Икона Богородицы «В скорбех и печалех Утешение»

К кому́ возопию́, Влады́чице? К кому́ прибе́гну в го́рести мое́й, а́ще не к Тебе́, Цари́це Небе́сная? Кто́ пла́ч мо́й и воздыха́ние мое́ прии́мет, а́ще не Ты́, Пренепоро́чная, Наде́ждо христиа́н и Прибе́жище на́м, гре́шным? Кто́ па́че Тебе́ в напа́стех защити́т? Услы́ши у́бо стена́ние мое́ и приклони́ у́хо Твое́ ко мне́, Влады́чице Ма́ти Бо́га моего́, и не пре́зри мене́, тре́бующаго Твоея́ по́мощи, и не отри́ни мене́, гре́шнаго. Вразуми́ и научи́ мя́, Цари́це Небе́сная; не отступи́ от мене́, раба́ Твоего́, Влады́чице, за ропта́ние мое́, но бу́ди мне́ Ма́ти и Засту́пница. Вруча́ю себе́ ми́лостивому покро́ву Твоему́: приведи́ мя́, гре́шнаго, к ти́хой и безмяте́жной жи́зни, да пла́чуся о гресе́х мои́х. К кому́ бо прибе́гну пови́нный а́з, а́ще не к Тебе́, упова́нию и прибе́жищу гре́шных, наде́ждою на неизрече́нную ми́лость Твою́ и щедро́ты Твоя́ окриля́емь? О, Влады́чице, Цари́це Небе́сная! Ты́ мне́ упова́ние и прибе́жище, покро́в и заступле́ние и по́мощь. Цари́це моя́ Преблага́я и ско́рая Засту́пнице, покры́й Твои́м хода́тайством моя́ прегреше́ния, защити́ мене́ от вра́г ви́димых и неви́димых; умягчи́ сердца́ злы́х челове́к, возстаю́щих на мя́. О, Ма́ти Го́спода моего́ Творца́! Ты́ еси́ ко́рень де́вства и неувяда́емый цве́т чистоты́. О, Богороди́тельнице! Ты́ пода́ждь ми́ по́мощь немощству́ющему плотски́ми страстьми́ и боле́знующему се́рдцем, еди́но бо Твое́ и с Тобо́ю Твоего́ Сы́на и Бо́га на́шего и́мам заступле́ние; и Твои́м пречу́дным заступле́нием да изба́влюся от вся́кия беды́ и напа́сти, о, Пренепоро́чная и Пресла́вная Бо́жия Ма́ти Мари́е. Те́мже со упова́нием глаго́лю и вопию́: ра́дуйся, Благода́тная, ра́дуйся, Обра́дованная, ра́дуйся, Преблагослове́нная, Госпо́дь с Тобо́ю! Ами́нь.

Кондак 1

Взбранней Воеводе Владычице нашей Богородице, даровавшей нам пречудную икону Свою «В скорбех и печалех Утешение», благодарственное приносим пение. Ты же, Пренепорочная, приими молитвы наша и от всяких бед заступи рабы Твоя, с верою и любовию вопиющия Ти: Радуйся, Владычице, в скорбех и печалех нас присно утешающая.

Икос 1

Ангел множество и вся Небесная Воинства славят Тя непрестанно на небеси, Владычице, и мы, земнороднии, исполненнии радости духовныя, притекающе к цельбоносней иконе Твоей, из глубины сердца приносим Ти глаголы сия:

Радуйся, Божие ко грешным благоволение.

Радуйся, кающихся пред Господом Богом крепкое заступление.

Радуйся, падшаго Адама воззвание.

Радуйся, слез Евиных избавление.

Радуйся, греховную отъемлющая скверну.

Радуйся, бане, омывающая совесть.

Радуйся, рождшая Избавителя, беззакония наша туне очищающаго.

Радуйся, всечудное всех к Богу примирение.

Радуйся, мосте, воистину преводяй нас от смерти к животу.

Радуйся, мир от потопа греховнаго спасшая.

Радуйся, лествице небесная, Еюже Господь к нам сниде.

Радуйся, вина всех обожения.

Радуйся, Владычице, в скорбех и печалех нас присно утешающая.

Кондак 2

Видяще Тя на иконе Твоей святей, Богомати Пречистая, Богомладенца Христа на руках Твоих держащую и ликами святых окружаемую, умиляемся душами нашими и благоговейно с любовию покланяемся пречистаго лика Твоего изображению, зовуще Сыну Твоему Христу Богу: Аллилуиа.

Икос 2

Разум небесный открывая, Богородице Дево, благоволила еси многими чудесы прославити икону Твою, в земном жребии Твоем, Святей Горе Афонстей, да вси ведуще таковое Твое о ней благоволение, песненно Тебе зовут:

Радуйся, обуреваемых тихое пристанище.

Радуйся, сумнящихся известное утверждение.

Радуйся, едина Мати милосердия.

