Икона Богородицы «Одигитрия» Смоленская

Молитва Пресвятой Богородице пред иконой Ея «Одигитрия» Смоленская

К кому́ возопию́, Влады́чице? К кому́ прибе́гну в го́рести мое́й, а́ще не к Тебе́, Цари́це Небе́сная? Кто плач мой услы́шит и воздыха́ние прии́мет, а́ще не Ты, Пренепоро́чная, Наде́ждо христиа́н и Прибе́жище нам, гре́шным? Кто па́че Тебе́ в несча́стиих защити́т? Услы́ши стена́ние мое́ и приклони́ у́хо Твое́ ко мне, Влады́чице и Ма́ти Бо́га моего́. Не пре́зри и́щущаго Твоея́ по́мощи и не отри́ни мене́ гре́шнаго, Цари́це Небе́сная! Научи́ мене́ исполня́ти во́лю Сы́на Твоего́ и да́руй жела́ние всегда́ сле́довати Его́ святы́м за́поведем. За мой ро́пот в боле́знях, труда́х и несча́стиях не отступи́ от мене́, но бу́ди Ма́терию и Покрови́тельницею мене́ малоду́шнаго, Цари́це моя́ Преблага́я, Засту́пнице Усе́рдная! Твои́м хода́тайством прегреше́ния моя́ покры́й, от ви́димых и неви́димых враго́в защити́, сердца́ вражду́ющих про́тив мене́ смягчи́ и Христо́вою любо́вию согре́й их. Мне же немощно́му да́руй Твою́ всеси́льную по́мощь победи́ти моя́ грехо́вныя привы́чки, да́бы, очи́щенный покая́нием и после́дующею доброде́тельною жи́знию, в обще́нии со Свято́ю Це́рковью прове́л остальны́я дни земна́го стра́нствия. Предста́ни мне, Наде́ждо всех христиа́н, в час кончи́ны моея́ и подкрепи́ мою́ ве́ру в сме́ртный тя́жкий час. Вознеси́ за мене́, многопрегреша́ющаго в жи́зни сей, Твоя́ всеси́льныя моли́твы по отше́ствии мое́м, да оправда́ет мене́ Госпо́дь и соде́лает прича́стником Его́ бесконе́чных ра́достей. Ами́нь.

Молитва 2-я Пресвятой Богородице пред иконой Ея «Одигитрия» Смоленская

К кому́ возопию́, Влады́чице? К кому́ прибе́гну в го́рести мое́й, а́ще не к Тебе́, Госпоже́ Влады́чице Богоро́дице, Цари́це Небе́сная? Кто́ пла́ч мо́й и воздыха́ние мое́ прии́мет, а́ще не Ты́, о, Пренепоро́чная, Наде́ждо христиа́н и Прибе́жище гре́шным? Приклони́, о, Пречи́стая Влады́чице, ушеса́ Твоя́ к моле́нию моему́, Ма́ти Бо́га моего́, не при́зри мя́, тре́бующа Твоея́ по́мощи, услы́ши стена́ние мое́ и во́пль се́рдца моего́ внуши́, о, Госпоже́ Богоро́дице Цари́це. И пода́ждь ми́ ра́дость душе́вную, подкрепи́ мя́ нетерпели́ваго, уны́лаго и неради́ваго к Твоему́ хвале́нию. Вразуми́ и научи́ мя́, ка́ко Тебе́ моли́тися подоба́ет, и не отступи́ от мене́, Ма́ти Бо́га моего́, за ропта́ние и нетерпе́ние мое́, но бу́ди ми́ покро́в и заступле́ние в жи́зни мое́й и приведи́ мя́ к ти́хому приста́нищу блаже́ннаго о́наго поко́я, и сопричти́ мя́ к ли́ку избра́ннаго Твоего́ ста́да и та́мо удосто́й мя́ воспева́ти и сла́вити Тя́ во ве́ки. Ами́нь.

Молитва 3-я Пресвятой Богородице пред иконой Ея «Одигитрия» Смоленская

О, Пречу́дная и Превы́шшая все́х тва́рей Цари́це Богоро́дице, Небе́снаго Царя́ Христа́ Бо́га на́шего Ма́ти, Пречи́стая Одиги́трие Мари́е! Услы́ши на́с гре́шных и недосто́йных в ча́с се́й моля́щихся и припа́дающих к Твоему́ Пречи́стому О́бразу со слеза́ми и умиле́нно глаго́лющих: изведи́ на́с от ро́ва страсте́й, Влады́чице Преблага́я, изба́ви на́с от вся́кия ско́рби и печа́ли, огради́ от вся́кия напа́сти и злы́я клеветы́, и от непра́веднаго и лю́таго наве́та вра́жия. Мо́жеши бо, о, Благода́тная Ма́ти на́ша, от вся́каго зла́ сохрани́ти лю́ди Твоя́ и вся́ким благодея́нием снабди́ти и спасти́; ра́зве Тебе́ ины́я Предста́тельницы в беда́х и обстоя́ниях, и те́плыя Хода́таицы о на́с, гре́шных, не и́мамы. Умоли́, Госпоже́ Пресвята́я, Сы́на Твоего́ Христа́ Бо́га на́шего, да удосто́ит на́с Ца́рствия Небе́снаго; сего́ ра́ди всегда́ сла́вим Тя́, я́ко Вино́вницу спасе́ния на́шего, и превозно́сим свято́е и великоле́пное и́мя Отца́ и Сы́на и Свята́го Ду́ха, в Тро́ице сла́вимаго и поклоня́емаго Бо́га, во ве́ки веко́в. Ами́нь.

Кондак 1

Избра́нней от все́х родов Бо́жией Ма́тери и Цари́це, Пресвято́й Одиги́трии, я́ко изба́вльшеся от ве́чныя сме́рти благода́тию ро́ждшагося от Нея́ Христа́ Бо́га и на пу́ть спасе́ния направля́еми Ма́терним Ея́ попече́нием, благода́рственное прино́сим пе́ние; Ты́ же, всеми́лостивая на́ша засту́пнице и путеводи́тельнице, от вся́ких на́с бе́д свобожда́й и к ца́рствию го́рнему руково́дствуй зову́щих Ти́ ра́достию: Ра́дуйся, Богоро́дице Одиги́трие, христиа́н упова́ние.

Икос 1

Арха́нгельский гла́с вопие́м Ти́, Чи́стая: ра́дуйся, благода́тная Одиги́трие Мари́е, и ра́дости духо́вныя испо́лни на́с, да благоговейною душе́ю и чи́стым се́рдцем принесе́м Ти́, ро́ждшей ми́ру Спаси́теля Христа́ Бо́га на́шего, глаго́лы сия́:

Ра́дуйся, Бо́га Отца́ благоволе́нием осене́нная; ра́дуйся, Бо́га Сы́на Ма́ти неискусобра́чная.

Ра́дуйся, Бо́га Ду́ха Свята́го оби́теле свяще́нная; ра́дуйся, Тро́ическия та́йны проявле́ние.

Ра́дуйся, а́нгельских умо́в удивле́ние; ра́дуйся, челове́ческаго ро́да украше́ние.

Ра́дуйся, го́рния с до́льними совокупи́вшая; ра́дуйся, врата́ ра́йская земноро́дным отве́рзшая.

