице, умоляю Тя: сподоби мя возвеселитися оною радостию неизреченною, яже в Рождением Тобою Царе и Боге, в неоказанием Его чертозе, в непрестающем услаждении, в нескончаемом Царстве Его сияет. О Владычице моя, прибежище мое, жизнь моя, оружие, похвало, упование и сило моя! Даруй ми наслаждатися неизреченными благодатьми Сына Твоего. Сего прошу от Тебе: Ты бо, яко Всевышняго Мати, подобную Ему, аще изволиши, и́маши силу. Того ради уповаю, яко прииму от Тебе, егоже ча́ю, о Богоневестная, рождшая всех Надежду, Господа нашего Иисуса Христа; Емуже подобает всякая слава, честь и поклонение со Безначальным Его Отцем, Благим и Животворящим Духом, ныне и присно, и во веки веков. Аминь.

Молитва тринадцатая

О Дево Владычице, Пречистая Богородице, Всеславная Госпоже моя! Высшая небес и чистшая светлостей солнечных! Честнейшая Херувим и Славнейшая всех Сил небесных! Апостолов похвало́ и мучеников крепосте! Радование преподобных, осияние подвизающихся! Златая кадильнице, светильниче светоносный! Купино́ неопалимая, Божественнейший законе, истинный кивоте, жезле Ааронов процветший: воистину бо жезл еси, от негоже истинный Плод, Сын Твой Христос, прозябе́! Ты плотию Бога Слова родила еси; но и по рождестве, якоже прежде рождества, пребывавши Дева. Тобою во Христе, Сыне Твоем, с Богом Отцем примирихомся. Ты грешным и беспомощным помощница еси; Ты еси утешение мира; сирот хранительница; пленных искупление; монашествующих укрепление; упование мирских человек; Ты вдовам терпение, покров и защищение еси; похвала, радость и венец девствующим.

О Честна́я Владычице и Госпоже! Укрый и охрани мя, да не превозносится лукавый враг надо мною: Ты бо, Пренепорочная, помощь моя еси; и инаго прибежища, кроме Тебе, не знаю. Со слезами молю Тя, Владычице, да не осудит мя Сын Твой и Создатель мой, по множеству содеянных мною грехов, в вечныя муки. Умоляю Тя, да сподоблюся и аз ходатайством Твоим во обители святых вни́ти, иде́же несть сле́з, ни скорбей, ниже́ смерти, ни мук, но радость непрестающая, наслаждение праведных, жизнь безконечная, утешение и слава.

Исполни уста моя благодатию Твоею; возбуди язык мой от радостныя души и теплаго сердца славословити Тя; даждь и мне силу воззвати Ти ангельское хваление, еже Ти Гавриил изрече́: Радуйся, Благодатная, Господь с Тобою!

Сподоби, о Дево, смиреннаго раба Твоего, избавитися ми от грехов и страстей. Разжени помыслы, яже от диавола мне прибывающия, и вое́же в преисподняя душу мою низринути, от него насылаемыя. Страх Божий и любовь даруй ми, о Дево. И жизнь непорочную подаждь ми; теплоту веры ко Господу и милость к ближним даруй; посли ми терпение, смирение, воздержание и пощение, сокрушенныя слезы, память вечных мук и от всех злых отвращение; яко да сподоблюся и аз внити в чертог Сына Твоего и Бога, и тамо со всеми святыми прославити великолепое имя Пресвятыя Троицы во веки веков. Аминь.

Молитва четырнадцатая

О Всепетая Владычице, источниче милосердия, бездно человеколюбия, водо живая, предстательнице грешных, истинная виноградная лозо́, небесное блаженство, общее всех прибежище, жизнь всего мира!

Суетному, мятущемуся и прелюбодейному миру продав себе до конца, обаче безпечален в деяниих и помыслех аз пребываю, и в небрежении житие провожду. Но, яко состраждущая Мати Божия, не возгнушайся мною, грешным; моление же сие, аще и оскверненными устами Тебе приносимое, приими; и милостива Судию благоприятными Твоими молитвами соделай. Умоли Сына Твоего, да пре́зрит вся грехи моя. К покаянию ум мой направи. Не попусти, да буду сатане достояние!

Паче же ходатайством Твоим обнови мя и исправи жизнь мою; яко да возмогу без страха предстати Судии и о́наго ужаснаго мучения избежати. Сотвори же мя наследника славы, молящи о сем Сына Твоего и Создателя моего, Емуже подобает слава, честь и поклонение во веки веков. Аминь.

Молитва пятнадцатая

О Пресвятая Владычице Богородице! Радосте отягощенных, предстательство обидимых, помоще безпомощным, сило немощных, жезле слепотствующих, спасительный кормчию заблуждающим; освяще́нный ковчеже, имже от потопа греховнаго спасаемся; купино́ неопалимая, юже Моисей Боговидец зряше; златая кадильнице, из нея́же Слово, плоть Себе возжегши, благоуханием вселенную исполни; седмосве́щный светильниче, паче сияния солнечнаго возсиявый; ски́ние святая; ста́мно5, Манну Христа вместившая; жезле Ааронов прозябший; руне́ Гедеоново; Богописанная книго, еяже ради рукописа́ние Адамово раздра́ся; горе́ Божия, в нейже Господь обитати благоволи; прекрасная по естеству, никиим же укоризнам надлежащая; вся непорочная; полноту Божества, Сына Отчаго, в Себе вместившая; Иезекии́лева врата, на восток зрящая; клеще огненная, ю́же Исаия ви́де; горб Даниилова несеко́мая; вершино Авваку́мова, добродетельми приосене́нная; преукрашенное вместилище Божия снисхождения; примирение мира; раю́ святейший, во Едеме насажденный; древо живоносное, розо благоуханная, цвете неувядаемый, чистейшая лилие; образе девства, без красок начертанный; боготканная порфиро; яснейшее всех пророчеств исполнение; немо́лчная уста апостольская; крепкое основание подвижников необоримых; царей утверждение, иереев похвало; прегрешений прощение, неумытнаго6 Судии умилостивление; души моей и тела обновление; спасение мое, жизнь моя, свет мой, упование мое, отрада моя, прибежище мое; покро́ве, сило, веселие и сладосте моя; стено́, ограждение, оружие, защито моя; славо, тишино, мире, песне моя, радосте, благословение, якорю, богатство, росо, святыне моя; печалей избавление, души моея просвещение и освящение; грехов искупление, упокоение в Бозе; воздержание, непорочносте, мужество, целомудрие, свободо, пристанище, сокровище, высото, крепосте, красото, благоразумие мое; вечное наследие мое; в покаянии утверждение, неусыпное мое пред Богом предстательство!

Ты зриши веру мою и любовь к Тебе восхище́нную; ихже ради, паче же яко Мати Милосерднаго Бога, сострадательна и мощна суща, приими несчастнейшую душу мою. И сподоби ю Твоим заступлением одесну́ю стати Сына Твоего и Бога, и упокоение со избранными и святыми Его получити. Ей, не лиши мя сего предстательства Твоего, имаши бо Его, яко должника Твоего, от Тебе плоть взаим вземшаго и рекшаго: чти отца твоего и матерь твою.

Се на Тя себе возлагаю надежно: Ты бо воистину родила еси во плоти Бога истиннаго; Емуже подобает всякая слава, честь и поклонение со Безначальным Его Отцем, Пресвятым и Благим и Животворящим Духом, ныне и присно, и во веки веков. Аминь.

Молитва шестнадцатая

Пресвятая Владычице Богородице, Благодатная Богородительнице, Преблагословенная Богоблагодатная Мати, Божества приятелище, Единороднаго Сына Безсмертнаго и Отца Незримаго огнеобразный престо́ле; Всенепорочная, Всепречистая, Всепетая, Всеблаженнейшая, Всенеприкосновенная, Всечестна́я, Всеублажаемая, Всеблагословенная, Всевожделенная Дево душе́ю и духом, такожде и телом; престоле Царя, на Херувимех седящаго; врата небесная, имиже на небо и мы восходим; Богоневестно, еюже с Богом примирение прииде нам; непостижимое чудо, неуразумеваемое известие; откровение Божия тайны сокровенныя; непобедимое предстательство, крепкое защищение; живоносный источниче, море неисчерпаемое дарований Божественных; высото, небесныя Силы превосходящая; глубино таинственных мыслей неизследимая; общая по Троице всех Владычице; всем, по Уте́шителе Дусе Святем, Уте́шительнице; за весь мир, по Единем Ходатае Христе Спасе, Ходатаице; колеснице мысленнаго Солнца, истиннаго Света, просвещающаго всякаго человека, грядущаго в мир; носящаго всяческая словом Своим носящая; мо́сте вселенныя, к премирному небу преводящий; Херувимов и Серафимов высшая и без сравнения славнейшая; Ангелов украшение, человеком спасение; Мати и рабо́ звезды незаходимыя; неизреченнаго человеколюбия Божия без дно; тве́рдое основание правыя веры; молние, души озаряющая; охранение на высоту восшедших, надеждо во глубину зол падших; крепосте бодрствующих, возбуждение ленивых; Церквей единомыслие, царств благоустроение; мире всея вселенныя; небесе и земли Царице!

Тобою хвалюся! На Тя надеюся! Тя прославляю! Не и́мам бо иныя кроме́ Тебе помощи и защищения. Да не буду безплоден в молениях к Тебе: и́маши бо силу, яко Единаго от Троицы неизреченно родившая; имаши, о чесо́м можеши умолити Его и умилостивити: се бо – руце Твои, имиже носила Его, Ему покажи; се – сосцы Твоя, имиже яко Младенца питала еси Его! К сим же, яже от Тебе суть, привлецы́ еще́ и я́же Он и́мать: крест, кровь, язвы, имиже мы спасаемся и хвалимся.

Вем, яко присно угодная творит Тебе, рождеством Ему на искупление мира послужившей. И се, исполнен мир весь благодеяньми Твоими. Ты всяку слезу от лица земли утолявши. Ты небесных возвеселявши и спасавши земных. Ты Творца умилостивлявши, Ты Ангелов и человек примирила еси; падших на высоту возвела еси. Тобою вся на лучшая премени́шася, и паче прежних в совершеннейшая всяческая преложишася. В Тебе и нашего воскресения зна́мение неложное и́мамы. Тобою Царство Небесное получити уповаем. Ты еси дарованная нам помощница спасения. Ты в рай вход отверзла еси нам. Ты восход к небу облегчила еси. Ты нас Сыну и Богу Твоему присвоила еси.