Радуйся, скорая Помощнице сущим в бедах и напастех.

Радуйся, скорбьми грехи наша очищающая.

Радуйся, печалию наша немощи душевныя врачующая.

Радуйся, суетныя радости мира сего презирати нас научающая.

Радуйся, от мира к премирным ум наш возводящая.

Радуйся, от любве земныя к небесней Божией любви нас привлекающая.

Радуйся, в самых страданиях наших утешение и благодатную жизнь нам подающая.

Радуйся, обетование благ вечных.

Радуйся, Ходатаице вечныя радости.

Радуйся, Владычице, в скорбех и печалех нас присно утешающая.

Кондак 3

Силу Божественныя благодати даруеши, о, Богомати, всем с верою и любовию прибегающим ко всечестному покрову Твоему; и нас, недугующих телом и душею, Благая Владычице, свыше укрепи и посещения Твоего сподоби, да спасаемии Тобою, непрестанно вопием Богу: Аллилуиа.

Икос 3

Имея любовь велию к людем, искупленным Кровию Сына Твоего и Бога, всем с верою и упованием прибегающим к Тебе милостивно подаеши руку помощи, Владычице, да вси единым сердцем и едиными усты приносят Ти пение сицевое:

Радуйся, милости сокровище многоценное.

Радуйся, отчаянных едина Надеждо.

Радуйся, тела моего врачевание.

Радуйся, души моея спасение.

Радуйся, твердая крепосте немощных.

Радуйся, изнемогающих Заступнице и укрепление.

Радуйся, гнев Божий Твоим молением скоро утоляющая.

Радуйся, страсти наша силою молитв Твоих укрощающая.

Радуйся, слепых зрение, глухих слышание.

Радуйся, хромых хождение, немых глаголание.

Радуйся, болящих благонадежное посещение.

Радуйся, яко Тобою по мере веры подаются благодатная исцеления всем немощствующим.

Радуйся, Владычице, в скорбех и печалех нас присно утешающая.

Кондак 4

Бурею многих бед одержимым нам помогаеши, Небесная Царице, с верою прибегающим к Тебе и покланяющимся цельбоносному образу Твоему, егоже милостиво явила еси нам во утешение, да прославляя милость Твою, нам ниспосланную, рожденному от Тебе Спасителю мира зовем: Аллилуиа.

Икос 4

Слышавше братия скита Андреевскаго словеса отца своего духовнаго: «Да будет сия икона вам отрадою и утешением в скорбех и печалех», возрадовашеся зело о Твоем заступлении, Пресвятая Дево, и всю надежду на Тя возложивше, воспеша Ти тако:

Радуйся, радость миру Христа Спасителя рождшая.

Радуйся, мир от скорбей избавляющая.

Радуйся, хуления и клеветы на Сына Твоего терпевшая.

Радуйся, страданием Его спострадавшая.

Радуйся, скорбных матерей утешение.

Радуйся, чад их благодатное охранение.

Радуйся, в бедах скорое нам заступление.

Радуйся, заблуждших исправление.

Радуйся, младенцев питание.

Радуйся, юных наставление.

Радуйся, Мати сиротствующих.

Радуйся, вдов заступление.

Радуйся, Владычице, в скорбех и печалех нас присно утешающая.

Кондак 5

Боготечная звезда явися икона Твоя, Дево Богородице, сиянием многих чудес духовно просвещая и неоскудно источая благодатная исцеления всем верным, усердно к ней притекающим и смиренно вопиющим Богу: Аллилуиа.

Икос 5

Видяще токи чудес, от святыя иконы Твоея источаемыя, Всеблагая, вси людие земли Вятския стекахуся к ней на поклонение и на Тя все упование свое в скорбех и печалех возлагающе, воспеша Ти сице:

Радуйся, Мати рода христианскаго.

Радуйся, усыновившая нас при Кресте Сына Твоего.

Радуйся, Бога с человеки соединившая.

Радуйся, верных Господеви сочетавшая.

Радуйся, Агнице, рождшая Агнца, вземшаго грехи мира.

Радуйся, чаше, черплющая нам радость от Источника безсмертия.

Радуйся, Споручнице спасения грешных.

Радуйся, Взыскание погибших.

Радуйся, нечаянная грешных Радосте.

Радуйся, падших востание.

Радуйся, Целительнице всех немощей.

Радуйся, утоление всякия печали.

Радуйся, Владычице, в скорбех и печалех нас присно утешающая.

Кондак 6

Проповедуют милости Твоя, Богородице, вси концы вселенныя, от святыя иконы Твоея «В скорбех и печалех Утешение» бываемыя: болящим бо здравие, слепым прозрение, скорбящим утешение подаеши и всем на всяком месте и на всякий час благодатную помощь являеши, вопиющим о Тебе Всемилостивому Богу: Аллилуиа.

Икос 6

Возсияла еси многими лучами чудес икона Твоя, о, Богомати, и сими не токмо Гору Афонскую, но и множайшая места озарила еси, да научимся звати Тебе:

Радуйся, приносящая к Сыну Твоему и Богу моления верных.

