Икона Богородицы «Казанская» («Богородско-Уфимская»)

О, Пресвята́я Госпоже́ Влады́чице Богоро́дице! Со стра́хом, ве́рою и любо́вию пред честно́ю (и чудотво́рною) ико́ною Твое́ю припа́дающе, мо́лим Тя: не отврати́ лица́ Твоего́ от прибега́ющих к Тебе́. Умоли́, милосе́рдая Ма́ти, Сы́на Твоего́ и Бо́га на́шего, Го́спода Иису́са Христа́, да сохрани́т ми́рну страну́ на́шу, Це́рковь же Свою́ Святу́ю непоколеби́му да соблюде́т и от неве́рия, ересе́й и раско́ла да изба́вит. Не и́мамы бо ины́я по́мощи, не и́мамы ины́я наде́жды, ра́зве Тебе́, Пречи́стая Де́во: Ты еси́ всеси́льная христиа́н Помо́щница и Засту́пница. Изба́ви же и всех, с ве́рою Тебе́ моля́щихся, от паде́ний грехо́вных, от наве́та злых челове́к, от вся́ких искуше́ний, скорбе́й, боле́зней, бед и от внеза́пныя сме́рти. Да́руй нам дух сокруше́ния, смире́ние се́рдца, чистоту́ помышле́ний, исправле́ние грехо́вныя жи́зни и оставле́ние прегреше́ний, да вси, благода́рне воспева́юще вели́чия и ми́лости Твоя́, явля́емыя над на́ми зде на земли́, сподо́бимся и Небе́снаго Ца́рствия, и та́мо со все́ми святы́ми просла́вим пречестно́е и великоле́пое и́мя Отца́, и Сы́на, и Свята́го Ду́ха во ве́ки веко́в. Ами́нь.

Конда́к 1.

Избра́нной от все́х родо́в Засту́пнице ро́да христиа́нскаго, покро́вом Своея́ бла́гости покрыва́ющей страну́ на́шу правосла́вную, благода́рственная пе́ния прино́сим Ти́, Богоро́дице, о явле́нии чу́дныя Твоея́ ико́ны. Ты́ же, я́ко Всеми́лостивая, все́х притека́ющих к Тебе́ Помо́щнице, заступа́й на́с во все́х ско́рбех и ну́ждах, беда́х и напа́стех, да зове́м Ти́:

Ра́дуйся, Засту́пнице усе́рдная ро́да христиа́нскаго.

И́кос 1.

А́нгел предста́тель по́слан бы́сть рещи́ Богоро́дице «Ра́дуйся», егда́ Бо́г Сло́во воплоща́шеся во утро́бе Ея́: и мы́, гре́шнии, прославля́юще явле́ние чу́дныя Ея́ ико́ны и Боже́ственнаго Младе́нца Спа́са Христа́, со умиле́нием вопие́м Благода́тней:

Ра́дуйся, Богоизбра́нная Отрокови́це;
ра́дуйся, Ма́ти Бо́жия.

Ра́дуйся, Цари́це Небесе́ и земли́;
ра́дуйся, све́тлое Це́ркве Небе́сныя и земны́я украше́ние.

Ра́дуйся, А́нгелы чти́мая;
ра́дуйся, пева́емая от Серафи́м.

Ра́дуйся, све́тлое проро́ческое сбытие́;
ра́дуйся, апо́столов похвало́.

Ра́дуйся, му́ченическое испове́дание;
ра́дуйся, преподо́бных ве́нче.

Ра́дуйся, пра́ведных весе́лие;
ра́дуйся, гре́шных упова́ние.

Ра́дуйся, Засту́пнице усе́рдная ро́да христиа́нскаго.

Конда́к 2.

Ви́дящи, Всенепоро́чная, с высоты́ Небе́снаго жили́ща Своего́, иде́же с Сы́ном Твои́м в сла́ве пребыва́еши, ско́рбь рабо́в Твои́х в новопросвеще́ннем гра́де, я́ко гне́внаго ра́ди Бо́жия посеще́ния ве́ра Христо́ва поруга́ема быва́ет ага́рянским злове́рием, благоволи́ла еси́ яви́ти ико́ну Свою́, чудесы́ ю́ прославля́ющи, да утвержда́емии зна́меньми Твоея́ благода́ти, христолюби́вии лю́дие ве́рно вопию́т Бо́гу: Аллилу́иа.

И́кос 2.

Разуме́ние трикра́тнаго явле́ния Богома́тере му́драя отрокови́ца и́щущи, тече́ ко власте́м, пове́дающи и́м ди́вное явле́ние и гро́зное преще́ние: мы́ же дивя́щеся свы́ше да́нному отрокови́це вразумле́нию, благогове́йно вопие́м к Преблагослове́нней:

Ра́дуйся, устна́ми чи́стыми хвалу́ Бо́гови соверша́ющая;
ра́дуйся, та́йны благода́ти Бо́жия ве́рным открыва́ющая.

Ра́дуйся, неве́рных сумни́тельное слы́шание;
ра́дуйся, ве́рных изве́стная похвало́.

Ра́дуйся, мо́лние, неве́рных устраша́ющая;
ра́дуйся, сла́вою чуде́с Твои́х ве́рных ра́зум озаря́ющая.

Ра́дуйся, ага́рянскаго злове́рия обличе́ние;
ра́дуйся, горды́ни и́х низложе́ние.

Ра́дуйся, ве́ры христиа́нския утвержде́ние;
ра́дуйся, почита́ния святы́х ико́н освяще́ние.

Ра́дуйся, ско́рбь на́шу в ра́дость претворя́ющая;
ра́дуйся, несумне́нною наде́ждою на́с увеселя́ющая.

Ра́дуйся, Засту́пнице усе́рдная ро́да христиа́нскаго.

Конда́к 3.

Си́ла Вы́шняго благода́тию Богома́тере умудри́ и укрепи́ отрокови́цу к иска́нию многоце́ннаго Бо́жия да́ра, и та́, с ве́рою дерза́ющи о Го́споде, приступи́ к труду́ и, скры́тое в земли́ обре́тши сокро́вище святы́я ико́ны Богома́тери, ра́достно возопи́ к Бо́гу: Аллилу́иа.

И́кос 3.

Име́ющи благоутро́бное промышле́ние о новопросвеще́нных лю́дех гра́да Каза́ни, от пречестны́я Твоея́ ико́ны то́ки чуде́с источи́ла еси́, Влады́чице, слепы́м теле́сныма очи́ма зре́ние подава́ющи, омраче́нных же душе́вно све́том богопозна́ния и благоче́стия озаря́ющи, де́вствующим под осене́нием Твоея́ ико́ны приста́нище небу́рное да́рующи. Сего́ ра́ди зове́м Ти́:

Ра́дуйся, явле́нием ико́ны Твоея́ тьму́ лю́тых обстоя́ний отгоня́ющая;
ра́дуйся, луча́ми чуде́с все́х просвеща́ющая.

Ра́дуйся, слепы́х прозре́ние;
ра́дуйся, омраче́нных смы́слом просвеще́ние.

Ра́дуйся, сла́во Правосла́вия;
ра́дуйся, ти́хое приста́нище и́щущих спасе́ния.

Ра́дуйся, Ма́ти целому́дрия;
ра́дуйся, покро́ве и огражде́ние де́вства.

Ра́дуйся, Е́юже ликовству́ет все́ мно́жество ве́рных;
ра́дуйся, Ея́же ра́ди рыда́ет де́монское по́лчище.

Ра́дуйся, все́х христиа́н вожделе́нная Помо́щнице;
ра́дуйся, все́х скорбя́щих Ра́досте.

Ра́дуйся, Засту́пнице усе́рдная ро́да христиа́нскаго.

Конда́к 4.

Бу́рю смяте́ний и крамо́лы врага́ми воздви́гнутую в стране́ на́шей утоли́ти тща́щься блаже́нный Ермоге́н, списа́тель чуде́с Твоея́, Богома́ти, ико́ны, сле́зно пред не́ю моля́шеся и, ви́дев, я́ко во́инству правосла́вному в щи́т и побе́дное зна́мение Твоя́ ико́на дарова́ся, ве́рою укрепля́емый до конца́ живота́ своего́, вопия́ше Бо́гу: Аллилу́иа.

И́кос 4.