И Тобою, Пречистая, от Адама и до скончания века бе, есть и будет слава и честь апостолом, пророком, мучеником, преподобным! О Тебе, Благодатная, радуется всякая тварь, Тобою спасающися, и за Тя и через Тебе прославляющи Единаго в Троице Бога во веки веков. Аминь.

Молитва семнадцатая

Восхваляю и прославляю Тя, Владычице Богородице, мира Предстательнице, всех Заступнице, моя Путеводительнице! Прости ми, Всенепорочная, леность мою и безчувствие к делом спасительным. Сама исполни уста мои и сердце вдохновения, да непрестанно Тебе и Человеколюбивому Сыну Твоему и Богу приноша́ю от всея души моея песнопения; ибо милостию благодати еще жив есмь доселе; и мно́жицею, окаянный, спасахся и спасаюся от всяких напастей, болезней и бед, душевных вку́пе и телесных. И паки надежду непогрешительную и в прочем житии моем и в жизни вечней имам на Тя. Сего ради, много милованный и милуемый по милости Твоей, от пламеннаго сердца и восхищенныя души восклицаю; и благодарственную хвалебную песнь, грешный раб Твой, Пресвятая Мати Человеколюбиваго Бога, радостно возношу Ти:

Радуйся, Благодатная Марие, Господь с Тобою! Радуйся, Богородице, Тобою бо Бог с нами! Радуйся, Всенепорочная и Благословенная! Радуйся, Дево, человеков славо! Радуйся, печате завета Господня! Радуйся, обновление обветшавших! Радуйся, соединение древле разстоящих! Радуйся, Рабо́ Господня! Радуйся, престоле Самаго Бога! Радуйся, Пречистая Дево и Мати! Радуйся, умилостивительная жертво заблуждающих! Радуйся, Божественный даре миру! Радуйся, Мати Божия! Радуйся, всея вселенныя Владычице! Радуйся, всех созданий высшая! Радуйся Бога Слова рождшая! Радуйся, радосте и славословие Ангелов! Радуйся, спасение верных! Радуйся, грехов моих разрешение! Радуйся, бедствующих утешение! Радуйся, мечу́ на бесов лукавых! Радуйся, в роды родов ублажаемая! Радуйся, нищим помоще богатая! Радуйся, скорое утешение скорбящих! Радуйся, озарение во мраке блудящих! Радуйся, немудрых премудрое разсуждение! Радуйся, в нуждах помощнице! Радуйся, страстных уте́шительнице! Радуйся, плавающих пристанище! Радуйся, странников путеводительнице! Радуйся, десни́це крепко стоящих! Радуйся, на руки Твоя приемлющая падающих! Радуйся, стено́ Тя призывающих! Радуйся, предваряющая маловерных! Радуйся, источниче всяких благ жизни! Радуйся, избавление вечныя муки! Радуйся, всем защите крепкая и покро́ве! Радуйся, Благословенная, во веки веков! Радуйся, Заступнице усердная рода христианскаго! Радуйся, Божия Невесте Неневестная! Аминь.

Молитва восемнадцатая, схииеромонаха Киевского отца Парфения7

Возлюбленная Богу Отцу Дщерь, безмужная Еммануила Мати, кристалловидная Паракли́та (Уте́шителя) Невесто, и всякия святыни вместилище! Радоватися Тебе о Господе!

О Святоглаголивая Горлице, высшая небес Владычице и чистшая светлостей солнечных, белолилейный Творца ковчеже, молниелучный Христа сосуде, орошенная Духом Росоносным и от Ангела манною воспитанная, благодать свыше паче всех получившая, и всех тварей превосходящая! Дражайшая моя Покровительнице! Умилосердися надо мною, бедным иноком! Недомыслимаго Сло́ва престо́ле и Неизследимаго Жениха чертоже; благородное гнездо Орла Небеснаго и зерцало Христовых Таин; красото безплотным Ангелом и похвало угодником Божиим! Желанная моя Защитнице и Попечительнице! Не отри́ни просьбы в крайней нужде моей! Нетленная Родительнице Владычня, и браку непричастная, и неискусомужная Царице; несгораемая свеще́ ми́рови и слепотствующим светящая! Всепетая Мати-Уте́шительнице и Спасительнице! Спаси мене от лукаваго в пагубней сей суете!

Архангельский Гавриилов глас вопию Ти, Троицею увенчанная, Пронарече́нная Отрокови́це, между Богом и людьми посреднице обретшаяся: Царюющая, о радуйся! С Тобою Господь! Торжествуй, быти Матерь Владыки Мессии сподобльшаяся!

Общий Ангел хранитель наш еси, Дево, и в призывании скоропослушливая. Полезному моему прошению помощи можеши; поручница ми и житии исправительница буди!

Не хощу́ бо от Тебе более ничесоже, ниже́ дневнаго пропитания; единаго же то́чию желаю: даждь ми возлюбити всем сердцем Сына Твоего, Господа и Бога нашего Иисуса Христа, и Твоим Матерним ходатайством получити наследие жизни вечныя, честно́ю Кровию Его нам стяжанныя. Аминь.

Молитва девятнадцатая, преподобного Максима Грека8

Тя, несравненною чистотою и безплотныя чины́ превосходящую, молю, Всепетая: скверную душу мою очисти от беззаконных помышлений, яже всегда рождаются во мне от злаго в плотских страстех навыкнове́ния, долгим временем обученннаго; и яже не престае́т се́яти в мысль мою лукавый демон, скверня́ и разслабляя ю присно скверными и льстивыми помыслами, спасению души моея зави́дяй. Сего ради молю Тя, Пречистая, не презри мене, бедне в сей скверней тине погружаемаго; но благоуханым миром молитв Твоих очисти мя от смрада сего; сладчайшим светом Божественныя любве измени всяческую тьму души моея; и уздою чистаго, всегда во мне пребывающаго, страха Божия укроти навеки мудрование безчинныя плоти моея, соблюдая ю в чистоте; да без порока возмогу умоляти Спасителя моего, единаго чиста суща естеством, и испрошу прощение беззаконий, имиже аз прогневах Его, живы́й подобие скотом безсловесным и совершая всякое беззаконное студодея́ние; не имый страха пред Страшным Суди́щем Его; ни огня негасимаго бояся, ни тьмы кромешныя, ни червя непрестанно кишащаго, ни страшнаго скрежета зубнаго.

Темже тягчайшия муки ожидают мя, аще токмо не принесу покаяния, моим беззакониям равнаго. И аз, о Госпоже Царице, во ужасе трепещу и боюся, и крайними болезньми непрестанно уязвляюся в душе, и умом содрогаюся: како доселе деяния праведнаго Суда Божия минуша мене? Се бо моими руками Создателя моего пригвоздих, нага́го на Кресте распяв! О, неисчетныя благостыни Владычни! Оле моея жестокости грешнаго раба! Увы мне, увы мне! Како избегну чающих мене мучений?! Ка́я пропасть земная от лика Божия сокрыет мя?!

Но буди милостива ко мне, молю Тя, Владычице! И умоли о мне Владыку, да милостив будет ко грехом моим, от великаго моего неразумия содеянным; и да подаст ми принести Ему покаяние, имже свобожуся от пасти страшнаго змия и злых приставников его. Ущедри мя, Владычице, к Тебе прибегающаго, и избави мя от сквернаго их насилия.

Неключимый9 раб Твой сый от юности, и на Тя надеяся, аз с радостию подклоних себе игу иноческому (аще мирянин, глаголи: «Христову»), от всего отрекся, да тако возмог бых избыти ждущих мя вечных мучений. Но и ныне сподоби мя безпреткновенно до конца донести сие иго добраго делания, Владыкою мне порученнаго; да хотя с делателями последняго часа улучу мзду от руки Его и услышу глас, внутрь чертога зовущий достойных причастия радости Владычня.

Ей, умоляю Тя, Пречистая Мати Вышняго, единое души моея утешение, упование и сладость, Божественный покро́ве, свете мой, заступление и спасение! Сподоби мя получити сие святыми молитвами Твоими. Ты бо еси, Владычице, начало спасения моего; возблаговоли же Сама и благий конец его устроити. Сотвори мя, Пречистая, причастника нетленныя славы от Тебе рождшагося возлюбленнаго Сына Твоего; да спасен Тобою, сподоблюся славити Единаго Триипостаснаго во единем существе Бога, Безначальнаго Отца, Собезначальнаго Сына и Всесильнаго Духа, Емуже подобает слава, честь и держава в безконечные веки. Аминь.

Молитва двадцатая, кающегося грешника

О Пресвятая Богородице, Пречистая Мати Дево!

К Тебе прибегаю, к Твоим Матерним объятиям припа́даю, заступления и помощи Твоея прошу. Се бо исполнихся скорби; беды обуревают мя; искушения и греси одержа́т бедную душу мою; весь недоумением исполнен есмь; слезами омочаю лице свое.

И где обра́щу спасение? К кому притеку недостойный?

Аще воззрю на Сына Твоего, страхом погружаюся: вем, яко Спаситель есть милостивый; обаче же и Судия праведный; аз же всегда попираю заветы Его, и яко мытарь не смею возвести на Пречистый лик грешных очес моих.

Аще ко святым обращуся, и паки тесно ми есть; ти́и бо бе́ша небесни житием, аз же весь землен есмь; сего ради стыжуся молити их, яко далече от них отстояй деяньми моими.

Но аще и Ты святых святейша еси, и Херувим честнейша; обаче к Тебе прибегаю с надеждою. Не вем, откуду сицево́ дерзновение имам; верую, яко Мати всем сущи, Сама да́руеши таковую благодать чадом Твоим.

Сего ради умильно, яко истинную и благую Матерь свою, прошу и молю: не отрини мене непотребнаго и скорбнаго; услыши тайная воздыхания души моея опечаленныя; воззри милостивым оком на раба Твоего огорченнаго; простри Матерния руки Твои к бедней главе моей, ина́го прибежища не имеющей. И помози мне, яко Сама веси и волиши. Уте́ши сердце мое, печальми болезнующее; просвети ум мой, суетою омраченный; укрепи волю, грехми́ разслабленную; испроси благодать Святаго Духа Уте́шителя; и даждь вся, яже к жизни и спасению потребная; наипаче же введи мя во время свое в обители Сына Твоего и Бога моего.