Радуйся, и Сама у Престола Сына Твоего непрестанно молящаяся о нас.

Радуйся, Предстательнице к Богу, мир от бед спасающая.

Радуйся, Заступнице рода христианскаго, от Бога нам дарованная.

Радуйся, древо благосеннолиственное, имже покрываются мнози.

Радуйся, древо светлоплодовитое, имже питаются вернии.

Радуйся, покрове миру, ширший облака.

Радуйся, земле обетования, из неяже течет мед и млеко.

Радуйся, светлый облаче, верныя непрестанно освещающий.

Радуйся, столпе огненный, наставляяй избранныя к небесному наследию.

Радуйся, ниво, растящая обилие щедрот.

Радуйся, Подательнице всякия благости.

Радуйся, Владычице, в скорбех и печалех нас присно утешающая.

Кондак 7

Хотящи явити токи чудес от иконы Своея «В скорбех и печалех Утешение», услышала еси, Владычице, молитву болящаго раба Твоего Владимира и от немоты исцеление ему даровала еси, да здрав сый душею и телом, проповедует всем милости Твоя, ради тоя иконы явленныя. Темже и мы прославляюще Бога, благодеющаго чрез святый образ Твой, вопием Ему: Аллилуиа.

Икос 7

Новое знамение милости Твоея явила еси, Царице Небесная, в чудеснем прославлении святыя иконы Твоея, к нейже с верою и любовию прибегающим и помощи от Тебе просящим всякий недуг и всякую язву душевную и телесную врачуеши. Сего ради вопием Ти:

Радуйся, купель, в нейже вся скорби наша погружаются.

Радуйся, чаше, Еюже радость и спасение восприемлем.

Радуйся, каменю, напоивший жаждущия жизни.

Радуйся, древо, услаждающее сланыя воды житейскаго моря.

Радуйся, животворныя воды неистощимый источниче.

Радуйся, бане, омывающая греховную скверну.

Радуйся, скорбей наших услаждение.

Радуйся, печалей наших утоление.

Радуйся, болезней наших врачевание.

Радуйся, бед избавление.

Радуйся, демонов попрание.

Радуйся, врагов посрамление.

Радуйся, Владычице, в скорбех и печалех нас присно утешающая.

Кондак 8

Странствие земное многоскорбное и многомятежное услаждаеши нам матерним твоим о нас попечением, Богородице: Ты бо, яко благая Одигитрия, наставляеши нас к тихому и благоотишному пристанищу и молиши Сына Твоего о прощении прегрешений наших, да непрестанно вопием Ему: Аллилуиа.

Икос 8

Всем верным умилительно есть взирати на святую икону Твою, Всемилостивая Владычице, Ты бо еси всех скорбящих Утешительница и бедствующих Помощница. К Тебе убо прибегаем, Богомати, пред пречестною иконою Твоею припадающе: исполни радости и веселия скорбная сердца наша, да, получивше отраду и утешение, вопием Ти:

Радуйся, Путеводительнице, к Небесному отечеству нас руководящая.

Радуйся, Царице Неба и земли, врата райская нам отверзающая.

Радуйся, Милостивая, нас милующая.

Радуйся, Домостроительнице, житие наше добре устрояющая.

Радуйся, руно орошенное, еже Гедеон предвиде.

Радуйся, блаженное чрево, невместимаго всеми Бога вместившее.

Радуйся, Неопалимая Купино.

Радуйся, Нерушимая Стено.

Радуйся, Живоносный Источниче.

Радуйся, Цвете Неувядаемый.

Радуйся, умягчение сердец злых.

Радуйся, умиление благих.

Радуйся, Владычице, в скорбех и печалех нас присно утешающая.

Кондак 9

Всякия утоляеши болезни и скорби, во обстоянии сущим руку помощи простирающи, о, Всеблагая: призрела бо еси на раба Твоего Тимофея и исцеление ему даровала еси. Услади убо и наша скорби и печали, скорая Помощнице, и исцеление подаждь недугующим душам и телесем нашим, да вопием немолчно: Аллилуиа.

Икос 9

Ветии многовещаннии недоумевают, киими словесы достойно восхвалити вся чудеса Твоя, Богородице, от святыя иконы Твоея бываемыя. Мы же, Твоя неисчетная благодеяния видяще, присно Тя ублажаем и хвалебно Тебе вопием:

Радуйся, обрадовавшая надеянием на Тя всех христиан.

Радуйся, Радосте и умирение миру.

Радуйся, Подательнице Божественныя благости.

Радуйся, Надеждо благ вечных.

Радуйся, кораблю хотящих спастися.

Радуйся, пристанище житейских плаваний.

Радуйся, верная Хранительнице уповающих на Тя по Бозе.

Радуйся, одеждо нагих дерзновения.

Радуйся, Заступнице всех и утверждение.