Ра́дуйся, ле́ствице небе́сная; ра́дуйся, ста́мно богоприи́мная.

Ра́дуйся, купино́ неопали́мая; ра́дуйся, трапе́зо пресвята́я.

Ра́дуйся, Богоро́дице Одиги́трие, христиа́н упова́ние.

Кондак 2

Ви́девши ико́ну пресвята́го Твоего́ ли́ка, Богоро́дице Де́во, ю́же боже́ственный евангели́ст Лу́ка написа́ и к Тебе́ принесе́, благоволи́ла еси́ о не́й и рекла́ еси́ пречи́стыми усты́ Твои́ми: «С се́ю ико́ною благода́ть Моя́ и си́ла». Таково́е обетова́ние Твое́ уве́девше, благогове́йно почита́ем пресвяты́й о́браз Тво́й, Влады́чице, и воспева́ем Сы́ну Твоему́ и Бо́гу: Аллилу́ия.

Икос 2

Уразуме́в благоволе́ние Твое́, Богоро́дице, к напи́санней ико́не Твое́й, апо́стол и евангели́ст Лу́ка дарова́ ю́ в благослове́ние и освяще́ние Христо́вой Це́ркви во Антиохи́и, в не́йже Одиги́трия она́ наименова́ся, си́есть Путеводи́тельница и Наста́вница, и чудесы́ боже́ственными просла́вися; о се́м благодаря́ще Тя́, Госпоже́ всеблага́я, я́ко подо́бие пречи́стаго ли́ка Твоего́ во утеше́ние на́м оста́вила еси́, усе́рдно Тебе́ вопие́м:

Ра́дуйся, Цари́це го́рних и до́льних; ра́дуйся, Влады́чице а́нгелов и челове́ков.

Ра́дуйся, ми́ра умире́ние; ра́дуйся, дре́вния вражды́ разруше́ние.

Ра́дуйся, де́вства сто́лпе; ра́дуйся, смире́ния глубино́.

Ра́дуйся, облече́нная в со́лнце; ра́дуйся, сия́ющая боже́ственною сла́вою.

Ра́дуйся, Ма́ти Све́та невече́рняго; ра́дуйся, раю́ сла́дости небе́сныя.

Ра́дуйся, вертогра́де Христо́в благоуха́нный; ра́дуйся, о́дре Царя́ вели́каго.

Ра́дуйся, Богоро́дице Одиги́трие, христиа́н упова́ние.

Кондак 3

Си́лою Бо́жиею чудеса́ преди́вная соверша́хуся от ико́ны Твоея́ Одиги́трии, Богома́ти Влады́чице, егда́ принесе́на бы́сть она́ из Антиохи́и в Царьгра́д и, в пресла́внем Влахе́рнстем хра́ме поста́вленная, исцеле́ние боля́щим подава́ше, слепы́я просвеща́ше, вся́ку я́зву в лю́дех врачева́ше, благода́тию Твое́ю, Богоро́дице, да вси́ зове́м просла́вльшему Тя́ Бо́гу: Аллилу́ия.

Икос 3

Име́яше Тя́ Царьгра́д засту́пницу держа́вную, Богоро́дице Де́во, и во дни́ нападе́ния на него́ враго́в си́льных и бранеиску́сных по́мощь Твою́ чуде́сную от святы́я ико́ны Твоея́ Одиги́трии получа́ше многочуде́сно, те́мже мо́лимся Тебе́, Всеблага́я, я́коже дре́вле гра́д о́ный мно́гажды от поги́бели спасла́ еси́, та́ко и на́с смире́нных спаси́ от поги́бели ве́чныя Ма́терним предста́тельством Твои́м ко Христу́ Бо́гу, да благода́рно Тебе́ зове́м:

Ра́дуйся, сто́лпе о́гненный, зно́й страсте́й умеря́ющий; ра́дуйся, сто́лпе о́блачный, мра́к грехо́в разгоня́ющий.

Ра́дуйся, засту́пнице усе́рдная моли́твенно Тя́ призыва́ющих; ра́дуйся, помо́щнице ско́рая в беда́х к Тебе́ притека́ющих.

Ра́дуйся, похвало́ же́н и де́в сла́во; ра́дуйся, Царьгра́да кре́пкое огражде́ние.

Ра́дуйся, Влахе́рнскаго хра́ма благода́тное сокро́вище; ра́дуйся, враго́в Правосла́вия посрамле́ние.

Ра́дуйся, нечести́вых ра́тей одоле́ние; ра́дуйся, ча́д Христо́вых предводи́тельнице к побе́дам.

Ра́дуйся, богому́дрых святи́телей споспе́шнице во благове́стии Христо́ве; ра́дуйся, па́стырем пасти́ ста́до свое́ посо́бствующая.

Ра́дуйся, Богоро́дице Одиги́трие, христиа́н упова́ние.

Кондак 4

Бу́рею морско́ю корабли о́наго прего́рдаго кага́на, гра́д Тво́й плени́ти восхоте́вшаго, сокруши́ла еси́, Влады́чице, и побе́ду на́д ни́м лю́дем христоимени́тым дарова́ла еси́ от святы́я ико́ны Свое́й Одиги́трии, лучи́ све́та небе́снаго распространя́ющи и во́и правосла́вныя и́ми просвеща́ющи, да вси́ уве́дят, я́ко Ты́ еси́ вои́стинну воево́да держа́вная Царьгра́да, и просла́вят Твоя́ ми́лости и чудеса́, воспева́юще Спаси́телю Бо́гу: Аллилу́ия.

Икос 4

Слы́шавше о чудеса́х Твои́х пресла́вных, Богоро́дице Де́во, я́же от ико́ны Твоей Одиги́трии яви́ла еси́ в Царьгра́де, недоумева́ем, ка́ко ико́на та́, носи́мая по сто́гнам гра́да, си́лою боже́ственною носи́вших ю́ управля́ше и стопы́ и́х по во́ле Твое́й направля́ше; напра́ви у́бо, Влады́чице, и на́ша стопы́ на пу́ть за́поведей Христо́вых и научи́ на́с ве́рно испо́лнити святу́ю во́лю Сы́на Твоего́ и Бо́га, да Тебе́ вопие́м си́це:

Ра́дуйся, свеще́ неугаси́мая; ра́дуйся, звездо́ незаходи́мая.

Ра́дуйся, сия́ющая све́том боже́ственным; ра́дуйся, просвеща́ющая благода́тию ду́ши ве́рных.

Ра́дуйся, Христо́во благоуха́ние; ра́дуйся, земли́ освяще́ние.

Ра́дуйся, ча́ше, че́рплющая ра́дость всему́ ми́ру; ра́дуйся, исто́чниче, излива́яй ве́чную сла́дость.

Ра́дуйся, черто́же благоукраше́нный Царя́ царе́й; ра́дуйся, пала́то све́тлая Го́спода господе́й.

Ра́дуйся, рая́ красне́йшая; ра́дуйся, у́тра светле́йшая.

Ра́дуйся, Богоро́дице Одиги́трие, христиа́н упова́ние.