Слы́шавше правосла́внии во́ини открове́нную Преподо́бным Се́ргием святи́телю Арсе́нию та́йну, я́ко предста́тельством Богома́тере су́д об Оте́честве на́шем преложе́н на ми́лость, ико́ну Богома́терню, я́ко зна́мя побе́дное, прии́мше, исхити́ша ма́терь градо́в ру́сских из ру́к супоста́т и возопи́ша Засту́пнице христиа́н:

Ра́дуйся, Ма́ти Бо́га Вы́шняго;
ра́дуйся, я́ко за все́х мо́лиши Сы́на Твоего́, Христа́ Бо́га на́шего.

Ра́дуйся, я́ко все́м твори́ши спасти́ся в держа́вный Тво́й покро́в прибега́ющим;
ра́дуйся, Засту́пнице все́х су́щих в ско́рбех и боле́знех.

Ра́дуйся, все́м моля́щимся сокруше́нным се́рдцем пред пречи́стым Твои́м о́бразом поле́зная да́рующая;
ра́дуйся, избавле́ние зо́л все́м, невозвра́тно наде́жду иму́щим на Тя́.

Ра́дуйся, ти́хое и до́брое приста́нище;
ра́дуйся, ско́рая Помо́щнице.

Ра́дуйся, гото́вый и те́плый покро́ве спасе́ния;
ра́дуйся, источа́ющая на́м неоску́дныя ми́лости.

Ра́дуйся, предваря́ющая на по́мощь;
ра́дуйся, избавля́ющая от все́х бе́д.

Ра́дуйся, Засту́пнице усе́рдная ро́да христиа́нскаго.

Конда́к 5.

Боготе́чная звезда́ яви́ся Твоя́, Богома́ти, ико́на, всю́ страну́ Росси́йскую обтека́ющая, луча́ми чуде́с Твои́х осиява́ющая все́х блужда́ющих по мо́рю стра́стнаго жития́, мра́к печа́лей и мглу́ вся́ких неду́г и скорбе́й прогоня́ющая и наставля́ющая на пу́ть спасе́ния с ве́рою к Тебе́ притека́ющих и вопию́щих к Бо́гу: Аллилу́иа.

И́кос 5.

Ви́дев ца́рь Пе́тр, я́ко от святы́я ико́ны Богома́терни благода́тию Бо́жиею содева́ются мно́гия чудеса́, прие́млет ю́ в путеводи́тельницу во́инству своему́ и в де́нь бра́ни на све́ев в щи́т и покро́в, и победи́в до конца́ врага́ с по́мощию Богома́тере, те́м ка́мень соверше́нный во основа́ние но́ваго ца́рствующего гра́да положи́, ико́ну же Твою́ чу́дную, я́ко освяще́ние, я́ко щи́т и огражде́ние, в се́рдце гра́да поста́ви. Сего́ ра́ди вопие́м Пречи́стей:

Ра́дуйся, жили́ще и до́ме Христа́ Бо́га на́шего;
ра́дуйся, вмести́лище неизрече́нныя Его́ сла́вы.

Ра́дуйся, гра́де одушевле́нный, при́сно ца́рствующий;
ра́дуйся, пала́то преукраше́нная.

Ра́дуйся, Ра́досте градо́в и ве́сей;
ра́дуйся, непобеди́мое христиа́н в беда́х храни́лище и предгра́дие.

Ра́дуйся, Це́ркве Правосла́вныя похвало́;
ра́дуйся, Ру́сской земли́ утвержде́ние.

Ра́дуйся, христолюби́ваго во́инства Помо́щнице;
ра́дуйся, враго́в одоле́ние.

Ра́дуйся, от бе́д избавле́ние;
ра́дуйся, Ма́терними Твои́ми щедро́тами все́х посеща́ющая.

Ра́дуйся, Засту́пнице усе́рдная ро́да христиа́нскаго.

Конда́к 6.

Предстоя́ще пред пречи́стым Твои́м о́бразом архиере́ев сосло́вии и вси́ лю́дие, мона́си и мирсти́и, пропове́дуют, Госпоже́ Богороди́тельнице, вели́кия Твоя́ ми́лости, я́ко гра́ды огражда́еши, оби́тели покрыва́еши, ве́си защища́еши, и, ве́дуще Тя́ вои́стинну Помо́щницу си́льну и непобеди́му, со слеза́ми прино́сят Ти́ моли́твы, да простре́ши к Сы́ну Твоему́ Богоно́снеи ру́ки за лю́ди Твоя́, во е́же изба́вити на́с от все́х бе́д и напа́стей, да благода́рне вопие́м Бо́гу: Аллилу́иа.

И́кос 6.

Возсия́вши просвеще́ние и́стинное и отгна́вши дре́вле ле́сть ага́рянскую во новопросвеще́нней стране́ Каза́нской, ны́не во все́х гра́дех росси́йских све́тиши све́том чуде́с и ми́лостей: притека́ющии бо с ве́рою ко Твое́й ико́не цельбоно́сней скорбе́й избавле́ние, неду́гов исцеле́ние и ра́дости вся́кия исполне́ния прие́млют, вопию́ще Тебе́ усе́рдно:

Ра́дуйся, неистощи́мый исто́чниче святы́ни;
ра́дуйся, многотеку́щая реко́ Боже́ственная благода́ти.

Ра́дуйся, гре́шных с Бо́гом примире́ние;
ра́дуйся, грехо́в на́ших очище́ние.

Ра́дуйся, благоче́стия Наста́внице;
ра́дуйся, в до́брых де́лех утвержде́ние и по́моще.

Ра́дуйся, до́брыя обе́ты прие́млющая;
ра́дуйся, благи́м наме́рением спосо́бствующая.

Ра́дуйся, злы́я начина́ния разруша́ющая;
ра́дуйся, вра́жия ко́зни расторга́ющая.

Ра́дуйся, ско́рая челове́ком Помо́щнице;
ра́дуйся, ми́лость сугу́бо на́м подаю́щая.

Ра́дуйся, Засту́пнице усе́рдная ро́да христиа́нскаго.

Конда́к 7.

Хотя́щу наро́ду правосла́вному испове́дати ми́лости Преблагослове́нныя Цари́цы Не́ба и земли́ и по си́ле благода́рственная принести́ о избавле́нии его́ от наше́ствия иноплеме́нных, ди́вному хра́му, созда́нному в че́сть пречу́дныя ико́ны, побе́дная в да́р принесе́, да вси́ па́мятующе ми́лость Богома́тере, спа́сшия гра́д се́й и страну́, вы́ну воспева́ют Бо́гу благода́рными усты́: Аллилу́иа.

И́кос 7.

Сто́льному гра́ду Росси́и свята́я ико́на Твоя́, Богома́ти, вои́стинну яви́ся блага́я Одиги́трия, я́коже дре́вле Царегра́ду: к Тебе́ бо прибега́ют лю́дие, по́мощи Твоея́ на нача́ло пути́ и де́л свои́х прося́ще и благода́рственная принося́ще моле́ния пред пречи́стою ико́ною Твое́ю за избавле́ние от скорбе́й и напа́стей, Тебе́ Помо́щницу и Засту́пницу кре́пкую ве́дают. Те́мже благода́рственно вопие́м Ти́:

Ра́дуйся, Росси́йския страны́ покро́ве;
ра́дуйся, Правосла́вия в не́й огражде́ние и утвержде́ние.

Ра́дуйся, несокруши́мый щи́те во́инов на́ших;
ра́дуйся, броне́ и́х неуязви́мая.

Ра́дуйся, ко́зни враго́в облича́ющая;
ра́дуйся, я́ко паучи́ну и́х растерза́ющая.

Ра́дуйся, нече́стия обличе́ние;
ра́дуйся, крамо́лы разруше́ние.

Ра́дуйся, ю́ных от заблужде́ний исправле́ние;
ра́дуйся, ста́рцев утеше́ние.

Ра́дуйся, душевре́дных уче́ний низложе́ние;
ра́дуйся, душеполе́зных зна́ний дарова́ние.

Ра́дуйся, Засту́пнице усе́рдная ро́да христиа́нскаго.

Конда́к 8.

Стра́нно и сумни́тельно неве́рующим слу́шати, ка́ко от ико́ны Твоея́ то́ки благода́ти истека́ют, воня́ живо́тная благоуха́ет: мы́ же, ве́рующе сло́ву, рече́нному Тобо́й, Влады́чице, к первонапи́санней ико́не: «С тобо́й Моя́ благода́ть и си́ла», упова́ем, я́ко и с се́ю ико́ною благода́ть Твоя́ вы́ну: те́мже благогове́йно предстоя́ще лобыза́ем ю́, поклоня́емся е́й, я́ко Тебе́ Саме́й су́щей, че́сть бо ико́ны на первообра́зное восхо́дит, и Твоя́ благода́ть се́ю ико́ною зна́мения и чудеса́ содева́ет все́м с ве́рою притека́ющим к Тебе́ и вопию́щим Бо́гу: Аллилу́иа.