Радуйся, всех верных ограждение и священное прибежище.

Радуйся, помоще верно молящихся Тебе.

Радуйся, светлое благодати познание.

Радуйся, Владычице, в скорбех и печалех нас присно утешающая.

Кондак 10

Спасительное прибежище в скорбех и бедах являешися всему роду человеческому, Мати Божия: Тя бо дарова Человеколюбец Господь погибающим в помощь, покров и утешение. Мы же, вечныя муки Твоим ходатайством избавитися уповающе, верно вопием Сыну Твоему и Богу нашему: Аллилуиа.

Икос 10

Стена необоримая и источник чудес явися святая икона Твоя, Владычице, всем к Твоему покрову прибегающим. Темже и мы, припадающе пред образом Твоим, молим Тя: защити и сохрани нас невредимы от всех напастей и нестроений, с любовию взывающих Ти из глубины души:

Радуйся, столпе девства.

Радуйся, чистоты и целомудрия сосуде избранный.

Радуйся, воинствующим на плоть целомудрием изрядное венчание.

Радуйся, во иночестве благоскорбящим Подательнице вечнаго радования.

Радуйся, пламень страстей изменяющая.

Радуйся, мрак искушений прогоняющая.

Радуйся, Наставнице целомудрия.

Радуйся, чистоты ограждение.

Радуйся, исправление человеков.

Радуйся, Еюже от падения нашего востахом.

Радуйся, твердое веры утверждение.

Радуйся, приятное молитвы кадило.

Радуйся, Владычице, в скорбех и печалех нас присно утешающая.

Кондак 11

Пение сие наше не презри, Пресвятая Дево, егоже всеумиленно приносим Ти, раби Твои, яко всесильней Заступнице рода нашего, но помози нам, Всеблагая, покаянием очиститися от скверны греховныя и преуспети в чистем и богоугоднем житии, да воспоминая неисчетная чудотворения Твоя, вопием Подателю всех благ Богу: Аллилуиа.

Икос 11

Светлыми лучами чудес пречестная икона Твоя, Владычице, немерцаемо сияет и весь мир благодатно озаряет, мрак греховный и уныние разгоняя. Не лиши, о, Всеблагая, Твоего заступления и нас, в житейском море треволнениями обуреваемых, обаче от сердца приносящих Ти благохваления сия:

Радуйся, сильным Твоим заступлением от всех бед нас избавляющая.

Радуйся, от труса и потопа нас защищающая.

Радуйся, от глада душевнаго и телеснаго нас снабдевающая.

Радуйся, огнь росою молитв Твоих угашающая.

Радуйся, от смертнаго губительства нас спасающая.

Радуйся, в бранех крепкая Помощнице.

Радуйся, от нашествия иноплеменных нас ограждающая.

Радуйся, от междоусобныя брани охраняющая.

Радуйся, плавающих легкое по водам прехождение.

Радуйся, путешествующих добрая Водительнице.

Радуйся, пленных свобождение.

Радуйся, от належащаго праведнаго прещения Божия скорое избавление.

Радуйся, Владычице, в скорбех и печалех нас присно утешающая.

Кондак 12

Благодать Божественную и милость испроси нам, Всемилостивая Владычице, у Сына Твоего и Бога, да, тою укрепляеми и направляеми, по пути сем многоскорбнем неуклонно шествовати возможем. Ты же, о, Богомати, от всякаго зла сохрани нас, под осенение иконы Твоея святыя прибегающих и со умилением о Тебе вопиющих: Аллилуиа.

Икос 12

Поюще Твоя милости и чудеса, Богородительнице, бывшая в древния и настоящая времена, хвалим, славим и величаем Тя, честнейшую воистину Херувим и славнейшую без сравнения Серафим, и, припадая к пречестному образу Твоему, умильно сей лобызаем, с трепетом и любовию воспевая Ти сице:

Радуйся, непостыдное наше упование в животе и по преставлении нашем.

Радуйся, уповающим на Тя мирен конец жития сего подающая.

Радуйся, в день судный наша Надеждо и Защищение.

Радуйся, Судии Праведнаго умоление.

Радуйся, геенны вечныя избавление.

Радуйся, Надеждо вечнаго спасения.

Радуйся, ключу Царствия Христова.

Радуйся, двере райская.

Радуйся, мосте, к небесем преводяй.

Радуйся, всех кающихся грешников прибежище и благая Заступнице.

Радуйся, Ангелов радосте.

Радуйся, всех праведных славо и утешение.

Радуйся, Владычице, в скорбех и печалех нас присно утешающая.

Кондак 13

О, Всепетая Мати Сладчайшаго Господа нашего Иисуса Христа! Услыши глас скорбящих раб Твоих и приими сие малое моление наше, от любящих сердец Тебе приносимое: избави нас от всяких бед, скорбей и напастей, недуги наша исцели, всяку злобу и вражду отжени от нас и причастниками жизни вечныя соделай о Тебе благодарно зовущих: Аллилуиа.