Кондак 5

Боготе́чная звезда́, ико́на Твоя́ Одиги́трия, Богома́ти Влады́чице, благоволе́нием Твои́м от Царьгра́да в страну́ Росси́йскую принесе́ся и гра́ду Смоле́нску в насле́дие благода́тное дарова́ся от благове́рнаго вели́каго кня́зя Влади́мира Монома́ха; те́мже благодари́м Тя́, Госпоже́ всеми́лостивая, я́ко таковы́й да́р святы́й оте́честву на́шему дарова́ла еси́, и пое́м в Троице сла́вимому Бо́гу: Аллилу́ия.

Икос 5

Ви́девше пресла́вное заступле́ние Твое́ гра́да Смоле́нска, Пречи́стая Влады́чице, прославля́ем великую Твою́ ми́лость, е́юже гра́д се́й от разоре́ния Баты́ева чуде́сно спасла́ еси́, гла́сом боже́ственным от ико́ны Одиги́трии уго́дника Христо́ва Мерку́рия на единобо́рство с предводи́телем ра́ти Баты́евой посла́вши, его́же о́н мече́м свои́м порази́ и гра́д Тво́й от разоре́ния изба́ви, и са́м венце́м му́ченическим увенча́ся, и со святы́ми сопричте́ся; того́ моли́твами небе́сными сподо́би на́с на земли́ неосужде́нно взыва́ти к Тебе́:

Ра́дуйся, гра́да Смоле́нска кре́пкое защище́ние; ра́дуйся, страны́ Росси́йския благода́тное утеше́ние.

Ра́дуйся, Це́ркви Христо́вой боголе́пное украше́ние; ра́дуйся, лю́бящих при́сное ра́дование.

Ра́дуйся, утоли́тельнице печа́лей; ра́дуйся, изба́вительнице от пле́на и пораже́ния.

Ра́дуйся, боля́щих исцеле́ние; ра́дуйся, уныва́ющих ободре́ние.

Ра́дуйся, му́ченика Христо́ва Мерку́рия на по́двиг ра́тный укрепи́вшая; ра́дуйся, гла́сом от ико́ны Твоея́ святы́я его́ воодушеви́вшая.

Ра́дуйся, я́ко Дави́да на Голиа́фа, побе́дою его́ увенча́вшая; ра́дуйся, гра́д Тво́й от разоре́ния изба́вившая.

Ра́дуйся, Богоро́дице Одиги́трие, христиа́н упова́ние.

Кондак 6

Пропове́дует страна́ Росси́йская ми́лости и чудеса́ Твоя́, пречи́стая Де́во Богоро́дице, и гра́д Смоле́нск све́тло красу́ется, име́я чудотво́рную ико́ну Твою́, вся́кия боле́зни исцеля́ющую и неду́жным здра́вие подава́ющую, сего́ ра́ди со благогове́нием почита́ем многоцеле́бный о́браз тво́й, Госпоже́ всеблага́я, и, покланя́ющеся ему́, я́ко зало́гу Твоего́ к на́м благоволе́ния, вопие́м Бо́гу: Аллилу́ия.

Икос 6

Возсия́ла есй стране́ Росси́йстей луча́ми боже́ственных чуде́с от святы́я ико́ны Твоея́ Одиги́трии, пречи́стая Влады́чице, к не́йже от ле́т дре́вних отцы́ на́ши прихожда́ху в ско́рбех и боле́знех и не тщи́ отхожда́ху, но приима́ху утеше́ния и цельбу́ душа́м и телесе́м, и́хже всле́д и мы к Тебе́ прихо́дим, Всеблага́я, и со благогове́нием и любо́вию лобыза́юще о́браз Тво́й чудотво́рный, мо́лимся Тебе́: утоли́ печа́ли на́ша, уврачу́й неду́ги на́ша, да зове́м Ти́:

Ра́дуйся, же́зле ста́рости; ра́дуйся, сто́лпе и утвержде́ние де́вства.

Ра́дуйся, вдови́ц заступле́ние; ра́дуйся, сиро́т призре́ние.

Ра́дуйся, младе́нцев воспита́ние; ра́дуйся, ни́щих снабде́ние.

Ра́дуйся, пле́нных свобожде́ние; ра́дуйся, скорбя́щих утеше́ние.

Ра́дуйся, и́ноков покрови́тельнице; ра́дуйся, и́нокинь наста́внице.

Ра́дуйся, по́стников укрепле́ние; ра́дуйся, подви́жников вразумле́ние.

Ра́дуйся, Богоро́дице Одиги́трие, христиа́н упова́ние.

Кондак 7

Хотя́щи дарова́ти гра́ду Москве́ прича́стие благода́ти чудотво́рныя ико́ны Твоея́ Одиги́трии, Влады́чице всеми́лостивая, благоволи́ла еси́, да пренесе́на бу́дет ико́на Твоя́ от Смоле́нска в Москву́ и, та́мо пребыва́ющи вре́мя не ма́ло, чудеса́ мно́гая соверша́ет; но а́ще и возвращена́ бы́сть в Смоле́нск по умоле́нию жи́телей его́, оба́че спи́сок ея́ в Москве́ оста́ся, и на ме́сте прохождения свята́го о́браза оби́тель де́в во и́мя Твое́ сооруди́ся[1], в не́йже под осене́нием чудотво́рныя Твоея́ ико́ны де́в ли́цы ти́хое приста́нище к чи́стому и богоуго́дному житию́ обрета́ют и воспева́ют немо́лчно пе́снь Бо́гу: Аллилу́ия.

Икос 7

Новосозда́нная оби́тель и́нокинь во гра́де Москве́ благогове́йно че́ствует свято́е подо́бие чудотво́рныя ико́ны Твоея́ Одиги́трии, пречи́стая Де́во Влады́чице, чудесы́ прославля́ющееся и ми́лости Твоя́ источа́ющее ве́рным, его́же осене́нием де́в ликостоя́ние благода́тно утеша́еши и в по́двизех поста́ и моли́твы утвержда́еши, подвиза́ющи и́х немо́лчно воспева́ти Ма́терния Твоя́ щедро́ты и благода́рно вопи́ти Тебе́:

Ра́дуйся, Бо́гом возлю́бленная Цари́це; радуйся, Бо́га возлюби́вшая Влады́чице.

Ра́дуйся, еди́на благослове́нная в жена́х; ра́дуйся, небе́сных ра́дование, земны́х заступле́ние.

Ра́дуйся, де́монов посрамле́ние, а́да попра́ние; ра́дуйся, укрепле́нная си́лою Го́спода си́л.

Ра́дуйся, облече́нная вла́стию Цари́цы не́ба и земли́; ра́дуйся, вои́нствующих на пло́ть целому́дрием блага́я помо́щнице.

Ра́дуйся, подвиза́ющихся в посте́ и безмо́лвии сла́дкая уте́шительнице; ра́дуйся и́ноком отра́до.

Ра́дуйся, Богоро́дице Одиги́трие, христиа́н упова́ние.

Кондак 8

Стра́нствие земно́е многоско́рбное и многомяте́жное услажда́еши на́м Ма́терним Твои́м о на́с попече́нием, Цари́це Богоро́дице, и во дни́ ско́рбных искуше́ний по́мощь Твою́ святу́ю явля́еши на́м во спасе́ние. Па́мятуем и испове́дуем, Влады́чице, Твое́ заступле́ние, егда́ га́ллы и с ни́ми двана́десять язы́ков на страну́ Росси́йскую наидо́ша и гра́д Москву́ плени́ша: Ты́ ико́ну Твою́ святу́ю Одиги́трию от Смоле́нска в полки́ во́инства Росси́йскаго благослови́ла еси́ принести́ и к побе́де на враго́в во́и правосла́вныя прису́тствием ея́ воодушеви́ла еси́, пресла́вное одоле́ние и́м дарова́вши предста́тельством Твои́м к Сы́ну Твоему́ и Бо́гу, Ему́же пое́м: Аллилу́ия.