Верую бо и вем несумненно, яко всяк, призываяй Тя от сердца, никакоже погибнет, но помилования от Господа сподобится; Твои бо есмы́ чада, и на ходатайство Твое непреложное упование имамы, яко Матерь еси Спаса нашего Христа Бога, Емуже слава со Отцем и Святым Духом во веки веков. Аминь.

Примечания

* * *

1 Молитвы прп. Ефрема Сирина (с 1-й по 17-ю), как и 19-я прп. Максима Грека, переведены собирателем книги на славянский язык с русского текста. – М. В. (См.: Ефрем Сирин, прп. Молитвы ко Пресвятой Богородице// Творения: В 3 т. М., 2002. Т. 2. С. 328–349).
2 сту́дный (церк.-слав.) – постыдный, бесчестный, позорный.
3 Зрак (церк.-слав.) – образ.
4 Презо́рство (церк.-слав.) – непослушание.
5 Ста́мно (от греч. stamnos) – сосуд.
6 Неумы́тный (церк.-слав.) – неподкупный, беспристрастный.
7 Прп. Парфений Киево-Печерский (Краснопевцев, † 1855). Канонизирован Украинской Православной Церковью в 1993 г.; память – 17/30 марта.
8 Изложена в сокращении. Умер в 1556 г. в Троицкой Лавре. Память о нем 21 января. – М. В.
9 Неключимый (церк.-слав.) – негодный, непотребный.

О, Пресвята́я Влады́чице и Богоро́дице, вы́сшая Херуви́м и честне́йшая Серафи́м, Богоизбра́нная Отрокови́це, всех скорбя́щих Ра́досте! Пода́ждь утеше́ние и нам, в ско́рби су́щим: ра́зве бо Тебе́ ино́го прибе́жища и по́мощи не и́мамы. Ты еди́на еси́ ра́дости на́шея Хода́таица, и я́ко Ма́ти Бо́жия и Ма́ти милосе́рдия, предстоя́щи у Престо́ла Пресвяты́я Тро́ицы, мо́жеши нам помощи́: никто́же бо притека́яй к Тебе́ просра́млен отхо́дит. Услы́ши у́бо и нас, ны́не в день ско́рби пред Твое́ю ико́ною припа́дающих и со слеза́ми Тебе́ моля́щихся: отжени́ от нас належа́щия44 на нас ско́рби и печа́ли в сей вре́менней жи́зни, не лише́ны же сотвори́ ны Твои́м всеси́льным хода́тайством и ве́чныя несконча́емыя ра́дости во Ца́рствии Сы́на Твоего́ и Бо́га на́шего, Ему́же подоба́ет вся́кая сла́ва, честь и поклоне́ние, со Безнача́льным Его́ Отце́м, и со Пресвяты́м и Благи́м и Животворя́щим Его́ Ду́хом, ны́не и при́сно, и во ве́ки веко́в. Ами́нь.

Кондак 1

Взбра́нней Воево́де победи́тельная, я́ко изба́вльшеся от ве́чныя сме́рти благода́тию от Тебе́ ро́ждшагося Христа́ Бо́га на́шего и Твои́м ма́терним пред Ним хода́тайством, благода́рственная воспису́ем Ти, раби́ Твои́: я́ко иму́щая держа́ву непобеди́мую, от вся́ких нас бед и ско́рбных обстоя́ний свободи́, зову́щих: ра́дуйся, Благода́тная Богоро́дице Де́во, всех скорбя́щих Ра́досте.

Икос 1

А́нгел предста́тель по́слан бысть с Небесе́ рещи́ Богоро́дице: ра́дуйся, возвеща́я Боже́ственным воплоще́нием Христо́вым хотя́щую роди́тися от Нея́ Ра́дость всему́ ми́ру, в ско́рби погиба́ющу. Те́мже и мы, грехми́ обремене́ннии, наде́жду спасе́ния в Тебе́ улучи́вше, уми́льно взыва́ем Ти:

Ра́дуйся, Бо́жие ко гре́шным благоволе́ние; ра́дуйся, ка́ющихся пред Го́сподом Бо́гом кре́пкое заступле́ние.

Ра́дуйся, па́дшаго Ада́ма воззва́ние; ра́дуйся, слез Е́виных избавле́ние.

Ра́дуйся, грехо́вную отъе́млющая скве́рну; ра́дуйся, ба́не, омыва́ющая со́весть.

Ра́дуйся, ро́ждшая Изба́вителя, беззако́ния на́ша ту́не очища́ющаго; ра́дуйся, всечу́дное всех к Бо́гу примире́ние.

Ра́дуйся, мо́сте, вои́стину преводя́й нас от сме́рти к животу́; ра́дуйся, мир от пото́па грехо́внаго спа́сшая.

Ра́дуйся, ле́ствице небе́сная, Е́юже Госпо́дь к нам сни́де; ра́дуйся, вина́ всех обо́жения.

Ра́дуйся, Благода́тная Богоро́дице Де́во, всех скорбя́щих Ра́досте.

Кондак 2

Ви́дяще то́ки чуде́с, излива́емыя от святы́я Твоея́ ико́ны, блага́я Богороди́тельнице, я́ко Ты еси́ моля́щихся блага́я помо́щница, оби́димых засту́пница, ненаде́ющихся наде́жда, печа́льных утеше́ние, а́лчущих корми́тельница, наги́х одея́ние, де́вственных целому́дрие, стра́нных наста́вница, тружда́ющихся по́мощь, слепы́х прозре́ние, глухи́х благослы́шание, больны́х исцеле́ние, благода́рственне вопие́м о Тебе́ Бо́гу: Аллилу́иа.

Икос 2

Ра́зум недоразуме́нный находя́щих на ны лю́тых скорбе́й разуме́ти и́щуще, к Тебе́ прибега́ем, о Ма́ти и Де́во, утешения тре́бующе. Ты же, Я́ко блага́я, научи́ ны разуме́ти в них блага́го Сы́на Твоего́ милосе́рдое промышле́ние во спасе́ние душ на́ших и очище́ние мно́гих согреше́ний, да взыва́ем Ти ра́достно:

Ра́дуйся, обурева́емых ти́хое приста́нище; ра́дуйся, сумня́щихся изве́стное утвержде́ние.

Ра́дуйся, еди́на Ма́ти милосе́рдия; ра́дуйся, ско́рая помо́щнице су́щим в беда́х и напа́стех.

Ра́дуйся, скорбьми́ грехи́ на́ша очища́ющая; ра́дуйся, печа́лию на́ша не́мощи душе́вныя врачу́ющая.

Ра́дуйся, су́етныя ра́дости ми́ра сего́ презира́ти нас науча́ющая; ра́дуйся, от ми́ра к преми́рным ум наш возводя́щая.

Ра́дуйся, от любве́ земны́я к небе́сней Божией любви́ нас привлека́ющая; ра́дуйся, в са́мых страда́ниях на́ших утеше́ние и благода́тную жизнь нам подаю́щая.

Ра́дуйся, обетова́ние благ ве́чных; ра́дуйся, Хода́таице ве́чныя ра́дости.

Ра́дуйся, Благода́тная Богоро́дице Де́во, всех скорбя́щих Ра́досте.

Кондак 3

Си́лою свы́ше укрепи́ мя, блага́я Влады́чице, неду́гующа те́лом и душе́ю, и посеще́ния Твоего́ сподо́би и промышле́ния, мрак уны́ния и ско́рби, облежа́щий мя, отгоня́юще, да спаса́емый Тобо́ю, непреста́нно вопию́ Бо́гу: Аллилу́иа.

Икос 3

Иму́щи бога́тство милосе́рдия неизрече́нное, всем скорбя́щим ру́ку по́мощи простира́еши, неду́ги врачу́ющи, стра́сти исцеля́ющи. Не пре́зри и мене́, блага́я Влады́чице, на одре́ не́мощи моея́ низлежа́ща и вопию́ща Ти:

Ра́дуйся, ми́лости сокро́вище многоце́нное; ра́дуйся, отча́янных еди́на наде́ждо.

Ра́дуйся, те́ла моего́ врачева́ние; ра́дуйся, души́ моея́ спасе́ние.

Ра́дуйся, тве́рдая кре́посте немощны́х; ра́дуйся, изнемога́ющих засту́пнице и укрепле́ние.

Ра́дуйся, гнев Бо́жий Твои́м моле́нием ско́ро утоля́ющая; ра́дуйся, стра́сти на́ша си́лою моли́тв Твои́х укроща́ющая.

Ра́дуйся, слепы́х зре́ние, глухи́х слы́шание; ра́дуйся, хромы́х хожде́ние, немы́х глаго́лание.

Ра́дуйся, боля́щих благонаде́жное посеще́ние; ра́дуйся, Я́ко Тобо́ю по ме́ре ве́ры подаю́тся благода́тная исцеле́ния всем немощству́ющим.

Ра́дуйся, Благода́тная Богоро́дице Де́во, всех скорбя́щих Ра́досте.

Кондак 4

Бу́ря мно́гих бед и напа́стей обдержи́т мя, и волне́ния не ктому́ терплю́: Ты же, Я́ко ми́лостивая Ма́ти Спа́са моего́ и Бо́га, воздви́гни ру́це к Сы́ну Твоему́, моля́щи Его́, да при́зрит на лю́тую скорбь се́рдца моего́ и воздви́гнет мя из пучи́ны отча́яния, вопию́щаго Ему́: Аллилу́иа.

Икос 4

Слы́шащи, Пресвята́я Де́во и Ма́ти, Симео́на праведнаго прорече́ние: Тебе́ же Само́й ду́шу про́йдет ору́жие, слага́ла еси́ в се́рдце Твое́м вся глаго́лы сия́, разумева́ющи, я́ко ра́дость ма́терняго се́рдца о ча́дех мно́гих печа́лей в ми́ре сем быва́ет прича́стна. Те́мже, я́ко искуше́нней по вся́ческим и спострада́ти ма́терней ско́рби могу́щей, взыва́ем Ти:

Ра́дуйся, ра́дость ми́ру Христа́ Спаси́теля ро́ждшая; ра́дуйся, мир от скорбе́й избавля́ющая.

Ра́дуйся, хуле́ния и клеветы́ на Сы́на Твоего́ терпе́вшая; ра́дуйся, страда́нием Его́ спострада́вшая.

Ра́дуйся, ско́рбных матере́й утеше́ние; ра́дуйся, чад их благода́тное охране́ние.

Ра́дуйся, в беда́х ско́рое нам заступле́ние; ра́дуйся, заблу́ждших исправле́ние.

Ра́дуйся, младе́нцев пита́ние; ра́дуйся, ю́ных наставле́ние.