И́кос 8.

Вся́ бы́вши горе́, к Небе́сным взя́та, и земны́х не оставля́еши, Богома́ти, свяще́нным Твои́м предста́тельством: и́маши бо ма́тернее дерзнове́ние ко Христу́ Бо́гу на́шему. Те́мже утверди́ в ми́ре глубо́це правосла́вных житие́ и вся́ поле́зная всегда́ да́руй рабо́м Твои́м, да велича́юще воспева́ем Ти́:

Ра́дуйся, Невмести́маго вмести́лище;
ра́дуйся, осене́нная си́лою Вы́шняго.

Ра́дуйся, прозя́бшая Кла́с Небе́сный;
ра́дуйся, ми́р ве́сь душепа́губнаго гла́да изба́вльшая.

Ра́дуйся, вы́ну хода́тайствующая за ро́д на́ш;
ра́дуйся, я́ко мно́го мо́жет моли́тва Твоя́ пред Сы́ном Твои́м и Бо́гом.

Ра́дуйся, все́х на́с при Кресте́ Сы́на Твоего́ усынови́вшая;
ра́дуйся, всегда́ Ма́тернюю любо́вь к на́м явля́ющая.

Ра́дуйся, Хода́таице ве́чных бла́г;
ра́дуйся, и во вре́менней жи́зни поле́зная на́м подаю́щая.

Ра́дуйся, изве́стное прибе́жище на́ше во все́х ско́рбных обстоя́ниих;
ра́дуйся, несомне́нное утеше́ние в печа́лех.

Ра́дуйся, Засту́пнице усе́рдная ро́да христиа́нскаго.

Конда́к 9.

Вся́каго естества́ а́нгельскаго превы́шшая яви́лася еси́, Пресвята́я Де́во: Бо́га бо зачала́ еси́ пло́тию, Невмести́маго все́ми вмести́ла еси́ во утро́бе Твое́й, на рука́х носи́ла еси́ Нося́щаго ве́сь ми́р дла́нию: те́мже, я́ко Честне́йшую Херуви́м и Сла́внейшую без сравне́ния Серафи́м велича́юще Тя́, вопие́м о Тебе́ Бо́гу: Аллилу́иа.

И́кос 9.

Вити́я многовеща́нныя, я́ко ры́бы безгла́сныя, ви́дим о Тебе́, Богоро́дице: недоуме́ет бо вся́к язы́к благохвали́ти Тя́ по достоя́нию, изумева́ет у́м пе́ти Тя́, Богоро́дице; оба́че Блага́я су́щи, приими́ и от на́с арха́нгельский гла́с, Тебе́ вопию́щих:

Ра́дуйся, Благода́тная;
ра́дуйся, я́ко Госпо́дь с Тобо́ю.

Ра́дуйся, Благослове́нная в жена́х;
ра́дуйся, обре́тшая благода́ть у Бо́га.

Ра́дуйся, роди́вшая Спаси́теля ми́ру;
ра́дуйся, Ма́ти Сы́на Бо́жия.

Ра́дуйся, Роди́тельнице Ве́чнаго Царя́;
ра́дуйся, израсти́вшая на́м пло́д живота́.

Ра́дуйся, освяще́нная Ду́хом Святы́м;
ра́дуйся, осене́нная си́лою Всевы́шняго.

Ра́дуйся, ве́рная Рабо́ Госпо́дня;
ра́дуйся, я́ко Тя́ блажа́т вси́ ро́ди.

Ра́дуйся, Засту́пнице усе́рдная ро́да христиа́нскаго.

Конда́к 10.

Спасти́ хотя́щи мно́гия от находя́щих зо́л, скорбе́й и боле́зней, чу́дную ико́ну Твою́, Богома́ти, дарова́ла еси́, ея́же ра́ди слепи́и прозира́ют, хроми́и хо́дят, разсла́бленнии возстаю́т, бесну́ющиися исцеля́ются, земли́ плодоно́сие подае́тся, лю́дие от смертоно́сныя я́звы избавля́ются, гра́ды и до́мы от огня́ спаса́ются: те́мже прославля́юще Бо́га, даю́щаго на́м таковы́я ми́лости, вопие́м Ему́ усе́рдно: Аллилу́иа.

И́кос 10

Стена́ еси́, Богоро́дице, стране́ Росси́йстей, гра́дом огражде́ние и сла́ва, правосла́вному во́инству на враги́ укрепле́ние. Те́мже, благодаря́ще Тя́, вопие́м:

Ра́дуйся, прославля́ющих Тя́ прославля́ющая;
ра́дуйся, не чту́щих Тя́ посрамля́ющая.

Ра́дуйся, враго́в устраше́ние;
ра́дуйся, от наше́ствия иноплеме́нных избавле́ние.

Ра́дуйся, во́инов кре́посте;
ра́дуйся, в дни́ бра́ни забра́ло и огражде́ние.

Ра́дуйся, в дни́ ми́ра живоно́сный са́де, увеселя́ющий сердца́ ве́рных;
ра́дуйся, ору́жие, его́же трепе́щут де́мони.

Ра́дуйся, спаси́тельный еле́й, умаща́ющий грехо́вныя ра́ны ка́ющихся;
ра́дуйся, те́плое на́ше упова́ние.

Ра́дуйся, несумне́нная на́ша Наде́ждо;
ра́дуйся, ти́хое и до́брое приста́нище.

Ра́дуйся, Засту́пнице усе́рдная ро́да христиа́нскаго.

Конда́к 11.

Пе́ние хвале́бное и благода́рственное прино́сят Тебе́, Влады́чице, припа́дающе ко ико́не Твое́й и любе́зно лобыза́юще ю́, де́в ли́цы, под держа́вным покро́вом Твои́м ти́хое и ми́рное и́ноческое житие́ провожда́ющии, и возложи́вше на Тя́ все́ упова́ние, ра́достно вопию́т Бо́гу: Аллилу́иа.

И́кос 11.

Я́ко светоприе́мную свещу́, зри́м Твою́ честну́ю ико́ну, Пресвята́я Влады́чице: та́ бо невеще́ственный о́гнь благода́ти Твоея́ восприе́мши, и в подо́биих ея́ но́вы возжига́ет свети́льники, прича́стны тоя́жде си́лы благода́тныя, и озаря́ет чудесы́, наставля́ющи на пу́ть спасе́ния все́х вопию́щих Ти́ си́це:

Ра́дуйся, Неве́сто Неневе́стная;
ра́дуйся, Богоизбра́нная Отрокови́це, Ма́ти Де́во.

Ра́дуйся, до́брая Наста́внице непоро́чнаго де́вства;
ра́дуйся, Храни́тельнице ревну́ющих о чистоте́.

Ра́дуйся, же́н похвало́;
ра́дуйся, де́в велича́ние.

Ра́дуйся, вдо́в заступле́ние;
ра́дуйся, сиро́т призре́ние.

Ра́дуйся, ни́щих Пита́тельнице;
ра́дуйся, наги́х одея́ние.

Ра́дуйся, печа́льных утеше́ние;
ра́дуйся, скорбя́щих весе́лие.

Ра́дуйся, Засту́пнице усе́рдная ро́да христиа́нскаго.

Конда́к 12.

Благода́ть да́ти восхоте́вши почита́ющим Тя́ с любо́вию, Богороди́тельнице, прису́щую Ти́ си́лу благода́тную оста́вила еси́ во святы́х Твои́х ико́нах, и́бо Боже́ственная благода́ть, спребыва́ющи те́м (ико́нам), зна́мения и чудеса́ вы́ну содева́ет и душе́вных и теле́сных неду́г исцеле́ние все́м с ве́рою приходя́щим подае́т Твои́ми Богома́терними непреста́нными к Бо́гу моли́твами о вопию́щих Ему́: Аллилу́иа.

И́кос 12.

Пою́ще Твоя́ чудеса́, бы́вшая в дре́вняя и настоя́щая времена́, хва́лим Тя́, я́ко Живоно́сный Исто́чник благода́ти, я́ко неистощи́мую реку́ чуде́с, я́ко бе́здну ми́лости и щедро́т, и все́ упова́ние по Бо́зе возлага́юще на Тя́ и в се́й и в бу́дущей жи́зни, прославля́юще Тя́, вопие́м:

Ра́дуйся, христиа́н непосты́дное упова́ние;
ра́дуйся, ве́рных спаси́тельное прибе́жище.