Икос 8

Вся́ ми́лости и щедро́т преиспо́лненная, всеблага́я Ма́ти Бо́жия, от святы́я ико́ны Твоея́ Одиги́трии во́инству православноросси́йскому по́мощь и одоле́ние на враги́ си́льныя и бранеиску́сныя пресла́вно дарова́ла еси́, га́ллы с безче́стием от оте́чества на́шего отгна́ла еси́ и, егда́ не бе́ на́м уже́ спасе́ния наде́жды, я́ко и гра́д Москва́ плене́н и разоре́н бы́сть, побе́дою ди́вною на враги́ на́с увенча́ла еси́, да всегда́ па́мятующе таково́е Твое́ заступле́ние, хвале́бно Тебе́ вопие́м:

Ра́дуйся, изнемога́ющих си́лою свы́ше укрепля́ющая; ра́дуйся, безпомо́щным по́мощь Твою́ святу́ю подаю́щая.

Ра́дуйся, правосла́внаго во́инства держа́вная посо́бнице; ра́дуйся, инове́рных ра́тей всеси́льная победи́тельнице.

Ра́дуйся, ико́ною Твое́ю свято́ю с во́ины росси́йскими ми́лостиво пребыва́вшая; ра́дуйся, три ме́сяцы чудотво́рным о́бразом Твои́м полки́ и́х освяща́вшая.

Ра́дуйся, страну́ Росси́йскую от га́лльскаго наше́ствия преди́вно изба́вившая; ра́дуйся, го́рдых си́лою Свое́ю вспя́ть со стыдо́м возврати́вшая.

Ра́дуйся, оби́димых правосу́дная засту́пнице; ра́дуйся, ненаде́жных наде́ждо, печа́льных отра́до.

Ра́дуйся, Богоро́дице Одиги́трие, христиа́н упова́ние.

Кондак 9

Все́м ве́рным ра́достно и утеши́тельно е́сть взира́ти на ико́ну Твою́ святу́ю, Ма́ти Бо́жия, на не́йже Тя́ зри́м на Богомладе́нца Го́спода на́шего Иису́са Христа́ умиле́нно взира́ющую. Мо́лим Та́, Всеблага́я, я́ко Ма́терь вся́ содержа́щаго в десни́це Свое́й Влады́ки, воззри́ и на на́с ми́лостиво и умиле́нно, и умоли́ Его́ бла́гость поми́ловати на́с недосто́йных, научи на́с, Влады́чице, моли́тися Ему́ благоприя́тно и неосужде́нно и пе́ти Ему́ нескве́рными усты́ и чи́стым се́рдцем а́нгельскую пе́снь: Аллилу́ия.

Икос 9

Вити́йство на́ше пе́сненное не довле́ет к прославле́нию мно́гих Твои́х чуде́с, Богоро́дице Влады́чице, я́же от святы́я ико́ны Твоея́ Одиги́трии яви́ла еси́ и при́сно явля́еши ве́рным; оба́че Ты́, я́ко вои́стинну блага́я Ма́ти, ве́ру и усе́рдие на́ше вме́сто пе́сней Тебе́ досто́йных со усе́рдием приими́, ве́си бо и любо́вь к Тебе́ на́шу, е́юже сердца́ на́ша пламене́ют, и ми́лостиво услы́ши сия́ в простоте́ соста́вленныя хвалы́:

Ра́дуйся, обра́дованная Присноде́во; ра́дуйся, Неве́сто неневе́стная.

Ра́дуйся, селе́ние Бо́га Сло́ва; ра́дуйся, оби́теле Святе́йшаго святы́х.

Ра́дуйся, с Сы́ном, Царе́м небе́с, ве́чно ца́рствующая; ра́дуйся, Ма́тернее дерзнове́ние к Нему́ иму́щая.

Ра́дуйся, моли́твам ве́рных ми́лостиво вне́млющая; ра́дуйся, лю́бящим Тя́ любо́вию Твое́ю боже́ственною воздаю́щая.

Ра́дуйся, Сио́на го́рняго украше́ние; ра́дуйся, ми́ра до́льняго защище́ние.

Ра́дуйся, гра́де, спасе́ния на́шего притека́ние; ра́дуйся, горе́ свята́я, соше́ствием Бо́жиим просла́вленная.

Ра́дуйся, Богоро́дице Одиги́трие, христиа́н упова́ние.

Кондак 10

Спаси́ на́с, Влады́чице, от поги́бели ве́чныя Ма́терним предста́тельством Твои́м ко Христу́ Бо́гу и, я́коже Тя́ ны́не ви́дим на ико́не, та́ко сподо́би на́с узре́ти Тя́ в ча́с кончи́ны на́шея, заступа́ющу ду́ши на́ша и от руки́ лю́таго мироде́ржца на́с соблюда́ющую, да по́мощию Твое́ю свято́ю избе́гнем его́ сете́й и сподо́бимся Ца́рствие Небе́сное получи́ти и в ра́дости ве́чней воспева́ти человеколю́бцу Бо́гу: Аллилу́ия.

Икос 10

Стена́ еси́ де́вам, Богоро́дице Де́во, и все́м ревни́телем де́вства и чистоты́ усе́рдная помо́щница; мо́лим Тя́, Пречи́стая, очи́сти на́ша сердца́ от вся́кия скве́рны грехо́вныя и украси́ ду́ши на́ша целому́дрием и чистото́ю, да невреди́ми пребу́дем от все́х искуше́ний ми́ра, пло́ти и диа́вола и сподо́бимся досто́йно возглаша́ти Тебе́ пе́сни таковы́я:

Ра́дуйся, до́брая младопита́тельнице де́вам; ра́дуйся, благосе́рдная попечи́тельнице сиро́т.

Ра́дуйся, ти́хое прибе́жище обурева́емых страстьми́; ра́дуйся, приста́нище смуща́емых искуше́ньми.

Ра́дуйся, мздовоздая́тельнице подви́жников целому́дрия; ра́дуйся, спобо́рнице борю́щихся со враги́ неви́димыми.

Ра́дуйся, ми́лостивая посети́тельнице непови́нно в темни́цы заключе́нных; ра́дуйся, блага́я уте́шительнице напра́сно клевету́ терпя́щих.

Ра́дуйся, боже́ственная свободи́тельнице су́щих в плену́ и изгна́нии; ра́дуйся, всемо́щная покрови́тельнице тружда́ющихся и обремене́нных.

Ра́дуйся, Судии́ Пра́веднаго умоле́ние; ра́дуйся, гре́шных с Бо́гом примире́ние.

Ра́дуйся, Богоро́дице Одиги́трие, христиа́н упова́ние.