[Се́й конда́к глаго́лется три́жды.]
[Далее повторяем 1‑е икос и кондак:]

Икос 1

Ангел множество и вся Небесная Воинства славят Тя непрестанно на небеси, Владычице, и мы, земнороднии, исполненнии радости духовныя, притекающе к цельбоносней иконе Твоей, из глубины сердца приносим Ти глаголы сия:

Радуйся, Божие ко грешным благоволение.

Радуйся, кающихся пред Господом Богом крепкое заступление.

Радуйся, падшаго Адама воззвание.

Радуйся, слез Евиных избавление.

Радуйся, греховную отъемлющая скверну.

Радуйся, бане, омывающая совесть.

Радуйся, рождшая Избавителя, беззакония наша туне очищающаго.

Радуйся, всечудное всех к Богу примирение.

Радуйся, мосте, воистину преводяй нас от смерти к животу.

Радуйся, мир от потопа греховнаго спасшая.

Радуйся, лествице небесная, Еюже Господь к нам сниде.

Радуйся, вина всех обожения.

Радуйся, Владычице, в скорбех и печалех нас присно утешающая.

Кондак 1

Взбранней Воеводе Владычице нашей Богородице, даровавшей нам пречудную икону Свою «В скорбех и печалех Утешение», благодарственное приносим пение. Ты же, Пренепорочная, приими молитвы наша и от всяких бед заступи рабы Твоя, с верою и любовию вопиющия Ти: Радуйся, Владычице, в скорбех и печалех нас присно утешающая.

Молитва

К кому возопию, Владычице? К кому прибегну в горести моей, аще не к Тебе, Царице Небесная? Кто плач мой и воздыхание мое приимет, аще не Ты, Пренепорочная, Надеждо христиан и Прибежище нам, грешным? Кто паче Тебе в напастех защитит? Услыши убо стенание мое и приклони ухо Твое ко мне, Владычице Мати Бога моего, и не презри мене, требующаго Твоея помощи, и не отрини мене, грешнаго. Вразуми и научи мя, Царице Небесная; не отступи от мене, раба Твоего, Владычице, за роптание мое, но буди мне Мати и Заступница. Вручаю себе милостивому покрову Твоему: приведи мя, грешнаго, к тихой и безмятежной жизни, да плачуся о гресех моих. К кому бо прибегну повинный аз, аще не к Тебе, упованию и прибежищу грешных, надеждою на неизреченную милость Твою и щедроты Твоя окриляемь? О, Владычице, Царице Небесная! Ты мне упование и прибежище, покров и заступление и помощь. Царице моя Преблагая и скорая Заступнице, покрый Твоим ходатайством моя прегрешения, защити мене от враг видимых и невидимых; умягчи сердца злых человек, возстающих на мя. О, Мати Господа моего Творца! Ты еси корень девства и неувядаемый цвет чистоты. О, Богородительнице! Ты подаждь ми помощь немощствующему плотскими страстьми и болезнующему сердцем, едино бо Твое и с Тобою Твоего Сына и Бога нашего имам заступление; и Твоим пречудным заступлением да избавлюся от всякия беды и напасти, о, Пренепорочная и Преславная Божия Мати Марие. Темже со упованием глаголю и вопию: радуйся, Благодатная, радуйся, Обрадованная, радуйся, Преблагословенная, Господь с Тобою! Аминь.

глас 8

Пе́снь 1

Ирмо́с: Во́ду проше́д, я́ко су́шу, и еги́петскаго зла́ избежа́в, изра́ильтянин вопия́ше: Изба́вителю и Бо́гу на́шему пои́м.

Бо́жиею благода́тию озари́ мя́, Богоблагода́тная, благогове́йно пе́ти пред свято́ю ико́ною Твое́ю Тебе́, необори́му Засту́пницу и держа́ву неразруши́му ста́да Твоего́.

Тя́, Всенепоро́чная, и́мамы предста́тельство, Отра́ду же и Утеше́ние. Сего́ ра́ди, сла́вяще бла́гость Твою́, мо́лимтися: поми́луй на́с.

Храни́тельница су́щи Горы́, наше́дшим разбо́йником на оби́тель Ватопе́дскую не предала́ еси́, Госпоже́, рабо́в Твои́х в ру́ки вра́жия.

Кто́ подо́бен Тебе́, Де́во, сла́вно творя́щая чудеса́? Наста́вив бо и́ноки пра́вдою Сы́на Твоего́, е́же боя́тися Его́, изба́вила и уте́шила еси́ и́х кре́постию Твое́ю.

Сла́ва: Врачевско́ е́сть е́же ре́зати и жещи́, здра́вия вино́вное, но Ты́ на́с, Сы́не Бо́жий, мя́гкими лечба́ми щедро́т Твои́х уврачу́й, Ма́тере Твоея́ мольба́ми.