Ра́дуйся, Ма́ти сиро́тствующих; ра́дуйся, вдов заступле́ние.

Ра́дуйся, Благода́тная Богоро́дице Де́во, всех скорбя́щих Ра́досте.

Кондак 5

Богото́чную Кровь Сы́на Твоего́, на Кресте́ за спасе́ние на́ше излива́емую, зря́щи, я́ко Раба́ Госпо́дня, смире́нно во́ли Отца́, И́же на небесе́х, повину́ющаяся, нам о́браз злострада́ния и терпе́ния яви́ла еси́, да и мы, в пещи́ искуше́ний и бед су́щии, вопие́м смире́нно Бо́гу: Аллилу́иа.

Икос 5

Ви́дя Тя Сын Твой и Бог при Кресте́ стоя́щую с возлю́бленным ученико́м и се́рдцем Ему́ сраспина́ющуюся, глаго́лаше: Же́но, се сын Твой, и ученику́: се, Ма́ти твоя́, всыновля́я Тебе́ вся ве́рующия в Него́. Мы же, я́ко о́бщницы ско́рби и страда́ний Сы́на Твоего́, име́юще в Тебе́ благу́ю Ма́терь, на Тя все упова́ние в ско́рби возлага́юще, вопие́м Ти:

Ра́дуйся, Ма́ти ро́да христиа́нскаго; ра́дуйся, усынови́вшая нас при Кресте́ Сы́на Твоего́.

Ра́дуйся, Бо́га с челове́ки соедини́вшая; ра́дуйся, ве́рных Го́сподеви сочета́вшая.

Ра́дуйся, А́гнице, ро́ждшая А́гнца, взе́мшаго грехи́ ми́ра; ра́дуйся, ча́ше, че́рплющая нам ра́дость от Исто́чника безсме́ртия.

Ра́дуйся, спору́чнице спасе́ния гре́шных; ра́дуйся, взыска́ние поги́бших.

Ра́дуйся, неча́янная гре́шных ра́досте; ра́дуйся, па́дших воста́ние.

Ра́дуйся, цели́тельнице всех немоще́й; ра́дуйся, утоле́ние вся́кия печа́ли.

Ра́дуйся, Благода́тная Богоро́дице Де́во, всех скорбя́щих Ра́досте.

Кондак 6

Пропове́дуют ми́лости Твоя́, Богома́ти, вси концы́ вселе́нныя, и́бо честны́м покро́вом Твои́м покрыва́еши весь род христиа́нский, о не́мже непреста́нно мо́лишися Христу́ Спаси́телю на́шему и избавля́еши от всех бед благонра́вныя и богобоя́щияся рабы́, ве́рно вопию́щия Бо́гу: Аллилу́иа.

Икос 6

Возсия́ благода́ть светоза́рная от пречу́дныя ико́ны Твоея́, Богома́ти, пред не́юже со слеза́ми припа́дающе, мо́лим Ти ся: отжени́ о́блак наше́дших на ны искуше́ний, да вопие́м Ти ра́достно:

Ра́дуйся, принося́щая к Сы́ну Твоему́ и Бо́гу моле́ния ве́рных; ра́дуйся, и Сама́ у Престо́ла Сы́на Твоего́ непреста́нно моля́щаяся о нас.

Ра́дуйся, предста́тельнице к Бо́гу, мир от бед спаса́ющая; ра́дуйся, засту́пнице ро́да христиа́нскаго, от Бо́га нам дарова́нная.

Ра́дуйся, дре́во благосенноли́ственное, и́мже покрыва́ются мно́зи; ра́дуйся, дре́во светлоплодови́тое, и́мже пита́ются ве́рнии.

Ра́дуйся, покро́ве ми́ру, ши́рший о́блака; ра́дуйся, земле́ обетова́ния, из нея́же тече́т мед и млеко́.

Ра́дуйся, све́тлый о́блаче, ве́рныя непреста́нно освеща́ющий; ра́дуйся, сто́лпе о́гненный, наставля́яй избра́нныя к небе́сному насле́дию.

Ра́дуйся, ни́во, растя́щая оби́лие щедро́т; ра́дуйся, пода́тельнице вся́кия бла́гости.

Ра́дуйся, Благода́тная Богоро́дице Де́во, всех скорбя́щих Ра́досте.

Кондак 7

Хотя́щи яви́ти то́ки чуде́с от Своея́ ико́ны, Всех скорбя́щих Ра́дости, повеле́ла еси́, Влады́чице, боля́щей Евфи́мии моле́бная пе́ния пред то́ю соверша́ти, и получи́вши исцеле́ние, всем пропове́дати ми́лости, ра́ди тоя́ ико́ны явле́нныя, да не сокры́т бу́дет исто́чник благода́тных исцеле́ний всем тре́бующим. Те́мже и мы не таи́м Твои́х благодея́ний, но благода́рственне прославля́юще Бо́га, вопие́м Ему́: Аллилу́иа.

Икос 7

Но́вая купе́ль Силоа́мская па́че о́ныя дре́вния яви́ся, Пречи́стая Влады́чице, храм Твой, в не́мже покланя́емся чудотво́рней иконе Твое́й: И́бо не еди́ною в ле́то и то́кмо пе́рвее входя́щим здра́вие те́ла подае́ши, но всегда́ вся́кий неду́г и вся́кую я́зву душе́вную и теле́сную врачу́еши с ве́рою и любо́вию к Тебе́ прибега́ющих. Сего́ ра́ди вопие́м Ти:

Ра́дуйся, купе́ль, в нейже вся ско́рби на́ша погружа́ются; ра́дуйся, ча́ше, Е́юже ра́дость и спасе́ние восприе́млем.

Ра́дуйся, ка́меню, напои́вший жа́ждущия жи́зни; ра́дуйся, дре́во, услажда́ющее сла́ныя воды́ жите́йскаго мо́ря.

Ра́дуйся, животво́рныя воды́ неистощи́мый исто́чниче; ра́дуйся, ба́не, омыва́ющая грехо́вную скве́рну.

Ра́дуйся, скорбе́й на́ших услажде́ние; ра́дуйся, печа́лей на́ших утоле́ние.

Ра́дуйся, боле́зней на́ших врачева́ние; ра́дуйся, бед избавле́ние.

Ра́дуйся, де́монов попра́ние; ра́дуйся, враго́в посрамле́ние.

Ра́дуйся, Благода́тная Богоро́дице Де́во, всех скорбя́щих Ра́досте.

Кондак 8

Стра́нницы и прише́льцы вси есмы на земли́ сей, по глаго́лу апо́столову: беды́ от враго́в, беды́ от сро́дник, беды́ от лжебра́тии терпя́ще в лише́ниих мно́гих и ско́рбех. Ты же, Влады́чице, Я́ко Блага́я Одиги́трие, наста́ви нас к ти́хому приста́нищу, и моли́ Сы́на Твоего́ проще́нию прегреше́ний нам пре́жде конца́ дарова́тися, да непреста́нно вопие́м Бо́гу: Аллилу́иа.

Икос 8

Все житие́ на́ше на земли́ боле́зненно и печа́ли испо́лнено от клеветы́, досажде́ния, укоре́ния и ины́х многови́дных бед и напа́стей: немощству́ет бо те́ло, изнемога́ет и дух наш. К Тебе́ у́бо прибега́ем, Богома́ти, пред пречи́стою ико́ною Твое́ю припа́дающе, испо́лни ра́дости и весе́лия ско́рбная сердца́ на́ша, да вопие́м Ти:

Ра́дуйся, путеводи́тельнице, к небе́сному оте́честву нас руководя́щая; ра́дуйся, Цари́це не́ба и земли́, врата́ ра́йская нам отверза́ющая.

Ра́дуйся, ми́лостивая, нас ми́лующая; ра́дуйся, домострои́тельнице, житие́ на́ше до́бре устроя́ющая.

Ра́дуйся, руно́ ороше́нное, е́же Гедео́н предви́де; ра́дуйся, блаже́нное чре́во, невмести́маго все́ми Бо́га вмести́вшее.

Ра́дуйся, купино́ неопали́мая; ра́дуйся, неруши́мая стено́.

Ра́дуйся, живоно́сный исто́чниче; ра́дуйся, цве́те неувяда́емый.

Ра́дуйся, умягче́ние злых серде́ц; ра́дуйся умиле́ние благи́х.

Ра́дуйся, Благода́тная Богоро́дице Де́во, всех скорбя́щих Ра́досте.

Кондак 9

Всякая жите́йская в ми́ре сем сла́дость печа́ли быва́ет прича́стна: сла́ва не стои́т, бога́тство мимотече́т, ле́пота и здра́вие увяда́ют, дру́зи и и́скреннии сме́ртию отъе́млются. Услади́ у́бо на́ша ско́рби, благи́х вино́вная, Твою́ нетле́нную даю́щи ра́дость нам, вопию́щим Бо́гу: Аллилу́иа.

Икос 9

Вети́и многовеща́ннии недоуме́ют, ки́ими словесы́ скорбя́щия утеша́ти, но Сама́, Влады́чице, возглаго́ли сердца́м на́шим утеше́ние, благода́ти Твоея́ луча́ми о́блак ско́рби на́шея и мрак уны́ния разгоня́ющи, да взыва́ем Ти:

Ра́дуйся, обра́довавшая наде́янием на Тя всех христиа́н; ра́дуйся, ра́досте и умире́ние ми́ру.

Ра́дуйся, пода́тельнице Боже́ственныя бла́гости; ра́дуйся, наде́ждо благ ве́чных.

Ра́дуйся, кораблю́ хотя́щих спасти́ся; ра́дуйся, приста́нище жите́йских пла́ваний.

Ра́дуйся, ве́рная храни́тельнице упова́ющих на Тя по Бо́зе; ра́дуйся, оде́ждо наги́х дерзнове́ния.

Ра́дуйся, храни́тельнице всех и утвержде́ние; ра́дуйся, всех ве́рных огражде́ние и свяще́нное прибе́жище.

Ра́дуйся, по́моще ве́рно моля́щихся Тебе́; ра́дуйся, све́тлое благода́ти позна́ние.

Ра́дуйся, Благода́тная Богоро́дице Де́во, всех скорбя́щих Ра́досте.