Кондак 11

Пе́ти Тебе́ немо́лчныя хвалы́ сы́тости не и́мамы, пречи́стая Ма́ти Де́во, Ты́ же, я́ко иму́щая милосе́рдие неисче́тное, насы́ти на́с пи́щею нетле́нною сло́ва Бо́жия во спасе́ние и научи́ на́с верно испо́лнити животво́рныя за́поведи Сы́на Твоего́ и Бо́га, Его́же умоли́, предста́тельнице на́ша всеблага́я, да низпо́слет ми́лость Свою́ на́м недосто́йным и сподо́бит на́с унасле́дити Его́ всесве́тлое и всеблаже́нное ца́рствие, иде́же от все́х святы́х пое́тся Ему́ хвале́бная пе́снь: Аллилу́ия.

Икос 11

Све́тлыми луча́ми чуде́с Твои́х, Богоро́дице Де́во, просвеща́еши на́с благода́тно и от святы́я ико́ны Твоея́ Одиги́трии утеше́ние духо́вное ниспосыла́еши уго́дником Сы́на Твоего́ и Бо́га, на́м же гре́шным да́ры целе́бныя подае́ши от нея́ неоску́дно, да зове́м Ти́ благода́рственно и хвале́бно:

Ра́дуйся, избра́нником Бо́жиим любо́вь Твою́ святу́ю явля́ющая; ра́дуйся, уго́дником Госпо́дним веле́ния небе́сныя открыва́ющая.

Ра́дуйся, святи́теля Христо́ва Митрофа́на Воро́нежскаго ико́ною Твое́ю облагода́тствовавшая; ра́дуйся, преподо́бнаго Се́ргия Ра́донежскаго посеще́ния Твоего́ сподо́бльшая.

Ра́дуйся, преподо́бнаго Кири́лла Белоезе́рскаго гла́сом от ико́ны Твоея́ на Белоо́зеро наста́вившая; ра́дуйся, преподо́бнаго Савва́тия Солове́цкаго в по́двизех пусты́нных укрепи́вшая.

Ра́дуйся, оби́телей Христо́вых покро́ве и снабде́ние; ра́дуйся, рабо́в Бо́жиих среди́ ми́ра та́йное вразумле́ние.

Ра́дуйся, Агнца и Па́стыря нетле́ннаго ро́ждшая; ра́дуйся, де́вство и сла́ву Ма́тере в Себе́ сочета́вшая.

Ра́дуйся, кри́не де́вства, к чи́стому и де́вственному житию́ приводя́й; ра́дуйся, цве́те нетле́ния, к жи́зни небе́сней возводя́й.

Ра́дуйся, Богоро́дице Одиги́трие, христиа́н упова́ние.

Кондак 12

Благода́ть Бо́жия де́йствует в чудесе́х пресла́вных, от святы́я ико́ны Твоея́ Одиги́трии явля́емых, пречи́стая и преблагослове́нная Богоро́дице Де́во, е́юже и на́ши ду́ши облагодати́, мра́к грехо́вный разгоня́ющи в на́с сия́нием Со́лнца пра́вды Христа́, да во све́те повеле́ний Его́ правоходя́ще, богоуго́дно житие́ сие́ вре́менное поживе́м в чистоте́ и пра́вде и сподо́бимся блаже́нство ве́чное получи́ти и со избра́нными пе́ти Ему́: Аллилу́ия.

Икос 12

Пою́ще Твоя́ чудеса́, Влады́чице, пропове́дуем ми́лости Твоя́, прославля́ем щедро́ты Твоя́ неисче́тныя и припа́даем ко святе́й и чудотво́рней ико́не Твое́й, мо́лим Ти́ ся с ве́рою и любо́вию: бу́ди на́м путеводи́тельница блага́я к све́тлому о́ному гра́ду Иерусали́му небе́сному, да у́зрим сла́ву Твою́ боже́ственную, да у́зрим пресве́тлое лице́ Твое́, ми́лостиво на на́с взира́ющее, и вку́пе со святы́ми воспое́м Ти́ си́це:

Ра́дуйся, ра́досте на́ша пресвята́я; ра́дуйся, Цари́це на́ша преблагая.

Ра́дуйся, усынови́вшая на́с при кресте́ Сы́на Твоего́ и Бо́га; ра́дуйся, Ма́тернюю любо́вь Твою́ при́сно явля́ющая.

Ра́дуйся, во благи́х жела́ния на́ша ди́вно исполня́ющая; ра́дуйся, скоропослу́шливая к смире́нным моли́твам.

Ра́дуйся, покро́вом Твои́м святы́м на́с покрывающая; ра́дуйся, ри́зою Твое́ю честно́ю благонаде́жно нас защища́ющая.

Ра́дуйся, в ча́с кончи́ны на́шея всеси́льная помо́щнице; ра́дуйся, на мыта́рствах возду́шных держа́вная на́м засту́пнице.

Ра́дуйся, теле́с на́ших безвозме́здное врачева́ние; ра́дуйся, ду́ш на́ших спасе́ние.

Ра́дуйся, Богоро́дице Одиги́трие, христиа́н упова́ние.

Кондак 13

О всепе́тая Ма́ти, о Цари́це всеми́лостивая, Де́во Богоро́дице Одиги́трие, приими́ на́ше моле́ние и принеси́ е́ Сы́ну Твоему́ и Бо́гу на́шему, ма́терне умоля́ющи Его́ бла́гость за на́с гре́шных и недосто́йных, да Твоего́ ра́ди всеси́льнаго хода́тайства изба́вит на́с муче́ния ве́чнаго и сподо́бит Ца́рствие Небе́сное получи́ти и со а́нгелы воспева́ти Ему́: Аллилу́ия.

[Се́й конда́к глаго́лется три́жды.]
[Далее повторяем 1‑е икос и кондак:]

Икос 1

Арха́нгельский гла́с вопие́м Ти́, Чи́стая: ра́дуйся, благода́тная Одиги́трие Мари́е, и ра́дости духо́вныя испо́лни на́с, да благоговейною душе́ю и чи́стым се́рдцем принесе́м Ти́, ро́ждшей ми́ру Спаси́теля Христа́ Бо́га на́шего, глаго́лы сия́:

Ра́дуйся, Бо́га Отца́ благоволе́нием осене́нная; ра́дуйся, Бо́га Сы́на Ма́ти неискусобра́чная.

Ра́дуйся, Бо́га Ду́ха Свята́го оби́теле свяще́нная; ра́дуйся, Тро́ическия та́йны проявле́ние.

Ра́дуйся, а́нгельских умо́в удивле́ние; ра́дуйся, челове́ческаго ро́да украше́ние.

Ра́дуйся, го́рния с до́льними совокупи́вшая; ра́дуйся, врата́ ра́йская земноро́дным отве́рзшая.

Ра́дуйся, ле́ствице небе́сная; ра́дуйся, ста́мно богоприи́мная.

Ра́дуйся, купино́ неопали́мая; ра́дуйся, трапе́зо пресвята́я.

Ра́дуйся, Богоро́дице Одиги́трие, христиа́н упова́ние.

Кондак 1

Избра́нней от все́х родов Бо́жией Ма́тери и Цари́це, Пресвято́й Одиги́трии, я́ко изба́вльшеся от ве́чныя сме́рти благода́тию ро́ждшагося от Нея́ Христа́ Бо́га и на пу́ть спасе́ния направля́еми Ма́терним Ея́ попече́нием, благода́рственное прино́сим пе́ние; Ты́ же, всеми́лостивая на́ша засту́пнице и путеводи́тельнице, от вся́ких на́с бе́д свобожда́й и к ца́рствию го́рнему руково́дствуй зову́щих Ти́ ра́достию: Ра́дуйся, Богоро́дице Одиги́трие, христиа́н упова́ние.