И ны́не: Услы́ши, Блага́я, мольбы́ христоимени́тых люде́й, при́зри на озлобле́ние утесня́емых, ви́ждь сле́зы су́щих в ско́рбех и умилосе́рдитися потщи́ся на рабы́ Твоя́.

Пе́снь 3.

Ирмо́с: Ты́ еси́ утвержде́ние притека́ющих к Тебе́, Го́споди, Ты́ еси́ Све́т омраче́нных, и пое́т Тя́ ду́х мо́й.

Под кро́в Тво́й притека́ем, лю́дие Твои́, Засту́пница бу́ди на́м, Влады́чице, подаю́щи отра́ду и утеше́ние пою́щим Тя́.

Возвесели́шася ватопе́дцы о спасе́нии Твое́м, Де́во, немощству́ющих бо препоя́сала еси́ си́лою на прогна́ние разбо́йников.

Не преста́й, Всеми́лостивая Госпоже́, спаса́ти рабы́ Твоя́ от неча́емых напа́стей, да благода́рственно сла́вим Тя́.

Моли́, Богороди́тельнице, е́же изба́витися на́м вся́каго гне́ва и преще́ния Бо́жия, Тебе́ почита́ющим.

Сла́ва: Хода́таица благоприя́тная и си́льная к Бо́гу, прегреше́ний оставле́ние испроси́ на́м у Него́, Богоневе́сто.

И ны́не: Смертоно́сных неду́гов душе́вных и теле́сных изми́ ны́, Влады́чице, ве́чнующую Жи́знь ми́ру ро́ждшая.

Седа́лен.

Ви́димыми и неви́димыми враги́ окружа́емии, к Тебе́, Де́во, прибега́юще, зове́м: не удали́ по́мощь Твою́ от на́с, я́коже от и́ноков ватопе́дских не удали́ла еси́, но держа́вною си́лою Твое́ю побори́ борю́щыя ны́, ми́рное и Богоуго́дное житие́ на́м устроя́ющи.

Пе́снь 4.

Ирмо́с: Услы́шах, Го́споди, смотре́ния Твоего́ та́инство, разуме́х дела́ Твоя́ и просла́вих Твое́ Божество́.

Убоя́ся се́рдце игу́мена в моли́тве усте́н его́ от гла́са Твоего́, Богома́ти, и преще́ния Сы́на Твоего́, и смяте́ся кре́пость его́ возвеще́ну бы́вшу нападе́нию от разбо́йников.

Внегда́ смути́тися Ватопе́ду во гне́ве Твое́м, Го́споди, ми́лость Твою́ помяну́л еси́ предста́тельством Присноде́вы, от Нея́же яви́лся еси́ на спасе́ние люде́й Твои́х.

Не преда́ждь в ру́ки враго́в насле́дие Твое́, Чи́стая, да не когда́ реку́т: где́ е́сть Богороди́тельница, на Ню́же упова́ша? но не вре́дно и ненаве́тно соблюди́ ста́до Твое́.

Сла́ва: Свято́му о́бразу Твоему́ припа́дающе, мо́лим Тя́: разори́ сове́ты хотя́щих на́м зла́я и живо́т на́ш напра́ви твори́ти в ми́ре Боже́ственную во́лю Сы́на Твоего́.

И ны́не: Во искуше́ниих бу́ди на́м, Влады́чице, спаси́тельное прибе́жище, в боле́знех врачева́ние, во обурева́нии ти́хое приста́нище и в ско́рбех Отра́да и Утеше́ние.

Пе́снь 5.

Ирмо́с: Вску́ю мя́ отри́нул еси́ от лица́ Твоего́, Све́те Незаходи́мый, и покры́ла мя́ е́сть чужда́я тьма́, окая́ннаго, но обрати́ мя́ и к све́ту за́поведей Твои́х пути́ моя́ напра́ви, молю́ся.

Сте́ну тве́рду и сто́лп непоколеби́м Тя́ и́мать Гора́ в наше́ствиях ва́рварских: студа́ бо исполня́еши вра́жия ли́ца и возвраща́тися твори́ши и́м вспя́ть тще́тным и безде́льным, Влады́чице.

Ма́тернее промышле́ние о су́щих в Горе́ иму́щей Ти́, стра́ха ра́ди Сы́на Твоего́, Де́во, поболе́ Ватопе́д, уве́дев о разбо́йницех, и роди́ ду́х спасе́ния предста́тельством Твои́м, Преблагослове́нная.

Я́ко же настоя́теля Ватопе́дскаго, по у́трени бде́вша и моли́вшася, наста́вила еси́, Блага́я, ка́ко спасти́ся от напа́сти, та́ко и на́м пода́ждь тща́ние от но́щи у́треневати к Бо́гу и ко спасе́нию наста́ви ны́, избавля́ющи от все́х бе́д.