Ра́дуйся, ненаде́жных наде́яние;
ра́дуйся, отча́янных спасе́ние.

Ра́дуйся, ба́не, омыва́ющая со́весть;
ра́дуйся, росо́, оживля́ющая ду́ши.

Ра́дуйся, боле́зней врачевство́ ско́рое и безме́здное;
ра́дуйся, от все́х бе́д бы́строе избавле́ние.

Ра́дуйся, Уте́шительнице во вся́кой ско́рби;
ра́дуйся, из глубины́ поги́бели спаса́ющая.

Ра́дуйся, отра́до в де́нь сме́рти;
ра́дуйся, еди́ная Наде́ждо и по сме́рти.

Ра́дуйся, Засту́пнице усе́рдная ро́да христиа́нскаго.

Конда́к 13

О Всепе́тая Ма́ти, ро́ждшая все́х святы́х Святе́йшее Сло́во, приими́ ны́не ма́лое сие́ моле́ние и, вели́чия ра́ди бла́гости Твоея́ и бе́здны щедро́т Твои́х, не помяни́ мно́жества грехо́в на́ших, но испо́лни во благи́х проше́ния на́ша, подава́ющи те́лу здра́вие, ду́ши спасе́ние, избавля́ющи от вся́кия ну́жды и печа́ли и Ца́рствия Небе́снаго насле́дники сотворя́ющи все́х ве́рно вопию́щих Бо́гу: Аллилу́иа.

[Се́й конда́к глаго́лется три́жды.]
[Далее повторяем 1‑е икос и кондак:]

И́кос 1.

А́нгел предста́тель по́слан бы́сть рещи́ Богоро́дице «Ра́дуйся», егда́ Бо́г Сло́во воплоща́шеся во утро́бе Ея́: и мы́, гре́шнии, прославля́юще явле́ние чу́дныя Ея́ ико́ны и Боже́ственнаго Младе́нца Спа́са Христа́, со умиле́нием вопие́м Благода́тней:

Ра́дуйся, Богоизбра́нная Отрокови́це;
ра́дуйся, Ма́ти Бо́жия.

Ра́дуйся, Цари́це Небесе́ и земли́;
ра́дуйся, све́тлое Це́ркве Небе́сныя и земны́я украше́ние.

Ра́дуйся, А́нгелы чти́мая;
ра́дуйся, пева́емая от Серафи́м.

Ра́дуйся, све́тлое проро́ческое сбытие́;
ра́дуйся, апо́столов похвало́.

Ра́дуйся, му́ченическое испове́дание;
ра́дуйся, преподо́бных ве́нче.

Ра́дуйся, пра́ведных весе́лие;
ра́дуйся, гре́шных упова́ние.

Ра́дуйся, Засту́пнице усе́рдная ро́да христиа́нскаго.

Конда́к 1.

Избра́нной от все́х родо́в Засту́пнице ро́да христиа́нскаго, покро́вом Своея́ бла́гости покрыва́ющей страну́ на́шу правосла́вную, благода́рственная пе́ния прино́сим Ти́, Богоро́дице, о явле́нии чу́дныя Твоея́ ико́ны. Ты́ же, я́ко Всеми́лостивая, все́х притека́ющих к Тебе́ Помо́щнице, заступа́й на́с во все́х ско́рбех и ну́ждах, беда́х и напа́стех, да зове́м Ти́:

Ра́дуйся, Засту́пнице усе́рдная ро́да христиа́нскаго.

Моли́тва 1‑я.

О Пресвята́я Госпоже́ Влады́чице Богоро́дице! Со стра́хом, ве́рою и любо́вию припа́дающе пред честно́ю ико́ною Твое́ю, мо́лим Тя́: не отврати́ лица́ Твоего́ от прибега́ющих к Тебе́, умоли́ милосе́рдая Ма́ти, Сы́на Твоего́ и Бо́га на́шего, Го́спода Иису́са Христа́, да сохрани́т ми́рну страну́ на́шу, Це́рковь Свою́ Святу́ю да незы́блему соблюде́т от неве́рия, ересе́й и раско́ла. Не и́мамы бо ины́я по́мощи, не и́мамы ины́я наде́жды, ра́зве Тебе́, Пречи́стая Де́во: Ты́ еси́ Всеси́льная христиа́н Помо́щница и Засту́пница. Изба́ви все́х с ве́рою Тебе́ моля́щихся от паде́ний грехо́вных, от наве́та злы́х челове́к, от вся́ких искуше́ний, скорбе́й, бе́д и от напра́сныя сме́рти: да́руй на́м ду́х сокруше́ния, смире́ние се́рдца, чистоту́ помышле́ний, исправле́ние грехо́вныя жи́зни и оставле́ние прегреше́ний, да вси́ благода́рне воспева́юще вели́чия Твоя́, сподо́бимся Небе́снаго Ца́рствия и та́мо со все́ми святы́ми просла́вим Пречестно́е и Великоле́пое И́мя Отца́ и Сы́на и Свята́го Ду́ха. Ами́нь.

Моли́тва 2‑я.

О, Пресвята́я Влады́чице Богоро́дице, Цари́це Небеси́ и земли́, вы́шшая а́нгел и арха́нгел и всея́ тва́ри честне́йшая, чи́стая Де́во Мари́е, ми́ру блага́я Помо́щнице, и все́м лю́дем утвержде́ние, и во вся́ких ну́ждах избавле́ние! При́зри и ны́не, Госпоже́ Всеми́лостивая, на рабы́ Твоя́, Тебе́ умиле́нною душе́ю и сокруше́нным се́рдцем моля́щияся, со слеза́ми к Тебе́ припа́дающия и покланя́ющияся пречи́стому и цельбоно́сному о́бразу Твоему́, и по́мощи и заступле́ния Твоего́ прося́щия. О, Всеми́лостивая и Премилосе́рдая Де́во Богоро́дице Чи́стая! Воззри́, Госпоже́, на лю́ди Твоя́: мы́ бо гре́шнии не и́мамы ины́я по́мощи, ра́зве Тебе́ и от Тебе́ ро́ждшагося Христа́ Бо́га на́шего. Ты́ еси́ засту́пница и предста́тельница на́ша. Ты́ еси́ оби́димых защище́ние, скорбя́щим ра́дование, си́рым прибе́жище, вдо́вам храни́тельница, де́вам сла́ва, пла́чущим весе́лие, больны́м посеще́ние, немощны́м исцеле́ние, гре́шным спасе́ние, Сего́ ра́ди, о Богома́ти, к Тебе́ прибега́ем, и на Тво́й Пречи́стый о́браз с Предве́чным на руку́ Твое́ю держи́мым Младе́нцем, Го́сподем на́шим Иису́сом Христо́м взира́юще, умиле́нное пе́ние Тебе́ прино́сим и вопие́м: поми́луй на́с, Ма́ти Бо́жия, и проше́ние на́ше испо́лни, вся́ бо су́ть возмо́жна хода́тайству Твоему́: я́ко Тебе́ сла́ва подоба́ет ны́не и при́сно и во ве́ки веко́в. Ами́нь.

Тропарь, глас 4

Засту́пнице усе́рдная,/ Ма́ти Го́спода Вы́шняго,/ за всех мо́лиши Сы́на Твоего́ Христа́ Бо́га на́шего,/ и всем твори́ши спасти́ся,/ в держа́вный Твой покро́в прибега́ющим./ Всех нас заступи́, о Госпоже́ Цари́це и Влады́чице,/ и́же в напа́стех и в ско́рбех, и в боле́знех обремене́нных грехи́ мно́гими,/ предстоя́щих и моля́щихся Тебе́ умиле́нною душе́ю/ и сокруше́нным се́рдцем,/ пред пречи́стым Твои́м о́бразом со слеза́ми,/ и невозвра́тно наде́жду иму́щих на Тя,/ избавле́ния всех зол,/ всем поле́зная да́руй,/ и вся спаси́, Богоро́дице Де́во:// Ты бо еси́ Боже́ственный покро́в рабо́м Твои́м.

Перевод: Заступница усердная, Матерь Господа Всевышнего, за всех молишь Ты Сына Твоего, Христа Бога нашего, и содействуешь спасению всех, под мощный Твой покров прибегающих. Всех нас защити, о Госпожа, Царица и Владычица, пребывающих в напастях, и скорбях, и болезнях, обремененных грехами многими, предстоящих и молящихся Тебе с умиленною душою и сокрушенным сердцем, пред пречистым Твоим образом со слезами, и имеющих твердую надежду в Тебе на избавление от всех зол. Всем полезное даруй и всех спаси, Богородица Дева, ибо Ты – Божественный покров рабам Твоим.