Молитва

О пречу́дная и превы́сшая все́х тва́рей Цари́це Богоро́дице, Небе́снаго Царя́ Христа́ Бо́га на́шего Ма́ти, Пречи́стая Одиги́трие Мари́е! Услы́ши на́с гре́шных и недосто́йных, в ча́с се́й моля́щихся и припа́дающих к Тебе́ с воздыха́нием и слеза́ми пред пречи́стым о́бразом Твои́м и умиле́нно глаго́лющих: изведи́ на́с от ро́ва страсте́й, Одиги́трие блага́я, изба́ви на́с от вся́кия ско́рби и печа́ли, огради́ от вся́кия напа́сти и злы́х клеве́т, и от непра́веднаго и лю́таго наве́та вра́жия. Мо́жеши бо, о благода́тная Ма́ти на́ша, не то́чию от вся́каго зла́ сохрани́ти лю́ди Твоя́, но и вся́ким благодея́нием снабди́ти и спасти́. Ра́зве Тебе́ ины́я предста́тельницы в беда́х и обстоя́ниих и те́плыя хода́таицы о на́с гре́шных не и́мамы к Сы́ну Твоему́ Христу́ Бо́гу на́шему, Его́же умоли́, Влады́чице, спасти́ на́с и удосто́ити Ца́рствия Небе́снаго, да, спасе́ннии Тобо́ю, сла́вим Тя́ и в бу́дущем ве́це, я́ко вино́вницу спасе́ния на́шего, и превозно́сим свято́е великоле́пое и́мя Отца́ и Сы́на и Свята́го Ду́ха, в Тро́ице сла́вимаго и покланя́емаго Бо́га, во ве́ки веко́в. Ами́нь.

[1] Новодевичий монастырь.

Тропарь Пресвятой Богородице пред иконой Ея «Одигитрия» Смоленская, глас 4

К Богоро́дице приле́жно ны́не притеце́м,/ гре́шнии и смире́ннии, и припаде́м,/ в покая́нии зову́ще из глубины́ души́:/ Влады́чице, помози́, на ны милосе́рдовавши,/ потщи́ся, погиба́ем от мно́жества прегреше́ний,/ не отврати́ Твоя́ рабы́ тщи,// Тя бо и еди́ну наде́жду и́мамы.

Перевод: К Богородице ныне усердно прибегнем мы, грешные и смиренные, и к Ней припадем, в покаянии взывая из глубины души: «Владычица, помоги, над нами сжалившись, поспеши, мы погибаем от множества согрешений! Не отпусти Твоих рабов ни с чем: ибо в Тебе имеем мы единственную надежду!»

Кондак Пресвятой Богородице пред иконой Ея «Одигитрия» Смоленская, глас 6

Предста́тельство христиа́н непосты́дное,/ хода́тайство ко Творцу́ непрело́жное,/ не пре́зри гре́шных моле́ний гла́сы,/ но предвари́, я́ко Блага́я, на по́мощь нас,/ ве́рно зову́щих Ти:/ ускори́ на моли́тву и потщи́ся на умоле́ние,// предста́тельствующи при́сно, Богоро́дице, чту́щих Тя.

Перевод: Защита христиан надежная, Ходатайство ко Творцу неизменное! Молитвенных голосов грешников не презри, но скоро приди, как Благая, на помощь нам, с верою взывающим Тебе: «Поспеши с заступлением и ускорь моление, Богородица, всегда защищая чтущих Тебя!»

Ин кондак Пресвятой Богородице пред иконой Ея «Одигитрия» Смоленская, глас 6

Не и́мамы ины́я по́мощи,/ не и́мамы ины́я наде́жды,/ ра́зве Тебе́, Влады́чице,/ Ты нам помози́,/ на Тебе́ наде́емся/ и Тобо́ю хва́лимся,/ Твои́ бо есмы́ раби́,// да не постыди́мся.

Перевод: Не имеем иной помощи, не имеем иной надежды, кроме Тебя, Владычица. Ты нам помоги: на Тебя надеемся и Тобою хвалимся, ибо мы – Твои рабы; да не постыдимся!

Минея, 28 Июля, Кано́н Пресвяты́я Богоро́дицы

Глас 4

Песнь 1

Ирмос: Отве́рзу уста́ моя́,/ и напо́лнятся Ду́ха,/ и сло́во отры́гну Цари́це Ма́тери,/ и явлю́ся, све́тло торжеству́я,/ и воспою́, ра́дуяся, Тоя́ чудеса́.

Припев: Пресвята́я Богоро́дице, спаси́ на́с.

Ра́достно, Чи́стая, ны́не наста́вшее хвале́ние приноша́ю, ра́дуяся,/ и ти́хим гла́сом, Одиги́трие, вопию́ Ти:/ ра́дуйся и испо́лни мя ра́зума, пе́ти начина́юща.

Припев: Пресвята́я Богоро́дице, спаси́ на́с.

Христа́ роди́вшая, ра́дость нам ве́чную, о, ра́дуйся, Всепе́тая,/ правосла́вным наде́жда, Одиги́трие, всепе́тая Деви́це,/ ра́дости испо́лни мя ми́рови жела́нныя.

Сла́ва Отцу́ и Сы́ну и Свято́му Ду́ху.

Лику́ют вси челове́цы и А́нгели всегда́,/ согла́сно вопию́ще на Небеси́ и на земли́, Одиги́трие:/ ра́дуйся, Деви́це, ра́дости бо Рождество́м Твои́м вся́ческая испо́лнила еси́.

И ны́не и при́сно и во ве́ки веко́в. Ами́нь.

Ра́дуйся, Одиги́трие, со стра́хом Ти вопию́щих ра́дости сподо́би,/ Ма́ти су́щия ра́дости, избавля́ющи скорбе́й вся́ческих,/ и всех поми́луй, к Тебе́ прибега́ющих.

Песнь 3

Ирмос: Твоя́ песносло́вцы, Богоро́дице,/ Живы́й и Незави́стный Исто́чниче,/ лик себе́ совоку́пльшия, духо́вно утверди́,/ в Боже́ственней Твое́й сла́ве/ венце́в сла́вы сподо́би.

Припев: Пресвята́я Богоро́дице, спаси́ на́с.

Христа́, Вы́шняго Царя́, о, ра́дуйся, непоколеби́мая чи́стая и одушевле́нная пала́то!/ Ра́дуйся, Одиги́трие, ра́дуйся:/ Тобо́ю неруши́м наш град сохраня́ется.

Припев: Пресвята́я Богоро́дице, спаси́ на́с.

Вмести́ти Его́же не возмо́же тварь,/ во утро́бу неискусобра́чную, Одиги́трие Деви́це, теле́сно вмести́ла еси́,/ те́мже Ти, ра́дуйся, пое́м, по до́лгу велича́юще.

Сла́ва Отцу́ и Сы́ну и Свято́му Ду́ху.

Ра́дость многопе́тая ми́рови,/ ра́достно Ти пою́ще при́сно, ве́чнующия, Чи́стая, ра́дости сподобля́емся/ Твои́ми ма́терними моли́твами к Ро́ждшемуся из Тебе́, Одиги́трие.