Кондак 10

Спасти́ хотя́й род челове́ческий от ве́чныя му́ки и непрестаю́щия ско́рби, Человеколю́бец Госпо́дь в присноде́вственную утро́бу Твою́ всели́ся и Тебе́, Ма́терь Свою́, дарова́ погиба́ющим в по́мощь, покро́в и защище́ние, да бу́деши печа́льным утеше́ние, скорбя́щим ра́дование, отча́янным наде́жда, ве́чныя му́ки Свои́м хода́тайством избавля́ющая и к небе́сному весе́лию приводя́щая всех, ве́рно вопию́щих Сы́ну Твоему́ и Бо́гу на́шему: Аллилу́иа.

Икос 10

Стена́ еси́ де́вам, Богоро́дице Де́во, и всем к Твоему́ покро́ву прибега́ющим. Те́мже мо́лим Тя: заступи́, покры́й и соблюди́ всех си́рых и безпомо́щных от искуше́ний, озлобле́ний и бед, Тебе́ с любо́вию взыва́ющих:

Ра́дуйся, сто́лпе де́вства; ра́дуйся, чистоты́ и целому́дрия сосу́де избра́нный.

Ра́дуйся, во́инствующим на плоть целому́дрием изря́дное венча́ние; ра́дуйся, во и́ночестве благоскорбя́щим пода́тельнице ве́чнаго ра́дования.

Ра́дуйся, пла́мень страсте́й изменя́ющая; ра́дуйся, мрак искуше́ний прогоня́ющая.

Ра́дуйся, наста́внице целому́дрия; ра́дуйся, чистоты́ огражде́ние.

Ра́дуйся, исправле́ние челове́ков; ра́дуйся, Е́юже от паде́ния воста́хом.

Ра́дуйся, тве́рдое ве́ры утвержде́ние; ра́дуйся, прия́тное моли́твы кади́ло.

Ра́дуйся, Благода́тная Богоро́дице Де́во, всех скорбя́щих Ра́досте.

Кондак 11

Пе́ние всеумиле́нное прино́сим Ти, раби́ Твои́, Богоро́дице, я́ко всеси́льней засту́пнице ро́да на́шего: утоли́ боле́зни многовоздыха́ющих душ на́ших, укроти́ гнев Бо́жий, пра́ведно на ны дви́жимый грех ра́ди на́ших, изба́ви нас от вся́кия лю́тыя ско́рби и боле́зни, вопию́щих о Тебе́ Бо́гу: Аллилу́иа.

Икос 11

Светоприе́мная свеща́, у́глем благода́ти Бо́жия возжже́нная, яви́ся нам пречестна́я ико́на Твоя́, Влады́чице, на освяще́ние на́ше и утеше́ние. Мы же, любо́вию чту́ще ю и с ве́рою припа́дающе к ней, вопие́м Ти:

Ра́дуйся, си́льным Твои́м заступле́нием от всех бед нас избавля́ющая; ра́дуйся, от тру́са и пото́па нас защища́ющая.

Ра́дуйся, от гла́да душе́внаго и теле́снаго нас снабдева́ющая; ра́дуйся, огнь росо́ю моли́тв Твои́х угаша́ющая.

Ра́дуйся, от сме́ртнаго губи́тельства нас спаса́ющая; ра́дуйся, в бра́нех кре́пкая помо́щнице.

Ра́дуйся, от наше́ствия иноплеме́нных нас огражда́ющая; ра́дуйся, от междоусо́бныя бра́ни охраня́ющая.

Ра́дуйся, пла́вающих ле́гкое по вода́м прехожде́ние; ра́дуйся, путеше́ствующих до́брая води́тельнице.

Ра́дуйся, пле́нных свобожде́ние; ра́дуйся, от належа́щаго праведнаго преще́ния Бо́жия ско́рое избавле́ние.

Ра́дуйся, Благода́тная Богоро́дице Де́во, всех скорбя́щих Ра́досте.

Кондак 12

Благода́ти зало́г восхоте́вши да́ти ро́ду на́шему, цельбоно́сную ико́ну Твою́ яви́ла еси́ нам, Богома́ти, от нея́же то́ки чуде́с с ве́рою приходя́щим источа́ются, неду́зи врачу́ются и ско́рби утоля́ются. Сего́ ра́ди ра́достно о Тебе́ вопие́м Бо́гу: Аллилу́иа.

Икос 12

Пою́ще Твоя́ ми́лости и чудеса́, Богороди́тельнице, хва́лим Тя вси, я́ко тве́рдую предста́тельницу на́шу, и со умиле́нием покланя́емся Тебе́, моля́щейся о нас, и про́сим: воздви́гни ру́це к Сы́ну Твоему́, да всегда́ в сей жи́зни и по сме́рти на́шей милосе́рдие Его́ неотсту́пно бу́дет от нас, взыва́ющих Ти:

Ра́дуйся, непосты́дное на́ше упова́ние в животе́ и по преставле́нии на́шем; ра́дуйся, упова́ющим на Тя ми́рен коне́ц жития́ сего́ подаю́щая.

Ра́дуйся, в день су́дный на́ша наде́ждо и защище́ние; ра́дуйся, Судии́ праведнаго умоле́ние.

Ра́дуйся, гее́нны ве́чныя избавле́ние; ра́дуйся, наде́ждо ве́чнаго спасе́ния.

Ра́дуйся, ключу́ Ца́рствия Христо́ва; ра́дуйся, две́ре ра́йская.

Ра́дуйся, мо́сте, к небесе́м приводя́й; ра́дуйся, всех ка́ющихся гре́шников прибе́жище и блага́я засту́пнице.

Ра́дуйся, А́нгелов ра́досте; ра́дуйся, всех пра́ведных сла́во и утеше́ние.

Ра́дуйся, Благода́тная Богоро́дице Де́во, всех скорбя́щих Ра́досте.

Кондак 13

О Всепе́тая Богообра́дованная Ма́ти, ро́ждшая на ра́дость не́бу и земли́ Царя́ Христа́, Бо́га на́шего! Услы́ши глас скорбя́щих раб Твои́х, и прие́мши сие́ ма́лое моле́ние на́ше, изба́ви нас от вся́ких бед, скорбе́й и напа́стей; неду́ги на́ша исцели́, напра́сныя клеветы́ потреби́, вся́ку зло́бу и вражду́ отжени́ от нас и бу́дущия изми́ му́ки о Тебе́ вопию́щих: Аллилу́иа.

[Се́й конда́к глаго́лется три́жды.]
[Далее повторяем 1‑е икос и кондак:]

Икос 1

А́нгел предста́тель по́слан бысть с Небесе́ рещи́ Богоро́дице: ра́дуйся, возвеща́я Боже́ственным воплоще́нием Христо́вым хотя́щую роди́тися от Нея́ Ра́дость всему́ ми́ру, в ско́рби погиба́ющу. Те́мже и мы, грехми́ обремене́ннии, наде́жду спасе́ния в Тебе́ улучи́вше, уми́льно взыва́ем Ти:

Ра́дуйся, Бо́жие ко гре́шным благоволе́ние; ра́дуйся, ка́ющихся пред Го́сподом Бо́гом кре́пкое заступле́ние.

Ра́дуйся, па́дшаго Ада́ма воззва́ние; ра́дуйся, слез Е́виных избавле́ние.

Ра́дуйся, грехо́вную отъе́млющая скве́рну; ра́дуйся, ба́не, омыва́ющая со́весть.

Ра́дуйся, ро́ждшая Изба́вителя, беззако́ния на́ша ту́не очища́ющаго; ра́дуйся, всечу́дное всех к Бо́гу примире́ние.

Ра́дуйся, мо́сте, вои́стину преводя́й нас от сме́рти к животу́; ра́дуйся, мир от пото́па грехо́внаго спа́сшая.

Ра́дуйся, ле́ствице небе́сная, Е́юже Госпо́дь к нам сни́де; ра́дуйся, вина́ всех обо́жения.

Ра́дуйся, Благода́тная Богоро́дице Де́во, всех скорбя́щих Ра́досте.

Кондак 1

Взбра́нней Воево́де победи́тельная, я́ко изба́вльшеся от ве́чныя сме́рти благода́тию от Тебе́ ро́ждшагося Христа́ Бо́га на́шего и Твои́м ма́терним пред Ним хода́тайством, благода́рственная воспису́ем Ти, раби́ Твои́: я́ко иму́щая держа́ву непобеди́мую, от вся́ких нас бед и ско́рбных обстоя́ний свободи́, зову́щих: ра́дуйся, Благода́тная Богоро́дице Де́во, всех скорбя́щих Ра́досте.

Моли́тва

О Пресвята́я Влады́чице Богоро́дице, вы́шшая Херуви́м и честне́йшая Серафи́м, Богоизбра́нная Отрокови́це, всех скорбя́щих Ра́досте! Пода́ждь утеше́ние и нам, в ско́рби су́щим: ра́зве бо Тебе́ ино́го прибе́жища и по́мощи не и́мамы. Ты еди́на еси́ ра́дости на́шея хода́таица, и Я́ко Ма́терь Бо́жия и Ма́ти милосе́рдия, предстоя́щи у Престо́ла Пресвяты́я Тро́ицы, мо́жеши нам помощи́: никто́же бо притека́яй к Тебе́ посра́млен отхо́дит. Услы́ши у́бо и нас, ны́не в день ско́рби пред Твое́ю ико́ною припа́дающих и со слеза́ми Тебе́ моля́щихся: отжени́ от нас належа́щия на нас ско́рби и печа́ли в сей вре́менней жи́зни, не лише́ны же ны сотвори́ Твои́м всеси́льным хода́тайством и ве́чныя несконча́емыя ра́дости в Ца́рствии Сы́на Твоего́ и Бо́га на́шего. Ами́нь.

Тропарь, глас 2

Всех скорбя́щих Ра́досте,/ и оби́димых Засту́пнице,/ и а́лчущих Пита́тельнице,/ стра́нных Утеше́ние,/ обурева́емых Приста́нище,/ больны́х посеще́ние,/ не́мощных покpо́в и засту́пнице,/ Же́зл ста́рости,/ Ма́ти Бо́га Вы́шняго Ты еси́, Пречи́стая:// потщи́ся, мо́лимся, спасти́ся рабо́м Твои́м.

Минея, 24 Октября, 

Глас 4

Песнь 1

Ирмос: Отве́рзу уста моя,/ и наполнятся Духа,/ и слово отры́гну Царице Матери,/ и явлюся, светло торжествуя,/ и воспою, радуяся, Тоя чудеса.

Припев: Пресвята́я Богоро́дице, спаси́ на́с.

Кую Ти достойную песнь принесет наше неможение,/ точию обрадовательную, ейже нас Гавриил тайно научил есть:/ радуйся, Богородице Дево, Мати Неневестная.