Величание:

Велича́ем Тя,/ Пресвята́я Де́во,/ и чтим о́браз Твой святы́й,/ от него́же истека́ет благода́тная по́мощь// всем, с ве́рою притека́ющим к нему́.

Величание (Казанская-Пензенская):

Велича́ем Тя,/ Пресвята́я Де́во,/ и чтим о́браз Твой святы́й,/ и́мже изба́вихомся// от пога́ных наше́ствия.

Минея, 22 Октября, Канон Одигитрии Пресвятыя Богородицы

Глас 4

Песнь 1

Ирмос: Отве́рзу уста́ моя/ и напо́лнятся Ду́ха,/ и слово отры́гну Царице Матери,/ и явлю́ся, све́тло торжеству́я,/ и воспою́, ра́дуйся́, Тоя́ чудеса́.

Припев: Пресвята́я Богоро́дице, спаси́ на́с.

Радостно, Чистая, ныне наста́вшее хвале́ние приноша́ю, ра́дуяся,/ и тихим гла́сом, Одигитрие, вопию́ Ти:/ радуйся и испо́лни мя ра́зума, пе́ти начина́юща.

Припев: Пресвята́я Богоро́дице, спаси́ на́с.

Христа родившая, радость нам вечную,/ о радуйся, Всепетая, православных наде́ждо,/ Одигитрие, всепетая Деви́це:/ радости испо́лни мя, ми́рови жела́нныя.

Сла́ва Отцу́ и Сы́ну и Свято́му Ду́ху.

Лику́ют вси челове́цы и Ангелы,/ всегда согласно вопию́ще на Небеси́ и на земли́, Одигитрие, радуйся, Деви́це,/ радости бо Рождеством Твоим вся́ческая испо́лнила еси.

И ны́не и при́сно и во ве́ки веко́в. Ами́нь.

Радость, Одигитрие,/ со страхом Ти вопию́щих ра́дости сподо́би,/ Мати су́щия радости, избавля́ющи скорбе́й всяческих,/ и всех помилуй, к Тебе прибега́ющих.

Песнь 3

Ирмос: Твоя песносло́вцы, Богородице,/ живы́й и незави́стный исто́чниче,/ лик себе совоку́пльшия, духо́вно утверди́,/ в Божественней Твоей славе/ венце́в славы сподо́би.

Припев: Пресвята́я Богоро́дице, спаси́ на́с.

Христа, Вышняго Царя, о радуйся, непоколебимая, чистая и одушевле́нная пала́то,/ радуйся, Одигитрие, радуйся:/ Тобою бо неруши́м наш град сохраняется.

Припев: Пресвята́я Богоро́дице, спаси́ на́с.

Вмести́ти егоже не возмо́же тварь,/ во утро́бу неискусобра́чную, Одигитрие Девице, телесно вмести́ла еси:/ темже Ти, радуйся, пое́м, по до́лгу велича́юще.

Сла́ва Отцу́ и Сы́ну и Свято́му Ду́ху.

Радость многопетая ми́рови,/ радостно Ти пою́ще присно, ве́чнующия, Чистая, радости сподобля́емся/ Твои́ми матерними молитвами к Ро́ждшемуся из Тебе, Одигитрие.

И ны́не и при́сно и во ве́ки веко́в. Ами́нь.

Злату́ю Тя ста́мну, и све́щник, и жезл, и трапе́зу, Чистая, призыва́ем, Одигитрие,/ и глас, еже радуйся, Тебе при́сно привноша́ем/ с си́миже имены́.

Седален, глас 3

Лю́дие благочестивии, правовернии собо́ри христоимени́тии,/ приступите верно вси,/ Божественному припа́дающе Божия Матере образу:/ Та́я бо исцеление боля́щим радостно подае́т,/ уязвля́ет же злосла́вныя, яко стрела́ от лу́ка,/ нас всех веселит светови́дно/ и благодатию озаря́ет молитвами Своими.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богородичен: Всю Тя Бог освяти́, Деву До́брую и Непорочную в жена́х,/ пророки прообрази́в че́стно, иере́и благослови́в, во святая святых всели́,/ Ангелом воспита́, с Небесе́ пищу хлеб подая́./ Сам же Преблагий, Единородное Бог Слово,/ всели́ся в Тя и плотию про́йде из Тебе./ Темже Ти покланяемся и чтим,/ яко воистинну истинную сущую Богородицу.

Песнь 4

Ирмос: Седя́й в славе на Престоле Божества во о́блаце ле́гце,/ прии́де Иисус Пребожественный/ нетле́нною дла́нию/ и спасе́ зову́щия:/ слава, Христе, силе Твоей.

Припев: Пресвята́я Богоро́дице, спаси́ на́с.

Радуйся, чудо чудес, Одигитрие Владычице./ Радуйся, всех радосте градо́в и ве́сей,/ непобеди́мое христианское в беда́х храни́лище,/ и предгра́дие, и на враги побежде́ние.

Припев: Пресвята́я Богоро́дице, спаси́ на́с.

Радуйся, радуйся людей православных похвало́ и христолюбивых пастырей, покров пребываеши всех, Царице./ Радуйся, Одигитрие, прибежище всем нам и утверждение.

Сла́ва Отцу́ и Сы́ну и Свято́му Ду́ху.

Радуйся, всем скорое в беда́х избавле́ние./ Радуйся, готовое всем скорбя́щим утеше́ние./ Радуйся, Всепетая, радуйся, Одигитрие Всеблагословенная,/ всем немощны́м Исцели́тельнице.

И ны́не и при́сно и во ве́ки веко́в. Ами́нь.

Радуйся, Еяже вели́чия вся тварь/ сла́вити у́бо спеши́т по достоянию, но не возмога́ет, Одигитрие,/ и сего ради зове́т Ти:/ радуйся, Владычице, Боговместимое жилище.

Песнь 5

Ирмос: Ужасо́шася всяческая/ о Божественней славе Твоей,/ Ты бо, Неискусобра́чная Дево,/ имела еси во утро́бе над всеми Бога/ и родила́ еси Безле́тнаго Сына,/ всем воспевающим Тя/ мир подава́ющая.

Припев: Пресвята́я Богоро́дице, спаси́ на́с.

Благосты́ни бездно и щедро́там еси, радуйся, Одигитрие Девице,/ радуйся, всем радость творя́щи верным./ О, радуйся, сущим в беда́х, скорбя́щим пребыстрая Заступнице.

Припев: Пресвята́я Богоро́дице, спаси́ на́с.

Радости от исполнения величия чудес Твоих зря́ще исполняемся вси,/ не зря́щии, слышаще же, вернии./ Темже, радуйся, Тебе присно,/ всюду и вси, Одигитрие, пое́м.

Сла́ва Отцу́ и Сы́ну и Свято́му Ду́ху.

Христа Бога нашего, о радуйся, Одигитрие, жили́ще/ и дом неизрече́нней и пребоже́ственней, Дево, Славе Его./ О, радуйся, пала́то преукраше́нная,/ радуйся, гра́де одушевле́нный, присноца́рствующий.

И ны́не и при́сно и во ве́ки веко́в. Ами́нь.

Радость неоску́дную Тя разсмотря́юще,/ яко мо́ре, Отроковице, Одигитрие Девице,/ радующеся вси, радуйся, вопие́м Ти/ и, пою́ще, Божественных даро́в неви́димо присно от Тебе ожидаем.

Песнь 6

Ирмос: Божественное сие́ и всечестно́е/ соверша́юще пра́зднество,/ Богомудрии, Богоматере,/ прииди́те, руками воспле́щим,/ от Нея ро́ждшагося Бога сла́вим.

Припев: Пресвята́я Богоро́дице, спаси́ на́с.

Христа, Чистая, прие́млющи,/ глас, еже радуйся, Одигитрие Девице, слышала еси,/ егоже неизреченно ро́ждши, и, радуйся, от всех слы́шиши всегда.

Припев: Пресвята́я Богоро́дице, спаси́ на́с.

Радости вся испо́лнила еси,/ Вышняя и нижняя Ты совокупи́ла еси, Одигитрие,/ темже радостно и согла́сно ныне Небо и вся земля зове́т Ти.

Сла́ва Отцу́ и Сы́ну и Свято́му Ду́ху.

Вдова́м, о радуйся, Всепетая, и всем си́рым, Одигитрие, утеше́ние,/ радуйся, всем источа́ющи ни́щим богатство неистощи́мое.

И ны́не и при́сно и во ве́ки веко́в. Ами́нь.