И ны́не и при́сно и во ве́ки веко́в. Ами́нь.

Злату́ю Тя ста́мну, и све́щник, и жезл, и трапе́зу, Чи́стая, призыва́ем, Одиги́трие,/ и глас, е́же ра́дуйся, Тебе́ при́сно привноша́ем/ с си́ми же имены́.

Седален, глас 1

Правове́рно чту́щия Тя и к Тебе́ прибега́ющия,/ ико́не Твое́й святе́й любе́зно покланя́ющияся,/ о Бо́жия Ма́ти, спаси́/ и не даждь нас в расхище́ние сопоста́том,/ ниже́ на́йдут на ны вся зла́я, я́же грехи́ на́ша угото́ваша нам,/ ни беззако́ния на́ша превзы́дут главы́ на́ша,/ но да Твоя́ ма́терняя к Бо́гу преодоле́ет за ны богоприя́тная моли́тва.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богородичен: Пречи́стая Твоя́ ико́на, Богоро́дице Де́во, врачевство́ всего́ ми́ра духо́вное,/ к не́йже прибега́ем, Тебе́ покланя́ющеся, почита́ем и лобыза́ем ю,/ исцеле́ний благода́ть почерпа́юще от нея́, и неду́гов теле́сных/ и душе́вных страсте́й Твои́ми моли́твами свобожда́емся.

Песнь 4

Ирмос: Седя́й в Сла́ве на Престо́ле Божества́/ во о́блаце ле́гце,/ прии́де Иису́с Пребоже́ственный/ Нетле́нною Дла́нию и спасе́ зову́щия:/ сла́ва, Христе́, си́ле Твое́й.

Припев: Пресвята́я Богоро́дице, спаси́ на́с.

Ра́дуйся, чу́до чудесе́м, Одиги́трие Влады́чице./ Ра́дуйся, всем ра́досте градово́м, и ве́сем непобеди́мое христиа́нское в беда́х храни́лище,/ и предгра́дие, и на враги́ побежде́ние.

Припев: Пресвята́я Богоро́дице, спаси́ на́с.

Ра́дуйся, ра́дуйся, лю́дем правосла́вным похвало́,/ и христолюби́вым во́инством покро́в пребыва́еши всем, Цари́це./ Ра́дуйся, Одиги́трие, прибе́жище всем нам и утвержде́ние.

Сла́ва Отцу́ и Сы́ну и Свято́му Ду́ху.

Ра́дуйся, всем ско́рое в беда́х избавле́ние./ Ра́дуйся, гото́вое всем скорбя́щим утеше́ние./ Ра́дуйся, Всепе́тая, ра́дуйся, Одиги́трие всеблагослове́нная,/ всем немощны́м Цели́тельнице.

И ны́не и при́сно и во ве́ки веко́в. Ами́нь.

Ра́дуйся, Ея́же вели́чия вся тварь сла́вити у́бо спеши́т по достоя́нию,/ но не возмога́ет, Одиги́трие, и сего́ ра́ди зове́т Ти:/ ра́дуйся, Влады́чице, Боговмести́мое жили́ще.

Песнь 5

Ирмос: Ужасо́шася вся́ческая/ о Боже́ственней сла́ве Твое́й:/ Ты бо, Неискусобра́чная Де́во,/ име́ла еси́ во утро́бе над все́ми Бо́га/ и родила́ еси́ Безле́тнаго Сы́на,/ всем воспева́ющим Тя/ мир подава́ющая.

Припев: Пресвята́я Богоро́дице, спаси́ на́с.

Благосты́ни бе́здно и щедро́там еси́, ра́дуйся, Одиги́трие Деви́це,/ ра́дуйся, всем ра́дость творя́щи ве́рным./ О, ра́дуйся, су́щим в беда́х и скорбя́щим пребы́страя Засту́пнице.

Припев: Пресвята́я Богоро́дице, спаси́ на́с.

Ра́дуйся, от исполне́ния вели́чия чуде́с Твои́х зря́ще,/ исполня́емся, вси незря́щии, слы́шаще же, ве́рнии./ Те́мже, ра́дуйся, Тебе́ при́сно всю́ду и вси, Одиги́трие, пое́м.

Сла́ва Отцу́ и Сы́ну и Свято́му Ду́ху.

Христа́ Бо́га на́шего, о, ра́дуйся, Одиги́трие, жили́ще/ и дом неизрече́нныя и Пребоже́ственныя, Де́во, сла́вы Его́./ О, ра́дуйся, пала́то преукраше́нная,/ ра́дуйся, гра́де одушевле́нный, при́сно ца́рствующий!

И ны́не и при́сно и во ве́ки веко́в. Ами́нь.

Ра́дость неоску́дную Тя разсмотря́юще, я́ко мо́ре, Отрокови́це,/ Одиги́трие Деви́це, ра́дующеся вси, ра́дуйся, вопие́м Ти;/ и пою́ще, Боже́ственных даро́в неви́димо при́сно от Тебе́ ожида́юще.

Песнь 6

Ирмос: Боже́ственное сие́ и всечестно́е/ соверша́юще пра́зднество,/ Богому́дрии, Богома́тере,/ прииди́те, рука́ми воспле́щим,/ от Нея́ ро́ждшагося Бо́га сла́вим.

Припев: Пресвята́я Богоро́дице, спаси́ на́с.

Христа́, Чи́стая, прие́млющи,/ глас, е́же ра́дуйся, Одиги́трие Деви́це, слы́шаше,/ Его́же неизрече́нно ро́ждши, ра́дуйся, от всех слы́шиши всегда́.

Припев: Пресвята́я Богоро́дице, спаси́ на́с.

Ра́дости вся испо́лнила еси́,/ вы́шния и ни́жния Ты совокупи́ла еси́, Одиги́трие,/ те́мже ра́достно и согла́сно ны́не не́бо и вся земля́ зове́т Ти.

Сла́ва Отцу́ и Сы́ну и Свято́му Ду́ху.

Вдова́м, о, ра́дуйся, Всепе́тая, и всем си́рым, Одиги́трие, утеше́ние;/ ра́дуйся, всем источа́ющи ни́щим бога́тство неистощи́мое.

И ны́не и при́сно и во ве́ки веко́в. Ами́нь.

Зла́та вся́каго блиста́ема и у́тра со́лнечнаго светле́йши, жили́ще Христо́во,/ ра́дуйся, Одиги́трие, ра́дуйся, Деви́це,/ ра́дуйся, Неве́сто Неневе́стная.

Кондак, глас 6

Предста́тельство христиа́н непосты́дное,/ хода́тайство ко Творцу́ непрело́жное,/ не пре́зри гре́шных моле́ний гла́сы,/ но предвари́, я́ко Блага́я, на по́мощь нас,/ ве́рно зову́щих Ти:/ ускори́ на моли́тву и потщи́ся на умоле́ние,/ предста́тельствующи при́сно, Богоро́дице, чту́щих Тя.