Припев: Пресвята́я Богоро́дице, спаси́ на́с.

Радуйся, благодати источниче; радуйся, лестнице и дверь Небесная;/ радуйся, све́щниче, и ста́мно златая, и горо́ несеко́мая, Яже Жизнодавца Христа мирови рождшая.

Припев: Пресвята́я Богоро́дице, спаси́ на́с.

Всея моея жизни Предстательнице, от бед многих избави мя,/ да благодарственный глас воспеваю Ти, Богоневесто Пречистая,/ и будущия мя исхити муки.

Припев: Пресвята́я Богоро́дице, спаси́ на́с.

Яже всем удобь послушная в скорби/ив печали помогающая, Богородице Благая,/ благодать подаждь пети Тя дерзающим, Владычице, скорбящих Радосте.

Сла́ва Отцу́ и Сы́ну и Свято́му Ду́ху.

Многобога́тную благодать стяжа́вши, Владычице,/ дерзновенною Твоею молитвою преславно изми мя от напастей,/ убогаго раба Твоего, скорбящих Радосте.

И ны́не и при́сно и во ве́ки веко́в. Ами́нь.

Яже едина в напастех и скорбех защищающая,/ под кров Твой, Пречистая, прибегающих тепле,/ приими яко Преблагая, яже от сердца моления.

Песнь 3

Ирмос: Твоя песнословцы, Богородице,/ живый и независтный источниче,/ лик себе совоку́пльшия, духовно утверди/ в Божественней Твоей славе,/ венцев славы сподоби.

Припев: Пресвята́я Богоро́дице, спаси́ на́с.

Утверждение буди, и прибежище, и покров, Дево Богородительнице,/ верою к Тебе прибегающим и Божию Тя Матерь испове́дающим.

Припев: Пресвята́я Богоро́дице, спаси́ на́с.

Крепость моя, и радость, и веселие, и стена твердая,/ и Предстательница Ты еси, Всенепорочная,/ искушений и бед избавляющи мя.

Припев: Пресвята́я Богоро́дице, спаси́ на́с.

Милостивным и кротким Твоим оком, Богородительнице,/ зрящи мя во обстоя́нии и скорби одержима, вскоре свободи:/ Тя бо призываю на помощь.

Припев: Пресвята́я Богоро́дице, спаси́ на́с.

Кропи́ши исцелений струи болящим, Дево, всюду:/ Тя бо источника показа милосердия, Владычице, Иже милости Господь,/ из Тебе рожде́йся паче ума.

Сла́ва Отцу́ и Сы́ну и Свято́му Ду́ху.

Источник милости, подаяй скорбящим утешение, Ты еси;/ темже, Владычице, и мне молитвенных Твоих вод источник источи и угаси страстей пещь.

И ны́не и при́сно и во ве́ки веко́в. Ами́нь.

Отчаявся по́мощи всякия,/ к Тебе, Пренепорочная, державней Хранительнице и покрову, притеко́х:/ не отри́ни убо мене от Божественнаго покро́ва Твоего.

Седален, глас 6

Преложение скорбящих,/ премене́ние болящих еси, Богородице Всепетая:/ спаси град Твой и люди,/ бори́мых умирение, обуреваемых тишино,/ едина Предстательнице верных.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богородичен: Утоли́ болезни многовоздыхающия души моея,/ утолившая вся́ку слезу от лица земли:/ Ты бо человеков болезни отгоняеши/ и грешных скорби разрешаеши,/ Тебе бо вси стяжа́хом надежду и утверждение,/ Пресвятая Мати Дево.

Песнь 4

Ирмос: Седяй в славе на Престоле Божества,/ во облаце легце/ прии́де Иисус Пребожественный/ нетленною дланию и спасе зовущия:/ слава, Христе, силе Твоей.

Припев: Пресвята́я Богоро́дице, спаси́ на́с.

Надеждо ненадежных, помощнице сирых,/ плачущих утешение, согрешающих очищение,/ Руководительнице заблудших, болящих Целе́бнице и исправление падающих,/ Владычице, спаси рабы Твоя.

Припев: Пресвята́я Богоро́дице, спаси́ на́с.

Не неприча́стни есмы, Владычице, Твоего заступления в ско́рбех;/ темнее и ныне нам помози́ вскоре, люте обуреваемым, руку простирающи, Чистая:/ буди милостива болезнем нашим, Мати Божия, радость скорую подающи.

Припев: Пресвята́я Богоро́дице, спаси́ на́с.

Вся Благая и теплая Заступница сущи грешником и смиренным, Богородительнице Пречистая Владычице,/ от бед и скорбей, и грехов спасай рабы Твоя.

Припев: Пресвята́я Богоро́дице, спаси́ на́с.

Преславную Твою Матерь, Христе́, приими́ молящуюся о мире, милостивно Тебе зовущую:/ Сыне Мой, приими мольбу Мою и ути́ши гнев, належа́щий земли.

Сла́ва Отцу́ и Сы́ну и Свято́му Ду́ху.

Кров и заступление, и прибежище буди ми, Дево, рабу Твоему,/ и избави мя от безмерных зол, воспевати Тя, Пречистая:/ слава неизреченному Рождеству Твоему.

И ны́не и при́сно и во ве́ки веко́в. Ами́нь.

Надежда и щит, и утверждение Ты мне еси, Благая,/ и лютых избавление, и просвещение души моей,/ и хвала, и стена, и держава.

Песнь 5

Ирмос: Ужасо́шася всяческая/ о Божественной славе Твоей:/ Ты бо, Неискусобрачная Дево,/ имела еси во утробе над всеми Бога/ и родила еси Безлетнаго Сына,/ всем воспевающим Тя/ мир подавающая.

Припев: Пресвята́я Богоро́дице, спаси́ на́с.

Ты крепость моя, Ты похвала, и радование, и Хранительница ми еси,/ и заступление, и прибежище, и Предстательница непобедима, Пресвятая Богородице Дево:/ темже спаси раба Твоего.

Припев: Пресвята́я Богоро́дице, спаси́ на́с.

Спаси мя, Владычице, из глубины напастей, и скорбе́й, и печалей, и страстей телесных/ и в тишине Божественней сохрани душу мою.

Припев: Пресвята́я Богоро́дице, спаси́ на́с.

Молитвеннице неложная, упование христиан, Обрадованная,/ приими мольбы от нас, прилежно призывающих и молящихся Тебе.

Припев: Пресвята́я Богоро́дице, спаси́ на́с.

Покров мой еси Ты и присное хваление, о Владычице Богородице:/ никакоже бо презираеши к Тебе прибегающих.

Сла́ва Отцу́ и Сы́ну и Свято́му Ду́ху.

Дом Тя Славы, го́ру Божию святую, Чистая,/ Невесту, чертог, храм освящения/ Сын Божий, в Тя вселивыйся, и рай сладости присносущныя нам соде́ла.

И ны́не и при́сно и во ве́ки веко́в. Ами́нь.

Сте́ну необори́му, Чистая, молитву Твою стяжавше, вопием Ти:/ умилосердися, о Владычице, и видимыя и невидимыя враги прожени́.

Песнь 6

Ирмос: Божественное сие и всечестно́е/ совершающе пра́зднество,/ Богомудрии, Богоматере,/ приидите, руками воспле́щем,/ от Нея рождшагося Бога славим.

Припев: Пресвята́я Богоро́дице, спаси́ на́с.

Болящих Целительницу, падающих востание, согрешающих очищение, Богородице,/ Тебе молю, со слезами припадаю и зову Ти:/ яко сильна́ Сама мя спаси, погибающаго.

Припев: Пресвята́я Богоро́дице, спаси́ на́с.

Ты еси стена нерушима, Ты еси покров тверд, Богородице Благая,/ Ты еси Предстательница крепка́ рабу Твоему:/ сего ради призываю Тя присно и притекаю к покро́ву Твоему.

Припев: Пресвята́я Богоро́дице, спаси́ на́с.

Мирови радость сущи, Богородице Чистая, радуйся, Тебе, Дево, зовем со Ангелом верно:/ Твоея радости сподоби ны и печаль нашу разори.

Припев: Пресвята́я Богоро́дице, спаси́ на́с.

Сладость Ангелов, скорбящих Радость,/ христиан Предстательница Ты еси, Дево Мати Господня:/ заступи нас и избави вечных мук.

Сла́ва Отцу́ и Сы́ну и Свято́му Ду́ху.

В день печали, егда имам телесных соу́з разрешитися, предстани ми, Богородительнице,/ и обдержа́ния бесовскаго исхити́.

И ны́не и при́сно и во ве́ки веко́в. Ами́нь.

При́зри, Владычице, на мя, смиреннаго, и паче надежды спаси мя:/ Ты бо еси упование и покров ми,/ жизнь и свет сердцу моему, Богородице, и утверждение.

Кондак, глас 4

Не и́мамы иныя помощи,/ не и́мамы иныя надежды,/ разве Тебе, Владычице./ Ты нам помози́:/ на Тебе надеемся и Тобою хвалимся,/ Твои бо есмы раби,/ да не постыдимся.

Икос

Простри́ дла́ни Твоя, имиже всех Владыку яко Младенца прияла еси за множество благости:/ не остави нас, всегда надеющихся на Тя, бо́дренною Твоею молитвою,/ и неисчетною просты́нею уще́дри нас,/ и подаждь душам нашим милосердие Твое, во веки источающи,/ Тебе бо имамы грешнии Заступницу от находящих на ны бед и зол./ Но яко имущи милосердия щедроты,/ ускори́ на молитву и потщися на умоление,/ предстательствующи присно, Богородице, чтущих Тя.

Песнь 7

Ирмос: Не послужи́ша твари Богомудрии/ паче Создавшаго,/ но огненное прещение мужески поправше,/ радовахуся, поюще:/ препетый отцев Господь и Бог, благословен еси.

Припев: Пресвята́я Богоро́дице, спаси́ на́с.

Страстьми́ престаре́вся и неосла́бными напастьми, и скорбьми/ и, доспев к за́падом жития моего, добродетелем непричастен, леностию снеде́н быв,/ вопию Ти, Владычице:/ утешение земным, помилуй мя.

Припев: Пресвята́я Богоро́дице, спаси́ на́с.

Радуйся, источниче присноживо́тныя воды;/ радуйся, раю́ пи́щный;/ радуйся, стено верных;/ радуйся, Неискусобрачная;/ радуйся, всемирная радосте,/ Еюже нам возсия́ хва́лимый отцев Бог и препрославлен.