Я́коже запрети́ла еси́, Госпоже́, отверза́ти врата́ гото́вой су́щей поги́бели от враго́в, та́ко положи́ в на́с благода́тную две́рь огражде́ния, да не обря́щется вхо́да всезло́бным губи́телем и и́х пле́велом.

Сла́ва: Я́ко же повеле́ла еси́, Влады́чице, возше́дше на сте́ны, разгна́ти разбо́йники, та́ко укрепи́ бы́ти на́м на четверосте́нии му́жества и пра́вды, му́дрости и целому́дрия, да отража́ем борю́щыя ны́.

И ны́не: Я́ко же уми́лостивила еси́, Де́во, Сы́на Твоего́, прогне́вавшася на су́щия в Ватопе́де, та́ко умилостивля́й Его́ о на́с, во мно́гия грехи́ впа́дающих, мно́го бо мо́жет моле́ние ма́тернее ко благосе́рдию Влады́ки.

Пе́снь 6.

Ирмо́с: Моли́тву пролию́ ко Го́споду и Тому́ возвещу́ печа́ли моя́, я́ко зо́л душа́ моя́ испо́лнися и живо́т мо́й а́ду прибли́жися, и молю́ся, я́ко Ио́на: от тли́, Бо́же, возведи́ мя́.

Возвеща́юще Ти́ печа́ли на́ша, мо́лимтися, Ма́ти Бо́жия: обвесели́ благода́тию Твое́ю скорбя́щих сердца́, все́х Ра́досте, и от тли́ возведи́ ны́.

Не стяжа́хом на земли́ ино́го утеше́ния и кре́пкаго заступле́ния, ра́зве Тебе́, Всеблага́я, покры́й у́бо от вся́каго зла́ любо́вию воспева́ющих Тя́.

Благосты́ню и ми́лость прие́млем от Сы́на Твоего́, Де́во, моли́твами Твои́ми: от молвы́ бо храни́ши ны́, смуще́ния, лови́твы и вся́каго кова́рства вра́жия, Всепе́тая.

Сла́ва: Ми́ру Спаси́тельнице, необори́мою си́лою Твое́ю не преста́й соблюда́ти ста́до Твое́, зову́щее: Отра́да и Утеше́ние на́ше Ты́ еси́, Благослове́нная.

И ны́не: Все́х благи́х вина́, сме́ртных оживле́ние, поги́бших взыска́ние, изба́ви, Госпоже́, рабы́ Твоя́ от напра́сныя сме́рти и от тли́ грехо́вныя возведи́ ны́.

Конда́к, гла́с 8‑й.

Взбра́нной Воево́де победи́тельная, я́ко изба́вльшеся от злы́х, благода́рственная воспису́ем Ти́, раби́ Твои́, Богоро́дице, но я́ко иму́щая держа́ву непобеди́мую, от вся́ких на́с бе́д свободи́, да зове́м Ти́: Ра́дуйся, Неве́сто Неневе́стная.

И́кос.

А́нгели Тя́, Ма́терь Бо́га на́шего, пе́сньми славосло́вят, и мы́ земни́и воспева́ем ра́достно Тебе́ вопию́ще: ра́дуйся, Светода́вца селе́ние, Е́юже лучи́ спасе́ния ми́рови возсия́ша; ра́дуйся Обра́дованная, Е́юже исполня́емся Боже́ственнаго весе́лия. Ра́дуйся, две́ре Восто́ка, от вра́т смертоно́сных греха́ на́с отводя́щая; ра́дуйся, свети́льниче пресве́тлый, просвеща́яй омраче́нных. Ра́дуйся, бе́здно Бо́жия к на́м человеколю́бия; ра́дуйся, цены́ вся́кия превы́сший да́р, на́м от Бо́га дарова́нный. Ра́дуйся, я́ко и́маши ве́лие к Нему́ дерзнове́ние; ра́дуйся, стра́же Афо́на и та́мо обита́ющих Храни́тельнице. Ра́дуйся, всекре́пкая стено́, Е́юже сохраня́емся необори́мы враги́ христиа́нскими; ра́дуйся, я́зво неви́димых враго́в и от ни́х уязвля́емых врачева́ние. Ра́дуйся, безси́льных си́ло и по́моще безпомо́щных; ра́дуйся, Отра́до и Утеше́ние скорбя́щих. Ра́дуйся, Неве́сто Неневе́стная.

Пе́снь 7.

Ирмо́с: От Иуде́и доше́дше, о́троцы в Вавило́не иногда́ ве́рою Тро́ическою пла́мень пе́щный попра́ша, пою́ще: отце́в Бо́же, благослове́н еси́.

Вопло́щся от утро́бы Твоея́ Госпо́дь, госпо́дствуяй тва́рию, и Тебе́, Де́во, Госпожу́ показа́ ви́димым же все́м и неви́димым, я́ко Ма́терь Свою́ прославля́я Тя́.

Согреши́хом, Го́споди, но не отступи́хом от Тебе́ и ино́го не ве́мы, ра́зве Тебе́, не преда́ждь на́с до конца́ Ма́тере Твоея́ мольба́ми, отце́в Бо́же благослове́нный.