Икос

Простри́ дла́ни Твоя́,/ и́миже всех Влады́ку я́ко Младе́нца прия́ла еси́, за мно́жество бла́гости;/ не оста́ви нас, всегда́ наде́ющихся на Тя,/ бо́дренною Твое́ю моли́твою и неисче́тною просты́нею уще́дри нас/ и пода́ждь душа́м на́шим милосе́рдие Твое́, во ве́ки источа́ющи:/ Тебе́ бо и́мамы, гре́шнии, Засту́пницу от находи́щих на ны бед и зол./ Но, я́ко иму́щи милосе́рдия щедро́ты,/ ускори́ на моли́тву и потщи́ся на умоле́ние,/ предста́тельствующи при́сно, Богоро́дице, чту́щих Тя.

Песнь 7

Ирмос: Не послужи́ша тва́ри Богому́дрии/ па́че Созда́вшаго,/ но, о́гненное преще́ние му́жески попра́вше,/ ра́довахуся, пою́ще:/ препе́тый отце́в Госпо́дь и Бог, благослове́н еси́.

Припев: Пресвята́я Богоро́дице, спаси́ на́с.

Ра́дуйся, ра́дуйся, Богоро́дице Одиги́трие,/ всех и всегда́ наставля́ющи ве́рных ше́ствовати ко вся́кому пути́ спаси́тельному;/ ра́дуйся, Влады́чице, Тобо́ю бо при́сно избавля́емся настоя́щия ва́рварския беды́.

Припев: Пресвята́я Богоро́дице, спаси́ на́с.

Ра́дуйся, ра́дуйся, Одиги́трие, бдя́щи и моля́щися о нас к Бо́гу,/ и вся́кия зло́бы хода́тайством Твои́м, вся́ческих скорбе́й, Богороди́тельнице,/ всех люде́й избавля́ющи.

Сла́ва Отцу́ и Сы́ну и Свято́му Ду́ху.

Ра́дуйся, ра́дуйся, Пресвята́я Одиги́трие,/ я́же проше́ния на́ша к по́льзе нам исполня́ющи/ и хотя́щи всем при́сно всегда́ любодру́жное благо́е еди́нство,/ спе́шное же во изя́щных.

И ны́не и при́сно и во ве́ки веко́в. Ами́нь.

Ра́дуйся, ра́дуйся, корабле́м, Одиги́трие, ну́ждно пла́вающим,/ избавля́ющи ве́рных и всем избавле́ние от вся́кия ско́рби/ и неду́ги пестро́тныя и ме́дленныя разреша́ющи вско́ре.

Песнь 8

Ирмос: О́троки благочести́выя в пещи́/ Рождество́ Богоро́дичо спасло́ есть;/ тогда́ у́бо образу́емое,/ ны́не же де́йствуемое,/ вселе́нную всю воздвиза́ет пе́ти Тебе́:/ Го́спода по́йте, дела́,/ и превозноси́те Его́ во вся ве́ки.

Припев: Пресвята́я Богоро́дице, спаси́ на́с.

Ра́дуйся, Всеблагослове́нная Мари́е,/ из Тебе́ бо Всеблагослове́нный Бог оде́яся во всего́ мя, челове́ка,/ и, оде́явся, соедини́ Своему́ Божеству́ неизрече́нным соедине́нием, Де́во Одиги́трие,/ ра́дуйся, Обра́дованная, ра́досте всего́ ми́ра.

Припев: Пресвята́я Богоро́дице, спаси́ на́с.

Ра́дуйся, лука́вых духо́в Прогони́тельнице;/ ра́дуйся, Богоро́дице Одиги́трие./ Ра́дуйся, я́ко Тебе́ Небе́сная неви́димая во́инства славосло́вят всегда́/ и велича́ют я́ко Ма́терь Бо́жию бы́вшую;/ ра́дуйся, Я́же ни́жняя сочта́вши с Вы́шними.

Сла́ва Отцу́ и Сы́ну и Свято́му Ду́ху.

Ра́дуйся, всех Небе́сных сил без разсужде́ния превосходя́щая;/ ра́дуйся, Одиги́трие./ Ра́дуйся, вся́кия тва́ри Бо́га ро́ждшая,/ госпо́дствующи ей, Влады́чице Всепе́тая;/ ра́дуйся, я́ко пребыва́еши Де́вою, Чи́стая, и по рождестве́.

И ны́не и при́сно и во ве́ки веко́в. Ами́нь.

Ра́дуйся, жена́м всем сла́во, хра́ме преосвяще́нный Бо́га на́шего;/ ра́дуйся, Одиги́трие, ра́дуйся, душеспаси́тельная всей вселе́нней;/ ра́дуйся, покрыва́ющий о́блаче, небе́с ши́ршая;/ ра́дуйся, мирополо́жнице, Боже́ственнаго ми́ра полна́.

Песнь 9

Ирмос: Всяк земноро́дный/ да взыгра́ется, Ду́хом просвеща́емь,/ да торжеству́ет же Безпло́тных умо́в естество́,/ почита́ющее свяще́нное торжество́ Богома́тере,/ и да вопие́т:/ ра́дуйся, Всеблаже́нная Богоро́дице,/ Чи́стая Присноде́во.

Припев: Пресвята́я Богоро́дице, спаси́ на́с.

Ра́дуйся, свеще́, Свет невече́рний поне́сшая,/ и в рождестве́ Твое́м многобо́жия тьму разруши́вшая,/ и а́довы про́пасти изба́вльшая лю́ди./ Ра́дуйся, Одиги́трие Богоро́дице, добро́т всех Предхода́таице.

Припев: Пресвята́я Богоро́дице, спаси́ на́с.

Ра́дуйся, земле́, из нея́же клас прозя́бший Небе́сный ве́рным,/ и ми́ра всего́ душегу́бнаго гла́да изба́ви, разу́мная и одушевле́нная./ О, ра́дуйся, виногра́де, и́же грозд живо́тный ро́ждшая, Богоро́дице Чи́стая Одиги́трие!

Сла́ва Отцу́ и Сы́ну и Свято́му Ду́ху.

Ра́дуйся, та́йных цвето́в прекра́сный су́щий раю́;/ ра́дуйся, Ма́ти Де́во, неви́димых ра́зум/ чистото́ю странноле́пно побе́ждши, Богороди́тельнице./ Ра́дуйся, Отрокови́це, ра́дуйся, Одиги́трие,/ всеми́рное чу́до и слы́шание.

И ны́не и при́сно и во ве́ки веко́в. Ами́нь.

Ле́то живота́ на́шего про́чее сохрани́ неврежде́но поможе́нием Твои́м, Де́во Отрокови́це,/ и сподо́би коне́ц благи́й получи́ти нам, воспева́ющим Тя и взыва́ющим:/ ра́дуйся, Всеблаже́нная Богоро́дице, Чи́стая Одиги́трие.

Светилен

Да почти́тся Всепе́тая Ма́ти Бо́жия,/ жизнь су́щую ро́ждшая, Христа́ Бо́га на́шего,/ ра́йских двере́й отверзе́ние, всего́ ми́ра очище́ние, к животу́ возведе́ние./ Сей есть проро́ки глаго́ланныя,/ Тому́ поклони́мся, Бо́гу и Спа́су душ на́ших.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богородичен: Прииди́те, ве́рнии, с чи́стою со́вестию, возвели́чим Ма́терь Бо́га на́шего,/ носи́вшую во чре́ве Боже́ственнаго Младе́нца Спа́са Христа́,/ к Нему́же ма́тернее дерзнове́ние иму́щи, непреста́нно мо́лит за ны/ и подае́т рабо́м Свои́м бога́тыя ми́лости.