Припев: Пресвята́я Богоро́дице, спаси́ на́с.

Всем, сущим в мире, Заступница еси/ и стена христианом, и прибежище непостыдно, Чистая Марие./ Темже верою Тя чтуще, вопием Христу:/ отец наших Боже, благословен еси.

Припев: Пресвята́я Богоро́дице, спаси́ на́с.

О благоутробия Твоего, Дево Чистая!/ Реши́ши бо безмерныя печали и напасти, призывающим в нужде и обстоянии:/ темже и ныне помози, Благословенная, Тя восхваляющим.

Сла́ва Отцу́ и Сы́ну и Свято́му Ду́ху.

Едино упование и помощь верным сущи, Богородительнице,/ потщи́ся помощи́ рабом Твоим, погружаемым скорбьми и в болезнех сущим,/ и прибегающим к Тебе с любовию души́.

И ны́не и при́сно и во ве́ки веко́в. Ами́нь.

Радование благодарственное Тебе приносим, Мати Божия,/ яко воистину Тобою изба́влени всякаго злаго начинания,/ и согласно Тебе поем: благословенна еси.

Песнь 8

Ирмос: Отроки благочестивыя в пещи́/ Рождество Богоро́дичо спасло есть:/ тогда убо образуемое,/ ныне же действуемое,/ вселенную всю воздвизает пети Тебе/ Господа пойте дела́/ и превозноси́те Его во вся веки.

Припев: Пресвята́я Богоро́дице, спаси́ на́с.

Радуйся, Престоле славный Божий;/ радуйся, верных стено́, Еюже сущим во тьме возсия́ Свет, Христос,/ Тебе блажащим и вопиющим:/ вся дела Господня, Господа пойте и превозносите во вся веки.

Припев: Пресвята́я Богоро́дице, спаси́ на́с.

Поем Тя, Пречистая и Мати Божия,/ и кто не славит Тя, воистину Благую, сущую надежду душ наших,/ темже, Пречистая, и мою мольбу приими́.

Припев: Пресвята́я Богоро́дице, спаси́ на́с.

Ты еси спасение всех человек, Яже Бога рождшая неизреченно;/ Ты еси верных спасительница, Богородице, и слепых наставница, и падающих исправление./ Темже Тя восхваляюще, Христу зовем:/ благословите вся дела Господа, пойте и превозносите Его во вся веки.

Припев: Пресвята́я Богоро́дице, спаси́ на́с.

Струи́ исцелений нам всегда, верным, Чистая, источаеши:/ темже незави́стную благодать взе́млюще,/ воспеваем Рождество Твое, Чистая, и превозносим во вся веки.

Сла́ва Отцу́ и Сы́ну и Свято́му Ду́ху.

На Тя возложих, Владычице, сердце, и душу, и тело: не и́мам бо иныя надежды, разве Тебе, еюже получу милость./ Темже подаждь ми богатую Твою благодать.

И ны́не и при́сно и во ве́ки веко́в. Ами́нь.

На мольбу мою ныне умилосердися и радость в печали место даруй ми,/ да пою Тя, Владычице, и вопию Сыну Твоему:/ благословите, вся дела Господня, Господа.

Песнь 9

Ирмос: Всяк земнородный/ да взыграется, Духом просвещаем,/ да торжествует же Безплотных умов естество,/ почитающее священное торжество Богоматере,/ и да вопиет:/ радуйся, Всеблаженная/ Богородице, Чистая Приснодево.

Припев: Пресвята́я Богоро́дице, спаси́ на́с.

Радуйся, Марие, великое всея твари чудо;/ радуйся, Дщи убо Давидова, Господня же Мати;/ радуйся, пение Гавриилово;/ радуйся, прибежище и утверждение, и помощь всем, Пресвятая, сущим на земли грешником.

Припев: Пресвята́я Богоро́дице, спаси́ на́с.

Юже изво́лил еси, Владыко, приими милостивно Молитвенницу, Матерь Твою, о нас,/ и Твоея благости всяческая исполнятся:/ да Тя вси яко Благодетеля величаем.

Припев: Пресвята́я Богоро́дице, спаси́ на́с.

О Дево Благая! О мира радосте и прибежище!/ О хранилище верных и избавление скорбе́й!/ Ты предста́ни ми в час смерти и избави от бесо́в, ищущих поглоти́ти мя.

Припев: Пресвята́я Богоро́дице, спаси́ на́с.

Ты еси Ангелов радость, Ты еси праведников добро́та,/ Ты еси верных надежда, Ты еси соблюдение наше,/ Ты еси мост, к жизни нестаре́ющейся преводя́й верою и любовию Тя величающия.

Сла́ва Отцу́ и Сы́ну и Свято́му Ду́ху.

О Мати всяческих Творца,/ всесветлая печальных уте́хо, оскорбляемых Предстательнице и немощны́х Заступнице,/ сохрани мя, Благая, от бед и прилог вражиих.

И ны́не и при́сно и во ве́ки веко́в. Ами́нь.

Едина болящих посещение, Едина падших исправление, Владычице,/ Едина к Богу Руководительнице и входе,/ Едина Ходатаице вечных благ,/ помилуй мя единаго, паче всех согрешившаго.

Светилен

Под кров Твой, Дево Госпоже, прибегаем/ вси ро́ди человечестии:/ просвети ны светом Рождества Твоего,/ грешныя рабы Твоя,/ молящияся прилежно и покланяющияся Тебе,/ и просящия умирения ми́рови/ и душам нашим велия милости.

Минея, 24 Октября, Ин канон

Глас 8

Песнь 1

Ирмос: Поим Господеви,/ проведшему люди Своя сквозе Чермное море,/ яко един славно прославися.

Припев: Пресвята́я Богоро́дице, спаси́ на́с.

Моря житейскаго волнами потопляем и напастьми лютыми одержим,/ ко пристанищу устремихся невла́емому, покрову Твоему:/ темже мя избави, Богородице, от лютых.

Припев: Пресвята́я Богоро́дице, спаси́ на́с.

Положи Тя пристанище сущим в бедах, Чистая, Бог, Иже от Тебе благоволивый восприяти плоть./ Темже Ти, припадающе, взываем:/ даруй помощь Твою рабом Твоим.

Припев: Пресвята́я Богоро́дице, спаси́ на́с.

Едина Благословенная и Богорадованная,/ Яже Радость человеком рождши неизреченную,/ печали отими души моея, молюся, и возвесели сердце мое.

Припев: Пресвята́я Богоро́дице, спаси́ на́с.

Избави мя, Пречистая, бесовския прелести,/ озлобления же, и вреда, и искушения,/ да верою Тя славлю, сущую по Бозе Заступницу и покров мой.

Сла́ва Отцу́ и Сы́ну и Свято́му Ду́ху.

Яже ненадеющихся надежда, падших исправление,/ печальных утешение, Свет Божественный рождшая,/ душу мою, сущую во тьме, просвети.

И ны́не и при́сно и во ве́ки веко́в. Ами́нь.

Яко Гавриил Деве, приидите, вернии, и мы вопие́м благоговейно:/ воистинну украшена еси, Чистая, рождшая Радость; радуйся, Благословенная.

Песнь 3

Ирмос: Ты еси утверждение/ притекающих к Тебе, Господи,/ Ты еси свет омраченных,/ и поет Тя дух мой.

Припев: Пресвята́я Богоро́дице, спаси́ на́с.

Ты еси земнородных упование, и помощь, и радость, покров и прибежище, Владычице, Мати Живота./ Темже Тя молим: Твою помощь низпосли́ всем поющим Тя, Пречистая.

Припев: Пресвята́я Богоро́дице, спаси́ на́с.

Иже Тобою избавльшеся от бед/ и Тебе ради радость получивше, Мати Безневестная,/ яко Подательницу благую и Заступницу благохва́льну вси прославляем.

Припев: Пресвята́я Богоро́дице, спаси́ на́с.

Благословен Плод чрева Твоего, Дево Богородице, всех радосте:/ Радость бо всему миру родила еси и Веселие,/ разгоняющее печаль греховную, Богоневесто.

Припев: Пресвята́я Богоро́дице, спаси́ на́с.

Тя Хранительницу, Пресвятая, в напастех стяжах;/ Тебе по Бозе мою Предстательницу и́мам неусы́пну;/ Тебе да обрящу, Пречистая, избавляющую мя в день Суда́ всякаго осуждения.

Сла́ва Отцу́ и Сы́ну и Свято́му Ду́ху.

Возвеличи милость и заступление, Пречистая, Твоих молитв на мне/ и избави мя от напастей и скорбе́й,/ Радость миру рождшая.

И ны́не и при́сно и во ве́ки веко́в. Ами́нь.

Яже радости приемшая исполнение, приими от нас, раб Твоих, целова́ние Арха́нгелово:/ радуйся, Радость рождшая миру;/ радуйся, ста́мно, из Неяже манна Небесная всем верным даровася;/ радуйся, Благословенная.

Седален, глас 6

Преложение скорбящих,/ премене́ние болящих еси, Богородице Всепетая:/ спаси град Твой и люди,/ бори́мых умирение, обуреваемых тишино,/ едина Предстательнице верных.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богородичен: Утоли́ болезни многовоздыхающия души моея,/ утолившая вся́ку слезу от лица земли:/ Ты бо человеков болезни отгоняеши/ и грешных скорби разрешаеши,/ Тебе бо вси стяжа́хом надежду и утверждение,/ Пресвятая Мати Дево.

Песнь 4

Ирмос: Из горы приосене́нныя, Слове, пророк/ единыя Богородицы,/ хотяща воплотитися, Боговидно усмотри́/ и со страхом славословите силу Твою.

Припев: Пресвята́я Богоро́дице, спаси́ на́с.

От великих и различных прегрешений же и напастей всегда спасаеши мя;/ темже Тя яко рождшую Господа молю/ и к Тебе прибегаю, непобедимей по́мощи скорбящим:/ от бед изведи мольбами Твоими.

Припев: Пресвята́я Богоро́дице, спаси́ на́с.

Боже мой Милосе́рде, Боже Человеколюбче, Воли́телю милости,/ ныне на мя излий Твою милость:/ молит Тя надежда и Заступница моя, Мати Твоя.

Припев: Пресвята́я Богоро́дице, спаси́ на́с.

Милость Твою и милосердие на рабы Твоя, Чистая, простри́,/ присно молящия Тя всякия скорби и муки избавляющи молитвами Твоими.