Гора́ Бо́жия осене́нная, Всечи́стая, покры́й су́щия в Горе́ се́нию Твои́х моли́тв и от се́ти ловя́щих изба́ви пою́щия: оте́ц на́ших Бо́же, благослове́н еси́.

Сла́ва: Непобеди́мая еси́ кре́пость, Госпоже́, и несокруши́мое огражде́ние с ве́рою призыва́ющих Тя́: разруша́еши бо сове́ты вооружа́ющихся на сла́вящия Тебе́.

И ны́не: Уныва́ющим Отра́до, печа́льным Утеше́ние, заблужда́ющим Наста́внице, соблюди́ на́с, Де́во, от вся́каго зла́, чту́щих святы́й о́браз Тво́й.

Пе́снь 8.

Ирмо́с: Царя́ Небе́снаго, Его́же пою́т во́и А́нгельстии, хвали́те и превозноси́те во вся́ ве́ки.

Преблагослове́нная Ма́ти Всеще́драго Бо́га, уще́дри ны́, недосто́йныя, дара́ми милосе́рдия Твоего́, да превозно́сим Тя́ во ве́ки.

Кре́пость и держа́ва бу́ди рабо́м Твои́м, Всецари́це, си́ла, ору́жие и ме́ч, враги́ спасе́ния секу́щий, да сла́вим Тя́ во ве́ки.

Сия́ющая па́че А́нгел святы́нею, храни́ на́с, Всенепоро́чная, от грехо́вных дея́ний, глаго́ланий и помышле́ний, да благословля́ем Тя́ во ве́ки.

Освяти́, Всесвята́я, благогове́йно лобыза́ющих святу́ю ико́ну Твою́ и Твои́м ма́терним дерзнове́нием ми́лостива на́м твори́ Сы́на Твоего́, да пое́м Его́ во ве́ки.

Сла́ва: Отра́до и Утеше́ние моля́щихся Тебе́, вре́менных и ве́чных лю́тых изба́ви ны́, да хва́лим Тя́ и Сы́на Твоего́ превозно́сим во вся́ ве́ки.

И ны́не: Пу́ть и Живо́т, Де́во, ро́ждшая, стопы́ на́ша напра́ви по словеси́ Бо́жию, да, живо́т ве́чный насле́довавше, пое́м Тя́, Сы́на Твоего́ превознося́ще во вся́ ве́ки.

Пе́снь 9.

Ирмо́с: Проявле́нное на горе́ законополо́жнику во огни́ и купине́ Рождество́ Присноде́вы в на́ше, ве́рных, спасе́ние пе́сньми немо́лчными велича́ем.

Весели́ся, Ватопе́де, неусы́пная бо Афо́на Назира́тельница я́же на Тя́ кова́рство вра́жие ма́нием Свои́м разруши́ и изгна́ны сотвори́ разруше́ние Тебе́ угото́вавшия.

О, вели́каго дерзнове́ния Твоего́, Де́во, к Бо́гу и благоутро́бия к рабо́м Твои́м! Возвеща́ющи бо о вразе́х, уклони́ла еси́ лице́ Свое́ от руки́ Сы́на Твоего́, я́коже до ны́не зри́шися на ико́не Твое́й.

Пото́к све́тлости, отра́ды и утеше́ния неистощи́мый Ты́ еси́, Богора́дованная Ма́ти Све́та, тьму́ у́бо страсте́й прожени́ от на́с, обстоя́щих све́тлое подо́бие лица́ Твоего́, и несвети́маго огня́ изба́ви.

Спасе́ние бу́ди при́сное, Госпоже́, от вра́г на́ших и из руки́ все́х, ненави́дящих на́с, и напра́ви но́ги на́ша на пу́ть ми́рен милосе́рдия ра́ди ми́лости Сы́на Твоего́ и Бо́га на́шего, Преблагослове́нная.

Сла́ва: Влады́чествующая все́ми я́ко Всецаря́ Ма́терь, стране́ на́шей пода́ждь благоде́нствие, ми́р, спасе́ние и на сопоста́ты побе́ды и одоле́ние.

И ны́не: Моле́бное пе́ние от души́ принесо́х со стра́хом Тебе́, Де́во, ро́ждшей Христа́ Бо́га, Его́же моля́щи, благоприя́тна сотвори́ моле́ния на́ша, да Тя́ пе́сньми немо́лчными велича́ем.

Тропа́рь, гла́с 4‑й.

К Богоро́дице приле́жно ны́не притеце́м, гре́шнии и смире́ннии, и припаде́м, в покая́нии зову́ще из глубины́ души́: Влады́чице, помози́, на ны́ милосе́рдовавши, потщи́ся, погиба́ем от мно́жества прегреше́ний. Не отврати́ Твоя́ рабы́ тщи́, Тя́ бо и еди́ну наде́жду и́мамы.