Зла́та всякаго блиста́ема и у́тра солнечнаго светле́йши,/ жили́ще Христово, радуйся, Одигитрие, радуйся, Девице,/ радуйся, Невесто Неневестная.

Кондак, глас 8

Притеце́м, людие, к тихому сему́ и доброму пристанищу,/ скорой Помощнице, гото́вому и те́плому спасению, покро́ву Девы,/ ускори́м на молитву и потщи́мся на покая́ние:/ источает бо нам неоску́дныя милости Пречистая Богородица,/ предваря́ет на помощь и избавляет от великих бед и зол/ благонравныя и Богобоя́щияся рабы Своя.

Икос

Смысл очи́стивше и ум, притеце́м к Богородице,/ све́тло пе́сньми ублажа́юще Ю,/ и пречи́стую икону Ея прославля́ем и чтим,/ и, припа́дающе, покланя́емся яко Само́й су́щей о́ной:/ честь бо иконы на Первообра́зное восхо́дит,/ и почита́яй и покланя́яйся ей почитает са́мое Первообра́зное,/ якоже Божественнии отцы реко́ша. И аще кто не чтит Пресвятыя Богородицы и не покланяется иконе Ея, ана́фема да будет:/ посрамля́ет бо и погубля́ет не чту́щия Ю,/ избавляет же от великих бед и зол благонра́вныя и Богобоя́щияся рабы Своя.

Песнь 7

Ирмос: Не послужи́ша тва́ри Богомудрии,/ па́че Созда́вшаго,/ но, о́гненное преще́ние му́жески попра́вше,/ ра́довахуся, пою́ще:/ препе́тый отцев Господь и Бог,/ благословен еси.

Припев: Пресвята́я Богоро́дице, спаси́ на́с.

Радуйся, радуйся. Богородице Одигитрие,/ всех и всегда наставля́ющи верных ше́ствовати ко всякому пути́ спасительному,/ радуйся, Владычице, Тобою бо присно избавляемся настоя́щия ва́рварския беды́.

Припев: Пресвята́я Богоро́дице, спаси́ на́с.

Радуйся, радуйся, Одигитрие,/ бдя́щи и моля́щися о нас к Богу,/ и всякия злобы хода́тайством Твоим всяческих скорбе́й,/ Богородительнице, всех людей избавля́ющи.

Сла́ва Отцу́ и Сы́ну и Свято́му Ду́ху.

Радуйся, радуйся, Пресвятая Одигитрие,/ проше́ния наша к пользе нам исполня́ющи/ и хотя́щи всем при́сно всегда любодру́жное благое единство, спешное же во изя́щных.

И ны́не и при́сно и во ве́ки веко́в. Ами́нь.

Радуйся, радуйся, корабле́м, Одигитрие, ну́ждно пла́вающим, избавля́ющи верных/ и всем избавле́ние от всякия ско́рби и неду́ги/ пестро́тныя и ме́дленныя разреша́ющи вскоре.

Песнь 8

Ирмос: О́троки благочестивыя в пещи́/ Рождество́ Богоро́дичо спасло́ есть,/ тогда у́бо образу́емое,/ ныне же де́йствуемое,/ вселе́нную всю воздвиза́ет пе́ти Тебе:/ Господа пойте дела/ и превозноси́те Его во вся веки.

Припев: Пресвята́я Богоро́дице, спаси́ на́с.

Радуйся, Всеблагословенная Марие,/ из Тебе бо Всеблагословенный Бог оде́яся во всего́ мя человека/ и, оде́явся, соедини́ Своему Божеству неизрече́нным соединением, Дево Одигитрие;/ радуйся, Обрадованная, радосте всего мира.

Припев: Пресвята́я Богоро́дице, спаси́ на́с.

Радуйся, лукавых духо́в Прогонительнице;/ радуйся, Богородице Одигитрие;/ радуйся, Юже Небе́сная неви́димая во́инства славосло́вят всегда и велича́ют яко Матерь Божию бывшую;/ радуйся, я́же нижняя сочета́вши с Вышними.

Сла́ва Отцу́ и Сы́ну и Свято́му Ду́ху.

Радуйся, всех Небесных сил без разсужде́ния превосходя́щая;/ радуйся, Одигитрие;/ радуйся, вся́кия тва́ри яко Бога Рождшая госпо́дствующи, ей, Владычице Всепетая;/ радуйся, пребыва́еши Дева Чистая и по рождестве́.

И ны́не и при́сно и во ве́ки веко́в. Ами́нь.

Радуйся, жена́м всем сла́во, хра́ме преосвяще́нный Бога нашего;/ радуйся, Одигитрие;/ радуйся, душеспаси́тельная всей вселенней;/ радуйся, покрывающий о́блаче, Небе́с ши́ршая;/ радуйся, мирополо́жнице, Божественнаго ми́ра полна́.

Песнь 9

Ирмос: Всяк земноро́дный/ да взыгра́ется, Ду́хом просвеща́ем,/ да торжеству́ет же Безпло́тных умо́в естество́,/ почита́ющее священное торжество Богома́тере,/ и да вопиет: радуйся, Всеблаженная Богородице,/ Чистая Приснодево.

Припев: Пресвята́я Богоро́дице, спаси́ на́с.

Радуйся, свеще́, Свет невечерний поне́сшая,/ и в Рождестве Твоем многобожия тьму разруши́вшая,/ и а́довы про́пасти изба́вльшая люди;/ радуйся, Одигитрие Богородице, добро́т всех Предхода́таице.

Припев: Пресвята́я Богоро́дице, спаси́ на́с.

Радуйся, земле́, из нея́же Клас прозя́бши Небесный верным,/ и мира всего душегу́бнаго гла́да изба́ви, разу́мная и одушевле́нная;/ о радуйся, виногра́де, иже Грозд живо́тный ро́ждшая,/ Богородице Чистая, Одигитрие.

Сла́ва Отцу́ и Сы́ну и Свято́му Ду́ху.

Радуйся, тайных цвето́в прекрасный су́щий раю́;/ радуйся, Мати Дево, Неви́димых ра́зум чистото́ю странноле́пно побе́ждши, Богороди́тельнице;/ радуйся, Отроковице;/ радуйся, Одигитрие, всеми́рное чу́до и слышание.

И ны́не и при́сно и во ве́ки веко́в. Ами́нь.

Лето живота́ нашего про́чее сохрани́ неврежде́нно поможе́нием Твоим, Дево Отроковице,/ и сподо́би коне́ц благи́й получи́ти нам, воспева́ющим Тя и взыва́ющим:/ радуйся, Всеблаженная Богородице, Чистая Одигитрие.

Светилен

Да почти́тся Всепетая Мати Божия,/ Жизнь Су́щую ро́ждши, Христа Бога нашего,/ райских дверей отверзе́ние и всего мира очище́ние, к животу́ возведе́ние:/ Сей есть проро́ком глаго́лавый,/ Тому поклони́мся, Богу и Спасу душ наших.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богородичен: Прииди́те, ве́рнии, с чистото́ю возвели́чим Пречистыя Матере Бога нашего чу́дную икону/ и Божественнаго Младенца, Спаса Христа,/ егоже яко рождшая на руку́ носи́вши/ и ма́терне дерзновение к Нему иму́щи,/ непреста́нно мо́лит за ны и подае́т рабом Своим богатыя милости.

Минея, 22 Октября, Ин канон праздника

Глас 4

Песнь 1

Ирмос: Отве́рзу уста́ моя/ и напо́лнятся Ду́ха,/ и слово отры́гну Царице Матери,/ и явлю́ся, све́тло торжеству́я,/ и воспою́, ра́дуйся́, Тоя́ чудеса́.

Припев: Пресвята́я Богоро́дице, спаси́ на́с.

Благогове́ют Ти, Богородице, Ангелов нача́льницы, и святых чи́ни че́стно слу́жат,/ праведнии красу́ются, Небесных Хода́таицу блажа́т Тя./ Ку́пно же и земля и Небо в веселии све́тло восхваля́ют Тя,/ и мы, грешнии, милости просим:/ озари́ наша сердца́, Владычице, воспе́ти песнь святыя Твоея иконы явлению.

Припев: Пресвята́я Богоро́дице, спаси́ на́с.

Прииди́те, собери́теся, христоимени́тии людие, умы́ тайно очи́стившеся, во святую церковь Матере Христа Бога нашего:/ источает бо нам неоску́дно от святыя иконы источник духо́вен,/ целе́бен душа́м и те́лом, песнь вопиющим:/ благословен из Тебе рождейся Бог наш.