Припев: Пресвята́я Богоро́дице, спаси́ на́с.

Радуйся, красная пала́то Слова, девственный чертоже Царя;/ радуйся, похвало всех Безплотных;/ радуйся, человеков радосте и помоще и упование.

Сла́ва Отцу́ и Сы́ну и Свято́му Ду́ху.

Спасение подаждь ми душевное и телесное, Пренепорочная,/ и недугующему даруй цельбу́ и лютых избавление.

И ны́не и при́сно и во ве́ки веко́в. Ами́нь.

О соде́яниих моих лукавых и прегрешениих многих кто возможет умолити Судию,/ аще не Ты, Чистая, едина согрешающих Заступнице.

Песнь 5

Ирмос: Мрак души моея разжени, Светодавче Христе Боже,/ началоро́дную тьму изгнав бездны,/ и даруй ми свет повелений Твоих, Слове,/ да утренюя, славлю Тя.

Припев: Пресвята́я Богоро́дице, спаси́ на́с.

Добро́ту Тя Иаковлю возлюби Бог, Дево Отроковице,/ украшая вся Тобою, омрачившияся преступлением пе́рвее.

Припев: Пресвята́я Богоро́дице, спаси́ на́с.

Душу мою сохрани, яко зе́ницу ока, под кровом крилу́ Твоею, Благая Пречистая,/ и от духо́в лукавых томления и мучения избави.

Припев: Пресвята́я Богоро́дице, спаси́ на́с.

Избавльшеся Тобою праматерния печали, Богородительнице, утешения исполнени быхом,/ Веселие всем рождшая и всемирную Радость:/ темже, Всепетая, Твоя песнословцы от бед Твоими молитвами соблюди.

Припев: Пресвята́я Богоро́дице, спаси́ на́с.

Благодарим Тя, избавльшеся Тобою грехов многих, и немощей, и болезней, и недуг лютых, Пречистая Владычице:/ надежда бо еси тверда́ Твоим верным рабом.

Сла́ва Отцу́ и Сы́ну и Свято́му Ду́ху.

С Божественным сошедшеся Гавриилом, возопиим Богородице верно:/ радуйся, Дево Святая, Благодатная, Господь с Тобою,/ Иже Тебе ради, потребив печаль, подаде́ миру радование.

И ны́не и при́сно и во ве́ки веко́в. Ами́нь.

Болящую душу мою исцели,/ рождшая всех Вземлющаго недуги, Пречистая Владычице.

Песнь 6

Ирмос: Содержи́ма мя приими, Человеколюбче, грехи многими/ и припадающа щедротам Твоим,/ яко пророка, Господи, и спаси мя.

Припев: Пресвята́я Богоро́дице, спаси́ на́с.

В нощи́ и во дни, я́ве и втай под Твой прибегаем кров, Пречистая Дево,/ иже Тя верно славословящи.

Припев: Пресвята́я Богоро́дице, спаси́ на́с.

В напастех Заступницу Тя и́мамы тверду,/ в скорбех крепкое спасение, покой в печалех,/ в беда́х помощь, Приснодево.

Припев: Пресвята́я Богоро́дице, спаси́ на́с.

Добро́та честных святых Ангел,/ радование человек всех Ты еси, Богородице Дево:/ Ты мя к животу настави.

Сла́ва Отцу́ и Сы́ну и Свято́му Ду́ху.

Палата Царя Славы и огнезрачный была еси Престол, Дево,/ Херувим превышши и Серафим:/ темже Тя всякое дыхание славит, яко Матерь Зижди́теля.

И ны́не и при́сно и во ве́ки веко́в. Ами́нь.

Радуйся, клеще́ Угля Божественнаго;/ радуйся, пророков печать и апостолов похвало́, Пречистая Богородице,/ Еяже ради от нетления свободи́хомся,/ бе́здну щедро́т ро́ждши, Богородице Дево,/ ско́рбных жития́ душу мою спаси́/ и радости духовныя двери отве́рзи ми:/ на Тя бо едину надежду возложи́х.

Кондак, глас 4

Не и́мамы иныя помощи,/ не и́мамы иныя надежды,/ разве Тебе, Владычице./ Ты нам помози́:/ на Тебе надеемся и Тобою хвалимся,/ Твои бо есмы раби,/ да не постыдимся.

Икос

Простри́ дла́ни Твоя, имиже всех Владыку яко Младенца прияла еси за множество благости:/ не остави нас, всегда надеющихся на Тя, бо́дренною Твоею молитвою,/ и неисчетною просты́нею уще́дри нас,/ и подаждь душам нашим милосердие Твое, во веки источающи,/ Тебе бо имамы грешнии Заступницу от находящих на ны бед и зол./ Но яко имущи милосердия щедроты,/ ускори́ на молитву и потщися на умоление,/ предстательствующи присно, Богородице, чтущих Тя.

Песнь 7

Ирмос: Божия снизхождения/ огнь устыде́ся в Вавилоне иногда:/ сего ради о́троцы в пещи́ радованною ногою,/ яко во цве́тнице, лику́юще, поя́ху:/ благословен еси, Боже отец наших.

Припев: Пресвята́я Богоро́дице, спаси́ на́с.

Водвори́хомся в вечер в плачи печалей и чаянии злых,/ но Твоим Боголепным кровом, Дево, обоже́ни бывше,/ обретохом радость заутра:/ Ты бо спасла еси нас.

Припев: Пресвята́я Богоро́дице, спаси́ на́с.

Яко Божественное прибежище покров Твой, Владычице, вси стяжавше к Богу,/ в напастех и гонениях, и гресе́х к Тебе прибегаем/ и Тобою изменение прие́млем, Пречистая.

Припев: Пресвята́я Богоро́дице, спаси́ на́с.

Грешников прибежище, низверженных исправление Ты еси, Владычице:/ сего ради притекаю к покро́ву Твоему,/ спаси мя, Богоневесто.

Припев: Пресвята́я Богоро́дице, спаси́ на́с.

В недоумении и печали сый и в беда́х, Пречистая,/ Тя призываю те́пле от се́рдца моего:/ предвари, и избави мя, и подаждь, Чистая, мне утешение.

Сла́ва Отцу́ и Сы́ну и Свято́му Ду́ху.

Благословенная Дево, Радосте скорбящих всех верных,/ от всякаго искушения и печали, и злобы завидящих мне изми/ и от грех и различных неду́г мя избави.

И ны́не и при́сно и во ве́ки веко́в. Ами́нь.

Вся еси светоносна, Свет незаходимый, Дево, приемши и просвещающи, Чистая, верою Тебе вопиющия:/ Благословен, Пречистая, Плод Твоего чрева.

Песнь 8

Ирмос: На горе святей прославльшася/ и в купине́ огнем/ Приснодевы Моисеови тайну явльшаго,/ Господа пойте/ и превозносите во вся веки.

Припев: Пресвята́я Богоро́дице, спаси́ на́с.

Вся еси Чистая и Божественныя славы исполнена, Ближняя Моя,/ рече Дух Божий, Тя провозвещая, Пречистая./ Юже песньми воспеваем, поюще:/ тебе подобает ра́доватися, Бога Человека рождшей.

Припев: Пресвята́я Богоро́дице, спаси́ на́с.

Ангелов похвало́ и человеков спасение,/ и Спору́чница буди ми, Мати Божия:/ яко да обращу́ся и прииму разрешение прежде согрешенных в ве́дении и не в ведении.

Припев: Пресвята́я Богоро́дице, спаси́ на́с.

Тя по Бозе упование спасения в напастех иму́ще, вернии, взываем:/ вся дела Господня, Господа пойте/ и превозносите Его во веки.

Припев: Пресвята́я Богоро́дице, спаси́ на́с.

Приими́ песнь от худых усте́н, Дево Всепетая, вопиющих Ти:/ радуйся, болящим телесем врачевство́ и отчаянным душам спасение.

Сла́ва Отцу́ и Сы́ну и Свято́му Ду́ху.

В болезнех и напастех одержимыя не пре́зри, Благая:/ но мольбу худую услышавши, свободи нас от скорбей великих,/ да верно Твою милость и заступление, Чистая, воспеваем.

И ны́не и при́сно и во ве́ки веко́в. Ами́нь.

Стоящих утверждение еси и падших исправление, Дево:/ темже мя, падшаго, возстави,/ да Тя славлю, Благословенную и Обрадованную.

Песнь 9

Ирмос: Благословен Господь Бог Израилев,/ воздвигнувый рог спасения нам/ в дому Давидове, Отрока Своего:/ в нихже посети нас Восток с высоты/ и направил ны есть на путь мира.

Припев: Пресвята́я Богоро́дице, спаси́ на́с.

Радости нам вечныя и жизни явилася еси преесте́ственне, Богородительнице, Хода́таица, Чистая,/ Спаса всех рождшая, от лица земнаго вся́ку сле́зу я́ве отъемшаго и всем радость подавшаго.

Припев: Пресвята́я Богоро́дице, спаси́ на́с.

Радость и веселие, и радование Божественное, Дево Неискусомужная, нам умно́жися Божие:/ се бо, плачущиися лю́те, радуемся молитвами Твоими.

Припев: Пресвята́я Богоро́дице, спаси́ на́с.

Под Твое милосердие прибегающии верою избавляются скорбных бед жития́:/ темже и аз ко Твоему покро́ву прибего́х, Богородице.

Припев: Пресвята́я Богоро́дице, спаси́ на́с.

Псалмы Тя воспеваем, Благодатная,/ и немолчно, еже радуйся, приносим:/ Ты бо источи́ла еси всем Радость.

Сла́ва Отцу́ и Сы́ну и Свято́му Ду́ху.

Иска́пающая Божественную сладость, всех Сладость рождшая,/ душу мою услади́, ядом змииным огорченную,/ отчуждающи мя горькаго вре́да всегда ходатайством Твоим,/ Предстательнице и радосте верных, Владычице.

И ны́не и при́сно и во ве́ки веко́в. Ами́нь.

Благословя́, благословлю́ Тя, Пречистая, и величаю те́пле:/ благослови мя убо, Твоего певца,/ и всяческих нуждных и печальных избави, и сохрани Твоими дланьми непобедима.

Светилен

Под кров Твой, Дево Госпоже, прибегаем/ вси ро́ди человечестии:/ просвети ны светом Рождества Твоего,/ грешныя рабы Твоя,/ молящияся прилежно и покланяющияся Тебе,/ и просящия умирения ми́рови/ и душам нашим велия милости.