Сла́ва Отцу́ и Сы́ну и Свято́му Ду́ху.

Диви́т, Пренепорочная, и ужаса́ет всяк слух странно чудо Божественнаго Твоего Рождества:/ како Херуви́мскаго Творца зачала́ еси;/ како Огнь нестерпи́мый во утро́бе носи́ла еси;/ како Су́щую Жизнь плотию облекла еси и Живо́т всему миру родила́ еси,/ Бога ку́пно и человека.

И ны́не и при́сно и во ве́ки веко́в. Ами́нь.

Под кров Твой, Дево Госпоже, прибега́ем вси ро́ди человечестии:/ просвети ны светом Рождества Твоего, грешныя рабы Твоя,/ моля́щияся прилежно и кла́няющиися пречистей Твоей иконе,/ прося́ще от Тебе прия́ти великия милости.

Песнь 3

Ирмос: Твоя песносло́вцы, Богородице,/ живы́й и незави́стный исто́чниче,/ лик себе совоку́пльшия, духо́вно утверди́,/ в Божественней Твоей славе/ венце́в славы сподо́би.

Припев: Пресвята́я Богоро́дице, спаси́ на́с.

Ку́ю Ти достойную похвалу́ наше принесе́т коне́чное неможе́ние,/ яко явле́нием пречистыя Твоея Божественныя иконы незави́стныя источники целе́бныя источа́еши/ верно прибега́ющим к Тебе рабом Твоим.

Припев: Пресвята́я Богоро́дице, спаси́ на́с.

Божественныя Твоей иконы святое явление, Богородице Дево,/ яко светоза́рное возсия́ нам солнце, преславных чуде́с лучи́ пуща́ющи,/ тьмы лю́тых обстоя́ний отгоня́ющи/ священными Твоими, Владычице, предстательствы.

Сла́ва Отцу́ и Сы́ну и Свято́му Ду́ху.

Испо́лнила еси благода́ти иногда́ первопи́санную Твою икону, Госпоже Дево Богородице,/ и ныне та же благодать и́стинствует сия́нием веры чудес, яко той ра́ди первопи́санныя,/ ко спасению верно к Тебе по Бо́зе прибегающим.

И ны́не и при́сно и во ве́ки веко́в. Ами́нь.

Покланяемся, Богородице, Твоему пречистому о́бразу и пресладкому Твоему Младенцу,/ превечному и незаходимому Свету, Христу,/ Имже спасла́ еси от лю́тых зол и тле́ния смертнаго все человеческое естество́.

Седален, глас 3

Лю́дие благочестивии, правовернии собо́ри христоимени́тии,/ приступите верно вси,/ Божественному припа́дающе Божия Матере образу:/ Та́я бо исцеление боля́щим радостно подае́т,/ уязвля́ет же злосла́вныя, яко стрела́ от лу́ка,/ нас всех веселит светови́дно/ и благодатию озаря́ет молитвами Своими.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богородичен: Всю Тя Бог освяти́, Деву До́брую и Непорочную в жена́х,/ пророки прообрази́в че́стно, иере́и благослови́в, во святая святых всели́,/ Ангелом воспита́, с Небесе́ пищу хлеб подая́./ Сам же Преблагий, Единородное Бог Слово,/ всели́ся в Тя и плотию про́йде из Тебе./ Темже Ти покланяемся и чтим,/ яко воистинну истинную сущую Богородицу.

Песнь 4

Ирмос: Седя́й в славе на Престоле Божества во о́блаце ле́гце,/ прии́де Иисус Пребожественный/ нетле́нною дла́нию/ и спасе́ зову́щия:/ слава, Христе, силе Твоей.

Припев: Пресвята́я Богоро́дице, спаси́ на́с.

Почтим, лю́дие, Чистыя в чистоте икону Девы Богородицы/ и Тоя́ Божественнаго Младенца, Христа Бога нашего,/ и лобыза́ем и прославля́ем со страхом и трепетом:/ почитаем бо икону благоче́стно,/ паче же почитаем Са́мую Ту́ю сущую Чистую Богоматерь.

Припев: Пресвята́я Богоро́дице, спаси́ на́с.

Давид, Божественный и чу́дный пророк, издале́ча прови́дя, глаго́ла:/ лицу́ Твоему́ помо́лятся богатии лю́дие./ Мы же, вернии, покланя́емся и лобыза́ем честну́ю икону,/ душа́ми ку́пно и телесы́ освяща́емы.

Сла́ва Отцу́ и Сы́ну и Свято́му Ду́ху.

Евангелия Христова Богогла́сный списа́тель Лука/ Божиим манове́нием всенепорочный Твой напису́ет образ, Богородице,/ и Младенца Превечнаго на рука́х Твоих вообрази́в,/ к немуже притекающия напастей и бед избавля́еши,/ и вся покрыва́еши, и спаса́еши Твоею милостию.

И ны́не и при́сно и во ве́ки веко́в. Ами́нь.

Ты еси похвало́ и вене́ц святым всем, о Царице!/ Ты упование наше и Помощница по Бозе,/ и на Тя надежду спасения нашего возложи́хом вси./ Тебе мо́лимся, яко Божии Матери:/ одожди́ грешным рабо́м Твоим богатыя Твоя душеспаси́тельныя ми́лости.

Песнь 5

Ирмос: Ужасо́шася всяческая/ о Божественней славе Твоей,/ Ты бо, Неискусобра́чная Дево,/ имела еси во утро́бе над всеми Бога/ и родила́ еси Безле́тнаго Сына,/ всем воспевающим Тя/ мир подава́ющая.

Припев: Пресвята́я Богоро́дице, спаси́ на́с.

Всяко, Пречистая, существо воспе́ти недоуме́ет Тя,/ па́че бо Горних умо́в превозвы́силася еси,/ рождши неприступнаго и страшнаго Всецаря и Бога,/ но, яко Ми́лостива и скорая человеком Помощница,/ вонми́ моле́нию раб Твоих и да́руй Твою помощь.

Припев: Пресвята́я Богоро́дице, спаси́ на́с.

Всяко, Пречистая, существо воспе́ти недоуме́ет Тя,/ па́че бо Горних умо́в превозвы́силася еси,/ рождши неприступнаго и страшнаго Всецаря и Бога,/ но, яко Ми́лостива и скорая человеком Помощница,/ вонми́ моле́нию раб Твоих и да́руй Твою помощь.

Сла́ва Отцу́ и Сы́ну и Свято́му Ду́ху.

Безоче́сным сладкое зре́ние дае́тся, глухи́м слы́шание,/ немы́м благоглаго́лание, хромым хождение, прокаже́нным очищение,/ де́монствуемым целому́дрие и в боле́знех су́щим различных исцеление/ осене́нием Пречистыя Твоея, Богородице, иконы.

И ны́не и при́сно и во ве́ки веко́в. Ами́нь.

Не умолчи́м никогда́же, Богородице, псалмы́ и пе́сньми воспева́ти вели́чия Твоя, Обрадованная:/ Бога бо воистинну воплотившагося родила́ еси,/ во спасение наше всемирное и избавление.

Песнь 6

Ирмос: Божественное сие́ и всечестно́е/ соверша́юще пра́зднество,/ Богомудрии, Богоматере,/ прииди́те, руками воспле́щим,/ от Нея ро́ждшагося Бога сла́вим.

Припев: Пресвята́я Богоро́дице, спаси́ на́с.

Божественнаго Твоего Рождества́, Дево Госпоже, пребога́тая благодать,/ юже дре́вле изглаше́нием предала́ еси пречистому Твоему образу,/ неоску́дне де́йствовати великая же и пресла́вная во спасение на Тя наде́ющимся.

Припев: Пресвята́я Богоро́дице, спаси́ на́с.

Иде́же прославля́ется святое имя Обрадованныя Богородицы,/ та́мо всяческих благи́х исто́чницы пролива́ются;/ прииди́те в чистоте́, челове́цы,/ се бо явление Божественныя Девы иконы сказу́ет Царицы пришествие во спасение всех верных.

Сла́ва Отцу́ и Сы́ну и Свято́му Ду́ху.

Целения боле́зней, отгна́ние же страстей и душепита́тельное спасение,/ грехо́в проще́ние и вечное избавле́ние от пречистыя Твоея иконы, Владычице,/ верно приходя́ще, прие́млем, Богомати Всенепорочная.

И ны́не и при́сно и во ве́ки веко́в. Ами́нь.

К Тебе, Госпоже, прибегают ро́ди правоверных, про́сят великия ми́лости/ и прие́млют неоску́дно су́щии в неду́зех исцеление, в страсте́х премене́ние, в печа́лех утеше́ние./ Источи́ и мне, Владычице, ка́плю душеспаси́тельную,/ да со всеми и аз пою́ Твое величие.

Кондак, глас 8

Притеце́м, людие, к тихому сему́ и доброму пристанищу,/ скорой Помощнице, гото́вому и те́плому спасению, покро́ву Девы,/ ускори́м на молитву и потщи́мся на покая́ние:/ источает бо нам неоску́дныя милости Пречистая Богородица,/ предваря́ет на помощь и избавляет от великих бед и зол/ благонравныя и Богобоя́щияся рабы Своя.

Икос

Смысл очи́стивше и ум, притеце́м к Богородице,/ све́тло пе́сньми ублажа́юще Ю,/ и пречи́стую икону Ея прославля́ем и чтим,/ и, припа́дающе, покланя́емся яко Само́й су́щей о́ной:/ честь бо иконы на Первообра́зное восхо́дит,/ и почита́яй и покланя́яйся ей почитает са́мое Первообра́зное,/ якоже Божественнии отцы реко́ша. И аще кто не чтит Пресвятыя Богородицы и не покланяется иконе Ея, ана́фема да будет:/ посрамля́ет бо и погубля́ет не чту́щия Ю,/ избавляет же от великих бед и зол благонра́вныя и Богобоя́щияся рабы Своя.

Песнь 7

Ирмос: Не послужи́ша тва́ри Богомудрии,/ па́че Созда́вшаго,/ но, о́гненное преще́ние му́жески попра́вше,/ ра́довахуся, пою́ще:/ препе́тый отцев Господь и Бог,/ благословен еси.

Припев: Пресвята́я Богоро́дице, спаси́ на́с.

Прииди́те, почерпе́м отпуще́ние от неистощи́маго источника,/ точа́щаго святы́ню Пречистыя Девы/ и Тоя́ Пречистаго Младенца, Божия Слова, нас ради вочеловечшагося./ К Нему возопии́м:/ Тво́рче Изба́вителю,/ препрославленный со Отцем и Духом, Боже, благословен еси.

Припев: Пресвята́я Богоро́дице, спаси́ на́с.

Неусы́пную, Чистая, и Богоприятную иму́щи молитву,/ и непреодоле́емую держа́ву кре́пости,/ врагов наших дерзость, яже на ны, разори́/ и вы́я их под но́зе верному народу нашему низложи́,/ да возвесели́мся о Тебе, раби́, Сыну Твоему вопию́ще:/ отец наших Боже, благословен еси.

Сла́ва Отцу́ и Сы́ну и Свято́му Ду́ху.

Радуемся и веселимся, вернии лю́дие, чу́дному явле́нию иконы Пречистыя Владычицы Богородицы:/ река́ бо яви́ся неисчерпа́ема, целебную во́ду точа́щи,/ слепы́м бо ви́дети дае́т и глухим слы́шание,/ хромым хождение и всем сущим в неду́зех безме́здное исцеле́ние.

И ны́не и при́сно и во ве́ки веко́в. Ами́нь.

Неиспы́тана глубина́, недове́домо таинство, непостижи́м образ, Дево, зачатия Твоего,/ зачатия без Се́мене, без мужа рождество./ Безплотный воплоти́ся, Превечный младе́нствует,/ Сын Божий, Сын Тебе, Девы, бывает, Емуже вопие́м:/ Боже, благословен еси.

Песнь 8

Ирмос: О́троки благочестивыя в пещи́/ Рождество́ Богоро́дичо спасло́ есть,/ тогда у́бо образу́емое,/ ныне же де́йствуемое,/ вселе́нную всю воздвиза́ет пе́ти Тебе:/ Господа пойте дела/ и превозноси́те Его во вся веки.

Припев: Пресвята́я Богоро́дице, спаси́ на́с.

Ум Ангельский и человеческий ужаса́ется, Богородице,/ како Бога Небеснаго, ложесна́ми объе́мши, воплоти́ла еси,/ како, Младенца ро́ждали, яко Сына на руку́ но́сиши/ егоже ужаса́ется тварь и трепе́щут Горнии Престоли, вопию́ще непрестанно:/ Свят, Свят, Свят еси, Боже, препе́тый и превозносимый во веки.

Припев: Пресвята́я Богоро́дице, спаси́ на́с.

Радуйся, су́щая ра́досте всего мира,/ со Архангелом Гавриилом вопие́м Ти, Богородице;/ радуйся, вмести́лище Невмести́маго;/ радуйся, Благодатная, носи́ло Божества всего;/ радуйся, Ада́мово воззва́ние, с Тобою Господь, и Тебе ради с нами, спасая нас,/ егоже поем и превозно́сим во веки.

Сла́ва Отцу́ и Сы́ну и Свято́му Ду́ху.

Корень Иессеев освяще́нный, корень греха́ нашего исто́ргнула еси;/ жезл Ааронов процве́тший, Жизнодателя цвета израсти́вши Христа;/ ста́мно манноприе́мная, смерти всю силу сокруши́ла еси/ и в поро́ду жизни возвела́ еси род человеческий:/ темже Тя поем, добрых виновную.

И ны́не и при́сно и во ве́ки веко́в. Ами́нь.

Ты похвала́ христианом еси, Владычице,/ Ты оружие на враги и стена́ к Тебе прибега́ющим./ Тя и ныне на помощь призываем, Госпоже,/ не даждь враго́м вознести́ся на люди Твоя,/ иже Тебе не хва́лят, ни Сына Твоего, Богородице, и Твоей иконе не кла́няются:/ сих победи́ и ду́ши наша спаси.

Песнь 9

Ирмос: Всяк земноро́дный/ да взыгра́ется, Ду́хом просвеща́ем,/ да торжеству́ет же Безпло́тных умо́в естество́,/ почита́ющее священное торжество Богома́тере,/ и да вопиет: радуйся, Всеблаженная Богородице,/ Чистая Приснодево.

Припев: Пресвята́я Богоро́дице, спаси́ на́с.

Тебе, тве́рдую Помощницу ро́ду челове́ческому, Богородице Марие, лик пророческий многообра́зно провозвести́,/ сень святу́ю, Небе́с простра́ннейшую,/ скрижа́ль Богопи́санную и купину́ неопали́мую,/ дверь Богопрохо́дную, го́ру же и ле́ствицу, и мост, и жезл процве́тший:/ мы же воистину Богородицу Тя величаем.

Припев: Пресвята́я Богоро́дице, спаси́ на́с.

Тайна глубины́ Рождества Твоего ум Ангельский ужаса́ет, Дево,/ и пречи́стая икона де́моны прого́нит,/ и ли́ца нечести́вых омрача́ет, и в студ порева́ет:/ не терпя́т бо взира́ти на си́лу ея́, бе́гают же и исчеза́ют./ Мы же любезно покланя́емся и лобыза́ем, и Тя, Богородицу, величаем.

Сла́ва Отцу́ и Сы́ну и Свято́му Ду́ху.

Предста́тельница су́щи неотсту́пна к Вышнему Царю,/ яко иму́щи матерне дерзнове́ние непосты́дно,/ в мире глубо́це православных житие́ утверди́ и отечество наше возвы́си,/ и вся поле́зная да́руй всегда рабо́м Твоим,/ да Тя, Богородице, величаем.

И ны́не и при́сно и во ве́ки веко́в. Ами́нь.

О Всемилостивая христиа́ном Помощнице,/ не может Тя воспе́ти достойно ум человеческий и Ангельский,/ яко всея́ тва́ри честне́йши, Небе́сных и земны́х сла́внейши:/ всех бо родила́ еси Творца и Бога,/ но, о Владычице,/ приими́ ми́лостивно и́же Тебе от сердца возложи́хом песнь,/ спасай нас всегда, на Тя бо наде́емся.

Светилен

Да почти́тся Всепетая Мати Божия,/ Жизнь Су́щую ро́ждши, Христа Бога нашего,/ райских дверей отверзе́ние и всего мира очище́ние, к животу́ возведе́ние:/ Сей есть проро́ком глаго́лавый,/ Тому поклони́мся, Богу и Спасу душ наших.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богородичен: Прииди́те, ве́рнии, с чистото́ю возвели́чим Пречистыя Матере Бога нашего чу́дную икону/ и Божественнаго Младенца, Спаса Христа,/ егоже яко рождшая на руку́ носи́вши/ и ма́терне дерзновение к Нему иму́щи,/ непреста́нно мо́лит за ны и подае́т рабом Своим богатыя милости.